Tema Yeo e Kgathwago ke Moya o Mokgethwa go Phethagatšweng ga Morero wa Jehofa

“Lentšu la-ka le le tšwaxo molomong wa-ka . . . le tlo phêtha se ke le rometšexo sôna.”—JES. 55:11.

1. Bontšha phapano magareng ga leano le morero.

AKANYA ka banna ba babedi bao yo mongwe le yo mongwe wa bona a itokišeletšago go tšea leeto ka koloi. Yo mongwe o lebeletše mmapa wo o bontšhago ka go lebanya mo a yago gona. Yo mongwe o tseba tsela ya moo a yago gona, eupša go na le ditsela tše dintši tšeo a di tsebago tša gore a fihle mo a yago gona. O itokišeleditše go fetoša tsela yeo a sepelago go yona ge go nyakega e le gore a kgone go swaragana le maemo le ge e le afe. Dikarolong tše dingwe, mekgwa yeo e šomišwago ke banna ba ba babedi e bontšha phapano yeo e lego gona magareng ga leano le morero. Leano le ka swantšhwa le go lebelela mmapa wo o bontšhago ditsela tša go fapa-fapana, mola morero o ka akaretša go dula o naganne ka pakane eupša o sa tshwenyega gakaalo ka gore o tla e fihlelela bjang.

2, 3. (a) Morero wa Jehofa o akaretša’ng gomme o ile a swaragana bjang le boemo bjo bo ilego bja tšwelela ge Adama le Efa ba be ba dira sebe? (b) Ke ka baka la’ng re swanetše go phafogela go phethagala ga morero wa Jehofa?

² Tabeng ya go phethagatša thato ya gagwe, Jehofa ga se a loga leano le le sa fetogego eupša o na le morero wo o tla phethagalago. (Baef. 3:11) Morero wo o akaretša seo a se rerilego go tloga mathomong bakeng sa batho le lefase—gore lefase le fetošwe legae la paradeise moo batho bao ba phethagetšego ba ka phelago gona ka khutšo le ka lethabo ka mo go sa felego. (Gen. 1:28) Ge Adama le Efa ba be ba dira sebe, Jehofa o ile a swaragana le boemo bjoo gomme a dira dithulaganyo tša go kgonthišetša gore morero wa gagwe o tla phethagala. (Bala Genesi 3:15.) Jehofa o ile a dira phetho ya gore mosadi wa gagwe wa seswantšhetšo o tla tšweletša “peu,” goba Morwa, yoo mafelelong a bego a tla fediša moferekanyi e lego Sathane, le go fediša tshenyo ka moka yeo a e bakilego.—Baheb. 2:14; 1 Joh. 3:8.

³ Ga go na selo le ge e le sefe legodimong goba lefaseng seo se ka thibelago gore morero wo Modimo a boletšego ka wona o phethagale. (Jes. 46:9-11) Ke ka baka la’ng re rialo? Ka gobane go akaretšwa moya o mokgethwa wa Jehofa. Matla a ao a sa fenyegego a kgonthišetša gore morero wa Modimo ‘o tla phethega.’ (Jes. 55:10, 11) Re swanetše go dula re phafogetše ka botlalo go phethagala ga morero wa Modimo. Ditebelelo tša rena tša nakong e tlago di ithekgile ka go phethagala ga wona. Go oketša moo, go matlafatša tumelo go bona tsela yeo ka yona Jehofa a dirišago moya wa gagwe o mokgethwa. Ka gona, anke re hlahlobeng tema yeo e kgathwago ke moya—nakong e fetilego, gona bjale le nakong e tlago—go phethagatšweng ga morero wa Jehofa.

Tema Yeo e Kgathilwego ke Moya o Mokgethwa Nakong e Fetilego

4. Jehofa o ile a utolla bjang morero wa gagwe ganyenyane-ganyenyane?

⁴ Mehleng ya Beibele, Jehofa o ile a utolla morero wa gagwe ganyenyane-ganyenyane. Mathomong, Peu e holofeditšwego e be e le ‘sephiri se sekgethwa.’ (1 Bakor. 2:7) Jehofa o boletše gape ka peu nywageng e 2000 ka morago. (Bala Genesi 12:7; 22:15-18.) Jehofa o ile a katološa kholofetšo ye go Aborahama. Mantšu ao a rego “ka peu ya xaxo” e be e le pontšho e kwagalago ya gore Peu e be e tla tla e le motho, setlogolo sa Aborahama. Re ka kgonthišega gore Sathane o be a lebeletše ka kgahlego e kgolo ge ditaba tše di be di utollwa. Ga go pelaelo gore Lenaba leo le be le nyaka go senya leloko la ditlogolo tša Aborahama gomme le hlakahlakanye morero wa Modimo. Eupša seo se be se ka se kgonege, ka gobane moya wa Modimo wo o sa bonagalego o be o šoma. Ka ditsela dife?

5, 6. Jehofa o dirišitše moya wa gagwe bjang bakeng sa go šireletša batho ba moloko wo o bego o tla tšweletša Peu?

⁵ Jehofa o dirišitše moya wa gagwe go šireletša moloko wo o bego o tla tšweletša Peu. Jehofa o boditše Aborama (Aborahama) gore: “Kôtsê ya xaxo ké Nna.” (Gen. 15:1) Mantšu ao e be e se go fo ipolelela. Ka mohlala, ela hloko seo se diregilego mo e ka bago ka 1919 B.C.E. ge Aborahama le Sara ba be ba dula kua Gerara ka lebakanyana. Ka ge Abimeleke, kgoši ya Gerara, a be a sa tsebe gore Sara ke mosadi wa Aborahama, o ile a tšea Sara ka maikemišetšo a go mo dira mosadi wa gagwe. Na Sathane o be a logile leano la go senya ditaba ka tsela e sa lemogegego, ka maiteko a go thibela Sara gore a se ke a belega peu ya Aborahama? Beibele ga e re botše. Seo e re botšago sona ke gore Jehofa o ile a tsena ditaba gare. O ile a lemoša Abimeleke torong gore a se ke a kgoma Sara.—Gen. 20:1-18.

⁶ E be e se ka lekga leo feela moo Jehofa a ilego a ba šireletša. Jehofa o ile a phološa Aborahama le ditho tša lapa la gagwe ka makga a mantši. (Gen. 12:14-20; 14:13-20; 26:26-29) Ke ka baka leo mopsalme a bego a ka bolela ka Aborahama le ditlogolo tša gagwe gore: “[Jehofa] Xa se a lesa motho a ba pateletša, a bá a kxalema le dikxoši ka ’baka la bôná. A re: Batlotšwa ba-ka bá, Le se kê la ba dira selô; Baporofeta ba-ka Le se kê la ba hlokofatša.”—Ps. 105:14, 15.

7. Jehofa o ile a šireletša setšhaba sa Isiraele ka ditsela dife?

⁷ Jehofa ka moya wa gagwe o ile a šireletša setšhaba sa Isiraele ya bogologolo, seo Peu e holofeditšwego e bego e tla belegelwa go sona. Jehofa ka moya wa gagwe o neile Baisiraele Molao wo o bego o šireletša borapedi bja therešo le go šireletša Bajuda tšhilafalong ya moya, ya boitshwaro le ya mmele. (Ek. 31:18; 2 Bakor. 3:3) Mehleng ya Baahlodi, moya wa Jehofa o ile wa matlafatša banna ba bangwe gore ba phološe Baisiraele manabeng a bona. (Baa. 3:9, 10) Nywaga-kgolong yeo e bego e lebiša go belegweng ga Jesu, yena karolo e kgolo ya peu ya Aborahama, moya o mokgethwa o swanetše go ba o ile wa akaretšwa go šireletšeng Jerusalema, Betlelehema le tempele—tšeo ka moka di bego di tla kgatha tema go phethagatšweng ga boporofeta bja mabapi le Jesu.

8. Ke’ng seo se bontšhago gore moya o mokgethwa o be o akaretšwa ka go lebanya bophelong le bodireding bja Morwa wa Modimo?

⁸ Moya o mokgethwa o be o akaretšwa ka go lebanya bophelong le bodireding bja Jesu. Moya o mokgethwa wo o bego o šoma ka popelong ya kgarebe Maria, o ile wa fihlelela selo se sengwe seo se sa kago sa direga. O ile wa dira gore mosadi yo a sa phethagalago a ime le go belega Morwa yo a phethagetšego, yo ge e le gabotse a bego a sa ahlolelwa lehu. (Luka 1:26-31, 34, 35) Ka morago, moya wo o ile wa šireletša Jesu wa lesea gore a se ke a hwa go sa letelwa. (Mat. 2:7, 8, 12, 13) Ge Jesu a be a e-na le nywaga e ka bago e 30, Modimo o ile a mo tlotša ka moya o mokgethwa, a mo kgetha go ba mojabohwa sedulong sa bogoši sa Dafida le go mo roma gore a ye go dira boboledi. (Luka 1:32, 33; 4:16-21) Moya o mokgethwa o ile wa matlafatša Jesu gore a dire mehlolo, go akaretša le go fodiša balwetši, go fepa mašaba le go tsoša bahu. Ditiro tše bjalo tše matla e be e le mohlala wa seo re ka se letelago ka tlase ga pušo ya Jesu.

9, 10. (a) Moya o mokgethwa o ile wa bonagala bjang go barutiwa ba Jesu ba lekgolong la pele la nywaga? (b) Ke tšwelopele efe yeo e ilego ya utollwa lekgolong la pele la nywaga C.E. mabapi le go phethagatšwa ga morero wa Jehofa?

⁹ Go thoma ka Pentekoste ya 33 C.E., Jehofa o dirišitše moya wa gagwe go kgetha karolo ya bobedi ya peu ya Aborahama, yeo bontši bja ditho tša yona e bego e se ditlogolo tša Aborahama. (Baroma 8:15-17; Bagal. 3:29) Moya o mokgethwa o ile wa bonagala o le go barutiwa ba Jesu ba lekgolong la pele la nywaga, wa ba thuša go dira boboledi ka mafolofolo le go ba matlafaletša go dira mediro e matla. (Dit. 1:8; 2:1-4; 1 Bakor. 12:7-11) Ka dimpho tšeo tša mohlolo, moya o mokgethwa o ile wa utolla tšwelopele e makatšago go phethagatšweng ga morero wa Jehofa. Jehofa o be a se sa hlwa a diriša thulaganyo ya nywaga-kgolong e fetilego ya gore borapedi bo thewe tempeleng kua Jerusalema. O be a šetše a thomile go kgahlegela phuthego ya Bokriste yeo e bego e sa tšwa go hlongwa. Ga e sa le go tloga ka nako yeo, Jehofa o be a dutše a diriša phuthego yeo ya batlotšwa bakeng sa go phethagatša morero wa gagwe.

¹⁰ Go šireletša, go matlafatša, go tlotša—tše e fo ba tše dingwe tša ditsela tše mmalwa tšeo ka tšona Jehofa a dirišitšego moya o mokgethwa mehleng ya Beibele bakeng sa go dira gore morero wa gagwe o tšwele pele go fihlela o phethega. Eupša go thwe’ng ka mehla ya rena? Jehofa o diriša moya wa gagwe bjang gona bjale bakeng sa go thekga morero wa gagwe? Re nyaka go tseba, ka gobane re nyaka go dirišana le moya. Ka gona, anke re hlahlobeng ditsela tše nne tšeo ka tšona Jehofa a dirišago moya wa gagwe gona bjale.

Tema Yeo e Kgathwago ke Moya o Mokgethwa Gona Bjale

11. Ke’ng seo se bontšhago gore moya o mokgethwa o tutuetša batho ba Modimo gore ba hlweke, gona o ka bontšha bjang gore o dirišana le moya wo?

¹¹ Sa pele, moya o mokgethwa ke wona o dirago gore batho ba Modimo e be bao ba hlwekilego. Bao ba tšeago karolo morerong wa Jehofa ba swanetše go hlweka boitshwarong. (Bala 1 Bakorinthe 6:9-11.) Ba bangwe bao ga bjale e bago Bakriste ba therešo ba kile ba tšea karolo mekgweng e bjalo ka bootswa, bohlotlolo le bosodoma. Dikganyogo tšeo di tšweletšago ditiro tše mpe di ka ba di tsemile medu. (Jak. 1:14, 15) Lega go le bjalo, batho ba bjalo ba “hlatswitšwe [ba] hlweka,” e lego seo se bontšhago gore ba dirile diphetogo tše di nyakegago maphelong a bona gore ba thabiše Modimo. Ke’ng seo se thušago motho yo a ratago Modimo gore a atlege go fenyeng tutuetšo ya go dira dilo ka go dumelelana le dikganyogo tše mpe? Bakorinthe ba Pele 6:11 e re, “Ka moya wa Modimo wa rena.” Ge o dula o hlwekile boitshwarong, o bontšha gore o dumelela moya woo o tutuetša bophelo bja gago.

12. (a) Go ya ka pono ya Hesekiele, Jehofa o hlahla mokgatlo wa gagwe bjang? (b) O ka bontšha bjang gore o dirišana le moya?

¹² Sa bobedi, Jehofa o diriša moya wa gagwe go hlahla mokgatlo wa gagwe gore a o lebiše mo a nyakago gore o ye gona. Ponong ya Hesekiele, go bolelwa ka karolo ya legodimong ya mokgatlo wa Jehofa e le madira a legodimong ao a sa fenyegego ao a phethagatšago morero wa Jehofa. Ke’ng seo se tutuetšago madira a gore a lebe thoko e itšego? Ke moya o mokgethwa. (Hesek. 1:20, 21) A re gopoleng gore mokgatlo wa Jehofa o bopilwe ka dikarolo tše pedi, ya legodimong le ya lefaseng. Ge e ba karolo ya legodimong e hlahlwa ke moya o mokgethwa, le karolo ya lefaseng e swanetše go ba e hlahlwa ke wona. Ka go kwa le go botegela tlhahlo yeo e hwetšwago karolong ya lefaseng ya mokgatlo wa Modimo, o bontšha gore o sepedišana le madira a Jehofa a legodimong e bile o dirišana le moya wa gagwe o mokgethwa.—Baheb. 13:17.

13, 14. (a) “Moloko wo” wo Jesu a boletšego ka wona o bopša ke bomang? (b) Nea mohlala wo o bontšhago gore moya o mokgethwa o re thuša go kwešiša ditherešo tša Beibele. (Bona lepokisi le le rego “Na o Sepedišana le Seetša se se Oketšegago?”)

¹³ Sa boraro, moya o mokgethwa o re thuša go kwešiša ditherešo tša Beibele. (Die. 4:18) Ke kgale “mohlanka yo a botegago le wa temogo” a diriša makasine wo e le mokero wa go oketša seetša ganyenyane-ganyenyane. (Mat. 24:45) Ka mohlala, ela hloko kwešišo yeo re nago le yona ka “moloko wo” woo Jesu a boletšego ka wona. (Bala Mateo 24:32-34.) Jesu o be a bolela ka moloko ofe? Sehlogo se se rego “Go ba Gona ga Kriste—Go Bolela’ng go Wena?” se hlalositše gore Jesu o be a sa bolele ka bakgopo, eupša o be a bolela ka barutiwa ba gagwe bao kgaufsinyane ba bego ba tla tlotšwa ka moya o mokgethwa.a Balatedi ba Jesu bao ba tloditšwego, ba lekgolong la pele la nywaga le ba mehleng ya rena, e be e tla ba bona bao ba bego ba tla bona pontšho le go lemoga seo e se bolelago—gore Jesu “o kgaufsi mejakong.”

¹⁴ Tlhaloso ye e bolela’ng go rena? Gaešita le ge re ka se kgone go lekanya gore “moloko wo” o tla tšea lebaka le lekaaka’ng, re swanetše go gopola dilo tše mmalwa mabapi le lentšu “moloko”: Gantši le šupa bathong ba nywaga e sa swanego bao ba phelago ka dinako tše di fetanago; ga se nako e telele ka mo go feteletšego; e bile e na le mo e felelago gona. (Ek. 1:6) Ka gona, re swanetše go kwešiša bjang mantšu a Jesu ao a rego “moloko wo”? Go bonagala a be a bolela gore batlotšwa bao ba bego ba le gona ge pontšho e thoma go bonagala ka 1914 ba be ba tla fetana ka nywaga le batlotšwa ba bangwe bao ba bego ba tla bona mathomo a masetlapelo a magolo. Moloko woo o bile le mathomo e bile ka kgonthe o tla ba le mafelelo. Phethagatšo ya dikarolo tše di fapa-fapanego tša pontšho e bontšha gabotse gore masetlapelo a kgaufsi. Ka go dula o lemoga gore nako e ile gomme wa dula o phakgame, o bontšha gore o sepedišana le seetša seo se tšwelago pele se bonega gomme o latela tlhahlo ya moya o mokgethwa.—Mar. 13:37.

15. Ke’ng seo se bontšhago gore re matlafatšwa ke moya o mokgethwa gore re kgone go tsebatša ditaba tše dibotse?

¹⁵ Sa bone, moya o mokgethwa o re matlafaletša go tsebatša ditaba tše dibotse. (Dit. 1:8) Ke’ng se sengwe seo se ka hlalosago kamoo ditaba tše dibotse di boletšwego ka gona lefaseng ka bophara? Nagana ka se. O ka ba o le yo mongwe wa batho bao mohlomongwe ka baka la go ba le dihlong kudu goba poifo o kilego wa nagana gore, ‘Nka se tsoge ke dirile boboledi ka ntlo le ntlo!’ Lega go le bjalo, ga bjale o tšea karolo ka mafolofolo modirong woo.b Bontši bja Dihlatse tše di botegago tša Jehofa di tšwetše pele di dira boboledi ge di lebeletšane le kganetšo goba tlaišo. Ke feela moya o mokgethwa wa Modimo wo o ka re matlafatšago gore re kgone go fenya mapheko ao a boifišago le go dira dilo tšeo re bego re ka se kgone go di dira ka matla a rena. (Mika 3:8; Mat. 17:20) Ka go tšea karolo ka botlalo modirong wa boboledi, o bontšha gore o dirišana le moya woo.

Tema Yeo e tla Kgathwago ke Moya o Mokgethwa Nakong e Tlago

16. Ke ka baka la’ng re ka kgodišega gore Jehofa o tla šireletša batho ba gagwe nakong ya masetlapelo a magolo?

¹⁶ Nakong e tlago, Jehofa o tla diriša moya wa gagwe o mokgethwa ka ditsela tše di makatšago kudu bakeng sa go phethagatša morero wa gagwe. Sa pele, ela hloko taba ya tšhireletšo. Bjalo ka ge re bone, Jehofa o dirišitše moya wa gagwe nakong e fetilego bakeng sa go šireletša yo mongwe le yo mongwe wa batho ba gagwe gotee le setšhaba sa Isiraele ka moka. Ka baka leo, re na le mabaka a kwagalago a go dumela gore o tla diriša moya wona woo o matla bakeng sa go šireletša batho ba gagwe nakong ya masetlapelo a magolo ao a tlago. Ga se ra swanela go hlwa re tshwenyega ka gore ge e le gabotse Jehofa o tla re hlokomela bjang ka nako yeo. Go e na le moo, re ka lebelela bokamosong ka kholofelo, re tseba gore Jehofa o tla dula a hlokomela bao a ba ratago e bile ba tla hwetša moya wa gagwe o mokgethwa.—2 Kor. 16:9; Ps. 139:7-12.

17. Ke bjang Jehofa a tlago go diriša moya wa gagwe o mokgethwa lefaseng le lefsa?

¹⁷ Ke bjang Jehofa a tlago go diriša moya wa gagwe o mokgethwa lefaseng le lefsa le le tlago? Ka nako yeo, moya woo o tla tutuetša go bulwa ga mangwalo a go phuthwa. (Kut. 20:12) Mangwalo ao a tla ba a hupere’ng? Go molaleng gore a tla ba a hupere ka go lebanya dilo tšeo Jehofa a tla di nyakago go rena nakong ya nywaga e sekete. Na o fagahletše go hlahloba dikagare tša mangwalo ao a go phuthwa? Re letetše lefase leo le lefsa ka tetelo-kgolo. Ga re kgone go nagana kamoo go tla bago go le ka gona go phela nakong yeo e šegofaditšwego, ge Jehofa a tla be a diriša moya wa gagwe o mokgethwa go phethagatša morero wa gagwe lefaseng le bathong bao ba tla bago ba dula go lona.

18. Ke’ng seo o ikemišeditšego sona ka go tia?

¹⁸ Anke re se keng ra lebala gore ruri go phethagala ga morero wa Jehofa go tla atlega, ka gobane o diriša moya wa gagwe o mokgethwa—matla a magolo kudu legohleng—gore a o phethagatše. Le wena o a akaretšwa morerong woo. Ka baka leo, ikemišetše ka go tia gore o kgopele Jehofa moya wa gagwe gomme o šome ka go dumelelana le tlhahlo ya wona. (Luka 11:13) Ka go rialo o ka ba le tebelelo ya go phela kamoo Jehofa a bego a reretše batho go phela ka gona—ka mo go sa felego lefaseng la Paradeise.

[Mengwalo ya tlase]

Na o a Gopola?

• Mehleng ya Beibele, Jehofa o dirišitše moya wa gagwe o mokgethwa bjang bakeng sa go dira gore morero wa gagwe o tšwele pele?

• Jehofa o diriša moya wa gagwe bjang gona bjale?

• Jehofa o tla diriša moya wa gagwe bjang nakong e tlago gore a phethagatše morero wa gagwe?

[Lepokisi go letlakala 10]

Na o Sepedišana le Seetša se se Oketšegago?

Jehofa o tšwela pele a bonegela batho ba gagwe ka seetša. Tše dingwe tša ditlhathollo tše difsa tšeo di gatišitšwego ka go Morokami ke dife?

▪ Seswantšho sa Jesu sa mabapi le komelo se hlalosa thuto efe e botse mabapi le kgolo ya moya? (Mat. 13:33)—July 15, 2008, matlakala 19-20.

▪ Go kgetha ga Bakriste gore ba be le kholofelo ya go phela legodimong go fela neng?—May 1, 2007, matlakala 30-31.

▪ Go rapela Jehofa “ka moya” go bolela’ng? (Joh. 4:24)—July 15, 2002, letlakala 15.

▪ Lešaba le legolo le hlankela lapeng lefe? (Kut. 7:15)—May 1, 2002, matlakala 30-31.

▪ Go kgethologanywa ga dinku le dipudi go direga neng? (Mat. 25:31-33)—October 15, 1995, matlakala 18-28.