Tirelo Ya Bobulamadibogo —Na E Go Swanetše?

¹ “Ga ke gopole ke dira selo le ge e le sefe se sengwe. Ke tloga ke sa nagane ka selo le ge e le sefe seo se ka tlišago lethabo le le swanago.” Ke mang yo a boletšego se? Yo mongwe wa Dihlatse tša Jehofa tše makgolo a dikete bao ba ilego ba dira bodiredi bja nako e tletšego modiro wa bona o thabišago wa bophelo ka moka. Na o kile wa naganišiša ka thapelo ka taba ya ge e ba tirelo ya bobulamadibogo e go swanela? Ka ge re šetše re ineetše ka mo go feletšego go Jehofa, re swanetše go hlahloba ge e ba re ka ba le karolo ka mo go tletšego go phatlalatšeng ditaba tše di lokilego tša Mmušo. Bakeng sa go fihlelela pakane yeo, hle hlahloba dipotšišo tše dingwe tšeo ba bantši ba di botšišago ka tirelo ya bobulamadibogo.

POTŠIŠO 1: “Ba bangwe ba re go bula madibogo ga se ga yo mongwe le yo mongwe. Nka tseba bjang ge e ba go ntoketše?”

² Karabo e ithekgile ka maemo a gago le boikarabelo bja gago bja Mangwalo. Go na le ba bantši bao boemo bja bona bja tša maphelo goba boemo bja bona bja gona bjale bophelong bo sa ba dumelelego gore ba diriše diiri tše 90 ka kgwedi bodireding. Tšea e le mohlala o tee, dikgaetšedi tše dintši tše di botegago tšeo e lego basadi ba ba nyetšwego ba Bakriste e bile e le bo-mma. Ba ba le karolo bodireding gantši ka mo ba ka kgonago ka gona go fihla moo maemo a bona a ba dumelelago. Ge sebaka se dumela, e ba babulamadibogo ba go thuša kgwedi e tee goba tše oketšegilego ngwaga o mongwe le o mongwe, ba hwetša lethabo le le tlišwago ke go oketša go ba ga bona le karolo tirelong. (Ba-Gal. 6:9) Gaešita le ge maemo a bona a ka se ke a ba dumelela gore ba hlankele e le babulamadibogo ba nako e tletšego mo nakong ye, ba kgothaletša moya wa bobulamadibogo gomme ke tšhegofatšo phuthegong e le bagoeledi ba fišegago ba ditaba tše di lokilego.

³ Ka lehlakoreng le lengwe, banababo rena ba bantši le dikgaetšedi bao ba se nago boikarabelo bjo bokaalo ba itirile gore e be ba hwetšagalago bakeng sa tirelo ya bobulamadibogo ka go beakanya dilo tša bona tšeo di tlago pele. Go thwe’ng ka wena? Na o mofsa yo a phethilego thuto ya sekolo sa lefase? Na o mosadi yo monna wa gagwe a kgonago go fepa lapa ka mo go lekanego? Na o lenyalong eupša o se na bana bao o ba hlokomelago? Na o rotše modiro wa gago wa boiphedišo? Go bula madibogo goba go se bule madibogo ke phetho yeo motho yo mongwe le yo mongwe a swanetšego go itirela yona. Potšišo ke gore, Na o ka bula sebaka bophelong bja gago bakeng sa go bula madibogo?

⁴ Sathane o diriša tshepedišo ya gagwe ya lefase ya dilo bakeng sa go tlatša maphelo a rena ka ditšhitišo le go re nweletša tseleng ya boithati ya bophelo. Ge e ba re ikemišeditše go dula re se karolo ya lefase, Jehofa o tla re thuša gore re etiše dikgahlego tša Mmušo pele e le gore re dire tšwelopele gomme re amogele ditokelo ka moka tša tirelo ya pušo ya Modimo tšeo di re bulegelago. Ge e ba o ka beakanya maemo a gago e le gore o hlankele o le mmulamadibogo, ke ka baka la’ng o sa dire bjalo?

POTŠIŠO 2: “Nka kgonthišega bjang gore ke tla kgona go hlokomela dinyakwa tša-ka tša tša ditšhelete tirelong ya nako e tletšego?”

⁵ Ke therešo gore dinageng tše dintši diiri tša modiro wa boiphedišo tšeo di nyakegago beke e nngwe le e nngwe bakeng sa go hwetša dilo tšeo di lebelelwago e le dinyakwa tša bophelo di oketšegile go theoša le nywaga. Lega go le bjalo, ba bantši ba butše madibogo ka masome-some a nywaga, gomme Jehofa o tšwela pele go ba hlokomela ka tša boiphedišo. Go nyakega tumelo le moya wa boikgafo gore o atlege o le mmulamadibogo. (Mat. 17:20) Go Psalme 34:10 re na le kgonthišetšo ya gore, “ba ba nyakaxo Morêna ba ka se kê ba bá ba hlôka tše di botse.” Yo mongwe le yo mongwe yo a tsenelago tirelo ya bobulamadibogo o swanetše go dira bjalo ka kgodišego e tletšego ya gore Jehofa o tla mo nea dinyakwa tša gagwe. O dira sona seo bakeng sa babulamadibogo ba botegago kae le kae! (Ps. 37:25) Go ba gona, ka go dumelelana le melao ya motheo yeo e lego go 2 Ba-Thesalonika 3:8, 10 le 1 Timotheo 5:8, babulamadibogo ga ba letele gore ba bangwe ba ba hlokomele ka dinyakwa tša tša ditšhelete.

⁶ Mang le mang yo a naganago ka tirelo ya bobulamadibogo o swanetše go dira bjalo ka ge Jesu a boletše gore: ‘Dula o bale tšhelete.’ (Luka 14:28) Go dira se go bontšha bohlale bjo bo šomago. Bolela le bao ba ilego ba bula madibogo ka katlego ka nywaga e mentši. Ba botšiše kamoo Jehofa a ilego a ba thuša ka gona ka tša boiphedišo. Molebeledi wa lena wa tikologo ke mmulamadibogo yo a nago le phihlelo yo a tla thabelago go go nea ditšhišinyo tša kamoo o ka atlegago ka gona bodireding bja nako e tletšego.

⁷ Motho le ka mohla a ka se bone ka mo go tletšego go rereša ga kholofetšo ya Jesu e lego go Mateo 6:33 go fihla ge a ipea ka diatleng tša Jehofa. Mmulamadibogo yo a botegago o laodišitše ka gore: “Ge nna le modirišani wa-ka re be re fihla kabelong ya rena e mpsha re le babulamadibogo, re be re e-na le merogo e sego kae le sephuthelwana se senyenyane sa matšarine, gomme re se na tšhelete. Re ile ra fetša dijo tša go lalela gomme ra re, ‘Bjale ga re na selo bakeng sa ka moswane.’ Re ile ra rapela ka se gomme ra ya malaong. Ka mahube mesong e latelago Hlatse ya lefelong leo e ile ya re etela gomme ya itsebiša ya re, ‘Ke ile ka rapelela gore eka Jehofa a ka romela babulamadibogo. Bjale nka sepela le lena ka nako e ntši ya letšatši, eupša ka ge ke dula motseng wa magaeng, ke tla swanela ke go ja le lena dijo tša mosegare, ka gona ke tlile le dijo tše bakeng sa rena ka moka.’ E be e le nama e ntši ya kgomo le merogo.” Ga go makatše ge Jesu a ile a re kgonthišetša gore re ka kgona go ‘kgaotša go belaelela bophelo bja rena’! Ke moka a oketša ka gore: “[Ke] mang wa lena e a kaxo kxôna xo eketša leêmo la xaxwe ka xo belaêlêla, a kxôna le moêlônyana o tee?”—Mat. 6:25, 27.

⁸ Lefase leo le re dikologilego e ba leo le phegelelago dilo tše di bonagalago ka mo go oketšegilego. Kgateletšo e oketšegago e magetleng a rena. Lega go le bjalo, go ba le tebogo ya boikokobetšo ya go leboga bodiredi bja nako e tletšego go re dira gore re kgotsofalele go phela ka dilo tše tše dinyenyane tše di bonagalago. (1 Tim. 6:8) Babulamadibogo bao ba bolokago bophelo bja bona bo le bonolo e bile bo sa hlaka-hlakana ba na le nako e oketšegilego bakeng sa tirelo gomme ba hwetša lethabo le legolo le matla a moya go ruteng ba bangwe therešo. Gaešita le ge ba sa leke go phela bophelo bja go itima dilo kudu, go lebeletšana ga bona ka teka-tekano le boemo bja bona bja tša boiphedišo go ba dirile gore ba kgone go thabela ditšhegofatšo tša go bula madibogo.

⁹ Ge e ba o lemoga ka mo go tseneletšego gore re phela mehleng ya bofelo le gore lefase le le kgopo le felelwa ke nako, o tla tutuetšega moyeng gore o dire boikgafo bjo bo nyakegago gore o bolele ditaba tše di lokilego ka sebaka se sengwe le se sengwe. Ka go lebelela boemo bja gago bja tša boiphedišo ka lefsa le ka go bea taba diatleng tša Jehofa, o ka lemoga gore o ka mo hlankela ka mo go tletšego. Gaešita le ge e le gore o swanelwa ke go gafa dilo tše dingwe tše di bonagalago tšeo o di nyakago e le gore o bule madibogo, o tla thabela ditšhegofatšo tše humilego tša Jehofa.—Ps. 145:16.

POTŠIŠO 3: “Bjalo ka mofsa yo a lego mahlalagading, ke ka baka la’ng ke swanetše go nagana ka tirelo ya bobulamadibogo e le modiro wa bophelo ka moka wo ke o kgethago?”

¹⁰ Ge o fetša nywaga ya gago e sego kae ya mafelelo ya sekolo, ka tlhago o nagana ka bokamoso. O nyaka gore e be bjo bo šireletšegilego, bjo bo thabišago le bjo bo kgotsofatšago. Baeletši bao ba hlahlago ba sekolo ba ka leka go go tutueletša modiro wa bophelo ka moka wo o lefelelago tšhelete e phagamego wo o nyakago gore o ye kholetšheng ya thuto ka nywaga e mentši. Letswalo la gago le le tlwaeditšwego gabotse la Bokriste le go botša gore o swanetše go lokišetša go hlankela Jehofa ka mo go tletšego ka mo go ka kgonegago. (Mmo. 12:1) Mo gongwe o ka ba o bile o nagana ka gore mafelelong o be lenyalong gomme o be le lapa. O tla dira’ng?

¹¹ Diphetho tšeo o di dirago mo nakong ye bophelong bja gago di ka bopa bokamoso bja gago ka moka. Ge e ba o šetše o le Hlatse ya Jehofa e ineetšego le e kolobeditšwego, o ineetše ka moya ka moka go Jehofa. (Ba-Heb. 10:7) Sebaka sa pele se o se hwetšago, leka bobulamadibogo bja go thuša ka kgwedi e tee goba dikgwedi tše oketšegilego. Se se tla go latswiša lethabo le boikarabelo tšeo di tlišwago ke go ba mmulamadibogo wa ka mehla, gomme pono ya gago ka seo o swanetšego go se dira ka bophelo bja gago ga go pelaelo gore e tla bonagala. Ke moka, go e na le go fo tlatša sekgoba ka modiro wa boiphedišo wa nako e tletšego ka morago ga go fetša sekolong, ke ka baka la’ng o sa thome go ba mmulamadibogo wa ka mehla? Ba bangwe bao ba ilego ba leta go fihlela ge ba godile gore ba thabele tirelo ya bobulamadibogo ba itshola ge ba sa ka ba thoma e sa le ka pela.

¹² Bjalo ka mofsa, diriša dibaka tša gago ka mo go holago bakeng sa go phegelela go se be lenyalong, gomme o thabele mehola yeo go e neago modirong wa go bolela wa nako e tletšego. Ge e ba e le kganyogo ya gago gore o be lenyalong nakong e nngwe, ga go na motheo o mokaone wa lenyalo wo o ka thewago wo o fetago go hlankela pele modirong wa bobulamadibogo bja ka mehla. Ge o dutše o gola ka tsebo le moyeng, mo gongwe o ka kgetha go dira go bula madibogo modiro wa gago wa bophelo ka moka wena gotee le molekane wa lenyalo yo a nago le kgopolo e swanago le ya gago. Banyalani ba bangwe bao ba ilego ba bula madibogo gotee ba ile ba ya modirong wa tikologo goba tšhemong ya boromiwa. A tsela e kgotsofatšago gakaakang ya bophelo!

¹³ Go sa šetšwe gore o tšwela pele nako e kaakang o bula madibogo, o tla be o nabišitše thuto ya gago gomme o amogetše tlwaetšo e bohlokwa kudu-kudu yeo go sego modiro wo o ka e neago lefaseng. Go ba mmulamadibogo go go ruta go ba le boitayo, go ba le thulaganyo ya motho ka noši, go dirišana le batho, go ithekga ka Jehofa le go hlagolela go se fele pelo le botho—e lego dika tšeo di ka go hlamelago go rwala boikarabelo bjo bogolwanyane.

¹⁴ Le ka mohla bophelo ga se ya ka ya ba bjo bo se nago kholofelo bakeng sa batho. Ke dilo tše sego kae tšeo e lego tša go ya go ile e le ka kgonthe, ka ntle le tšeo Jehofa a di holofeditšego. Ka ge bokamoso bja gago e le bjo bo go bulegetšego, ke nako efe e kaone go feta gona bjale yeo e ka hwetšagalago bakeng sa gore o naganišiše ka mo go tseneletšego ka seo o tlago go se dira ka bophelo bja gago nywageng e tlago? Hlahloba ka kelohloko tokelo ya go bula madibogo. Le ka mohla o ka se ke wa itsholela go kgetha tirelo ya bobulamadibogo e le modiro wa gago wa bophelo ka moka.

POTŠIŠO 4: “Na go fihlelela tekanyo ya diiri ga se kgateletšo e sa kgaotšego? Go thwe’ng ge e ba ke e-ba morago ka nako ya-ka?”

¹⁵ Ge o tlatša fomo ya kgopelo ya bobulamadibogo bja ka mehla, o swanetše go araba potšišo e rego: “Na u hlophisitse litaba tsa hao hore u khone ho finyella lihora tse 1000 tse hlokahalang ka selemo?” Gore o e fihlelele, o swanetše go dira palo-gare ya diiri tše e ka bago tše tharo ka letšatši tirelong. Go molaleng gore se se nyaka thulaganyo e botse le boitayo. Babulamadibogo ba bantši ba hlagolela go ba le setlwaedi se se šomago ka lebaka la dikgwedi tše sego kae.

¹⁶ Lega go le bjalo, Mmoledi 9:11 e bolela therešo ge e re, ‘Nako le ditiragalo tše di sa letelwago di re wela bohle.’ Go babja mo go šoro goba maemo a mangwe ao a sa letelwago go ka bakela mmulamadibogo gore a šalele morago. Ge e ba bothata e se bja lebaka le letelele gomme bo tšwelela e sa le ka pela ngwageng wa tirelo, go ka nyakega thulaganyo e pitlaganego gore o fihlelele nako yeo e šaletšego. Eupša go thwe’ng ge e ba go rotoga bothata go šetše dikgwedi tše sego kae feela gore ngwaga wa tirelo o fele gomme mmulamadibogo a ka se kgone go fihlelela pakane ya gagwe?

¹⁷ Ge e ba o babja ka nakwana ka dikgwedi tše sego kae goba ge e ba ka lebaka le lengwe la tšhoganetšo leo le lego ka godimo ga taolo ya gago o ka se kgone go fihlelela diiri tše di nyakegago, o ka batamela setho sa Komiti ya Tirelo ya Phuthego gomme wa hlalosa bothata. Ge e ba bagolo ba nagana gore e tla ba mo go holago gore ba go dumelele gore o tšwele pele ka tirelo ya bobulamadibogo ka ntle le go tshwenyega ka go fihlela nako yeo e lahlegilego, ba ka dira phetho yeo. Mongwaledi o tla swaya karata ya Peho ea Mohoeletsi oa Phutheho go bontšha gore mmulamadibogo a ka se kgone go fihlelela pakane ya gagwe ya nako yeo e šaletšego. Ye ga se tumelelo ya gore o se be gona eupša go e na le moo, ke go naganela maemo a gago ka mo go kgethegilego.—Bona pampiri ya ka gare ya Tirelo ya Rena ya Mmušo ya August 1986, serapa 18.

¹⁸ Babulamadibogo ba ba nago le phihlelo ba šoma diiri tše oketšegilego mathomong a ngwaga wa tirelo. Tirelo ya bona ya bobulamadibogo e tla pele, ka gona ka dinako tše dingwe ba hwetša go swanetše gore ba fokotše mediro yeo e sego bohlokwa. Ge e ba mmulamadibogo a šalela ka baka la thulaganyo yeo e sego botse goba go se be le boitayo tabeng ya go e kgomarela, o swanetše go kwa gore ke boikarabelo bja gagwe go šomela go fihlelela nako yeo e senyegilego gomme a se ke a letela go naganelwa ka mo go kgethegilego.

¹⁹ Go na le dinako tšeo mmulamadibogo a lebeletšanago le phetogo yeo e sa phemegego maemong a gagwe. A ka hwetša gore ga a kgone go fihlelela diiri tšeo di nyakegago ka nako e telele ka baka la bothata bjo bo tšwelago pele bja tša maphelo goba bothata bjo bo oketšegilego bja lapa le tše dingwe. Tabeng ye, tsela ya bohlale e tla ba go boela go beng mogoeledi gomme o be le karolo neng le neng ge go kgonega tirelong ya bobulamadibogo bja go thuša. Ga go na tokišetšo ya ka mehla ya go dumelela motho gore a dule lelokelelong la babulamadibogo ge e ba maemo a gagwe a se sa hlwa a mo dumelela go fihlelela diiri tše di nyakegago.

²⁰ Re holofela gore tokišetšo ya go nea tlhokomelo e kgethegilego go bao ba swanelegago e tla kgothaletša ba oketšegilego gore ba ngwadišetše tirelo ya bobulamadibogo ka ntle le go tshwenyega ka mo go sa nyakegego. Gape e swanetše go kgothaletša bao ba šetšego ba le tirelong ya nako e tletšego gore ba tšwele pele ba bula madibogo. Re rata gore babulamadibogo ba atlege tirelong ya bona ya nako e tletšego.

POTŠIŠO 5: “Ke nyaka go phethagatša selo se sengwe gomme ke thabele go se dira. Na tirelo ya bobulamadibogo e tla nkgotsofatša?”

²¹ Lethabo la kgonthe le ithekgile kudu ka go ba le tswalano ya kgaufsi ya motho ka noši le Jehofa le kgodišego ya gore re mo hlankela ka potego. Jesu o ile a kgotlelela kota ya tlhokofatšo “ka baka la thabo e a e beetšwego ka pele.” (Ba-Heb. 12:2, PK) Lethabo la gagwe le ile la tlišwa ke go dira thato ya Modimo. (Ps. 40:8) Tshepedišong ya gona bjale ya dilo, re ka thabela lethabo la kgonthe ge e ba bontši bja mediro ya rena ya bophelo e tswalana le borapedi bja rena bja Jehofa. Go phegelela dilo tša moya go re nea maikwelo a go ba le morero ka gobane pelong ya rena re a tseba gore re dira seo se lokilego. Lethabo le tlišwa ke go nea, gomme ga go tsela ya go ikgafa yeo re e tsebago yeo e phalago go ruta ba bangwe kamoo ba ka hwetšago bophelo bjo bo sa felego lefaseng le lefsa la Modimo.—Dit. 20:35.

²² Mmulamadibogo yo a tsopotšwego serapeng sa mathomo o hlalositše se ka tsela ye: “Na go ka ba le lethabo le ge e le lefe le legolo go feta go bona motho yo o ithutago le yena e e-ba moreti yo mafolofolo wa Jehofa? Ke mo go thabišago le mo go matlafatšago tumelo go bona kamoo Lentšu la Modimo le lego matla ka gona go tutuetšeng batho gore ba dire diphetogo maphelong a bona e le gore ba kgahliše Jehofa.” (Bona Morokami wa October 15, 1997, matlakala 18-23.) Ka gona, ke’ng seo se go tlišetšago lethabo? Ge e ba o tšeela godimo maiteko a ka mo go sa felego le ao e lego a bohlokwa go e na le boipshino bja nakwana bjo bo newago ke lefase, bobulamadibogo bo tla go nea maikwelo a kgahlišago a gore o phethagatša se sengwe ao a tlago go go dira gore o thabe e le ka kgonthe.

POTŠIŠO 6: “Ge e ba e se bjo bo nyakegago bakeng sa bophelo bjo bo sa felego, na ga se boikgethelo bja-ka gore ke bula madibogo goba ga ke bule madibogo?”

²³ Ke therešo gore ke wena yo a swanetšego go itirela phetho ya go bula madibogo. Ke Jehofa a nnoši a ka ahlolago maemo a gago ka noši a bophelo. (Ba-Roma 14:4) O go letetše ka mo go swanetšego gore o mo hlankele ka pelo, moya, monagano le matla a gago ka moka. (Mar. 12:30; Ba-Gal. 6:4, 5) O rata yo a neago a thabile, yo a mo hlankelago a thabile, e sego ka go se rate goba ka go gapeletšwa. (2 Ba-Kor. 9:7; Ba-Kol. 3:23) Lebaka la gago la go hlankela ka nako e tletšego e swanetše go ba gore o rata Jehofa le batho tšhemong. (Mat. 9:36-38; Mar. 12:30, 31) Ge e ba ye e le tsela yeo o ikwago ka yona, gona o swanelwa ke go naganišiša ka mo go tseneletšego ka tirelo ya bobulamadibogo.

²⁴ Re holofela gore seo se hlalositšwego mo se tla go thuša go hlahloba ditebelelo tša gago ka go bula madibogo. Na o ka beakanya maemo a gago gore o tle o be mmulamadibogo wa ka mehla? Ka mo tlase go gatišitšwe almanaka yeo e nago le sehlogo se se rego, “Thulaganyo Ya-ka ya Beke le Beke ya Tirelo ya Bobulamadibogo.” Bona ge e ba o ka itlaletša thulaganyo e šomago yeo e tla go dumelelago go šoma palogare ya diiri tše 23 beke e nngwe le e nngwe bodireding. Ke moka, o bee tumelo ya gago e tletšego le kholofelo go Jehofa. Ka thušo ya gagwe o ka atlega! O holofeditše gore: “[Ke tla] bula nthoba tša lexodimo ka Le thšollêla thšexofatšô wa xo tlo Le xolêla.”—Mal. 3:10.

²⁵ Ka gona re a botšiša, “Tirelo ya bobulamadibogo—na e go Swanetše?” Ge e ba o ka re “Ee,” bea letšatši la go thoma go bula madibogo kgaufsinyane gomme o kgodišege gore Jehofa o tla go šegofatša ka bophelo bja lethabo!

Thulaganyo Ya-ka ya Beke le Beke ya Tirelo ya Bobulamadibogo

MOŠUPOLOGOLABOBEDILABORAROLABONELABOHLANOMOKIBELOSONTAGA

MesongMesongMesongMesongMesongMesongMesong

tirelo yatšhemotirelo yatšhemotirelo yatšhemotirelo yatšhemotirelo yatšhemotirelo yatšhemotirelo yatšhemo

ThapamaThapamaThapamaThapamaThapamaThapamaThapama

tirelo yatšhemotirelo yatšhemotirelo yatšhemotirelo yatšhemotirelo yatšhemotirelo yatšhemotirelo yatšhemo

MantšiboaMantšiboaMantšiboaMantšiboaMantšiboaMantšiboaMantšiboa

tirelo yatšhemotirelo yatšhemotirelo yatšhemotirelo yatšhemotirelo yatšhemotirelo yatšhemotirelo yatšhemo

Diriša phentshele go bega thulaganyo ya gago ya letšatši le lengwe le le lengwe la beke.

Rulaganya palo-moka ya diiri tše e ka bago tše 23 beke e nngwe le e nngwe tirelong ya tšhemo. Thulaganyo ya palo-moka ya diiri tša beke le beke ____________________