O se ke wa Iphora ka Kgopolo ya Maaka
“O DIRILE’NG?” Modimo o botšišitše Efa potšišo ye ka morago ga gore a je sehlare seo se bego se ileditšwe. Efa o ile a araba ka gore: “Ke noga—e mphorile gomme ka ja.” (Gen. 3:13) Sathane, noga ya mahlajana yeo e mo dirilego gore a se kwe Modimo, ka morago e ile ya bitšwa “noga ya kgale, . . . yeo e timetšago lefase ka moka.”—Kut. 12:9.
Pego ye ya Genesi e bolela ka Sathane e le yo a nago le maanomabe, yo a bolelago maaka ka maikemišetšo a go fora bao ba sego šedi. Ruri o ile a foraforetša Efa. Lega go le bjalo, ga se ra swanela go nagana gore Sathane ke yena feela yo a ka re timetšago. Beibele e bile e re lemoša ka kotsi ya go ba bao “ba iphorago ka kgopolo ya maaka.”—Jak. 1:22.
Go ka bonagala go ka se tsoge go diregile goba go kgonegile gore re iphore. Lega go le bjalo, go molaleng gore Modimo o na le morero wa go re eletša. Ka gona, re tla ba re dira gabotse ge re ela hloko dilo tšeo di ka dirago gore re iphore le gore ke mohuta ofe wa kgopolo ya maaka wo o ka re timetšago. Mohlala wa ka Mangwalong o ka re thuša.
Mohlala wa Bao ba Ilego ba Iphora
Mo e ka bago ka ngwaga wa 537 B.C.E., Korese yo Mogolo wa Peresia o ile a ntšha taelo ya gore Bajuda bao ba bego ba le bothopša Babilona ba boele Jerusalema gomme ba age tempele lefsa. (Esera 1:1, 2) Ka go dumelelana le morero wa Jehofa, ngwageng o latetšego batho ba ile ba thea metheo ya tempele e mpsha. Bao ba boilego bothopša ba ile ba thaba le go tumiša Jehofa ka ge a ile a šegofatša mogato wa mathomo wa modiro wo o bohlokwa. (Esera 3:8, 10, 11) Eupša go se go ye kae, go ile gwa ba le baganetši bao ba bilego kgahlanong le modiro wo wa go aga tempele lefsa gomme batho ba nyema moko. (Esera 4:4) Mo e ka bago nywaga e 15 ka morago ga ge ba boile, mmušo wa Peresia o ile wa thibela mediro ka moka ya go aga kua Jerusalema. E le go tiiša thibelo, bahlankedi ba mmušo ba ile ba tla Jerusalema gomme “ba thibela [Bajuda] ba ba swaretše dibetša.”—Esera 4:21-24.
Bajuda ba ile ba iphora ka kgopolo ya maaka ge ba be ba lebeletšane le lepheko le le lešoro. Ba be ba ipotša gore: “Nako ga sešo ya fihla, e lego nako ya gore ntlo ya Jehofa e agiwe.” (Hag. 1:2) Ba ile ba phetha ka gore Modimo ga a nyake gore tempele e agwe le semeetseng. Go e na le go nyaka ditsela tša gore ba dire thato ya gagwe, ba ile ba tlogela kabelo ya bona e kgethwa gomme ba swarega kudu ka go kaonefatša dintlo tša bona. Moporofeta wa Modimo Hagai o ile a ba botšiša serokaphatla gore: “Na ye ke nako ya gore le dule dintlong tša lena tšeo di manegilwego ka mapolanka, mola ntlo ye [tempele ya Jehofa] e le lešope?”—Hag. 1:4.
O ithuta’ng mohlaleng wo? Go ba le pono e fošagetšego mabapi le gore morero wa Modimo o tla phethagala neng go ka dira gore re thome go se sa tšea mediro ya rena ya moya e le bohlokwa gomme ra arošwa ke dilo tšeo re di ratago. Ka mohlala, akanya o letetše baeng. Go fagahlela ketelo ya bona go ka go dira gore o emaeme o leka go dira gore ba hwetše dilo di le maemong a mabotse. Lega go le bjalo, ka morago o hwetša molaetša wa gore baeng ba tla fihla ka morago ga nako. Na o tla tlogela go ba lokišetša dilo?
Lega go le bjalo, gopola gore Hagai le Sakaria ba ile ba thuša Bajuda go kwešiša gore Jehofa o sa dutše a nyaka gore tempele e agwe lefsa ka pelapela. Hagai o ile a ba eletša ka gore: “Tiang matla lena batho ka moka ba naga, . . . gomme le šome.” (Hag. 2:4) Ba be ba swanetše go tšwela pele ka mošomo, ba kgodišegile gore moya wa Modimo o tla ba thekga. (Sak. 4:6, 7) Na mohlala wo o ka re thuša go phema go dira diphetho tše di fošagetšego mabapi le letšatši la Jehofa?—1 Bakor. 10:11.
Go Phema Kgopolo ya Maaka ka go ba le Mabaka a Kwagalago
Ge moapostola Petro a be a ngwala lengwalo la gagwe la bobedi, o be a naganne ka tšhupamabaka ya Jehofa ya go hlola “magodimo a mafsa le lefase le lefsa.” (2 Pet. 3:13) O be a lemogile gore bakweri ba bangwe ba be ba ipotšiša gore na Modimo o tla tsoga a tsene ditaba tša batho gare. Ba ile ba dira phošo ka go ganetša gore go ka se direge selo, gore “dilo tšohle di [be di] sa le ka tsela yeo di bego di le ka yona mathomong a tlholo.” (2 Pet. 3:4) Petro o be a nyaka go lwantšha mabaka ao a fošagetšego. O ngwadile gore: ‘Ke le gopotša ditaba tše dingwe ka go tsoša matla a lena a go nagana gabotse.’ O ile a gopotša Bakristegotee le yena gore bakweri bao ba be ba fošitše. Nakong e fetilego Modimo o ile a tsena ditaba tša batho gare, a tliša meetsefula a šiišago lefaseng ka moka.—2 Pet. 3:1, 5-7.
Ka 520 B.C.E., Hagai o neile kgothatšo e swanago go Bajuda bao ba bego ba nyemile moko e bile ba tapile. O ile a ba eletša ka gore: “Šetšang ditsela tša lena.” (Hag. 1:5) Gore a šišinye kgopolo ya barapedigotee le yena, o ile a ba gopotša ka merero le dikholofetšo tša Modimo mabapi le batho ba Gagwe. (Hag. 1:8; 2:4, 5) Kapejana ka morago ga kgothatšo yeo, modiro wa go aga o ile wa thomološwa—go sa šetšwe thibelo ya mmušo. Manaba a ile a leka gape go thibela modiro wa go aga, eupša a ile a palelwa. Thibelo e ile ya kgaotšwa gomme tempele ya fetšwa ka nywaga e mehlano.—Esera 6:14, 15; Hag. 1:14, 15.
Go Šetša Ditsela tša Rena
Na o nagana gore re ka nyema moko ge go tšwelela mathata go swana le Bajuda ba mehleng ya Hagai? Ge e ba seo se ka direga, re ka thatafalelwa ke go dula re fišegela go bolela ditaba tše dibotse. Eupša ke’ng seo se ka re nyemišago moko? Ge e le gabotse, re ka ikhwetša re tlaišwa ke go hloka toka ga tshepedišo ye ya dilo. Nagana ka Habakuku, yo a ilego a botšiša gore: “Na ke go bitše go fihlela neng ke kgopela thušo wena o sa ntheetše, o sa re namolele ge re swerwe ga sehlogo?” (Habak. 1:2, Today’s English Version) Mokriste a ka lebala gore nako e akgofile gomme a etiša bophelo bja boiketlo pele ka baka la seo ba bangwe ba rego ke go diega. Na o nagana gore seo se ka se go diragalele? Ge e ba re ka nea mabaka ka tsela ye, re tla ba re iphora. Ruri go bohlokwa go latela keletšo ya Mangwalo ka go ‘šetša dipelo tša rena’ le ka ‘go tsoša matla a rena a go nagana gabotse’! Re ka ipotšiša gore: ‘Na ke swanetše go makatšwa ke gore tshepedišo ye e kgopo ya dilo e tšere nako e telele kudu go feta kamoo ke bego ke letetše ka gona?’
Nako Yeo Beibele e Boletšego ka Yona e sa le Pele
Anke o ele hloko mantšu a Jesu a mabapi le bofelo bja tshepedišo ye ya dilo. Pego ya Mareka ya boporofeta bja Jesu bja mabapi le mehla ya bofelo e bontšha gore Jesu o re eleditše leboelela gore re dule re phafogile. (Mar. 13:33-37) Re hwetša temošo e swanago tlhalosong ya boporofeta bja letšatši le legolo la Jehofa la Haramagedone. (Kut. 16:14-16) Ke ka baka la’ng re lemošwa gantšintši? Dikgopotšo tše bjalo di a nyakega ka ge go leta ka nako yeo go ka bonagalago e le e telele go ka dira gore batho ba be kotsing ya go lebala gore nako e akgofile.
Jesu o ile a dira seswantšho se se bontšhago bohlokwa bja go dula re phafogile ge re letetše bofelo bja tshepedišo ya dilo. O ile a bolela ka monna yoo ntlo ya gagwe e ilego ya thubja ke mahodu. O be a ka phema bjang go utswetšwa? Ka go dula a phafogile bošego ka moka. Jesu o phethile seswantšho se ka go re eletša gore: “Le itlhatsele le le ba itokišitšego, gobane Morwa wa motho o tla ka nako yeo le sa e naganego.”—Mat. 24:43, 44.
Seswantšho seo se bontšha gore re swanetše go dula re letile, gaešita le ka nako e telele. Ga se ra swanela go tshwenyega kudu ka gore tshepedišo ye e kgopo e tšere nako e telele kudu go feta kamoo re bego re letetše ka gona. Ga se ra swanela go iphora ka gore ‘nako ya Jehofa ga sešo ya fihla.’ Kgopolo e bjalo e ka retetša kganyogo ya rena ya go bolela ditaba tše dibotse tša Mmušo.—Baroma 12:11.
Go Tumola Kgopolo ya Maaka
Molao wa motheo wo o lego go Bagalatia 6:7 o a šoma tabeng ya go ba le kgopolo ya maaka, o re: “Le se ke la timetšwa . . . Se sengwe le se sengwe seo motho a se bjalago, ke sona seo a tlago go se buna.” Ge tšhemo e sa lengwe, ngwang o mela gabonolo. Ka mo go swanago, kgopolo ya maaka e ka mela ka menaganong ya rena ge e ba re sa diriše bokgoni bja rena bja go nagana. Ka mohlala, re ka ipotša gore: ‘Gona re a tseba gore letšatši la Jehofa le a tla—eupša le ka se tle ka pela.’ Go nagana ka tsela e bjalo go ka dira gore re goge maoto ge re dira mediro yeo e tswalanago le pušo ya Modimo. Ge nako e dutše e eya, re ka thoma go hlokomologa tsela yeo re bego re le mafolofolo ka yona moyeng. Ka go re’alo letšatši la Jehofa le ka re wela re sa itebetše.—2 Pet. 3:10.
Lega go le bjalo, kgopolo ya maaka e ka se mele menaganong ya rena ge e ba re dula re itlhatselela “thato e botse le e amogelegago le e phethegilego ya Modimo.” (Baroma 12:2) Go bala Lentšu la Modimo ka mehla ke e nngwe ya dilo tšeo di ka re thušago gore re kgone go dira se. Mangwalo a ka matlafatša kgodišego ya rena ya gore Jehofa o dula a dira dilo ka nako e swanetšego.—Habak. 2:3.
Ge re ithuta, re rapela, re eba gona dibokeng ka mehla e bile re dira boboledi mola ka lehlakoreng le lengwe re dira mediro e botho, seo se tla re thuša go ‘dula re nagana ka go ba gona ga letšatši la Jehofa.’ (2 Pet. 3:11, 12) Jehofa o tla lemoga maiteko ao a ka mehla. Moapostola Paulo o re gopotša gore: “Anke re se ke ra lapa go dira botse, gobane re tla buna ka nako e swanetšego ge e ba re sa lape.”—Bagal. 6:9.
Ruri ye ga se nako ya go dumelela kgopolo ya maaka e re fora gore re nagane gore letšatši la Jehofa le sa le kgole. Go e na le moo, ke nako ya gore re be šedi ka ge letšatši la Jehofa le batametše.
[Seswantšho go letlakala 4]
Hagai le Sakaria ba kgothaleditše Bajuda go aga
[Seswantšho go letlakala 5]
Go thwe’ng ge e ba mong wa ntlo a ka ba a tsebile gore lehodu le tseleng?