Na O Ka Hlankela Jehofa O Le Mmulamadibogo?
1 Kopanong ya morago bjale ya Selete ya “Barwadi ba Seetša,” seboledi se ile sa botšiša gore: “Na o ka bula madibogo? Na o tla bula madibogo?” Se boletše gore dipotšišo tše ke tšeo di swanetšego ka gobane Haramagedone e kgaufsi kudu, gomme e dira gore modiro wa boboledi e be o akgofilego go feta lege e le neng pele.—1 Ba-Kor. 7:29a.
2 Ga go pelaelo gore go bula madibogo ke modiro o thata. Go nyaka boitayo le thulaganyo e botse. Lega go le bjalo, modiro wa rena bodireding “xa se [wa] lefêla.” (1 Ba-Kor. 15:58) Na go ka bolelwa se se swanago ka mediro e mengwe yeo re kgethago go e dira le yeo e jago nako ya rena le matla? Lerato la go rata Jehofa le tutueletša Bakriste go ba mafolofolo tirelong ya gagwe, gomme go ba mafolofolo tirelong ya Jehofa go lebišitše ba bantši modirong wa bobulamadibogo.—1 Joh. 5:3; Kut. 4:11.
3 Bahlanka ba bantši ba banyenyane ba Jehofa bao ba sa tšwago go aloga sekolong se se phagamego ba nagana ka kudu ka go bula madibogo. Seo ke se se swanetšego ka mo go feletšego. Ke modiro ofe o mongwe wa bophelo ka moka wo e ka bago o bohlokwa kudu go feta bodiredi bja nako e tletšego? (Mat. 6:33) Ditaba tše di lokilego tša Mmušo wa Modimo di swanetše go bolelwa; wo ke modiro wa Jehofa gomme ke tokelo e kgolo gakaakang go nwelela go wona go tloga bofseng bja motho go ya pele!—Mat. 24:14.
4 Na lena batswadi le kgothaletša bana ba lena go tsenela tirelo ya nako e tletšego? Na bana ba lena ba kwešiša gabotse gore le nyaka gore ba diriše pelo ya bona ka moka, moya, monagano le matla modirong wo o bohlokwa kudu? (Mar. 12:30) Bagoeledi ba bantši ba banyenyane ba itokišetša modiro wa bobulamadibogo bja ka mehla ka go ba le karolo e le babulamadibogo ba go thuša lebakeng le lengwe le le lengwe nywageng ya ge ba sa tsena sekolo. Ruri boineelo bjo bjalo go Jehofa bo thabiša pelo ya gagwe!—Die. 27:11.
5 Ee, ga se bohle bao maemo a bona a ba dumelelago go tsenela tirelo ya bobulamadibogo. Lega go le bjalo, o le lenyalong goba o se lenyalong, o le yo mofsa goba o tšofetše, na o kile wa naganišiša ka kudu le ka thapelo ka go hlankela Jehofa o le modiredi wa mmulamadibogo wa ditaba tše di lokilego? (Ba-Kol. 3:23) Banyalani ba bantši ba bafsa ba šoma bakeng sa go katološa bodiredi bja bona e le gore o tee wa bona goba ka bobedi ba ka bula madibogo.
6 Ge e ba o sa kgone go bula madibogo ka mehla gona bjale, na o ka šoma o le mmulamadibogo wa go thuša? Mohlomongwe bagoeledi ba bantši ka phuthegong ya geno ba rulaganyetša go dira seo ka April. Na o ka ba tlatša? Gaešita lege bahlanka ka moka ba ba botegago ba Jehofa ba amogela ditšhegofatšo tše dintši, ditšhegofatšo tše oketšegilego di letetše bao ba ikemišeditšego go diriša nako e oketšegilego tirelong ya Mmušo ba tsoma batho bao ba swanago le dinku.—Dit. 20:35.