Lenaneo Le Lefsa La Kopano Ya Letšatši Le Le Kgethegilego
1 Sehlogo sa lenaneo le lefsa la kopano ya letšatši le le kgethegilego leo le thomago ka September ke “E-bang Batho ba Rutwago ke Jehofa.” (Joh. 6:45) Thuto ya Modimo e tšwago go Jehofa ka kgonthe e re thuša go phela maphelo a kgotsofatšago. E tšweletša ka go rena tebogo e tseneletšego ya go leboga bohwa bja rena bja moya. Maiteko a rena a go thuša ba bangwe go kwa ditaba tše di lokilego a re dira gore re be ditho tše nago le mohola tša setšhaba. Letšatši le le le kgethegilego la kopano le tla gatelela ditšhegofatšo tšeo di thabelwago ke batho bao ba rutwago ke Jehofa.
2 Lenaneo le tla bapetša ka go fapanya mehola ya thuto ya Modimo le dikotsi tša tshekamelo ya lefase. Re tla bona gabotse kudu kamoo Jehofa a neago ka gona thuto ya maemo a phagamego—thuto e theilwego Lentšung la gagwe, Beibele. Go tla gatelelwa dikarolo tše tharo tša borapedi tšeo go tšona re hwetšago lethabo ka go ba bao ba rutwago ke Modimo. Go oketša moo bafsa ba tla kgothaletšwa go ekiša mehlala e kgethegilego ya Beibele e bjalo ka Dafida le Timotheo le go aga maphelo a bona go dikologa mediro ya moya. Tumelo ya rena e tla tiišwa ge potego e sa kwanantšhego ya batšofadi le yona e gatelelwa. Batho bao ba sa tšwago go ineela bao ba swanelegago ba tla kgona go kolobetšwa. Ba swanetše go tsebiša molebeledi yo a okamelago ka kganyogo yeo letšatši la kopano le sa le ka pele kudu.
3 Polelo ya motheo ya letšatši le le kgethegilego la kopano e na le sehlogo se se rego, “Go Rutwa ke Jehofa go Dira Thato ya Gagwe.” E tla gatelela mabaka ao ka ona ka moka ga rena re swanetšego go tšwela pele re ithuta, gore re tiišwe tumelong le gore re dule re dira tšwelopele. Re tla opeletšwa go ekiša Jehofa ka go ruta ba bangwe therešo e išago bophelong bjo bo sa felego. Diphihlelo tše di agago di tla akaretšwa bakeng sa go bontšha kamoo dipuku tša Mokgatlo di thušitšego ba bantši gore e be bao ba rutwago ke Jehofa. Ditiragalo tše di holago tšeo di phethilwego ke lenaneo la go ruta la Jehofa la lefase ka moka di tla gatelelwa.
4 Dira dithulaganyo tše di lebanego gore o be gona. Kgothaletša bohle ba thabelago gore ba be gona. Lebelela pele go rutweng dilo tše dintši tše dibotse ke Morutiši wa rena yo Mogolo.—Jes. 30:20.