Na Re Tla Dira Se Gape?
Boipiletšo bjo Bongwe Gape Bakeng sa Babulamadibogo ba go Thuša
1 Ke eng seo re tla se dirago gape? Na re tla ba babulamadibogo ba go thuša sehleng sa Segopotšo? Pampiri ya ka gare ya Tirelo ya Rena ya Mmušo ya February 1997 e ile ya tanya tlhokomelo ya rena ka sehlogo seo se ngwadilwego ka mongwalo o mokoto se se rego: “Go Nyakega Babulamadibogo ba go Thuša ba 10 000.” Re be re kgodišegile gore le be le tla tšeela boipiletšo bjoo godimo. Ge pego ya tirelo ya March 1997 e be e kgoboketšwa, re ile ra thabišwa ke go bona gore ba 8728 ba be ba ngwadišitše bakeng sa bobulamadibogo bja go thuša! Ge e ba palong yeo re okeletša babulamadibogo ba ka mehla ba 4803 le babulamadibogo ba kgethegilego ba 174 bao ba ilego ba bega kgweding yeo, re hwetša gore 20 lekgolong ya bagoeledi ka moka bao ba lego ka tlase ga lekala la Afrika Borwa ba be ba le tirelong ya bobulamadibogo. Na re tla dira se gape sehleng sa Segopotšo?
2 Re reta ka borutho bohle bao ba ilego ba dira boiteko bjo bo oketšegilego gore ba oketše modiro wa bona wa tirelo ya tšhemo ngwagola. Ka mo go kwagalago, ka moka ga lena le tutueditšwe ke lerato le le se nago boithati la go rata Jehofa Modimo le magagabo lena. (Luka 10:27; 2 Pet. 1:5-8) Bagoeledi bao ba nago le maemo a fapa-fapanego a bophelo ba ile ba bula sebaka bakeng sa bobulamadibogo bja go thuša. Phuthegong e nngwe, bagoeledi ba 51 ba ile ba bula madibogo gotee ka kgwedi e swanago, go akaretša le bontši bja bagolo, mma yo a nago le morwedi wa dikgwedi tše 15, kgaetšedi yo a tlogetšego mošomo wa gagwe gomme a hwetša mošomo wa nakwana gore o mo nee sebaka sa go bula madibogo, le kgaetšedi yo a godilego yo a sa kago a bula madibogo pele. Molebeledi wa tikologo o ngwadile gore: “Boiteko bjo bogolo modirong wa go dira boboledi bo gare bo tšwela pele. . . . Se ga se na tutuetšo feela tšhemong eupša diphuthego di phophoma ka phišego. Banababo rena ba thabela go tsebana gakaone gaešita le go bona mafelelo a mabotse bodireding.”
3 Bafsa le bona ba be ba se ba tlogelwa ngwagola. Mogoeledi yo a sa kolobetšwago wa nywaga e 13 wa United States o be a letetše ka tetelo-kgolo nako yeo ka yona a bego a ka bontšha boineelo bja gagwe go Jehofa. Ka morago ga ge a kolobeditšwe ka February, o ile a ngwala ka kganyogo ya gagwe ya go ba mmulamadibogo wa go thuša ka March: “Ka ge bjale go se na selo seo se ka nthibelago, gatee-tee ke ile ka tsenya kgopelo ya-ka. . . . Diphihlelo tše dintši tše di kgahlišago tše re ilego ra di thabela le gatee di be di ka se be gona ge nkabe e se be ka taletšo ya lena e lerato ya go laleletša go bula madibogo. Ke leboga Jehofa ge ke bile le tokelo ya go ba gare ga ba 100 000 [United States] bao ba ilego ba arabela.” O ile a ipeela pakane ya go dira se gape.
4 Mohlomongwe o bile gare ga ba 8728 bao ba bilego le karolo modirong wa bobulamadibogo bja go thuša ka March e fetilego goba ba 7264 ka April goba ba 4564 ka May. Na o tla dira seo gape lenyaga? Ge e ba o se wa kgona go bula madibogo ngwagola, na o ka kgona go dira seo lenyaga? Na re ka feta palo ya ba 10 198, bao e bilego babulamadibogo ba go thuša ka April 1990? Yeo e bile palo e kgolo kudu ya babulamadibogo ba go thuša kgweding le ge e le efe e tee dinageng ka moka ka tlase ga lekala la Afrika Borwa.
5 Lebiša Tlhokomelo Kgweding ya April le May: Lenyaga, Letšatši le kgethegilego la Dimakasine le tla ba ka Mokibelo, April 4, gomme Segopotšo se wela go Mokibelo, April 11, e lego seo se dirago gore April e be kgwedi e botse kudu ya modiro o oketšegilego wa bodiredi. (2 Ba-Kor. 5:14, 15) Matšatšing a mathomo a 11 a kgwedi, re tla lebiša tlhokomelo go laletšeng batho ba bantši ba ba thabelago ka mo go ka kgonegago gore ba be gona Segopotšong. Ge e ba o rulaganya go ba mmulamadibogo wa go thuša, hle tsenya kgopelo ya gago e sa le ka pela pele ga letšatši leo o ratago go thoma ka lona.—1 Ba-Kor. 14:40.
6 Ka ge May e e-na le mafelo-beke a mahlano a feletšego, bagoeledi bao ba tsenago sekolo goba bao ba šomago modiro wa boiphedišo ka nako e tletšego ba ka hwetša go le bonolo go ba babulamadibogo ba go thuša kgweding yeo. Ka go rulaganyetša diiri tše lesome tirelong ya tšhemo go a mangwe le a mangwe a mafelo-beke a mahlano, o tla swanelwa ke go rulaganyetša diiri tše dingwe tše lesome feela kgweding gore o fihlelele diiri tše di nyakegago tše 60.
7 Ka April gotee le ka May, re tla be re bolelela dipeeletšo tša Morokami e le mpho ya dipuku. Moo peeletšo e ganwago, sepediša dikopi ka e tee ka e tee tša dimakasine. Se se swanetše go kgothatša ba bantši ba rena ka mo go oketšegilego go katanela go bula madibogo. Ke ka baka la’ng re bolela bjalo? Go nea dimakasine go bonolo gomme ke mo go thabišago go šoma ka tšona bodireding. Di swanela go dirišetšwa dibopegong ka moka tša tirelo—modirong wa ntlo le ntlo le wa lebenkele le lebenkele, gotee le ge re batamela batho setarateng, mafelong a go emiša dikoloi, diphakeng le ka mekgwa e mengwe e sa rulaganyetšwago. Sa bohlokwa kudu, dimakasine tša Morokami le Phafoga! di thekga ditherešo tša Mmušo. Di lebiša tlhokomelo phethagalong ya boporofeta bja Beibele, di bontšha gore Mmušo wa Modimo o a buša. E bile di kgoma maphelo a babadi ka go lebeletšana ka kwešišo le dinyakwa tša kgonthe tša batho. Ge e ba re nagana kamoo bophelo bja rena bo ilego bja kgongwa ka gona ke dimakasine tše tše bohlokwa, re tla tutueletšega go ba le karolo go di abeng ka bophara ka mo go ka kgonegago ka April le May.
8 Ge o lokišetša modiro wo o matla wa dimakasine, o tla holwa ke go boeletša dihlogo tše: “Morokami le Phafoga!—Dimakasine tše di Lego Nakong tša Therešo” (Morokami wa January 1, 1994) “Diriša Dimakasine tša Rena ka mo go Holago” (Tirelo ya Rena ya Mmušo ya September 1995) le “Lokišetša Thero ya Gago ka Noši ya Dimakasine” (Tirelo ya Rena ya Mmušo ya October 1996).
9 Bagolo Etelelang Pele: Go thuša bagoeledi ba bantši bao ba bego ba bula madibogo ngwagola, bagolo phuthegong e nngwe ba ile ba tsebatša Mokibelo o tee mo kgweding e le letšatši le kgethegilego la modiro wa tirelo bakeng sa phuthego ka moka. Go ile gwa dirwa dithulaganyo tša go kopana ka dinako tše mmalwa tše sa swanego ka letšatši, e lego seo se ilego sa nea bohle ka phuthegong sebaka sa go ba le karolo dibopegong tše fapa-fapanego tša go nea bohlatse. Tšona di ile tša akaretša go šoma mafelong a kgwebo, go nea bohlatse setarateng, go etela ka ntlo le ntlo, go dira maeto a go boela, go ngwala mangwalo le go nea bohlatse ka mogala. Karabelo e bile e botse, e lego moo bagoeledi ba 117 ba ilego ba tšea karolo tirelong ya tšhemo letšatšing leo. Ba ile ba diriša palo-moka ya diiri tše 521 bodireding gomme ba sepediša palo-moka ya dimakasine, diporoutšha le dipuku tše 617! Lethabo la Mokibelo woo le ile la fetela go Sontaga, mo go bilego le palo e kgolo kudu Polelong ya Phatlalatša le Thutong ya Morokami.
10 Sebokeng se sengwe le se sengwe sa Tirelo ka April le May, phuthego e swanetše go gopotšwa ka nako le moo diboka tša tirelo ya tšhemo di tlago go swarelwa gona bekeng e latelago, kudu-kudu ge e ba go dirilwe dithulaganyo tše dingwe tše oketšegilego go e na le dithulaganyo tša ka mehla. Babulamadibogo ba ka mehla gotee le bagoeledi bao e sego babulamadibogo ba go thuša ba kgothaletšwa go thekga dithulaganyo tše tša sehlopha ge maemo a bona a dumela.
11 Molebeledi wa tirelo o tla swanelwa ke go kopana le ngwanabo rena yo a abago mašemo bakeng sa go dira dithulaganyo tša gore go šongwe mašemo ao a sa akaretšwego ka mehla. Tlhokomelo e oketšegilego e ka lebišwa magaeng ao go ona go se nago motho le go neeng bohlatse ditarateng le ka lebenkele ka lebenkele. Go ka gatelelwa le go nea bohlatse mantšiboa. Go swanetše gore go otarwe disola tše oketšegilego tša dimakasine bakeng sa April gotee le May e le ge go letetšwe modiro o oketšegilego.
12 Bagoeledi ba Bantši ba ka Swanelega: Lefoko la pele kgopelong ya bobulamadibogo bja go thuša le re: “Ka baka la lerato la-ka la go rata Jehofa le kganyogo ya-ka ya go kganyoga go thuša ba bangwe gore ba ithute ka yena le merero ya gagwe e lerato, ke rata go oketša go ba ga-ka le karolo tirelong ya tšhemo ka go ngwadiša ke le mmulamadibogo wa go thuša.” Go rata Jehofa le go nyaka go thuša ba bangwe moyeng ke motheo wa boineelo bja rena. (1 Tim. 4:8, 10) E le gore a swanelegele go ba mmulamadibogo wa go thuša, motho o swanetše go kolobetšwa, a be le boemo bjo bo botse bja boitshwaro, gomme a be boemong bja go neela diiri tše 60 bodireding ka kgwedi. Ge ka moka ga rena re hlahloba maemo a rena, na ba bangwe ba rena bao ba sa kago ba bula madibogo le ka mohla ba ka dira bjalo lenyaga ka April goba May?
13 Ba bantši ka diphuthegong ba ka lemoga gore le bona ba ka kgona go bula madibogo ge ba bona ba bangwe bao ba nago le maemo a swanago ba ngwadiša. Bana ba sekolo, batho ba ba godilego, bao ba šomago mošomo wa boiphedišo ka nako e tletšego, go akaretša bagolo le bahlanka ba bodiredi gotee le ba bangwe e ile ya ba babulamadibogo ba go thuša ka mo go atlegilego. Mma wa lapa yo e bilego e le mmago bana ba babedi yo a šomago mošomo wa nako e tletšego o ile a fihlelela diiri tše 60, a sepediša dimakasine tše 108 gomme a thoma dithuto tša Beibele tše 3 kgweding e tee ya ge e be e le mmulamadibogo wa go thuša. O ile a dira se bjang? O ile a dirišetša iri ya gagwe ya nako ya go khutša go nea bohlatse tšhemong ya kgaufsi, o ile a nea bohlatse ka go ngwala mangwalo, a nea bohlatse mafelong a go emiša dikoloi le setarateng. Gape o be a diriša letšatši la gagwe la go se be mošomong beke e nngwe le e nngwe ka mo go holago ka go kopanela le phuthego tirelong ya tšhemo. Gaešita le ge mathomong a be a nagana gore bobulamadibogo bja go thuša e be e le pakane e sa fihlelelegego, ka kgothatšo e tšwago go bagolo le ka thulaganyo e šomago, mapheko a ile a fenywa.
14 Jesu o ile a kgonthišetša barutiwa ba gagwe gore: “Yoko ya-ka xa e robe, morwalô wa-ka ké o bohwefê.” (Mat. 11:30) Leo e be e le leina la sehlogo se se kgothatšago seo se tšweletšego ka go Morokami wa August 15, 1995. Se bolela ka kgaetšedi yo a bego a šoma mošomo wa nako e tletšego wa boiphedišo o gateletšago kudu. Na o be a nagana gore bobulamadibogo bja go thuša bo be bo ka se kgonege go yena? Aowa. Ge e le gabotse, o ile a kgona go ba mmulamadibogo wa go thuša kgwedi e nngwe le e nngwe. Ka baka la’ng? Ka gobane o be a e-kwa gore go bula madibogo ge e le gabotse go be go mo thuša go kgomarela teka-tekano. Go thuša batho ge ba dutše ba ithuta therešo ya Beibele le go ba bona ba fetola maphelo a bona gore ba hwetše kamogelo ya Modimo e be e le mothopo o mogolo kudu wa lethabo bophelong bja gagwe bja leema-ema.—Die. 10:22.
15 Boikgafo le ge e le bofe bja motho ka noši le ditokišo tšeo motho a swanelwago ke go di dira e le gore a bule madibogo di putswa kudu ka ditšhegofatšo tšeo a di thabelago. Kgaetšedi o ngwadile ka phihlelo ya gagwe ka bobulamadibogo bja go thuša ka gore: “Bo nthušitše go tlošeng kgopolo ya-ka go naganeng ka nna le go beng yo a lebišitšego tlhokomelo go thušeng ba bangwe. . . . Ke bo kgothaletša bao ba ka kgonago.”
16 Go Nyakega Thulaganyo e Botse: Letlakaleng la mafelelo la pampišana ye ya ka gare, re tšweleditše gape dithulaganyo tša mohlala tšeo di tšweletšego ka go Tirelo ya Rena ya Mmušo ya February 1997. Mohlomongwe e nngwe ya tšona e swanela maemo a gago. Ge o dutše o di boeletša, nagana ka tsela ya gago ya ka mehla ya modiro wa kgwedi le kgwedi. Ke mediro efe ya ka gae yeo e ka dirwago e sa le pele, pele ga ge o bula madibogo goba yeo e ka beelwago ka thoko ka nakwana go ba go fihlela ka morago ga moo? Na e nngwe ya nako yeo o e dirišago boithabišong, boitapološong goba dibopegong tše dingwe tša go itloša bodutu di ka tlogelwa? Go e na le go lebelela palo-moka ya diiri tše 60 tšeo di nyakegago, rulaganya thulaganyo ya gago motheong wa letšatši le letšatši goba wa beke le beke. Go nyakega feela diiri tše 2 ka letšatši goba diiri tše 15 ka beke go mmulamadibogo wa go thuša. Lebelela thulaganyo ya mohlala, gomme o bone seo o ka se rulaganyago ge e le ka thulaganyo ya motho ka noši yeo e go swanelago gabotse kudu gotee le lapa la gago, gomme o e thale ka phentshele.
17 Karabelo e botse le thekgo e oketšegilego yeo phuthego e ilego ya e bontšha bakeng sa bodiredi ngwagola e ile ya matlafatša phišego ya mmulamadibogo wa ka mehla yo a ilego a ngwala gore: “Ke leboga kudu kgothatšo ya lena e lerato ya go dira boiteko bjo bo oketšegilego go thekga bobulamadibogo bja go thuša. . . . Dithulaganyo tša lena tše šišintšwego di thušitše ba bantši bao ba sa ka go ba bula madibogo le ge e le neng pele gore ba bone gore ba ka kgona. . . . Ke thaba kudu go ba karolo ya mokgatlo wa Jehofa le go latela boetapele bjo bo thabišago bjo lerato bja molaki yo a botegago le yo bohlale.”
18 Diema 21:5 e re kgonthišetša ka gore: “’Kelêllô tša serôtô di iša mokhoreng; e a pôtlakaxo ó y’o hlôka.” Diema 16:3 e re kgothatša ka gore: “Xafêla Morêna medirô ya xaxo ka moka; ké mo merêro ya’xo e tl’o xo phêthêxa.” Ee, ka go akaretša Jehofa ka thapelo phethong ya rena le ka go ithekga ka yena ka mo go tiilego gore a re thuše go atlega, re ka kgodišega ka dithulaganyo tša rena tša go ba babulamadibogo ba go thuša. Mohlomongwe ka morago ga go bona kamoo thulaganyo ya rena e šomago gabotse ka gona lebakeng la kgwedi goba tše pedi re le babulamadibogo ba go thuša, re tla kgona go swaya lepokisi kgopelong ya bobulamadibogo bja go thuša leo le balegago ka gore: “Swaya mo ge e-ba o rata go hlankela ka mo go tšwelago pele o le mmulamadibogo wa go thuša go ba go fihla ka nako e sa tsebjego.” Lega go le bjalo, re ka lebelela pele go beng babulamadibogo ba go thuša gape ka August, ge go tla be go e-na le mafelo-beke a mahlano a tletšego. Ge re phetha ngwaga wa tirelo ka August, go tla dirwa boiteko bjo bo rulagantšwego bakeng sa gore yo mongwe le yo mongwe a be le karolo ka mo go tletšego ka mo go ka kgonegago bodireding.
19 Jesu o ile a porofeta ka gore: “E a ntumêlaxo, ó tlo dira medirô ye ke e diraxo, ó tlo dira le e fetišaxo yeo, xobane Nna ke ya xo Tate.” (Joh. 14:12) Ke tokelo e thabišago go rena go hlankela re le badirišani ba Modimo ge boporofeta bjo bo e-ba le phethagalo ya bjona e kgolo. Ye ke nako ya go bolela ditaba tše di lokilego ka phišego e kgolo kudu go feta le ge e le neng pele, re reka nako ya go dira modiro wo. (1 Ba-Kor. 3:9; Ba-Kol. 4:5) Go ba le karolo gantši ka mo go ka kgonegago tirelong ya bobulamadibogo bja go thuša ke tsela e botse kudu ya go dira karolo ya rena re le bagoeledi ba Mmušo. Re letetše ka tetelo-kgolo go bona kamoo kopelo ya theto e tla bago e kgolo ka gona sehleng se sa Segopotšo go tšwa go babulamadibogo ba go thuša. (Ps. 27:6) Ge re nagana ka mafelelo a ngwagola, re ipotšiša gore, ‘Na re tla dira se gape?’ Re kgodišegile gore re tla dira bjalo!
Na o ka ba Mmulamadibogo wa go Thuša?
“Le ge e ba maemo a gago ka nnoši eka ba afe, ruri ge e ba o kolobeditšwe gomme o e-na le boitshwaro bjo bo botse, o ka kgona go rulaganya dilo gore o tle o fihlelele diiri tše 60 tše di nyakegago ka kgwedi bodireding bja tšhemo gomme o dumela gore o ka kgona go šoma kgwedi goba tše oketšegilego o le mmulamadibogo wa go thuša, gona bagolo ba phuthego ba tla thabela go ela hloko kgopelo ya gago bakeng sa tokelo ye ya tirelo.”—Go Rulaganyetšwa go Dira Bodiredi bja Rena, letlakala 114.