Lefa Leo le sa Hwetšagalego Gabonolo la Bokriste

KA GE GO ANEGA BLOSSOM BRANDT

Go be go e-wa lehlwa San Antonio, Texas, ka January 17, 1923 letšatši leo ke belegwego ka lona. Ka ntle go be go tonya, eupja ke ile ka amogelwa ka matsogong a borutho a batswadi ba lerato ba Bakriste, Judge le Helen Norris. Go tloga dilong tšeo ke sa di gopolago ge ke be ke sa le yo monyenyane, se sengwe le se sengwe seo batswadi ba-ka ba bego ba se dira se be se dikologile borapeding bja bona go Jehofa Modimo.

KA 1910 ge mma a be a e-na le nywaga e seswai, batswadi ba gagwe ba ile ba huduga kgaufsi le Pittsburgh, Pennsylvania, go ya polaseng ya ka ntle ga Alvin, Texas. Moo ba ile ba thabela go ithuta ditherešo tša Beibele go tšwa go moagišani. Mma o ile a fetša karolo e šetšego ya bophelo bja gagwe a tsoma go dira gore batho ba be le kgahlego kholofelong ya Mmušo. O ile a kolobetšwa ka 1912 ka morago ga ge lapa le hudugetše Houston, Texas.

Mma le batswadi ba gagwe ba ile ba gahlana la mathomo le Charles T. Russell, mopresidente wa pele wa Watch Tower Bible and Tract Society, ge a be a etetše phuthego ya bona kua Houston. Lapa gantši le be le amogela legaeng la bona baemedi ba basepedi ba Mokgatlo, bao ka nako yeo ba bego ba bitšwa basepedi ba bodumedi. Nywaga e sego kae ka morago, mma o ile a hudugela Chicago, Illinois le batswadi ba gagwe, gomme Ngwanabo rena Russell le yena o be a etela phuthego moo.

Ka 1918, koko o ile a swarwa ke Kwatama le gona ka baka la go mo fokodiša mmeleng, dingaka di ile tša eletša gore a dule tlelaemeteng e borutho. Ka ge rakgolo a be a šomela khamphani ya ditimela ya Pullman, ka 1919 o ile a hwetša lengwalo la go hudugela morago Texas ka mošomo. Gona moo, San Antonio, mma o ile a gahlana le setho se fišegago sa phuthego seo se bego se bitšwa Judge Norris. Ba ile ba kgahlegelana di sa tloga fase, gomme ge nako e dutše e e-ya ba nyalana, ke moka Judge a ba tate wa-ka.

Tate o Ithuta Therešo ya Beibele

Judge (moahlodi) o neilwe leina le leo le sa tlwaelegago ge a belegwa. Ge tatagwe a mmona la mathomo, o ile a re: “Ngwana yoo o na le seriti bjalo ka moahlodi,” gomme ya ba leina la gagwe. Ka 1917, ge tate a be a e-na le nywaga e 16 o ile a newa dipampišana Where Are the Dead? le What Is the Soul? tšeo di gatišitšwego ke Watch Tower Bible and Tract Society. Tatago tate o be a hwile nywaga e mebedi pele ga moo, gomme dipampišana tšeo di ile tša mo nea dikarabo tšeo a bego a di nyaka ka boemo bja bahu. Kapejana ka morago ga moo o ile a thoma go ba gona dibokeng tša Barutwana ba Beibele, bjalo ka ge Dihlatse tša Jehofa di be di tsebja bjalo nakong yeo.

Gatee-tee tate o ile a nyaka go tšea karolo medirong ya phuthego. O ile a hwetša tšhemo yeo a bego a ka bolela go yona, gomme ka morago ga sekolo o be a e-ya moo ka paesekele ya gagwe go yo phatlalatša dipampišana. O ile a nwelela ka mo go feletšego go abeng kholofelo ya Mmušo, gomme ka March 24, 1918, a bontšha boineelo bja gagwe go Jehofa ka go kolobetšwa meetseng.

Ngwageng o latetšego ge mma a hudugetše San Antonio, tate o ile a gogelwa ke seo a boletšego gore e be e le “go nywanywa mo go botse kudu-kudu le mahlo a matala-lerata kudu” ao a sa kago a a bona. Go se go ye kae ba ile ba dira gore go tsebege gore ba nyaka go nyalana, eupja ba ile ba swara bothata bja go ka dira gore batswadi ba mma ba dumele seo. Lega go le bjalo, ka April 15, 1921, go ile gwa ba le lenyalo. Bobedi bja bona ba be ba e-na le pakane ya bodiredi bja nako e tletšego.

Go Thoma e sa le ka Pela Bodireding

Ge mma le tate ba be ba le gare ba lokišetša go ya kopanong ya Cedar Point, Ohio, ka 1922, ba ile ba lemoga gore mma o be a le mmeleng. Kapejana ka morago ga go belegwa ga-ka, ge tate a be a-na le nywaga e 22 feela, o ile a kgethwa gore e be molaodi wa tirelo wa phuthego. Se se be se bolela gore o be a dira ditokišetšo ka moka tša tirelo ya tšhemo. Ka morago ga dibeke tše sego kae feela ke belegwe, mma o be a e-ya le nna modirong wa ntlo le ntlo. Ge e le gabotse, makgolo le rakgolo le bona ba be ba rata ge ke e-ba le bona bodireding.

Ge ke be ke e-na le nywaga e mebedi feela, batswadi ba-ka ba ile ba hudugela Dallas, Texas, gomme ba thoma bodiredi bja nako e tletšego bjalo ka babulamadibogo nywaga e meraro ka morago. Bošego ba be ba robala ka tentaneng hleng ga tsela gomme ba mpea ka madulong a ka morago a koloi. Go ba gona, ke be ke nagana gore se e be e le selo se se kgahlišago, eupja ka morago go ile gwa ba molaleng gore ba be ba tloga ba sešo ba itokišetša bophelo bja bobulamadibogo. Ka gona tate o ile a thoma kgwebo. Ge nako e dutše e e-ya, o ile a aga koloyana ya go rekišetša ka go itokišetša go thoma bobulamadibogo gape.

Pele ke thoma sekolo, mma o ile a nthuta go bala le go ngwala, gomme ke be ke tseba go atiša go fihla ka kgato ya bone. Nepo ya gagwe ka mehla e be e le go nthuša go kgona go ithuta. O be a nkemiša godimo ga setulo kgaufsi le yena e le gore ke phumule dibjana ge a dutše a di hlatswa gape o be a nthuta go swara mangwalo ka hlogo le go opela dikopelo tša Mmušo goba difela bjalo ka ge re be re di bitša bjalo mehleng yeo.

Go Hlankela Modimo le Batswadi Ba-ka

Ka 1931 ka moka ga rena re bile gona kopanong e kgahlišago kudu-kudu kua Columbus, Ohio, moo re ilego ra amogela leina Dihlatse tša Jehofa. Lege ke be ke e-na le nywaga e seswai feela, ke ile ka nagana gore e be e le leina le lebotse kudu-kudu leo nkilego ka le kwa. Kapejana ka morago ga ge re boetše gae, kgwebo ya tate e ile ya fsa lore-lore, gomme tate le mma ba tšea se e le “thato ya Morena” ya gore ba thome go bula madibogo gape. Ka gona, go thoma ka selemo sa 1932, re ile ra thabela nywaga e mentši bodireding bja nako e tletšego.

Batswadi ba-ka ba ile ba bula madibogo bogareng bja Texas e le gore ba tle ba dule kgaufsi le batswadi ba mma, bao ba bego ba sa le San Antonio. Go tloga kabelong e nngwe go ya go e nngwe go be go bolela gore ke feto-fetole dikolo gantši kudu. Ka dinako tše dingwe bagwera ba sa naganego ba be ba re: “Ke ka baka la’ng le sa dule fase felo gotee, gomme la ba le legae bakeng sa ngwana yoo wa lena,” bjalo ka ge eka ke be ke sa hlokomelwe ka tshwanelo. Eupja ke ile ka nagana gore bophelo bja rena e be e le bjo bo thabišago le gore ke be ke thuša tate le mma bodireding bja bona. Ge e le gabotse, ke be ke tlwaetšwa le go hlangwa bakeng sa seo ka morago e bego e tla ba mokgwa wa-ka wa bophelo.

Ka dikgwedi tše dintši ke be ke dutše ke botša tate le mma gore ke nyaka go kolobetšwa, le gona ba be ba bolela le nna gantši ka taba yeo. Ba be ba nyaka go kgodišega gore ke tseba kamoo phetho ya-ka e bego e le bohlokwa ka gona. Ka December 31, 1934, go ile gwa fihla letšatši bakeng sa tiragalo ye e kgolo bophelong bja-ka. Lega go le bjalo, bošego pele ga moo, tate o ile a kgonthišetša gore ke ile ka ya go Jehofa ka thapelo. Ke moka, o ile a dira selo se sebotse kudu. O ile a dira gore ka moka ga rena re khuname, gomme a rapela. O ile a botša Jehofa gore o be a thabile kudu ka phetho ya ngwanenyana wa gagwe o monyenyane ya go neela bophelo bja gagwe go Yena. O ka kgodišega gore nywaga ka moka yeo e tlago, nka se ke ka lebala ka bošego bjoo!

Tlwaetšo e Tšwago go Makgolo le Rakgolo

Magareng ga 1928 le 1938, ke feditše nako e ntši ke etela makgolo le rakgolo kua San Antonio. Mokgwa wa ka mehla ge ke be ke e-na le bona e be e le o swanago kudu le ge ke be ke e-na le batswadi ba-ka. Makgolo e kile ya ba mmapatši wa dipuku tša bodumedi, bjalo ka ge ba be ba bitša babulamadibogo bjalo, gomme ka morago ya ba mmulamadibogo wa nakwana. Rakgolo o ile a kgethwa bjalo ka mmulamadibogo ka December 1929, ka gona tirelo ya tšhemo ka mehla e be e le modiro wa letšatši le letšatši.

Bošego rakgolo o be a nkgokarela gomme a nthuta maina a dinaledi. O be a nthetela sereto ka hlogo. Ke ile ka tšea maeto a mantši le yena ka ditimela tša Pullman nakong ya ge a be a šoma ditimeleng. E be e le yoo ka mehla ke bego nka leba go yena ge ke be ke e-na le bothata; o be a nkhomotša le go mphumula meokgo. Eupja, ge ke be ke laiwa bakeng sa go se itshware gabotse gomme ke e-ya go tsoma khomotšo go yena, o be a tla fo bolela (mantšu ao ke bego ke sa a kwešiše nakong yeo, eupja modumo wa wona e le wo o kwagala gabotse): “Ngwana-ka, tsela ya mofoši e thata e le ruri.”

Nywaga ya Tlaišo

Ka 1939, Ntwa ya II ya Lefase e ile ya thoma gomme batho ba Jehofa ba ile ba kgotlelela tlaišo le bošoro bja sehlopha sa bahlola-mpherefere. Mafelelong a 1939, mma o ile a babja o šoro gomme mafelelong gwa nyakega gore a buiwe, ka gona re ile ra boela morago San Antonio.

Dihlopha tša bahlola-mpherefere di be di ipopa ge re be re dira mošomo wa dimakasine ditarateng tša San Antonio. Eupja beke e nngwe le e nngwe, re be re le fao re le lapa, o mongwe le o mongwe a le sekhutlong seo a se abetšwego. Gantši ke be ke lebelela ge ba iša tate seteišeneng sa maphodisa.

Tate o ile a leka go tšwela pele a bula madibogo gaešita lege mma a ile a swanelwa ke go kgaotša. Lega go le bjalo, o be a sa hwetše tšhelete e lekanego modirong wa nakwana ka gona le yena o ile a swanela go kgaotša. Ke feditše sekolo ka 1939, gomme le nna ka yo šoma.

Leina la tate la Judge (moahlodi) le ile la ipontšha e le leo le holago lebakeng la nywaga yeo. Ka mohlala, sehlopha sa bagwera se ile sa yo nea bohlatse ka toropong go yela ka kua leboa la San Antonio, gomme motseta wa kgoro o ile a thoma go ba tsenya kgolegong ka moka ga bona. O be a swere ba ka bago 35, go akaretša makgolo le rakgolo. Ba ile ba tsebiša tate, gomme o ile a tšea koloi a leba fao. O ile a ya ofising ya motseta wa kgoro gomme a re: “Ke nna Judge Norris go tšwa San Antonio.”

Motseta wa kgoro o ile a botšiša gore, “Ke a kwa Morena, Moahlodi, nka go direla’ng?”

Tate o ile a araba ka gore, “Ke tlile go tlo ntšha batho ba kgolegong.” Ka baka leo motseta wa kgoro o ile a ba dumelela ba lokollwa ka ntle ga peile—gomme ga se gwa ba le dipotšišo tše dingwe gape!

Tate o be a rata go bolela meagong ya diofisi ka gare ga toropo gomme kudu-kudu a rata go etela baahlodi le bo-ramolao. O be a botša moamogela-baeng gore: “Ke nna Judge Norris, gomme ke tlile go bona Moahlodi semang-mang.”

Ke moka, ge a gahlana le moahlodi, ka mehla o be a bolela ka gore: “Bjale, pele ke bolela ka morero wa ketelo ya-ka, ke rata go hlalosa gore ke bile Moahlodi nako e telele go go feta. Ke bile moahlodi bophelo bja-ka ka moka.” Ke moka a hlalose kamoo a hweditšego leina la gagwe ka gona. Se se ile sa ba matseno a bogwera, gomme o ile a hlagolela ditswalano tše dintši tša bogwera le baahlodi mehleng yeo.

Go Leboga Tlhahlo ya Batswadi

Ke be ke le nywageng yeo ya bofsa ya khuduego ya go tsena mahlalagading, gomme ke be ke tseba gore tate le mma ba be ba hupile lenala gantši ge ba be ba ntebeletše gomme ba ipotšiša seo ke tlago go se dira ka mo go latelago. Ka ge bana ka moka ba dira, ke be ke leka tate le mma ka makga a mantši, ke ba kgopela go dira selo se sengwe goba go ya felo go gongwe mo ke tsebago e sa le pele gore karabo ya bona e tla ba aowa. Ka dinako tše dingwe ke be ke lla. Ge e le gabotse, ke be ke tla nyama kudu ge nkabe ba be ba itše: “Tšwela pele, dira seo o se nyakago. Ga re na taba.”

Go tseba gore ke be nka se ba gapeletše go fetola ditekanyetšo tša bona go ile gwa mpha maikwelo a polokego. Ge e le gabotse, se se ile sa dira gore go be bonolo go nna ge bafsa ba bangwe ba be ba šišinya boithabišo bjo e sego bja bohlale, ka gobane ke be nka re: “Tate a ka se ke a ntumelela.” Ge ke be ke na le nywaga e 16, tate o ile a kgonthišetša gore ke ithuta go otlela le gore ke hwetša lengwalo la bootledi. Gape, ka yona nako ye o ile a mpha dinotlelo tša ntlo. Ke ile ka makatšwa ke gore o be a mpota. Ke ile ka ikwa ke godile, gomme se se ile sa mpha kgopolo ya go ba le boikarabelo le kganyogo ya go se senye kholofelo ya bona.

Mehleng yeo go be go se na keletšo e ntši yeo e bego e newa mabapi le lenyalo, eupja tate o be a tseba Beibele le seo e bego e se bolela mabapi le go nyala ‘fela Moreneng.’ (1 Ba-Korinthe 7:39) O ile a tloga a mpotša ka mo go kwagalago gore ge ke be nka tsoga ke tlišitše mošemane wa lefase ka gae, goba gaešita le go nagana go beana mabaka le yena, o be a tla nyama o šoro kudu. Ke be ke tseba gore o be a nepile, ka gobane ke be ke bone lethabo le botee lenyalong la bona ka ge ba be ba nyetše “Moreneng.”

Ka 1941, ge ke be ke e-na le nywaga e 18, ke ile ka nagana gore ke be ke ratana le lesogana le lengwe ka phuthegong. E be e le mmulamadibogo gomme a ithutela go ba ra-molao. Ke be ke thabile. Ge re be re botša batswadi ba-ka gore re be re nyaka go nyalana, go e na le go bontšha go gana goba go nyama, ba ile ba fo bolela gore: “Blossom, re rata go go kgopela selo se tee. Re bona gore le sa le ba banyenyane kudu, gomme re rata go le kgopela gore le eme ngwaga o tee. Ge e-ba ruri le tloga le ratana, ngwaga o tee o ka se dire phapano.”

Ke leboga kudu gore ke ile ka theetša keletšo ya bona e bohlale. Lebakeng la ngwaga, ke ile ka gola ka mo go itšego gomme ka thoma go bona gore lesogana le le be le se na dika tšeo di bego di tla nyakega bakeng sa molekane wa lenyalo yo a swanetšego. Mafelelong o ile a tlogela mokgatlo, gomme ke ile ka phonyokga seo nkabego e bile kotsi bophelong bja-ka. Ke mo go thabišago gakaakang go ba le batswadi ba bohlale bao kahlolo ya bona e ka botwago!

Lenyalo le Modiro wa Bosepedi

Maregeng a 1946, ka morago ga ge ke be ke feditše nywaga e tshelelago ke bula madibogo e bile ke šoma modiro wa nakwana, lesogana le lebotse kudu-kudu le ke bego ke sa ka ka gahlana le lona le ile la tsena ka Holong ya rena ya Mmušo. Gene Brandt o be a abetšwe bjalo ka modirišani wa mohlankedi wa banababo rena wa mosepedi, bjalo ka ge molebeledi wa tikologo a be a bitšwa bjalo mehleng yeo. E bile maikwelo a go kgahlegelana, gomme ka August 5, 1947, re ile ra nyalana.

Go se go ye kae, tate le Gene ba ile ba bula kgwebo ya go bala matlotlo. Eupja tate o ile a botša Gene gore: “Letšatši leo kgwebo ye e re paledišago go ya sebokeng goba kabelong ya pušo ya Modimo, ke tlo kgonya lemati la yona gomme ka lahlela dinotlelo kua kgole.” Jehofa o ile a šegofatša pono ye ya moya gomme kgwebo e ile ya re nea dinyakwa tša nama ka mo go lekanego le go re dumelela nako ya go bula madibogo. Tate le Gene e be e le bo-rakgwebo ba babotse, gomme re ka be re ile ra huma gabonolo, eupja se e be e se pakane ya bona le ka mohla.

Ka 1954, Gene o ile a laleletšwa modirong wa tikologo, e lego seo se ilego sa bolela phetogo e kgolo maphelong a rena. Batswadi ba-ka ba be ba tla itshwara bjang? Mo le gona ba be ba se ba tshwenyega kudu ka bona ka noši eupja ka dikgahlego tša Mmušo wa Modimo le ka boiketlo bja moya bja bana ba bona. Ga se ba ka ba re go rena: “Ke ka baka la’ng le sa re belegele ditlogolo?” Go e na le moo, ka mehla ba be ba re: “Ke eng seo re ka se dirago go le thuša tirelong ya nako e tletšego?”

Ka gona ge letšatši la rena la gore re tloge le fihla, go be go kwala mantšu a kgothatšo feela le a go thabela tokelo ya rena e kgolo. Ga se ba ka ba re dira gore re ikwe eka re be re ba lahla, eupja ka mehla ba be ba re nea thekgo e feletšego. Ka morago ga ge re sepetše, ba ile ba ipoloka ba swaregile modirong wa bobulamadibogo nywaga e mengwe e lesome. Tate o ile a kgethwa e le molebeledi wa motse wa San Antonio, e lego boemo bjoo a ilego a ba go bjona ka nywaga e 30. O ile a thabela go bona kgolo ya go tloga phuthegong e tee motseng ka bo-1920 go ya go tše 71 pele ga ge a e-hwa ka 1991.

Ge e le ka nna le Gene, bophelo bo be bo tletše ka lethabo. Re bile le lethabo le legolo la go hlankela banababo rena le dikgaetšedi dinageng tša ka godimo ga tše 31, gomme mohlomongwe e le yeo e di fetago ka moka, ke tokelo ya go ba gona sehlopheng sa bo-29 sa Sekolo sa Beibele sa Watchtower sa Gilead ka 1957. Ka morago ga moo re ile ra boela gape modirong wa bosepedi. Ka 1984, ka morago ga nywaga e 30 modirong wa tikologo le wa selete, Mokgatlo ka botho o ile wa nea Gene kabelo ya tikologo kua San Antonio, ka ge batswadi ba be ba le nywageng ya bona ya bo-80 gomme bophelo bja bona bo fokola.

Go Hlokomela Batswadi

E be e le ngwaga le seripa feela ka morago ga ge re be re boetše San Antonio moo mma a ilego a idibala gomme a hwa. Se se ile sa direga ka bjako kudu mo ke ilego ka se kgone go bolela dilo tše dingwe tšeo ke bego ke nyaka go mmotša tšona. Se se ile sa nthuta gore ke bolele kudu le tate. Ka morago ga nywaga e 65 ya lenyalo, o be a gopola mma kudu, eupja re be re hwetšagala bakeng sa go mo nea lerato le thekgo.

Mohlala wa tate wa bophelo bja gagwe ka moka wa go ba gona dibokeng tša Bokriste, wa go ithuta le wa tirelo o ile wa tšwela pele go ba go fihla lehung la gagwe. O be a rata go bala. Ka ge a be a swanetše go šala a le noši ge re be re ile tirelong, ke be ke re ge ke boa gae ke mmotšiše gore, “Na o be o lewa ke bodutu?” O be a swaregile kudu ka go bala le go ithuta, e bile kgopolo ya go lewa ke bodutu ga se ya ka ya mo tlela.

Go be go na le mokgwa o mongwe wa bophelo ka moka woo re bego re o kgomaretše. Ka mehla tate o be a phegelela gore lapa le je le le gotee, kudu-kudu nakong ya dijo tša sefihlolo, e lego nako yeo temana ya Mangwalo ya letšatši le letšatši e bego e hlahlobja. Le ka mohla ga se ka ka ka dumelelwa go tloga gae ntle le go dira bjalo. Ka dinako tše dingwe ke be ke fela ke re: “Eupja tate ke tlo šalela sekolong (goba mošomong).”

O be a re, “Ga se temana ya letšatši yeo e go šaledišago; ga se wa tsoga ka nako.” Ke be ke swanelwa ke go dula le go e theetša. O be a kgonthišetša gore mohlala wo o mobotse o ba gona go fihla matšatšing a gagwe a mafelelo a bophelo. Le ke lefa le lengwe leo a ntlogeletšego lona.

Tate o ile a dula a phafogile monaganong go fihla lehung. Seo se ilego sa dira gore go mo hlokomela go be bonolo e be e le gore o be a sa ke a sola-sola goba go belaela. Ee, ka dinako tše dingwe o be a bolela ka bolwetši bja gagwe bja marapo, eupja ke be ke mo gopotša gore seo a bego a tloga a e-na le sona e be e le “bo-Adama,” gomme o be a tshega. Ge nna le Gene re be re dutše hleng ga gagwe, tate o ile a ithobalela ka setu mesong ya November 30, 1991.

Ga bjale ke na le nywaga e fetago e 70 gomme ke sa dutše ke holega mohlaleng o mobotse wa batswadi ba-ka ba lerato ba Bakriste. Le gona ke thapelo ya-ka e tšwago pelong ya gore ke bontšhe tebogo ya-ka e tletšego bakeng sa lefa le ka go le diriša ka mo go swanetšego nywageng ka moka e tlago.—Psalme 71:17, 18.

[Seswantšho go letlakala 5]

Nna le mma

[Pictures on page 7]

1. Kopano ya pele yeo ke bilego go yona: San Marcos, Texas, September 1923

2. Kopano ya mafelelo yeo tate a bilego go yona: Fort Worth, Texas, June 1991 (tate ke yo a dutšego)

[Seswantšho go letlakala 9]

Gene le Blossom Brandt