Go Diriša Ditlabakelo Tše Bohlokwa Ka Bohlale

1 Ge o dutše o nea bohlatse ka ntlo le ntlo, pakane ya gago e swanetše go ba go akaretša mong wa ntlo poledišanong e agago ya Mangwalo ka go diriša Beibele le ditlabakelo tše dingwe tše bohlokwa. (Bapiša le 2 Ba-Korinthe 6:1; 2 Timotheo 2:15.) Batho ba tšhemong ya lena ba tshwenyegile ka eng mehleng ye? Na ba tshwenyegile ka boemo bja tša boiphedišo le go senyega ga bophelo bjo bobotse bja lapa? Na ba tshwenyegile ka bosenyi bjo bo golago le go hloka molao nageng ye? Ditlhaloso tše sego kae tša matseno ka lege e le sefe sa dihlogo tše di ka lebiša poledišanong e botse ya Beibele.

2 O ka re:

◼“Mehleng ye e hlohlago, batho ba bantši ba hwetša go le thata go hwetša tšhelete e lekanego ya go iphediša. Na o nagana gore mebušo ya batho e tla rarolla mathata a rena a tša ditšhelete ka tsela yeo e tlago go lokela o mongwe le o mongwe? [Theetša karabo.] Nna ka noši ke hweditše kgopolo ye e le e kgothatšago kudu . . . ”

3 Ka gona o ka bala Psalme 72:12-14 gomme o phethe poledišano ka go kgetha lengwalo le lengwe go ao a hwetšwago go matlakala 380-1 a puku ya Go Boledišana. Goba ka morago ga go bala lengwalo le tee, o ka šupa go le tee goba a mabedi ao a lego go dikgaolo 1 le 2 ka pukung ya Khutšo ya Kgonthe.

4 Ditšhabeng tše dintši mo gongwe o ka kgetha go diriša matseno a:

◼“Batho ba bantši ba dumela gore re phela ‘mehleng ya bofêlô’ le gore nako ya lefase le e fela ka lebelo. O ikwa bjang ka seo? [Dumelela karabo.] Na o kile wa lemoga gore Beibele e re botša ka tsela yeo re ka phologago bofelo bja lefase le la mehleng yeno ka yona gomme ra phela lefaseng leo le tlago go dirwa paradeise? Na nka abelana le wena lengwalo le le le kgothatšago kudu?” Bala Psalme 37:9-11. Lebiša mong wa ntlo go kgaolo 8 ya puku ya Khutšo ya Kgonthe gomme o bale serapa 1. Go ithekgile ka kgahlego ya mong wa ntlo le nako yeo e lego gona, mo gongwe o ka rata go abelana le yena mangwalo a oketšegilego. (Bona puku ya Go Boledišana, matlakala 305-14.)

5 Bagoeledi ba bangwe ba hweditše e le mo go holago go diriša pampišana ya Bophelo Lefaseng le Lefsa la Khutšo bakeng sa go thoma poledišano. Ba fo bontšha mong wa ntlo seswantšho gomme ba mmotšiša ge e ba a be a ka rata go phela ka tlase ga maemo a bjalo a khutšo. Ka gona ba lebiša tlhokomelo ya mong wa ntlo go serapa se se lego pampišaneng. Ka morago ga go boledišana ka dikgopolo tše sego kae tšeo di tšwago pampišaneng le go bala lengwalo le tee goba a mabedi, ba neela puku ya Khutšo ya Kgonthe.

6 Mo go ganwago mpho ya puku, go ka tlogelwa pampišana go mong wa ntlo gomme gwa dirwa dithulaganyo tša go boela le go tšwetša poledišano pele. Bagoeledi ba bantši—go akaretša ba banyenyane—ba atlega go thoma dithuto tša Beibele ka e nngwe ya dipampišana ka go bala serapa gomme ka morago ba kgopela pono ya mong wa ntlo ka seo se badilwego.

7 Ge e ba o kgona go thoma thuto ketelong ya mathomo, dira dithulaganyo tše di tsepamego bakeng sa go tšwetša poledišano pele nakong e tlago. Mo gongwe o ka thea motheo wa ketelo ya gago e latelago ka go botša mong wa ntlo gore ge o boa o tla rata go abelana le yena karabo ya potšišo yeo e botšišwago ka mehla e rego: “Ke ka baka la’ng Modimo a dumelela tlaišego?” Sehlogo se se lego ka mo tlase se tla šišinya kamoo taba e ka katološwago ka gona poelong.