Pampišana e Lego Nakong ya Kingdom News Yeo e Swanetšego go Phatlalatšwa Lefaseng ka Bophara
1Ka Sontaga, April 23, go tla neelwa polelo e kgethegilego ya phatlalatša yeo e nago le sehlogo se se tanyago se se rego “Bofelo bja Bodumedi bja Maaka bo Kgaufsi.” Bofelong bja diboka tša letšatši leo, go tla lokollwa pampišana e šikinyago monagano ya Kingdom News ya matlakala a mane. Molaetša o lego nakong woo e o swerego o tla phatlalatšwa lefaseng ka bophara ka nako ya dibeke tše tharo go thoma ka April 24 go fihla ka May 14.
2Batho ba gakanegile dikarolong ka moka tša lefase. Go sa šetšwe gore ba dula kae, ba hlaselwa ke mathata. Pampišana ya Kingdom News e tla ba e kgahlišago kudu go bao ba tshwenyegilego e le ka kgonthe ka seo se diregago, ka ge e tla ba lebiša Lentšung la Modimo bjalo ka mothopo o botegago wa tlhahlo bakeng sa batho. (Ps. 119:105) Ka moka ga rena re lebeletše pele go hwetšeng kopi ya pampišana ya Kingdom News ge e lokollwa ka April 23. Ka nako e swanago, go na le go gontši mo go swanetšego go dirwa go lokišeletšeng lesolo le le matla la dibeke tše tharo.
3Kgothaletša Bohle go Tšea Karolo ka Mafolofolo: Ke mang a tlago go tšea karolo modirong? Ga go na pelaelo ya gore yo mongwe le yo mongwe yo e šetšego e le mogoeledi o tla fagahlela go dira bjalo! Go thwe’ng ka barutwana ba Beibele bao ba bago gona ka mehla dibokeng? Ba bangwe ba be ba dutše ba kopanela le rena ka nako e telele gomme ba dira tšwelopele ka go se kgaotše. Ge e ba ba dumelantše maphelo a bona le melao ya motheo ya Mangwalo, na ba swanelegela go ka balwa bjalo ka bagoeledi ba Mmušo? Mogoeledi yo a swarago thuto ya Beibele a ka boledišana le morutwana ka taba, gomme ge e ba morutwana a rata go tšea karolo tirelong ya tšhemo, bagolo ba babedi ba tla ahla-ahla le yena taba e lego go matlakala 98 le 99 a puku ya Go Rulaganyetšwa go Dira Bodiredi bja Rena. Se se swanetše go dirwa kapejana ka mo go ka kgonegago e le gore bao ba swanelegago go ba bagoeledi ba sa kolobetšwago ba ka ba le karolo ka mo go tletšego lesolong. Barutwana ba Beibele bao ba sa hlwago ba swanelegela go ka balwa bjalo ka bagoeledi ba sa kolobetšwago ba sa dutše ba ka kgothaletšwa go abelana pampišana ye e lego nakong ya Kingdom News le batho bao ba ba tlwaetšego goba le ditho tša lapa.—Bona Morokami wa November 15, 1988, letlakala 17, serapa 8.
4Modiro wo ga o thata; yo mongwe le yo mongwe a ka tšea karolo go wona. Batswadi ba ka akaretša mananeo a tlwaetšo ka pampišana ya Kingdom News e le karolo ya beke le beke ya thuto ya lapa ya Beibele, e le gore ditho ka moka tša lapa e ka ba tše di itokišeditšego gabotse go e sepediša ka ntlo le ntlo. Gantši thero e bonolo ke e kaone kudu. Ka morago ga matseno a makopana, nea mong wa ntlo pampišana ya Kingdom News gomme o mo kgothaletše go e bala. Ge beng ba dintlo ba bontšha kgahlego, ngwala e le gore o ka kgona go boa bakeng sa go hlagolela kgahlego. (1 Ba-Kor. 3:6, 7) Senotlelo se se išago katlegong ke go ba le thero e bonolo yeo e lokišeditšwego gabotse.
5Go tla ba le ‘go gontši mo go tla dirwago’ ka April le May. Tokollong ya kgwedi e tlago ya Tirelo ya Rena ya Mmušo, go tla newa tsebišo e oketšegilego pampiring ya ka gare yeo e nago le sehlogo se se rego “Go Dira go Gontši Modirong wa Morena.”—1 Ba-Kor. 15:58, NW.