Tsomang Bao Ba Nago Le Tshekamelo E Swanetšego
1 Morero o mongwe wa modiro wa boboledi ke go hwetša bao ba ‘sekametšego ka mo go swanetšego bophelong bjo bo sa felego.’ (Dit. 13:48, NW) Go aba dimakasine tša Morokami le Phafoga! go ipontšhitše e le tsela e botse kudu ya go phetha se, ka ge dimakasine tša rena di dira batho gore ba phafogele kholofelo ya Mmušo. Re tla be re bolelela dimakasine ka April. Go holofelwa gore mo kgahlego e hwetšwago gona, re ka thoma dithuto tše difsa tša Beibele pukung ya Tsebo e Išago Bophelong bjo bo sa Felego. Ditšhišinyo tše dingwe tšeo mo gongwe di ka go thušago ke tše:
2 Ge o diriša “Morokami” wa April 1, mohlomongwe o ka bolelela “Retang Kgoši ya Bosafelego!,” gomme wa re:
◼“Batho ba bantši bao re boledišanago le bona ba dumela go Modimo. Ba bangwe ba hwetša go le thata go mo dumela. O ikwa bjang? [Dumelela karabo.] Re dikologilwe ke bohlatse bjo bo lego molaleng bjo bo hlatselago gore go swanetše go ba go e-na le Modimo. [Bala Psalme 104:24.] Ge re bona khamera goba computer, re dumela ka go se dika-dike gore e swanetše go ba e tšweleditšwe ke mohlami yo bohlale. Na e tla ba gatlhaologanyo go bolela gore dilo tše di raraganego kudu tše bjalo ka lefase gotee le rena batho, di tšweletše ka kotsi?” Diriša serapa go tšwa sehlogong go bontšha lebaka le le kwalago la go dumela go Modimo. Sepediša dimakasine ka moneelo wa ka mehla.
3 “Morokami” wa April 15 o bolelela sehlogo se se rego, “Lebaka Leo ka Lona Borapedi bja Therešo bo Amogelago Tšhegofatšo ya Modimo.” Pele o o sepediša, o ka botšiša gore:
◼“Ka ge go e-na le madumedi a makgolo-kgolo lefaseng, na o nagana gore ka moka ga ona a ka amogelwa ke Modimo? [Dumelela tlhaloso.] Jesu o boletše e sa pele gore go sa šetšwe dipolelo tša batho ba bantši ba bodumedi, bao ba sa dirego thato ya Modimo ba tla lahlwa. [Bala Mateo 7:21-23.] Ke gabohlokwa gore re hlaole bodumedi bja therešo bjo bo rutilwego ke Jesu.” Phetla sehlogo se se rego, “Bodumedi bja Therešo bo Swanetše go Enywa Dienywa tša Mohuta Mang?,” seo se thomago go letlakala 16 gomme o ahla-ahle mohlala o tee go bontšha ntlha.
4 Ge o bolelela sehlogo se segolo ka go “Phafoga!” ya May 8, “Nako Yeo Dintwa di ka se Hlwego di E-ba Gona,” mohlomongwe o ka nagana ka gore:
◼“Lekgolong le la nywaga go bile le dintwa tše makgolo-kgolo, go akaretša le dintwa tše pedi tša lefase. Lega go le bjalo, mo e nyakilego go ba baetapele ka moka ba lefase ba bolela gore ba nyaka khutšo. Motho yo mongwe le yo mongwe yo ke mo tsebago o bolela selo se se swanago. Ge e ba yo mongwe le yo mongwe a nyaka khutšo, ke ka baka la’ng ba sa e hwetše? [Dumelela karabo.] O nagana gore go nyakega’ng go rena gore re bone khutšo ya kgonthe lefaseng?” Ka morago ga karabo ya mong wa ntlo, phetla matlakala 8 le 9 gomme o bale ditemana tše bjalo ka Psalme 46:8, 9. Ka go diriša diswantšho le mangwalo a tsopotšwego, bontšha kamoo Mmušo wa Modimo o tlago go tliša khutšo ya lefase ka bophara ka gona yeo e tlago go ba ya ka mo go sa felego. Ke moka sepediša dimakasine ka moneelo wa ka mehla gomme o rulaganyetše go boa.
5 Ge e ba o hwetša ba bantši bao ba rego ba swaregile, mohlomongwe o ka leka se:
◼“Re thabela go thuša batho ba ba phelago maphelo a leema-ema e bile ba hwetša nako e nyenyane ya go nagana ka lehlakore la moya la bophelo. Dimakasine tša rena, e lego Morokami le Phafoga!, di reretšwe go nea tsebišo e kopana mabapi le ditaba tše bohlokwa tše di kgomago wena le lapa la gago. Ke tla rata go go tlogelela dikopi tše gore o di bale.”
6 Kgonthišetša gore o nea bao ba amogelago dimakasine sebaka sa gore le bona ba beeletše makasine o tee goba ka bobedi bja yona. Ba tla holwa e le ka kgonthe ke go bala Morokami le Phafoga! tšeo di tlišago “ditaba tše di lokilego tša selo se sengwe se se kaone.”—Jes. 52:7, NW.