“Modimo, Mphêtlêkê”

“Modimo, mphêtlêkê, O tsebê pelo ya-ka; . . . O nkišê tseleng e sa felexo.”—PSALME 139:23, 24.

1. Jehofa o dirišana bjang le bahlanka ba gagwe?

KA MOKA ga rena re nyaka motho yo a ka dirišanago le rena ka kwešišo, motho yoo a ka šetšago maemo a rena, motho yoo a thušago ge re palelwa, motho yoo a ka se re nyakego seo re sa kgonego go se dira. Jehofa Modimo o dirišana le batho ba gagwe ka tsela yeo. Psalme 103:14 e re: “Yêna ó tseba lebopô le re lexo ka lôna, xa a lebale xe re le lerole.” Le gona, Jesu Kriste yo a ekišago Tatagwe ka mo go phethagetšego, o fetiša taletšo ye e borutho: “Tlang xo Nna bohle ba Le lapišitšwexo, ba Le imêlwaxo; Nna ke tlo Le khutšiša. Le ithwešê yoko ya-ka [goba, “Tsenang ka tlase ga joko ya-ka le nna,” mongwalo wa ka tlase wa NW], Le rutwê ke Nna; xobane ke yo boló le wa pelo e kokobetšexo; ’me Le tlo hwetša khutšô ya meôya ya lena. Xobane yoko ya-ka xa e robe, morwalô wa-ka ké o bohwêfê.”—Mateo 11:28-30.

2. Bontšha phapano magareng ga pono ya Jehofa le ya batho mabapi le (a) Jesu Kriste le (b) balatedi ba Kriste.

² Pono ya Jehofa ka bahlanka ba gagwe gantši e fapana kudu le ya batho. O bona ditaba go tšwa boemong bjo bo fapanego gomme o šetša dibopego tšeo ba bangwe ba ka bago ba sa tsebe selo ka tšona. Ge Jesu Kriste a be a phela mo lefaseng “o be a nyaditšwe a lahlilwe ke batho.” Bao ba sa kago ba mo dumela bjalo ka Mesia ‘ga ba ka ba mo šetša selo.’ (Jesaya 53:3, PK; Luka 23:18-21) Lega go le bjalo, mahlong a Modimo e be e le “Morwa-moratwa [wa Modimo],” yoo Tatagwe a itšego go yena: “Ke kxahlwa ke Wene!” (Luka 3:22; 1 Petro 2:4) Gare ga balatedi ba Jesu Kriste go na le batho bao ba lebelelelwago fase ka baka la bodiidi bja go hloka dilo tše di bonagalago gomme ba kgotlelela tlaišo e ntši. Lega go le bjalo, mahlong a Jehofa le Morwa wa gagwe, batho ba bjalo ba ka ba ba humile. (Ba-Roma 8:35-39; Kutollo 2:9) Ke ka baka la’ng go e-na le dipono tše di sa swanego?

3. (a) Ke ka baka la’ng pono ya Jehofa ka batho gantši e fapana kudu le ya batho? (b) Ke ka baka lang go le bohlokwa kudu go rena go hlahloba mohuta wa motho yoo re lego yena ka gare?

³ Jeremia 11:20 (PK), e a araba: ‘Jehofa o leka dipshio.’ O bona seo re lego sona ka gare, gaešita le dibopego tša semelo sa rena tšeo di fihlegilego mahlong a ba bangwe. Tlhahlobong ya gagwe, o lebiša tlhokomelo kudu dikeng le maemong ao e lego a bohlokwa tswalanong e botse le yena, e lego tšeo di nago le mohola wa nako e telele kudu go rena. Go tseba ga rena seo go re bea pelo; le gona ke mo go dirago gore motho a nagane. Ka ge Jehofa a hlokomela seo re lego sona ka gare, gona go bohlokwa go rena go hlahloba seo re lego sona ka gare ge e ba re tla ipontšha re le mohuta wa batho bao a ba nyakago lefaseng la gagwe le lefsa. Lentšu la gagwe le re thuša go dira tlhahlobo yeo.—Ba-Hebere 4:12, 13.

Dikgopolo tša Jehofa di Bohlokwa Gakaakang!

4. (a) Ke’ng seo se ilego sa tutuetša mopsalme gore a bolele gore dikgopolo tša Modimo di be di le bohlokwa go yena? (b) Ke ka baka la’ng di swanetše go ba tša bohlokwa go rena?

⁴ Ka morago ga go naganišiša ka bophara le go tsenelela ga tsebo ya Modimo ya go tseba bahlanka ba gagwe, gotee le bokgoni bjo bo sa tlwaelegago bja Modimo bja go kgona go nea thušo lege e le efe yeo mo gongwe ba ka e nyakago, mopsalme Dafida o ngwadile gore: “Ka gona, go nna dikgopolo tša gago di bohlokwa gakaakang!” (Psalme 139:17a, NW) Dikgopolo tšeo, tše di utolotšwego Lentšung la gagwe le le ngwadilwego di feta kgole selo lege e le sefe seo se tšwago go batho, go sa šetšwe gore dikgopolo tša bona ke tše bohlale gakaaka’ng. (Jesaya 55:8, 9) Dikgopolo tša Modimo di re thuša go dula re hlokometše dilo tša bohlokwa e le ka kgonthe bophelong le go fišega tirelong ya gagwe. (Ba-Filipi 1:9-11) Di re thuša gore re lebelele ditaba ka tsela yeo Modimo a di lebelelago ka yona. Di re thuša go ipotegela, go dumela ka potego mohuta wa motho yoo ge e le gabotse re lego yena ka pelong. Na o ikemišeditše go dira seo?

5. (a) Lentšu la Modimo le re opeletša go diša eng “mo xo tšohle tše di dišwaxo”? (b) Pego ya Beibele mabapi le Kaine e ka re hola bjang? (c) Lege re se ka tlase ga Molao wa Moše, fela o re thuša bjang go kwešiša seo se kgahlago Jehofa?

⁵ Batho ba na le tshekamelo ya go lebiša tlhokomelo kudu ponagalong ya ka ntle, eupja Mangwalo a a re eletša: “Mo xo tšohle di dišwaxo, diša pelo y’axo.” (Diema 4:23) Beibele e re thuša go dira seo ka ditaelo gotee le mehlala. E re botša gore Kaine o ile a direla Modimo dihlabelo ka go ithola kgwara mola ka pelong ya gagwe a be a bedišwa ke kgalefo, gomme ka morago ya ba lehloyo la go hloya Abele ngwanabo. Le gona e re opeletša gore re se ke ra swana le yena. (Genesi 4:3-5; 1 Johane 3:11, 12) E bega taelo ya Molao wa Moše ya go kwa. Eupja e bile e gatelela gore taelo e kgolo kudu ya Molao e be e le gore bao ba rapelago Jehofa ba swanetše go mo rata ka pelo ya bona ka moka, monagano, moya le matla; e bile e bolela gore se se latelago ka bohlokwa e be le molao wa go rata magagabo bona bjalo ka ge ba ithata.—Doiteronomio 5:32, 33; Mareka 12:28-31.

6. Ge re diriša Diema 3:1, ke dipotšišo dife tšeo re swanetšego go ipotšiša tšona?

⁶ Go Diema 3:1, ga re opeletšwe feela go boloka ditaelo tša Modimo, eupja le go kgonthišetša gore go kwa ke pontšho ya seo se tlogago se le ka pelong ya rena. Re le motho ka o tee, re swanetše go ipotšiša, ‘Na se se bjalo ka go kwa ga-ka ditaelo tša Modimo?’ Ge e ba re lemoga gore ditabeng tše itšego selo seo se re tutuetšago goba tsela yeo re naganago ka yona e a fokola—go ba gona ga go na le o tee wa rena yoo a ka bolelago gore ga a na bosodi—gona re swanetše go ipotšiša, ‘Ke dira’ng go kaonefatša boemo bjoo?’—Diema 20:9; 1 Johane 1:8.

7. (a) Go nyatša ga Jesu Bafarisei go Mateo 15:3-9, go ka re thuša bjang tabeng ya go diša dipelo tša rena? (b) Ke maemo afe ao mo gongwe a ka nyakago gore re gate megato e tiilego bakeng sa go laya monagano wa rena le pelo?

⁷ Ge Bafarisei ba e lego ba-Juda ba be ba ikgakanya ka gore ba godiša Modimo mola ka boradia ba godiša mokgwa woo o tutuetšwago ke boithati, Jesu o ile a ba nyatša ka gore ke baikaketši gomme a bontšha gore borapedi bja bona e be e le bja lefeela. (Mateo 15:3-9) Le gona Jesu o ile a lemoša gore gore re kgahle Modimo yoo a bonago pelo, ga se mo go lekanego go phela bophelo bja go bonala re e-na le boitshwaro ka ntle, mola ka go rata go hwetša boipshino bja go kgotsofatša kganyogo re bile re nwelela ka go phegelela dikgopolong tšeo di gobogilego. Mo gongwe re ka swanelwa ke go gata megato e tiilego bakeng sa go laya menagano ya rena le pelo. (Diema 23:12; Mateo 5:27-29) Tayo e bjalo le yona e a nyakega ge e ba ka baka la modiro wa rena wa boiphedišo, dipakane tša rena tša thuto goba boithabišo bjo re bo kgethago, re fetoga baekiši ba lefase, re le dumelela le re hlama go ya ka ditekanyetšo tša lona. Anke le ka mohla re se lebale gore morutiwa Jakobo o šupa bao ba ipolelago gore ke ba Modimo, eupja e le bao ba ba nyakago go ba bagwera ba lefase gore ke ‘diotswa.’ Ka baka la’ng? Ka gobane “lefase ka moka le rapeletše matleng a yo mobe.”—Jakobo 4:4; 1 Johane 2:15-17; 5:19, NW.

8. Gore re holwe ka mo go tletšego ke dikgopolo tše bohlokwa tša Modimo, re swanetše go dira’ng?

⁸ E le gore re holwe ka botlalo ke dikgopolo tša Modimo ditabeng tše le go tše dingwe, re swanetše go beela ka thoko nako ya go di bala le go di kwa. Go feta moo, re swanetše go ithuta tšona, go bolela ka tšona le go naganišiša ka tšona. Babadi ba bantši ba Morokami ba ba gona ka mehla dibokeng tša phuthego tša Dihlatse tša Jehofa, moo Beibele e ahla-ahlwago. Ba reka nako ya bona dilong tše dingwe tšeo ba di phegelelago e le gore ba dire se. (Ba-Efeso 5:15-17) Le gona, seo ba boelwago ke sona se bohlokwa go feta kgole lehumo la dilo tše di bonagalago. Na ga se kamoo o ikwago ka gona?

9. Ke ka baka la’ng ba bangwe bao ba bago gona dibokeng tša Bokriste ba dira tšwelopele ka pela go feta ba bangwe?

⁹ Lega go le bjalo, ba bangwe bao ba bago gona dibokeng tše ba dira tšwelopelo moyeng ka bjako go feta ba bangwe. Ba diriša therešo ka mo go tletšego kudu maphelong a bona. Se se bakwa ke’ng? Gantši, lebaka le legolo ke go go ba ga bona mafolofolo go ithuteng ga motho ka noši. Ba lemoga gore ga re phele ka bogobe feela; dijo tša moya tša letšatši le letšatši di bohlokwa go fo swana le go ja dijo tša go fepa mmele ka mehla. (Mateo 4:4; Ba-Hebere 5:14) Ka gona, ba leka go diriša bonyenyane nako e itšego letšatši le letšatši ba bala Beibele goba dipuku tšeo di e hlalosago. Ba lokišeletša diboka tša phuthego, ba ithuta e sa le pele gomme ba bala mangwalo. Ga ba fo bala taba feela; ba naganišiša ka yona. Mokgwa wa bona wa go ithuta o akaretša le go naganišiša kudu ka mafelelo ao seo ba ithutago sona a swanetšego go ba le sona maphelong a bona ka noši. Ge ba dutše ba gola moyeng, ba thoma go ikwa go etša kamoo mopsalme a ikwelego ka gona, yo a ilego a ngwala gore: “Melaô ya xaxo ke e rata xakaka’ng! . . . Mabohlatse [“dikgopotšo,” NW] a xaxo ké dimakatšô.”—Psalme 1:1-3; 119:97, 129.

10. (a) Go nyaka nako e kaaka’ng go tšwela pele re ithuta Lentšu la Modimo gore re holege? (b) Mangwalo a bontšha bjang se?

¹⁰ Go sa šetšwe ge e ba re ithutile Lentšu la Modimo ka lebaka la ngwaga, nywaga e mehlano goba nywaga e 50, le ka mohla ga le fetoge selo feela seo se toutwago—e sego ge dikgopolo tša Modimo di le bohlokwa go rena. Go sa šetšwe gore o mongwe le o mongwe wa rena o ithutile Mangwalo gakaaka’ng, go na le go gontši mo re sa go tsebego. Dafida o itše: “Wene Modimo, di mpaletše ruri; ké tše ntši-ntši tše di sa balwexo. Xe nka re ke a di bala, di feta mohlaba [ka] xo ata.” Dikgopolo tša Modimo re ka se kgone go di bala. Ge re be re ka swanelwa ke go bala dikgopolo tša Modimo letšatši ka moka, gomme ra robala re dira bjalo, ge re tsoga mesong go be go tla ba go sa dutše go e-na le go gontši mo re ka naganago ka gona. Ka gona, Dafida o ngwadile gore: “Ge ke phafogile ke sa na le wena.” (Psalme 139:17, 18, PK) Go iša ka go sa felego, re tla ba le go gontši mo re tlago go ithuta gona mabapi le Jehofa le ditsela tša gagwe. Re ka se ke ra fihla moo re tsebago dilo tšohle.—Ba-Roma 11:33.

Go Hloya Seo Jehofa a se Hloilego

11. Ke ka baka la’ng go le bohlokwa go se tsebe feela dikgopolo tša Modimo, eupja go ba le maikwelo a swanago le a gagwe?

¹¹ Go ithuta ga rena Lentšu la Modimo ga se feela ka morero wa go tlatša hlogo ya rena ka ditherešo. Ge re dutše re le dumelela go nwelela ka dipelong tša rena, re bile re thoma go ba le maikwelo a swanago le a Modimo. Seo se bohlokwa gakaakang! Ge e ba re sa hlagolele maikwelo a bjalo, mafelelo e ka ba afe? Gaešita lege re ka kgona go boeletša seo Beibele e se bolelago, mo gongwe re ka ba re lebelela seo se iletšwago e le se se kganyogegago, goba mo gongwe re ka kwa seo se nyakegago e le morwalo o boima. Ke therešo gore gaešita lege re hloile se se fošagetšego, re ka swanelwa ke go katana ka baka la go se phethagale ga motho. (Ba-Roma 7:15) Eupja ge e ba re sa dire boiteko bja kgonthe bakeng sa go dumelelanya seo re lego sona ka gare le seo se lokilego, na re ka letela go kgahla Jehofa, yena “mofenyeki wa dipelo”?—Diema 17:3, NW.

12. Go rata seo Modimo a se ratago le go hloya seo Modimo a se hloilego go bohlokwa gakaaka’ng?

¹² Go hloya seo Modimo a se hloilego ke tšhireletšo e matla bobeng, go swana lege go rata seo Modimo a se ratago go dira gore go dira se se lokilego e be selo se se thabišago. (1 Johane 5:3) Mangwalo a re opeletša leboelela gore re hlagolele lerato gotee le lehloyo. “Hee lena ba-rata-Modimo, hlôyang bobe.” (Psalme 97:10) “Le bê ba ba hloilexo bobe, Le xomarêlê boló.” (Ba-Roma 12:9) Na re dira seo?

13. (a) Ke thapelo efe ya Dafida yeo e lego mabapi le go fedišwa ga ba babe yeo re dumelelanago le yona ka botlalo? (b) Bjalo ka ge go bontšhwa thapelong ya Dafida, ke bomang bao e bego e le ba kgopo bao a ilego a ba rapelela gore Modimo a ba fediše?

¹³ Jehofa o boletše ka mo go kwalago morero wa gagwe wa go fediša ba kgopo lefaseng le go tliša lefase le lefsa moo go loka go tlago go aga gona. (Psalme 37:10, 11; 2 Petro 3:13) Barati ba toko ba hlologetše gore nako yeo e tle. Ba dumelelana ka mo go feletšego le mopsalme Dafida, yo a rapetšego ka gore: “Modimo, O kabe O bolaya bakxôpô! Lena batho ba madi, ntloxêleng! Ke bôna-bao ba Xo bolêlaxo ka tše mpe; ba ikxodiša ka tša lefêla, é le manaba a xaxo.” (Psalme 139:19, 20) Dafida ka noši o be a se a hlologelwa go bolaya batho ba bjalo ba e lego ba kgopo. O rapeletše gore tefetšo e tle e e-tšwa seatleng sa Jehofa. (Doiteronomio 32:35; Ba-Hebere 10:30) Ba e be e se batho bao ba ilego ba fo kgopiša Dafida ka noši ka tsela e itšego. Ba be ba emetše Modimo gampe, ba diriša leina la gagwe ka tsela e sa swanelago. (Ekisodo 20:7) Ka go se botege, ba be ba ipolela gore ba a mo hlankela, eupja ba be ba diriša leina la gagwe go tšwetša pele maano a bona ka noši. Dafida o be a sa rate batho bao ba kgethilego go ba manaba a Modimo.

14. Na go na le batho ba kgopo bao ba ka thušwago? Ge e ba go le bjalo, gona ba ka thušwa bjang?

¹⁴ Go na le batho ba dimilione tše dikete bao ba sa tsebego Jehofa. Ba bangwe ka go hloka tsebo ba dira dilo tšeo Lentšu la Modimo le bontšhago gore ke tše mpe. Ge e ba ba phegelela tseleng ye, ba tla ba gare ga bao ba fedišwago nakong ya masetla-pelo a magolo. Lega go le bjalo, Jehofa ga a kgahlwe ke lehu la yo mobe, gomme le rena ga se ra swanela go kgahlwa ke lona. (Hesekiele 33:11) Ge nako e sa dutše e dumela, re leka go thuša batho ba bjalo go ithuta le go diriša ditsela tša Jehofa. Eupja go thwe’ng ge e ba batho ba bangwe ba bontšha lehloyo le le tseneletšego la go hloya Jehofa?

15. (a) Ke bafe bao mopsalme a bego a ba lebelela e le ‘manaba a kgonthe’? (b) Lehono re ka bontšha bjang gore re “hloile” bao ba hlanogelago Jehofa?

¹⁵ Mabapi le bona, mopsalme o itše: “Morêna, a nka se hlôye ba ba Xo hlôyaxo? A nka se hlaswe ba Xo tsoxêlaxo? Ke ba hloile kè xaketše, ké manaba a-ka [a kgonthe, NW].” (Psalme 139:21, 22) Ke ka gobane ba be ba hloile Jehofa kudu ge Dafida a ile a ba lebelela ka go ba hlaswa. Bahlanogi ba akaretšwa gare ga bao ba bontšhago lehloyo la bona go Jehofa ka go mo hlanogela. Bohlanogi gabotse-botse ke go rabela malebana le Jehofa. Bahlanogi ba bangwe ba bolela gore ba tseba Modimo e bile ba a mo hlankela, eupja ba gana dithuto goba dinyakwa tšeo di ngwadilwego ka Lentšung la gagwe. Ba bangwe ba bolela gore ba dumela Beibele, eupja ba gana mokgatlo wa Jehofa gomme ba leka ka matla go šitiša modiro wa wona. Ge ba kgetha bobe bjo bo bjalo ka boomo ka morago ga ge ba tsebile se se lokilego, ge e ba bobe bo ikepela kudu moo e bago karolo yeo e ka se aroganywego le semelo sa bona, gona Mokriste o swanetše go hloya (ka kgopolo ya Beibele ya lentšu leo) bao ba ikgokagantšego le bobe wa go se arogane le bjona. Bakriste ba therešo ba na le maikwelo a swanago le a Jehofa ka bahlanogi ba bjalo; ga ba fagahlele go tseba ka dikgopolo tša bohlanogi. Ka mo go fapanego, ba “hlaswa” bao ba itirilego manaba a Modimo, eupja ba tlogelela Jehofa gore a phethe tefetšo.—Jobo 13:16; Ba-Roma 12:19; 2 Johane 9, 10.

Ge Modimo a re Fetleka

16. (a) Ke ka baka la’ng Dafida a ile a nyaka gore Jehofa a mo fetleke? (b) Ke’ng seo se lego gona mabapi le pelo ya rena se re swanetšego go kgopela Modimo thušo gore re se lemoge?

¹⁶ Dafida o be a sa nyake go swana le bakgopo ka tsela lege e le efe. Batho ba bantši ba leka go fihla seo ba lego sona ka gare, eupja Dafida o ile a rapela ka boikokobetšo a re: “Modimo, mphêtlêkê, O tsebê pelo ya-ka; O ntekê O tsebê dikxopolô tša-ka. O mpônê xe nka ba wa tsela e mpe, O nkišê tseleng e sa felexo.” (Psalme 139:23, 24) Ge a bolela ka pelo ya gagwe, Dafida o be a sa šupe pelo ya nama. Ka go dumelelana le tlhaloso ya seswantšhetšo ya polelwana yeo, o be a šupa go seo a bego a le sona ka gare, e lego motho wa ka gare. Le rena re swanetše go nyaka gore Modimo a fetleke dipelo tša rena gomme a bone ge e ba re e-na le dikganyogo lege e le dife, maikwelo, merero, dikgopolo goba ditutuetšo tše sa lokago. (Psalme 26:2) Jehofa o a re laletša: “Ngwan’a-ka! Nneêlê pelo y’axo; ’me mahlô ’axo a a kxahlwê ke ditsela tša-ka.”—Diema 23:26.

17. (a) Go e na le go fihla dikgopolo tša rena tše di hlokišago khutšo, re swanetše go dira’ng? (b) Na re swanetše go makatšwa ke ge re hwetša ditshekamelo tše di fošagetšego ka dipelong tša rena, gomme re swanetše go dira’ng ka tšona?

¹⁷ Ge e ba ka go rena go e-na le dikgopolo lege e le dife tše di kwešago bohloko, tše di hlokišago khutšo tše di iphihlilego ka go rena ka baka la dikganyogo tše di fošagetšego goba ditutuetšo tše di fošagetšego goba ka baka la boitshwaro bja rena bjo bo fošagetšego, gona ruri re nyaka gore Jehofa a re thuše go lokiša taba. Go e na le go diriša mantšu a rego “tsela e mpe,” phetolelo ya Moffatt e diriša “tsela e fošagetšego”; The New English Bible e re: “Tsela lege e le efe e nyamišago wena [ke gore Modimo].” Rena ka noši re ka ba re sa kwešiše gabotse dikgopolo tša rena tše di re hlokišago khutšo, ka go rialo re sa kgone go botša Modimo bothata bja rena, eupja o kwešiša boemo bja rena. (Ba-Roma 8:26, 27) Ga se gwa swanela go re makatša ge e ba go e na le ditshekamelo tše mpe ka pelong ya rena; lega go bjalo, ga se ra swanela go di lokafatša. (Genesi 8:21) Re swanetše go tsoma thušo ya Modimo bakeng sa go di tumola ka medu. Ge e ba re tloga re rata Jehofa le ditsela tša gagwe, re ka ya go yena re nyaka thušo e bjalo re kgodišegile gore “[Modimo] ó feta dipelo tša rena, ’me o tseba tšohle.”—1 Johane 3:19-21.

18. (a) Jehofa o re hlahla bjang tseleng ya ka mo go sa felego? (b) Ge e ba re tšwela pele re latela tlhahlo ya Jehofa, ke theto efe e borutho yeo re ka letelago go e hwetša?

¹⁸ Ka go dumelelana le thapelo ya mopsalme ya gore Jehofa o be a tla mo iša tseleng e sa felego, Jehofa ruri o hlahla bahlanka ba gagwe ba ikokobeditšego, ba ba kwago. Ga a ba hlahle feela tseleng yeo e ka bolelago bophelo bjo botelele ka gobane ba sa fedišwe pele ga nako ka baka la go dira bobe, eupja ka kgopolo ya gore tsela yeo iša bophelong bjo bo sa felego. O gatelela go rena go nyaka ga rena mohola wa go lebalela sebe wa sehlabelo sa Jesu. Ka Lentšu la gagwe le mokgatlo wa gagwe, o re nea thuto e bohlokwa e le gore re kgone go dira thato ya gagwe. O gatelela go rena bohlokwa bja go arabela thušong ya gagwe e le gore ka gare re fetoge mohuta wa motho yoo re ipolelago gore re yena ka ntle. (Psalme 86:11) O re kgothatša ka tebelelo ya bophelo bjo bobotse bja mmele lefaseng le lefsa la go loka, gotee le bophelo bjo bo sa felego bakeng sa go bo dirišetša go hlankela yena, e lego Modimo a nnoši wa therešo. Ge e ba re tšwela pele ka go arabela ka potego tlhahlong ya gagwe, gona ge e le gabotse, o tla re botša go etša ge a boletše go Morwa wa gagwe, a re: “Ke kxahlwa ke Wene!”—Luka 3:22; Johane 6:27; Jakobo 1:12.

Tlhaloso ya Gago ke Efe?

◻ Ke ka baka la’ng pono ya Jehofa ka bahlanka ba gagwe gantši e fapana le ya batho?

◻ Ke’ng seo se ka re thušago go lemoga seo Modimo a se bonago ge a hlahloba pelo ya rena?

◻ Ke thuto ya mohuta ofe yeo e re thušago go ithuta ditherešo le go diša pelo ya rena?

◻ Ke ka baka la’ng go le bohlokwa go se tsebe feela seo Modimo a se bolelago eupja go ba le maikwelo a swanago le a gagwe?

◻ Ke ka baka la’ng rena ka noši re swanetše go rapela ka gore: “Modimo, mphêtlêkê, O tsebê pelo ya-ka”?

[Seswantšho go letlakala 16]

Ge o ithuta, katanela go dira gore dikgopolo tša Modimo le maikwelo e be tša gago

[Seswantšho go letlakala 18]

Dikgopolo tša Jehofa “di feta mohlaba [ka] xo ata”

[Credit Line]

Pictorial Archive (Near Eastern History) Est.