“Tumêlô E Tšwa Xo Kweng”
1 Ge re hwetša motho yo a ‘sekametšego ka mo go swanetšego bophelong bjo bo sa felego,’ go bohlokwa go matlafatša tumelo ya motho yoo ka seo a se kwelego. (Dit. 13:48, NW; Ba-Roma 10:17) Go phetha seo, re swanetše go latelela moo go sepedišitšwego dimakasine gona ka go boela re iša ditokollo tša morago le go boledišana ka mo go oketšegilego. Gape re swanetše go phafogela go sepediša dipeeletšo tša dimakasine tša rena. Lega go le bjalo, gopola ka pakane ya go thoma thuto pukung ya Tsebo e Išago Bophelong bjo bo sa Felego. Ditšhišinyo tše dingwe tšeo mohlomongwe di ka go thušago ke tše:
2 Ge o dira leeto la go boela moo o ahla-ahlilego sehlogo se rego, “Retang Kgoši ya Bosafelego!,” o ka thoma ka tsela ye:
◼“Nakong e fetilego ge re be re boledišana, re ahla-ahlile bjo bongwe bja bohlatse bjo bogolo bjo bo hlatselago gore go na le Modimo yo matla-ohle. Lega go le bjalo, go fo tseba go ba gona ga gagwe ga gwa lekana. Re swanetše go tseba leina la gagwe. O bitša Modimo ka leina lefe? [Dumelela karabo.] Batho ba dimilione ba fo mmitša ‘Morena’ goba ‘Modimo,’ ao e lego maina-ina. Go oketša moo, o nyaka gore re mo tsebe ka leina la gagwe. [Bala Psalme 68:4.] Beibele e re botša go gontši ka Jehofa Modimo, go etša ge go hlaloswa pukung ye.” Bontšha seswantšho go letlakala 29 la puku ya Tsebo gomme o bale mongwalo o hlalosago. Ka morago ga go ahla-ahla dirapa tše tharo tša mathomo go kgaolo 3, o tla be o thomile thuto!
3 Go bao o ahla-ahlilego le bona sehlogo se rego, “Lebaka Leo Bodumedi bja Lefase bo Tlago go Fela ka Lona,” mo gongwe o ka rata go latelela kgahlego ka go bolela gore:
◼“Ka morago ga gore o bale sehlogo, o ka ba o ile wa kgahlišwa ke therešo ya gore re ka se ke ra lebelela madumedi ka moka ka tsela e swanago. Bobedi bodumedi bja therešo le madumedi a maaka a gona. Se se rotoša potšišo e kwalago e rego, Ke borapedi bja bomang bjo Modimo a bo amogelago? Karabo e ile ya newa ke Jesu gomme e hlaloswa pukung ye.” Phetla kgaolo 5 pukung ya Tsebo, gomme o bale serapa 4 go akaretša le Johane 4:23, 24. Ke moka botšiša gore, “Na o tla rata go amogela thuto e sa lefelelwego ya legae ya Beibele?” Ge e ba karabelo e le e botse, phetla kgaolo 1 gomme o thome thuto.
4 Ge e ba kgahlego e be e bontšhitšwe go “Phafoga!” ya May 8, ge o boela mo gongwe o ka leka matseno a bakeng sa go thoma thuto pukung ya “Tsebo”:
◼“Mo gongwe o a gopola gore re bile le poledišano ka ditebelelo tša rena tša gore mafelelong re tla bona lefase le le se nago ntwa. Go thata go akanya ka seo ruri se tlago go ba sona. Se ke seswantšho sa moswantšhi yo mongwe mabapi le lona. [Bontšha seswantšho go matlakala 188-9 pukung ya Tsebo.] Na e be e ka se be mo go kgahlišago go kgona go thabela maemo a? [Phetla matlakala 4-5, bontšha seswantšho gomme o bale lepokisi.] Leina la puku ye le swana le mantšu a Jesu a hwetšwago go Johane 17:3. [Bala.] Ge e ba nka dumelelwa, ke tla rata go go bontšha kamoo puku ye e ka dirišwago ka gona le Beibele ya gago go hwetša tsebo yeo e phološago bophelo.” Ge e ba mong wa ntlo a rata, thoma thuto kgaolong ya mathomo.
5 Ge e ba o kopane le motho yo a bego a swaregile ge o be o etetše la mathomo, mohlomongwe o ka bolela se ge o boela:
◼“Ke be ke go etetše kgaufsinyane gomme ka tlogela dikopi tša dimakasine tša Morokami le Phafoga! Dimakasine tše di aga tlhompho ya go hlompha Beibele le tlhahlo ya yona ya boitshwaro. Ka ge ke nagana gore go bohlokwa go motho yo mongwe le yo mongwe go kwešiša Lentšu la Modimo, ke boile gore ke tle ke go bontšhe selo se sengwe seo se tlago go go thuša go dira bjalo.” Bontšha puku ya Tsebo gomme o šupe go dikagare go letlakala 3. Botšiša gore ke kgaolo efe e kgahlišago kudu, e phetle gomme o thome thuto.
6 Lethabo la rena e tla ba le legolo ge e ba re kgona go ‘bulela ba bangwe mojako o yago tumelong’ e išago bophelong bjo bo sa felego.—Dit. 14:27; Joh. 17:3.