Meneelo Bakeng Sa Modiro Wa Mokgatlo Wa Lefase Ka Bophara E Thekga Katološo
Ka ge go boletšwe e sa le pele go Jesaya 54:2, 3, borapedi bjo bo sekilego bja Jehofa bo tšwela pele bo katologa lefaseng ka moka. Se se akaretša dinaga tše di fapa-fapanego kontinenteng ya Afrika le dihlakahlakeng tša kgaufsi. Nywageng e lesome e fetilego, dithibelo modirong wa Mmušo di ile tša tlošwa mafelong a bjalo ka Angola, Cameroon, Equatorial Guinea, Ethiopia, Madagascar, Malawi, Mozambique le Togo. Dinageng tše le go tše dingwe moo tšhemo e bego e šweufetše bakeng sa puno, baromiwa ba Gilead, dialoga tša Sekolo sa Tlwaetšo ya Bodiredi, ditho tša lapa la Bethele le ba bangwe ba amogetše dikabelo.—Mat. 9:37, 38.
Go molaleng gore koketšego ya barapedi ba therešo mokgatlong wa Jehofa e nyaka gore go agwe makgolo-kgolo a Diholo tše mpsha tša Mmušo. Gape go ile gwa nyakega gore go rulaganyetšwe Diholo tša Kopano le meago e mefsa goba e katološitšwego ya lekala. Go lefelela mediro ye gotee le go dira gore modiro wa Mmušo o dule o tšwela pele, e sego Afrika feela eupša le dikarolong tše dingwe tša lefase le gona go dirišitše meneelo e mentši ya modiro wa Mokgatlo wa lefase ka bophara.
Diswantšho tše di tšerwego le tše di thadilwego matlakaleng a mabedi a pampiri ye ya ka gare di go nea kgopolo ya seo Mokgatlo o bego o dutše o katanela go se phetha tšhemong ya Afrika. Se se bontšhwago ke e mengwe ya meago yeo mo nakong ye e lego gare e agwa le mediro yeo e tlago go thoma kgaufsinyane. Lekala la Afrika Borwa le ile la tsenya letsogo ka mafolofolo go bontši bja mediro ye dinageng tša baagišani.
Ka go hlahloba tšhate ya tirelo ya tšhemo ka go 1996 Yearbook, o ka hwetša seswantšho se sekaone sa seo bagoeledi dinageng tše ba se dirago bodireding. Dikoketšego tše di kgethegilego di diregile dinageng tše dintši, gomme kgonagalo ya kgolo e bonagatšwa dipalong tše di ikgethilego tša bao ba bilego gona Segopotšong. Ge re nagana ka seo se dirwago e le karolo ya modiro wa lefase ka moka wa go bolela ka Mmušo le go dira barutiwa dikontinenteng tše dingwe, se se gatelela go rena tokelo yeo re nago le yona ya go thekga ka tsela e bonagalago motheo wa borapedi bja therešo.—Luka 16:9; 1 Tim. 6:18.
Holo ya Mmušo KwaZulu-Natala, Afrika Borwa, e agilwe ka matšatši a 9
Holo ya Mmušo yeo e agilwego ka mokgwa o seketšago Nigeria
Holo ya Kopano Mozambique, yeo e nago le madulo bakeng sa ba 1500 e tla fetšwa go ya bofelong bja 1996
Meago ya lekala la Mozambique, yeo e tlago go lokela go dulwa seruthwaneng sa 1996
Lekala la Sierra Leone, le rulaganyeditšwe go fetšwa lenyaga
Holo ya Kopano e feditšwego ya marulelo feela Mauritius, gotee le meago ya lekala, yeo e tlago go fetšwa mathomong a 1997
Lekala la Zimbabwe le a agwa
Holo ya Kopano ya marulelo feela le lekala le lefsa di a agwa Senegal
Lekala le lefsa la Kenya, mošate, Nairobi
Lekala la Madagascar, le tla fetšwa kgaufsinyane
Meago ya lekala e akanyetšwago bakeng sa Malawi