Diboka Tša Tirelo Tša November
Beke e Thomago ka November 2
10 mets:Ditsebišo tša phuthego le Ditsebišo tše di kgethilwego go Tirelo ya Rena ya Mmušo. Gogela tlhokomelo tsebišong e lego lepokising leo le lego mabapi le diaterese tša makala. Reta bagoeledi bakeng sa karolo yeo ba e tšeago modirong wa go bolela ka Mmušo. Šišinya dintlha tšeo di ka bolelelwago tše di lego dimakasineng tša gona bjale tšeo di ka dirišwago tšhemong ya gabo lena.
15 mets:“Matla a Lentšu la Modimo.” Dipotšišo le dikarabo. Kgothaletša bohle go bala pampišana ya Lebaka Leo ka Lona o ka Botago Beibele, ba ela hloko mokgwa wa go bea mabaka le poledišano e bonolo e atlegago yeo e ka dirišwago tirelong ya tšhemo.
20 mets:“Thea Motheo Ketelong ya Gago ya Mathomo.” Ngwanabo rena yo a swarago karolo ye o rola dipontšho tše nne tšeo di bontšhago matseno a tee a a mabedi ao a boletšwego go dirapa 2 le 3 gomme di bontšha e nngwe le e nngwe ya dintlha tšeo di lego go dirapa 4, 5 le 6. Pontšho ya mafelelo e swanetše go bontšha kamoo puku ya Lentšu la Modimo e ka neelwago ka gona ketelong ya mathomo.
Kopelo 52 le thapelo ya go phetha.
Beke e Thomago ka November 9
5 mets:Ditsebišo tša phuthego le Ditaba tša Pušo ya Legodimo.
15 mets:“Na o Latela Ditaelo?” Polelo yeo e theilwego sehlogong sa Morokami wa October 1, 1990, matlakala 30-1 ka molebeledi yo a okamelago. Go swanetše go hlaloswa kamoo e šomago ka gona phuthegong go dinyakwa tše itšego: go bega nako ya tirelo ya tšhemo, go hlwekiša Holo ya Mmušo, go ba gona ka nako bakeng sa diboka tša tirelo ya tšhemo, go laola bana Holong ya Mmušo, bjalo bjalo. Reta mo go swanetšego gomme o thuše bohle go lemoga kamoo phuthego ka moka e holegago ka gona le gore modiro wa bahlanka bao ba kgethilwego e ba o bonolo kudu ge bohle ba latela ditaelo.
10 mets:“E-ba Mmulamadibogo wa go Thuša ka December.” Akaretša taba ka borutho le ka phišego ka dipotšišo le dikarabo. Tsebiša dithulaganyo tša phuthego bakeng sa tirelo ya tšhemo le dithulaganyo tše di kgethegilego tšeo di swanetšego go dirwa bakeng sa dihlopha tše kgolo ka December.
15 mets:“Na o Lebelela Dipuku tša Rena e le tša Bohlokwa?” Polelo e kgothatšago.
Kopelo 27 le thapelo ya go phetha.
Beke e Thomago ka November 16
15 mets:Ditsebišo tša phuthego, go akaretša pego ya tša ditšhelete le ditebogo bakeng sa meneelo. Reta phuthego ka borutho bakeng sa go thekga phuthego ka ditšhelete gotee le Sekhwama sa Mokgatlo sa Diholo tša Mmušo le modiro wa Mokgatlo wa lefase ka bophara. Batswadi ba swanetše go lokišetša bana ba bona ba sekolo ka mo go kgethegilego bakeng sa dikgang tšeo di ka tsogago matšatšing a maikhutšo, ba diriša matlakala 17-21 a pukwana ya Sekolo.
20 mets:“Kamoo go ka Hlagolelwago Kgahlego ka Gona.” Polelo le dipontšho, e swanetše go swarwa ke molebeledi wa tirelo. Bontšha mekgwa yeo e hlalositšwego go dirapa 5 le 6. Dira gore dipontšho e be tše bonolo le tšeo di kwešišegago gabonolo.
10 mets:“Kgetha Dintlha tše di Swanetšego Tšeo di ka Bolelelwago.” Poledišano magareng ga monna le mosadi ba lokišetša go ya tirelong ya tšhemo.
Kopelo 198 le thapelo ya go phetha.
Beke e Thomago ka November 23
10 mets:Ditsebišo tša phuthego. Dira pontšho ya kamoo ntlha e ka bolelelwago e tšwago makasineng wa gona bjale e ka dirišwago ka gona mafelo-bekeng a. Diriša ditšhišinyo tše di neilwego Sebokeng sa Tirelo sa bekeng e fetilego.
20 mets:“Go Holofela Jehofa Dilong ka Moka Tšeo re di Dirago”—Karolo 1. Poledišano ya dirapa 1 go ya go 13 tša pampiri ya ka gare ka banababo rena ba babedi, go kgethwa gore e be bao ba šomago Komiting ya moo ya Meago ya Tikologo. Diphihlelo tša lefelong leo di ka akaretšwa. Ka borutho kgothaletša bohle bao ba swanelegago gore ba ithape.
15 mets:Lebaka Leo ka Lona re sa Binego Menyanya ya Matšatši a Matswalo. Poledišano magareng ga mogolo le mošemane yo a sa hlwago a tsena mahlalagading wa tšhiwana yo e lego mohlala o mobotse. Mošemane o ya go mogolo go ya go kgopela thušo ya gagwe tabeng ya go lebeletšana le kgateletšo ya dithaka tša gagwe ya go ya moletlong wa letšatši la matswalo. O kwešiša gore go fošagetše eupja o nyaka go kgona go hlalosa se gabotse go ba bangwe. Mogolo o boeletša le mošemane ka botho le ka polelo e bonolo, tsebišo yeo e lego go matlakala 30-1 ka go Morokami wa September 1, 1992 le matlakala 260-2 a puku ya Go Boledišana.
Kopelo 24 le thapelo ya go phetha.
Beke e Thomago ka November 30
10 mets:Ditsebišo tša phuthego. Boeletšang dintlha tše di lego lengwalong la Mokgatlo la August 15, 1992 leo le kgothaletšago bagoeledi go tsenya dipego tša bona Lepokising le le kgethegilego la Dipego Holong ya Mmušo.
15 mets:Go Diriša Puku ya Motho yo a Phagamego Bakeng sa go Dira Gore Seetša sa Rena se Bonege ka December. Polelo e nago le pontšho. Kgothaletša bohle go gopola dintlha tša tirelo ya tšhemo gabotse. Šišinya dintlha tše di ka bolelelwago tšeo di theilwego go dikgaolo tše di ahla-ahlilwego Thutong ya Puku ya Phuthego pejana kgweding ye.
20 mets:“Go Holofela Jehofa Dilong ka Moka Tšeo re di Dirago”—Karolo 2. Kakaretšo ya dirapa 14 go ya go 25 tša pampiri ya ka gare ka dipotšišo le dikarabo. Gatelela karolo yeo mogoeledi o mongwe le o mongwe a ka bago le yona ka (1) go ithapa ge e ba a swanelega gomme maemo a dumela, (2) go neela ka tša ditšhelete go Sekhwama sa Mokgatlo sa Diholo tša Mmušo le (3) go thekga mediro ya phuthego ge ba bangwe ba ile kabelong ya tša moago.
Kopelo 4 le thapelo ya go phetha.