“Fišegelang Mediro E Mebotse” Ka April!

¹ Ngwagola go ile gwa newa bohlatse bjo bogolo kudu ge dikopi tše dimilione tša Kingdom News No. 34 di be di abja lefaseng ka bophara. Bagoeledi ba phuthego le babulamadibogo ka mo go swanago ba ile ba tšea karolo ka phišego modirong wo o tutuetšago. Na o be o le gare ga bona? Ge e ba o be o le gona, ga go na pelaelo gore o thabetše ka mo go tletšego go ba le karolo lesolong leo le makatšago. Bjale o ka ba o ipotšiša gore, ‘modiro o botse’ wo re o boloketšwego lenyaga ke ofe?—Tito 2:14.

² Ka April le mathomong a May re tla thabela go aba kgatišo e kgethegilego ya makasine wa Phafoga!, e lego tokollo ya May 8, 1996 yeo e nago le sehlogo se se rego, “Nako Yeo Dintwa di ka se Hlwego di E-ba Gona.” Ka ge sehlogo se se tla ipiletša go beng ba dintlo ba bantši kudu, re tla phegelela go nea kabo ya dimakasine sebaka se segolo kudu. Ka baka la bohlokwa bja tsebišo yeo e nago le yona, tokollo ye ya Phafoga! e swanetše go bolelelwa ka April le ka May go fihlela ge disola di fedile.

³ Pakane ya Rena ke Gore Bagoeledi ka Moka ba Tšee Karolo: E tla ba mo go kgothatšago e le ka kgonthe ge e ba mogoeledi yo mongwe le yo mongwe nageng ye a ka tšea karolo modirong wa boboledi ka April. Ka ge re sa dutše re gopola ka Segopotšo sa lehu la Kriste, re tla rata go bontšha e le ka kgonthe tebogo ya rena ya go leboga botho bja Modimo ka go neela “sehlabelo sa theto” ka go lebanya bodireding bja tšhemo.—Ba-Heb. 13:15, PK.

⁴ Boiteko bjo mafolofolo bo swanetše go dirwa bakeng sa go lemoga dinyakwa tša setho se sengwe le se sengwe sa phuthego, e le gore bohle ba ka tšea karolo ka phišego bodireding ka April. (Ba-Roma 15:1) Baswari ba thuto ya puku ba swanetše go tseba ka mo go tletšego ka maemo a bao ba lego dihlopheng tša bona gomme ba nee thušo e šomago ge e ba go nyakega. Na go na le bao ba nyakago senamelwa? Ke mang yo a ka se neago? Na ba bangwe ba na le dihlong goba ba a itšhoga? Na bagoeledi ba nago le phihlelo e ntši ba ka šoma gotee le bona? Go thwe’ng ka bao ba sa kgonego go tšwa ka gae goba bao ba babjago? Na ba ka nea bohlatse ka mogala, ka go ngwala lengwalo goba ka modiro o mongwe o itšego o atlegago?

⁵ Ba bangwe bao ba ilego ba tapa ba be ba dutše ba hwetša kgothatšo ya ka mehla ya moya, gomme ba ka tutueletšwa go ba modirong wa boboledi gape. Lesolo la Phafoga! e kgethegilego le tla ba nea sebaka se sebotse sa gore ba tsošološwe.

⁶ Tlwaetšang Bafsa Gore ba Tšee Karolo: Bana ba bantši ba Dihlatse tša Jehofa ba be ba sepela le batswadi ba bona ka ntlo le ntlo ka nywaga e mentši, le ge ba sešo ba hlankela e le bagoeledi ba sa kolobetšwago. Na gona bjale ke nako ya gore ba thome? Na ba tutueditšwe go tšwa pelong gomme ba itokišeditše go tšea karolo ka mo go nago le morero modirong wa ntlo le ntlo? Dihlogo tša malapa di swanetše go diriša nako thutong ya lapa ya Beibele go thuša bana ba bona ba swanelegago gore ba lokišeletše thero go dumelelana le nywaga ya yo mongwe le yo mongwe le bokgoni. Ba bagolo ba ka kgetha potšišo e šišinyago kgopolo yeo e tsošago kgahlego ya mong wa ntlo gomme ka morago ba bontšhe karabo makasineng. Bana ba banyenyane ba ka nea bohlatse bjo bo atlegago ka mantšu a sego kae feela. Ka mohlala, ba ka kgothaletša mong wa ntlo go “bala makasine o kgethegilego wo o sepedišwago lefaseng ka bophara kgweding ye.” E le karolo ya tokišetšo ya lena ya lapa, kgonthišega gore o akaretša ditšhišinyo tša go fenya dikganetšo tše di tlwaelegilego. O tla hwetša dikgopolo tše dintši tše dibotse pukung ya Go Boledišana. Dinakong tša dijo le dibakeng tše dingwe tše di swanetšego, kgothaletša ditho tša lapa go laodiša diphihlelo tšeo di bilego le tšona tirelong ya tšhemo.

⁷ Barutwana ba Beibele ba ba Swanelegago ba Dira Modiro wo Jesu a o Dirilego: Jesu ga a ka a lekanyetša feela thuto ya gagwe go go neeng tayo ditabeng tša thutatumelo. O ile a sepela le barutwana ba gagwe bodireding gomme a ba ruta kamoo ba ka bolelago ka gona. (Luka 8:1; 10:1-11) Boemo ke bofe lehono? Mo e ka bago dithuto tše 65 000 tša Beibele di swarwa Afrika Borwa le dinageng tša kgaufsi tše di lego ka tlase ga lekala la rena. Ka ntle le pelaelo, bontši bja barutwana ka go kgothatšwa ka mo go swanetšego ba ka gata mogato o latelago tlwaetšong ya bona gomme ba swanelegela go ba bagoeledi ba sa kolobetšwago ka April.

⁸ Ge e ba o swara thuto ya Beibele, ela hloko dipotšišo tše: Na morutwana o bontšha tšwelopele, go dumelelana le nywaga ya gagwe le bokgoni bja gagwe? Na o šetše a thomile go abelana le ba bangwe tumelo ya gagwe ka mo go sa rulaganyetšwago? Na o apara “motho e mofsa”? (Ba-Kol. 3:10) Na o fihlelela ditshwanelego tša bagoeledi ba sa kolobetšwago, tšeo di lokeleditšwego go matlakala 97 go ya go 99 a puku ya Bodiredi bja Rena? Ge e ba o dumela gore o a swanelega, ke ka baka la’ng o sa boledišane le yena ka taba yeo? Barutwana ba bangwe ba nyaka feela taletšo e lebanyago ya gore ba tšee karolo modirong. Ee, ge e ba morutwana a rata, sa pele go tla nyakega gore molebeledi yo a okamelago a rulaganye ka tsela e tlwaelegilego bakeng sa go boledišana le bagolo ba babedi. Ka lehlakoreng le lengwe, selo se sengwe se ka ba se thibela morutwana. Mohlomongwe yo mongwe wa bagolo a ka sepela le wena thutong ya Beibele gomme a dira gore morutwana a ntšhe sa mafahleng a gagwe ge e le ka maikwelo a gagwe mabapi le therešo. Ka morago ga go theetša seo morutwana a tlago go se bolela, mogolo a ka kgona go nea ditšhišinyo tše di šomago gotee le thušo ya Mangwalo.

⁹ ‘Rekang Nako’ ya Bobulamadibogo bja go Thuša: Ngwaga o mongwe le o mongwe sehleng sa Segopotšo, tebogo ya go leboga topollo e tutueletša ba dikete go ‘reka’ nako ya go ba babulamadibogo ba go thuša. (Ba-Ef. 5:15-17, bapiša le NW.) Le ge boikgafo bjo bo itšego bo nyakega, meputso ke e megolo. Palo e kgahlišago ya bafsa e diriša maikhutšo a sekolo ka mo go holago bakeng sa bobulamadibogo bja go thuša. Batho ba bagolo bao ba šomago ka nako e tletšego ba diriša mantšiboa le mafelo-beke ka mo go holago kudu modirong wona wo. Ka go rialo, malapa ka moka a ile a tšea bobulamadibogo bja go thuša a le gotee! Diphuthegong tše dingwe bontši bja bagolo le bahlanka ba bodiredi gotee le basadi ba bona ba ngwadišitše e le babulamadibogo ba go thuša. Ba tutueditšwe ke mohlala wa bona wa phišego, ba bangwe ba ile ba dira sona seo, e le gore palo e kgolo ya phuthego e hlankele e le babulamadibogo ba go thuša ka April.

¹⁰ Go sa šetšwe gore o kgona go tsenela bobulamadibogo bja go thuša goba ga o kgone, tsoma ditsela tša go oketša tirelo ya gago tšhemong ka April. Ipeele pakane yeo e tlago go nyaka boiteko bjo itšego bjo bo kgonegago, eupša e le e ka fihlelelwago. Kganyogo ya gago ya go “ikxafa ka [go] ipheletša” tirelong ya Jehofa go ya ka maemo a gago a motho ka noši, e tla šegofatšwa ke yena.—2 Ba-Kor. 12:15.

¹¹ Diboka tša Tirelo ya Tšhemo: Diboka tša tirelo ya tšhemo di swanetše go rulaganyetšwa letšatši le lengwe le le lengwe la lesolo la Phafoga!, ka nako yeo e tlago go dumelela gore go thongwe e sa le ka pela bodireding. Go swanetše go dirwa le tokišetšo ya go nea bohlatse mantšiboa. Bagoeledi ba bantši ba tla tšea karolo tirelong ya tšhemo mafelo-bekeng, ka gona diphuthego di swanetše go rulaganya diboka tša tirelo ya tšhemo ka Mekibelo, mesong gotee le mathapama bakeng sa nako ya kabo e kgethegilego ya Phafoga!

¹² Bao ba swarago diboka tša tirelo ya tšhemo ba swanetše go bona gore go na le tšhemo e ntši. Tšhemo yeo e sa šongwago morago bjale e swanetše go akaretšwa pele. Lega go le bjalo, tšhemo e sa abjago yeo e hlokomelwago ke Mokgatlo ga se ya swanela go šongwa ka ntle le tumelelo ya Mokgatlo. Na o na le tšhemo e tee goba tše oketšegilego tša motho ka noši tšeo di sa hlwago di akaretšwa morago bjale? Ge e ba o tla nyaka thušo ya go di šoma nakong ya lesolo, bolela le molebeledi wa tirelo goba ngwanabo rena yo a hlokomelago tšhemo gomme ba tla thabela go go rulaganyeletša thušo e itšego.

¹³ O tla Sepediša Dimakasine tše Kae? Potšišo yeo ke ya motho yo mongwe le yo mongwe gore a e arabe. Mabapi le go dira phetho ya gore ke dimakasine tše kae tšeo o ka di sepedišago nakong ya lesolo, nagana ka mohuta wa tšhemo yeo o tla bego o e šoma, nywaga ya gago, bophelo bja mmele, nako yeo o ka e dirišago modirong le mabaka a mangwe. Lega go le bjalo, ela hloko kgopotšo yeo e neilwego tokollong ya Morokami ya January 1, 1994, e rego: “E le keletšo feela, bagoeledi mo gongwe ba ka ba le pakane ya mo e ka bago go sepediša dimakasine tše 10 ka kgwedi go ithekgile ka maemo a bona; babulamadibogo ba ka katanela tše 90.” Na pakane e swanago e tla ba ya kgonthe go wena?

¹⁴ Bagolo—Go Nyakega Thulaganyo e Botse: Ge e ba go kgonega, kgonthišetšang gore tšhemo ka moka ya phuthego e tla šongwa ka tokollo e kgethegilego ya Phafoga! Go swanetše go lebišwa tlhokomelo e kgolo ya go šoma tšhemo le ge e le efe ya kgwebo yeo e abetšwego phuthego. Bao ba e šomago ba swanetše go lokišetša gabotse gomme ba apare ka bothakga. Thero e telele ga e nyakege. Ge o batamela rakgwebo, o ka bolela gore gantši ga o kopane le bo-rakgwebo ka gae, ka gona o etela lefelo la gagwe la kgwebo bakeng sa go bolelela sehlogo seo se tlago go mo kgahla e le ka kgonthe. Ke moka o ka hlalosa ka boripana ntlha e kgethegilego ka makasineng. Go nea bohlatse setarateng ka dimakasine le gona go swanetše go rulaganywa ka tshwanelo tšhemong ya phuthego. Tsela e atlegago kudu ya go ba le karolo modirong wa setarata ke go gata mogato pele gomme o batamele bafeti-ka-tsela, go e na le go letela gore ba go batamele. Ka ge le tla be le bonwa ke batho bohle, le swanetše go ikwa le e-na le ponagalo e hlomphegago. Go ka ba go e-na le mafelo a mangwe tšhemong ya lena ao a ka šongwago nakong ya lesolo a bjalo ka maema-fofane, dipetlele, mafelo a go phaka dikoloi, diphaka le mafelong a go hlokomela batšofadi goba dikoka. Sehlopha sa bagolo se swanetše go dira phetho ya gore ke dithulaganyo dife tšeo di ka dirwago bakeng sa go nea bohlatse mafelong a a tšhemo ya phuthego ya lena.

¹⁵ Jehofa ke mošomi yo a sa lapego. (Joh. 5:17) O bopile magodimo le lefase gotee le dimela le diphoofolo; eupša o ile a tšwela pele go šoma go fihlela a be a bopa sebopiwa sa gagwe se se thopilego sefoka lefaseng—e lego motho. Therešo ya gore re na le bophelo ke mafelelo a lebanyago a go rata ga Modimo go šoma. Ka ge re le “baetši ba Modimo,” re swanetše go tutueletšwa ke lerato la rena la go mo rata gore re be ba “fišegelago mediro e mebotse.” (Ba-Ef. 5:1; Tito 2:14, PK) Ka ge Jehofa a swanelwa ke go hwetša boiteko bja rena bjo bo kaone-kaone le ka ge kganyogo ya go hwetša meputso e le semelo sa yo a fišegago, re swanetše go thabela go dira modiro o mobotse bodireding. Ee, Jehofa o leboga sehlabelo le ge e le sefe seo re mo direlago sona gomme modiro wa rena le ka mohla ga se wa lefela. (1 Ba-Kor. 15:58) Ka gona, ka dipelo tše di thabilego, anke re ikgafeleng modirong wa phišego ka April, re kgodišega ka kamogelo ya Jehofa le tšhegofatšo ya gagwe gotee le ka katlego e humilego!