“Sephiri” Seo re Ithutilego Sona Tirelong ya Rena e Kgethwa

Ka ge go anega Olivier Randriamora

“Ke tseba go hlaelelwa ke dilo e bile ke tseba le go atelwa ke tšona. Dilong tšohle le maemong ohle ke ithutile sephiri sa go khora le go swarwa ke tlala . . . Dilong tšohle ke na le matla ka baka la yo a mphago matla.”—Bafil. 4:12, 13.

MANTŠU a a moapostola Paulo e bile kgothatšo e kgolo bophelong bja ka le bja mosadi wa ka, Oly. Go swana le Paulo, re ithutile “sephiri” seo ka go ithekga ka mo go tletšego ka Jehofa ge re dutše re Mo hlankela mo Madagascar.

Ge Dihlatse tša Jehofa di thoma go ithuta Beibele le mmago Oly ka 1982, nna le Oly re be re le kgauswi le go nyalana. Ke ile ka swarelwa thuto ya Beibele, gomme ka morago Oly o ile a swarelwa ya gagwe. Re nyalane ka 1983, ra kolobetšwa ka 1985 gomme gateetee ra ba babulamadibogo ba go thuša. Re bile babulamadibogo ba ka mehla ka July 1986.

Ka September 1987, re ile ra thoma go hlankela re le babulamadibogo ba kgethegilego. Kabelo ya rena ya pele e bile toropo e nyenyane ya ka leboabodikela bja Madagascar moo go bego go se na phuthego. Go na le merafo e megolo e 18 gotee le malapa a mantši a go dula ka meloko Madagascar, le gona meetlo le ditšo tša moo di fapane kudu. Semalagasy ke leleme la semmušo, eupša go na le mebotwana e sa swanego. Ka baka leo re ile ra ithuta mmotwana woo o bolelwago moo re bego re dula gona, gomme seo se ile sa dira gore re amogelwe gabonolo ke batho ba moo.

Mathomong ke be ke neela polelo ya phatlalatša Sontaga se sengwe le se sengwe, gomme ka morago ga moo Oly o be a fo opa magoswi. Re be re le ba babedi feela. Re be re swara dikarolo ka moka tša Sekolo sa Bodiredi sa Pušo ya Modimo, gomme Oly ka ge a be a se na mothuši, o be a bolela le motho wa boikgopolelo. Re ile ra thaba kudu ge molebeledi wa tikologo ka botho a šišinya gore re sware diboka tša rena ka tsela e fapanego!

Ka ge poso yeo re bego re e šomiša e be e sa fihliše dilo ka nako, mabakeng a mangwe re be re sa hwetše ka nako tšhelete ya kgwedi le kgwedi ya go thuša babulamadibogo. Ka baka la se, re ile ra ithuta go phela ka go hlaelelwa ke dilo. Ka nako e nngwe, re be re se na tšhelete e lekanego ya go lefelela pese ya go ya kopanong ya tikologo yeo e bego e le bokgole bja dikhilomithara tše 130. Re ile ra gopola keletšo e nngwe e bohlokwa yeo re ilego ra e botšwa ke Hlatsegotee le rena ya gore: “Botšang Jehofa mathata a lena. Go ba gona, modiro wo le o dirago ke wa gagwe.” Ka baka leo re ile ra rapela gomme ra phetha ka go ya ka maoto. Lega go le bjalo, pele ga ge re ka tloga, ngwanabo rena yo mongwe o ile a re etela go sa letelwa gomme a re fa mpho ya tšhelete—tšhelete yeo e bego e lekana tlwaa go lefelela pese!

MODIRO WA TIKOLOGO

Ka February 1991, ke ile ka kgethelwa go ba molebeledi wa tikologo. Ka nako yeo, sehlopha sa rena se senyenyane se be se na le bagoeledi ba senyane, ba bararo ba bona ba be ba kolobeditšwe, gomme gantši re eba ba 50 dibokeng. Ka morago ga go tlwaeletšwa modiro wa tikologo, re ile ra hlankela motsengmošate, e lego Antananarivo. Ka 1993, re ile ra abelwa tikologong e nngwe karolong ya ka bodikela bja naga ya Madagascar. Maemo a boiphedišo lefelong leo a be a fapana kudu le a toropong.

E le gore re fihle diphuthegong le go dihlopha tšeo di lego lekatana, re be re sepela ka maoto, ka dinako tše dingwe re sepela dikhilomithara tše 145 dithabeng tša dithokgwa tše boifišago kudu. Re be re swara feela dilo tšeo di nyakegago. Lega go le bjalo, ge e ba polelo ya phatlalatša ya molebeledi wa tikologo e be e akaretša pontšho ya di-slide, ka ge ka dinako tše dingwe go be go le bjalo mehleng yeo, morwalo wa rena o be o imela. Oly o be a swara motšhene wa go bapala di-slide, mola nna ke be ke imelwa ke petiri ya koloi.

Gantši go be go re tšea dikhilomithara tše 40 gore re fihle phuthegong e latelago. Ditseleng tšeo re bego re sepela go tšona, re be re namelela le go fologa ditsejaneng tša dithaba, re tshela dinoka, e bile re hlaphuhla ka gare ga maraga. Ka dinako tše dingwe re be re robala ka thoko ga tsela, eupša gantši re be re leka go tsoma motse gore re hwetše marobalo. Mabakeng a mangwe re be re kgopela marobalo go batho bao le ganyenyane re bego re sa ba tsebe. Ka morago ga ge re hweditše marobalo, re be re thoma go apea dijo. Oly o be a adima pitša ya go apea gomme a eya nokeng goba sedibeng sa kgauswi go kga meetse. Ge a dira seo, nna ke be ke adima selepe gomme ke phapha dikgong tša go apea. Bophelo bo be bo tšwela pele. Ka dinako tše dingwe re be re reka kgogo yeo re bego re swanetše go e hlaba le go e hloba.

Ka morago ga dijo, re be re lata meetse a mangwe a go hlapa. Ka dinako tše dingwe re be re robala ka khitšhing. Ge pula e ena, re be re robala kgauswi le leboto, gore re se ke ra koloba ge tlhaka e be e dutla.

Ka mehla re be re kgonthišetša gore re nea bohlatse go bao ba bego ba re amogela magaeng a bona. Ge re fihla moo re bego re lebile gona, ruri re be re thabišwa ke botho bja bana babo rena le dikgaetšedi ba Bakriste gotee le moya wa bona wa go amogela baeng. Tsela yeo ba bego ba tšeela godimo diketelo tša rena e be e phumola ditlhohlo ka moka tšeo re lebeletšanego le tšona tseleng.

Ge re amogetšwe ka magaeng a Dihlatsegotee le rena, re be re thabela go di thuša ka mešongwana ya ka gae. Se se be se dira gore ba kgone go tšea karolo le rena tirelong ya tšhemo. Re be re sa letela go newa dilo tša manobonobo goba dijo tša maemo, tšeo bao ba re amogelago ba bego ba ka se kgone go di lefelela.

GO ETELA DIHLOPHA TŠEO DI LEGO LEKATANA

Re be re thabela go etela dihlopha tšeo di lego lekatana, moo bana babo rena ba bego ba dira gore re swarege kudu ka modiro bekeng yeo ya ketelo. Re be re se na le nako ya go ‘khutša go se nene.’ (Mar. 6:31) Lefelong le lengwe, banyalani bao e lego Dihlatse ba ile ba laletša dithuto tša bona ka moka tša Beibele—tše 40—legaeng la bona e le gore re be le bona ge ba di swara. Oly le kgaetšedi wa lapa leo ba ile ba swara dithuto tše ka bago tše 20, gomme nna le ngwanabo rena re ile ra swara tše dingwe tše 20. Ge morutwana yo mongwe a feditše ke moka a tloga, gateetee re be re thoma go ithuta le yo mongwe. Ka moragonyana letšatšing leo, re ile ra emiša dithuto tšeo gore re kgone go swara diboka tša phuthego, gomme ka morago ra tšwela pele ka dithuto tšeo di šetšego tša Beibele. Leemaema leo le ile la fela mohlomongwe ka morago ga iri ya seswai bošego!

Ge re be re etela sehlopha se sengwe, ka moka ga rena re ile ra leba motseng wa kgauswi mo e ka bago ka iri ya seswai mesong. Ka moka ga rena re be re apere diaparo tša kgale. Ka morago ga go sepela nako e telele sethokgweng, re ile ra fihla tšhemong yeo mosegare wa sekgalela. Re ile ra apara diaparo tše hlwekilego gomme gateetee ra thoma boboledi bja ntlo le ntlo. Bagoeledi e be e le ba bantši eupša dintlo e le tše sego kae. Ka baka leo re ile ra kgona go fetša tšhemo ka moka ka metsotso e 30. Ka morago re ile ra leba motseng o latelago. Ge re feditše go dira boboledi moo, re ile ra boela gae ka yona tsela yeo e telele. Mathomong, mosepelo o bjalo o be o dira gore re ikwe re se na matla. Re be re šomišitše nako e ntši le matla eupša re feditše mo e ka bago iri e tee feela re le modirong wa ntlo le ntlo. Lega go le bjalo, Dihlatse tša lefelong leo di be di sa belaele. Di ile tša dula di na le phišego.

Sehlopha se sengwe kua Taviranambo se be se dula kgauswi le tlhora ya thaba. Moo re ile ra hwetša lapa la Dihlatse leo le bego le dula ka ntlong ya phapoši e tee. Moago o mongwe o monyenyane woo o bego o le kgauswi le moo o be o šomišetšwa go swara diboka. Kapelapela yo re bego re mo etetše o ile a thoma go goeletša ka lentšu la go hlaboša gore: “Bana bešo!” Tlhoreng ya thaba e latelago go ile gwa kwagala lentšu la gore: “Thobela!” Yo re bego re mo etetše o ile a goeletša gape gore: “Molebeledi wa tikologo o fihlile!” Go ile gwa arabja gape gore: “Re tseleng!” Go bonagala molaetša woo o ile wa fetišetšwa gape go ba bangwe ba bego ba dula kgojana le moo. Go se go ye kae batho ba ile ba thoma go kgobokana, gomme ge diboka di thoma, go be go na le ba fetago 100.

BOTHATA BJA DINAMELWA

Ka 1996 re ile ra abelwa tikologong yeo e lego kgauswi le Antananarivo, e lego lefelo leo le lego gare ga dithaba. Tikologo yeo le yona e be e na le ditlhohlo. Ga se ka mehla go bego go na le dinamelwa tša go ya mafelong a kgole le ditoropo. Re be re swanetše go etela sehlopha seo se lego toropong ya Beankàna (Besakay), yeo e lego dikhilomithara tše 240 go tloga Antananarivo. Ka morago ga go dumelelana le mootledi ka seo re tlago go mo lefa, re ile ra namela lori e nyenyane yeo e bego e lebile moo. E be e nametšwe ke batho ba 30 ka gare le ka godimo ga yona, ba bangwe ba patlame ka godimo ga yona gomme ba bangwe ba itshwareleditše ka morago.

Go etša mehleng, lori yeo e ile ya hwa tseleng, gomme re ile ra swanelwa ke go tšwetša pele leeto la rena ka maoto. Ka morago ga go ikgoga ka diiri tše mmalwa, lori e kgolo e ile ya tšwelela. E be e šetše e tletše ka batho le diphahlo, lega go le bjalo mootledi o ile a fo ema. Re ile ra namela, gomme ra swanelwa ke go ema ka maoto ka ge e be e tletše. Re ile ra sepela nakonyana go fihla nokeng, eupša leporogo la yona le be le lokišwa. Gona moo re ile ra swanelwa ke go ya ka maoto motsaneng o mongwe, moo go bego go dula babulamadibogo ba kgethegilego. Le ge ketelo ya rena e be e sa letelwa, re ile ra fetša nako re dira boboledi le bona ge re letetše gore leporogo le lokišwe le gore re hwetše senamelwa se sengwe.

Go tšere beke go fihlela go tšwelela koloi, gomme re ile ra tšwela pele ka leeto la rena. Mmila woo re bego re sepela go wona o be o tletše ka dikoti. Gantši re be re swanetše go kgorometša koloi yeo e le ka gare ga meetse a go fihla matolong, ka dinako tše dingwe re kgopša e bile re e wa. Re ile ra fihla motsaneng o mongwe e sa le ka masa, gomme ra fologa gona. Re ile ra tlogela go sepela ka tsela e kgolo, gomme ra sepela mašemong a reisi ao a nago le dikoti tša meetse a maraga ao a bego a goma mathekeng a rena, re lebile moo re yago gona.

Yeo e be e le ketelo ya rena ya pele lefelong leo, ka gona re ile ra nea bohlatse go bao ba bego ba šoma mašemong ao a reisi gomme ra ba botšiša moo Dihlatse tša lefelong leo di bego di dula gona. Re ile ra thaba kudu ge re hwetša gore ge e le gabotse bona bašomi bao e be e le bana babo rena ba moya!

GO KGOTHALETŠA BA BANGWE GO TSENELA TIRELO YA NAKO E TLETŠEGO

Go theoša le nywaga, re ile ra bona meputso ya go kgothaletša ba bangwe go tsenela tirelo ya nako e tletšego. Ge re be re etetše phuthego e nngwe yeo e bego e na le babulamadibogo ba ka mehla ba senyane, re ile ra kgothaletša mmulamadibogo yo mongwe le yo mongwe gore a kgothaletše mogoeledi o tee go tsenela tirelo ya bobulamadibogo. Ge re boa dikgwedi tše tshelelago ka morago, re ile ra hwetša go na le babulamadibogo ba ka mehla ba 22. Dikgaetšedi tše pedi tša babulamadibogo di be di kgothaleditše botatago tšona bao e bego e le bagolo ba phuthego gore e be babulamadibogo ba ka mehla. Bana bao babo rena ba ile ba kgothaletša mogolo yo mongwe gore le yena a tsenele tirelo. Ka moragonyana, mogolo yoo wa boraro o ile a kgethelwa go ba mmulamadibogo yo a kgethegilego. Ka morago, yena le mosadi wa gagwe ba ile ba thoma modiro wa tikologo. Go thwe’ng ka bagolo bale ba bangwe ba babedi? Yo mongwe o hlankela e le molebeledi wa tikologo, gomme yo mongwe ke moithaopi wa go aga Diholo tša Mmušo.

Re leboga thušo ya Jehofa letšatši le letšatši, ka ge re lemoga gore re ka se fihlelele selo ka matla a rena. Ke therešo gore ka dinako tše dingwe re ikwa re lapile e bile re babja, eupša re a thaba ge re gopola meputso ya bodiredi bja rena. Jehofa o tšwetša pele modiro wa gagwe. Re thabela karolo e nyenyane yeo re e phethago modirong wo, ka ge ga bjale re mo hlankela re le babulamadibogo ba kgethegilego. Ka kgonthe re ithutile “sephiri” sa go ithekga ka Jehofa, yena ‘yo a re fago matla.’

[Ntlhakgolo go letlakala 6]

Re ithutile “sephiri” sa go ithekga ka Jehofa

[Mmapa/Diswantšho go letlakala 4]

Madagascar, e lego yeo e bitšwago Big Red Island, ke sehlakahlaka sa bone ka bogolo lefaseng. E na le mobu o mohwibidu, gomme e na le mehuta e mentši ya diphoofolo tša moswananoši

[Seswantšho go letlakala 5]

Re thabela go swara dithuto tša Beibele

[Diswantšho go letlakala 5]

Go etela diphuthego e be e le e nngwe ya ditlhohlo tše dikgolo tšeo re lebeletšanego le tšona