Ekiša Jehofa Ka Go Hlokomela Ba Bangwe E Le Ka Kgonthe
1 Jehofa Ke Mohlala O Mogolo Kudu Wa Motho Yo A Bontšhago Tlhokomelo Ya Kgonthe Go Ba Bangwe. Ka Ge E Le Mmuši Wa Legohle, O Kgomega Ka Dinyakwa Tša Tlholo Ya Gagwe Yeo E Lego Batho. (1 Pet. 5:7) Jesu O Ile A Kgothaletša Balatedi Ba Gagwe Gore Ba Bonagatše Dika Tša Tatagwe, Yo A Dirago Gore Letšatši Le Hlabele Le Pula E Nele Batho Ba Ba Lokilego Le Ba Ba Sa Lokago. (mat. 5:45) O Ka Ekiša Jehofa Ka Go Bontšha Go Kgomega Ga Kgonthe Ka Ba Bangwe—Ka Go Ba Yo A Itokišeleditšego Go Abelana Molaetša Wa Mmušo Le Motho Yo Mongwe Le Yo Mongwe Yo O Gahlanago Le Yena. Ka Go Ba Yo A Tlwaelanego Gabotse Le Diporoutšha Tšeo Di Tlago Go Dirišwa Bodireding Ka July, O Tla Ba Boemong Bjo Bobotse Bja Go Nea Thušo Ya Moya Go Ba Bangwe. Ditšhišinyo Tše Di Latelago Di Nea Dikgopolo Ge E Le Ka Tsela Yeo Ka Yona O Ka Lokišeletšago Ketelo Ya Pele Gomme Ka Morago Wa Latelela Kgahlego Ka Maeto A Go Boela A Lego Nakong.
2 Ge o bolelela poroutšha ya “Na Modimo Ruri o na le Taba le Rena?” o ka re:
◼“Na o kile wa ipotšiša lebaka leo ka lona Modimo a dumelelago batho gore ba tlaišege ge e ba ruri a e-na le taba le bona? [Dumelela karabo.] Poroutšha ye ga e fo nea karabo e kgotsofatšago ya potšišo ye eupša e bile e bontšha gore Modimo o holofeditše go dirolla tshenyo ka moka yeo motho a e tlišitšego godimo ga gagwe le godimo ga legae la gagwe leo e lego lefase.” Bala serapa 23 go letlakala 27. Bontšha seswantšho seo se lego ka tlase ga sona, gomme o bale Psalme 145:16 go tloga go serapa 22. Sepediša poroutšha ka R1,00. Ge e ba e amogelwa, botšiša potšišo yeo e ka arabjago ketelong e latelago, ya go swana le e rego: “Na o ka rata go tseba kamoo Modimo a tlago go phethagatša morero wa gagwe wa go tlišetša batho ditšhegofatšo gotee le go fetola lefase gore e be paradeise?”
3 Ge o boela go bao o ba sepedišeditšego poroutšha ya “Na Modimo Ruri o na le Taba le Rena?” mo gongwe o ka thoma poledišano e nngwe ka tsela ye:
◼“Ge ke be ke etetše nakong e fetilego, re ile ra ela hloko gore Modimo ruri o na le taba le rena le gore ke morero wa gagwe go dirolla tshenyo ka moka yeo motho a e tlišitšego godimo ga gagwe le godimo ga legae la gagwe leo e lego lefase.” Phetla poroutšha seswantšhong seo se lego go matlakala 2-3 gomme o re: “Re ile ra phetha poledišano ya rena ka potšišo e rego, Modimo o tla phethagatša bjang morero wa gagwe wa go tlišetša batho ditšhegofatšo gotee le go fetola lefase gore e be paradeise? O nagana’ng?” Dumelela karabo. Phetla go letlakala 17, gomme o bale serapa 2 le Daniele 2:44. Ka morago ga moo, bala serapa 12 go letlakala 18. Botšiša mong wa ntlo ge e ba a ka rata go hlahloba le wena karolo 9 ya poroutšha. Ge e ba a ka rata, ithute yona le yena.
4 Matseno ao a ka dirišwago ge go bolelelwa poroutšha ya “Ge Motho yo o mo Ratago a E-hwa” šea. Bontšha letlakala la yona la ka ntle gomme o re:
◼“Lehono re abelana poroutšha ye yeo e tlišeditšego batho ba dimilione bao ba lahlegetšwego ke batho ba ba ba ratago lehung khomotšo le kholofelo. Na o kile wa ipotšiša gore ke kholofelo efe yeo e lego gona bakeng sa bahu? [Dumelela karabo.] Beibele e bolela ka mo go kwagalago ka kholofetšo ya Modimo ya tsogo.” Bala Johane 5:28, 29. Phetla poroutšha gomme o hlalose ka dintlha tšeo di dirilwego go serapa sa mafelelo go letlakala 28 le serapa sa pele go letlakala 31. Bontšha diswantšho tšeo di sepedišanago le tšona. Sepediša poroutšha ka R1,00. O ka lokišeletša tsela ya leeto la go boela ka go botšiša gore, “Re ka kgonthišega bjang gore mafelelong lehu le tla fedišetšwa sa ruri?”
5 Moo o sepedišitšego poroutšha ya “Ge Motho yo o mo Ratago a E-hwa,” mo gongwe o ka rata go diriša thero ye leetong la go boela:
◼“Ge re be re bolela pele, re ile ra ahla-ahla kholofelo e kgahlišago ya tsogo. Poroutšha yeo ke go tlogeletšego yona e hlalosa lebaka leo ka lona re ka kgonthišegago gore mafelelong lehu le tla fedišetšwa sa ruri. Na ga se wa hwetša dikholofetšo tša Modimo e le tše di homotšago le tše di kgodišago?” Dumelela karabo. Ke moka phetla go letlakala 31 ka poroutšheng, gomme o bale serapa sa bobedi le sa boraro gotee le Kutollo 21:1-4. Gatelela tebelelo yeo re nago le yona ya go thabela bophelo ka ntle le go hwa le ka mohla. Go ithekgile ka kgahlego e bontšhitšwego le maemo mo nakong ye, o ka ithapela go nea thuto ya Beibele pukung ya Tsebo goba botšiša potšišo e nngwe gore o bule tsela bakeng sa leeto la go boela le le latelago.
6 Mo gongwe o ka bolela se se latelago ge o neela poroutšha ya “Morero wa Bophelo ke Ofe—O ka o Hwetša Bjang?”:
◼“Batho ba bantši ba ile ba ipotšiša seo morero wa bophelo e lego sona. Ba ile ba ipotšiša gore: ‘Ke ka baka la’ng ke le mo? Ke ya kae? Ke’ng seo bokamoso bo ntshwaretšego sona?’ O nagana gore re ka hwetša kae dikarabo? [Dumelela karabo.] Ela hloko seo Beibele e se bolelago. [Bala Psalme 36:9.] Na ga se mo go kwagalago go phetha ka gore Mmopi wa motho o boemong bjo bokaone kudu bja go ka hlalosa lebaka leo ka lona re lego mo? [Dumelela karabo.] Poroutšha ye e bontšha morero o mogolo woo Modimo a re boloketšego wona.” Phetla go matlakala 20-1, bala mantšu a hlalosago seswantšho, gomme o hlalose ka seswantšho; ke moka o sepediše poroutšha ka R1,00. Ge e ba e amogelwa, botšiša gore: “Re ka kgodišega bjang gore e sa dutše e le morero wa Modimo gore batho ba phele ka mo go sa felego Paradeiseng mo lefaseng?” Rulaganyetša nako ya go boela.
7 Ge e ba poroutšha ya “Morero wa Bophelo ke Ofe—O ka o Hwetša Bjang?” e sepedišitšwe, o ka bolela selo sa go swana le se ge o boela:
◼“Ketelong ya-ka e fetilego, ke ile ka thabela e le ka kgonthe go boledišana le wena ka pono ya Beibele ya gore bophelo bja motho ruri bo na le morero.” Bontšha seswantšho se se lego go letlakala 31 gomme o botšiše gore, “Re ka kgonthišega bjang gore e sa dutše e le thato ya Modimo gore batho ba phele ka mo go sa felego Paradeiseng mo lefaseng?” Bala serapa 3 go letlakala 20. Ahla-ahla dintlha tše di lego ka tlase ga sehlogwana se se rego, “E sa Dutše e le Morero wa Modimo,” go letlakala 21. Phetla go letlakala la ka morago la poroutšha, gomme o bale ka mpho ya thuto ya legae ya Beibele e sa lefelelwego. Rola puku ya Tsebo gomme o ithapele go bontšha kamoo re e dirišago ka gona e le thušo ya go ithuta Beibele.
8 Bodiredi bja rena bo swanetše go bonagatša kgahlego e tšwago pelong yeo re nago le yona go thušeng batho ba dipelo tše di botegago go ‘fihlelela tsebo e nepagetšego ya therešo.’ (1 Tim. 2:4, NW) Ka gona, dira nako thulaganyong ya gago ya tirelo gore o boele go motho yo mongwe le yo mongwe yo o mo sepedišeditšego poroutšha. Go bontšha ga gago go kgomega ga kgonthe ka bona mo gongwe go ka feleletša ka gore o thuše bao ba llago le bao ba hlokofetšego ka baka la makgapha ao a dirwago bodumeding bja maaka gore ba hlaolelwe phologo. (Hesek. 9:4, 6) Gape o tla hwetša lethabo le kgotsofalo tšeo di tlišwago ke go tseba gore o ekiša Jehofa ka go hlokomela ba bangwe e le ka kgonthe.—Bapiša le Ba-Filipi 2:20.