E-ba Mmulamadibogo Wa Go Thuša Ka December

1 Ka moka ga rena re dira gabotse ge re ipotšiša gore: ‘Ke tla ba morwadi wa seetša go fihla bokgoleng bofe ka December? Na nka ba mmulamadibogo wa go thuša?’—Mat. 5:14, 16.

2 Bafsa bao ba kolobeditšwego ka kakaretšo ba na le nako ya go se ye sekolong matšatšing a maikhutšo. Batswadi ba bangwe le bagoeledi bao e lego batho ba bagolo ba ka kgona go tlatša bagoeledi ba banyenyane tirelong e katološitšwego ya tšhemo kgweding ye. Ba bantši bao ba šomago ka nako e tletšego ka mo go swanago ba tla ba le nako e oketšegilego yeo ba ka e dirišago bodireding bjo bja go phološa bophelo.

3 Lebaka le legolo tabeng ya go kgona go šoma re le babulamadibogo ba go thuša ke go ikemišetša ga rena go dira boiteko bjo bongwe bjo bo nyakegago. (Luka 13:24) Ge e ba re rulaganya modiro wa rena ka kelohloko, go akaretša ditaba tša lapa le tša phuthego, go ka dirwa gore nako e hwetšagale e le gore re ka ba le lethabo la go šoma re le babulamadibogo ba go thuša.

4 Na o tla kgona go katološa bodiredi bja gago ka December? Go dira bjalo go ka go thuša gore o ikwe o kgodišegile kudu mejakong gomme gwa feleletša ka diphihlelo tše di agago. O ka ba le lethabo le legolo.—Dit. 20:35.