Go Thoma Dithuto Tša Beibele Ka December
1 Jesu o laetše barutiwa ba gagwe gore e be barutiši ba ditaba tše di lokilego. (Mat. 28:19, 20) Mokgwa wa rena o mogolo wa go ruta ba bangwe ke ka go swara dithuto tša Beibele. Na o tšea karolo modirong wo? Ge e ba go se bjalo, o ka thoma bjang thuto gore o be le karolo e kgolo go ruteng ba bangwe?
2 Mohlomongwe re neile mong wa ntlo pampišana gomme ra holofetša gore re tla boa go tla go ahla-ahla dikagare tša yona.
Ge re boela go mong wa ntlo yo re mo tlogeletšego pampišana e rego “Na Lefase le le tla Phologa?,” mo gongwe re ka re:
◼“Ge ke be ke le mo matšatšing a sego kae a fetilego, re ile ra boledišana ka go akgofa ga mehla ya rena le gore Jesu o hlalositše maemo ao a lego gona mehleng ya rena ka mo go nepagetšego. Ke tla rata go tšea metsotso e sego kae gomme re hlahlobe ka boripana tsebišo e tšwago pampišaneng yeo ke go tlogeletšego yona. Ela hloko seo se boletšwego ka tlase ga sehlogwana se se rego ‘Pontšho.’” Phetlang go letlakala 3 la pampišana gomme le ahla-ahle dirapa tše pedi goba tše tharo tša mathomo ka tlase ga sehlogwana seo, le bala ditemana tše di bontšhitšwego ge nako e dumela. Gatelela kamoo boporofeta bja Jesu bo phethagalago ka gona lehono. Rulaganyetša go boa gomme le ahla-ahle dirapa tše dingwe ka tlase ga sehlogwana se. Kgothaletša mong wa ntlo gore a bale taba pele o boa.
3 Goba mo gongwe o ka bolela se se swanago le se:
◼“Nakong e fetilego ge re be re boledišana, ke ile ka go tlogelela pampišana e nago le sehlogo se se rego Na Lefase le le tla Phologa? Nakong yeo re boletše ka tema yeo Jesu Kriste a e kgathago ditabeng tša lefase. Re bala mantšu a gagwe ao a ngwadilwego ka Beibeleng go Johane 17:3. [Bala.] Ka ge go le bohlokwa gore re ithute ka Modimo le Jesu ge e ba re nyaka bophelo bjo bo sa felego, ke mo go re swanetšego gore re dire seo re ka se kgonago go hwetša tsebo e bjalo. Ge Jesu a be a le lefaseng, o ile a bonagatša dika tše dintši tše di botse tša Modimo. Na ga se mo go nago le tlhaologanyo go dumela gore tekanyo yeo re tsebago ka yona ka Jesu le bodiredi bja gagwe ke tekanyo yeo re tlago go tseba ka Tatagwe ka yona? [Dumelela karabo.] Ela hloko seo puku ye ya Motho yo a Phagamego Kudu yo a Kilego a Phela e se bolelago.” Bala serapa sa pele le sa bobedi letlakaleng la lesome la kgaolo 116. Gatelela gore puku ye e na le tsebišo ka moka yeo e lego dipegong tše nne tša Diebangedi mabapi le Jesu gomme e bea taba ye ka tatelano yeo ditiragalo di diregilego ka yona. Hlalosa dihlogo tše di kgethegilego tša dikgaolo, diswantšho le mmapa ka mathomong a puku. Botša motho yoo gore o tla thabela go mo tlogelela puku ye e botse ka moneelo wa R9,00.
4 Ka morago ga ge re dumedišitše mong wa ntlo yo a amogetšego puku ya “Motho yo a Phagamego,” mo gongwe re ka re:
◼“Bjalo ka ge ke boletše ketelong ya-ka e fetilego, puku ya Motho yo a Phagamego e rulaganyeleditšwe thuto ya Beibele. Ke tla rata go bontšha ka boripana kamoo e ka dirišwago ka gona ka mo go holago.” Phetla pukung go kgaolo 1 e rego, “Melaetša e tšwago Legodimong.” Lebiša tlhokomelo ya mong wa ntlo dipotšišong tšeo di gatišitšwego. Bala potšišo ya pele ke moka le bale dirapa tša mathomo. Kgokaganya taba le seswantšho se se lego letlakaleng la bobedi. Ahla-ahla dipotšišo tše di šetšego gomme o gatelele dikarabo ge e ba nako e dumela. Pele o ruma ketelo, rulaganyetša go boa gomme o tšwetše poledišano pele.
5 Ka go ba le kgopolo e nepagetšego, go lokišetša gabotse le go diriša sebaka se sengwe le se sengwe ka mo go holago, re tla ba bao ba hlamilwego gabotse bakeng sa go thoma thuto ya Beibele ka December.