Ditsela tša go Oketša Bodiredi bja Gago

¹ Nywaga e 40 e fetilego, sehlogo se se rego, “Na o Dira Sohle se se Lego Matleng a Gago?” se ile sa tšwelela ka go Morokami (wa Seisemane) wa January 15, 1955. Se ile sa bolela ka lerato kamoo go ka kgonegago ka gona gore batho ba Jehofa ba kaonefatše boiteko bja bona bja motho ka o tee ka o tee bodireding e le gore ba ka oketša modiro wa bona wa Mmušo. Keletšo yeo e botse e sa šoma le lehono, ge re dutše re tšwela pele re kaonefatša.

² Tirelo ya rena ka moka e swanetše go tutuetšwa ke molao o phagamego kudu o rego: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka, le ka matla a xaxo ka moka.” (Mar. 12:30) Re bontšha lerato la rena le le feletšego la go rata Jehofa ka go diriša ka mo go tletšego dibaka tšeo di re bulegelago tša go tšwetša pele modiro wa gagwe wa Mmušo. Ela hloko ditsela tše di latelago tšeo o ka oketšago bodiredi bja gago ka tšona.

³ Rwala Boikarabelo bja Gago: Banababo rena bao ba ineetšego ba ka katanela go swanelega e le bahlanka ba bodiredi gomme ka morago ba tšwele pele go fihlela ba hlankela e le bagolo. Dihlogo tše di rego, “Na o a Katana?” le “Na o a Swanelega go ka Hlankela?” tšeo di lego ka tokollong ya Morokami wa September 1, 1990, di ile tša tutueletša banababo rena ba bantši gore ba itire ba hwetšagalago bakeng sa boikarabelo bja phuthego. Botšiša bagolo ba phuthego ya geno ka ditšhišinyo tše itšego tša kamoo o ka katanago ka gona gomme wa swanelega.

⁴ Bagolo le bahlanka ba bodiredi bao ba sa nyalago ba kgothaletšwa gore ba naganišiše ka go dira kgopelo bakeng sa Sekolo sa Tlwaetšo ya Bodiredi. O ka itlwaelanya le sekolo se ka go bala ditšhupetšo ka go Watch Tower Publications Indexes tša 1986-1995, 1996 le 1997 ka tlase ga “Ministerial Training School.” Na o bona ‘mojako o mogolo wa modiro’ o bulegile ka pele ga gago? (1 Ba-Kor. 16:9a) Banababo rena ba bantši bao ba ilego ba tsena ka mojako wo le ka mohla ga se ba ka ba nagana ka ditokelo ka moka tša tirelo e le tšeo di kgonegago ka morago ga go aloga. Lehono ba thabela go hlankela Bethele goba tšhemong e le babulamadibogo ba kgethegilego, baromiwa goba balebeledi ba tikologo.

⁵ Katanela Tirelo ya Nako e Tletšego: Bafsa bao ba alogago sekolong se phagamego, basadi ba malapa le motho le ge e le ofe yo a fihleletšego nywaga ya go rola modiro ba swanetše go naganela bobulamadibogo ka kelohloko. Boeletša pampiri ya ka gare ya Tirelo ya Rena ya Mmušo ya July 1998, ke moka o bolele le babulamadibogo bao maemo a bona a bego a swana le ao a bophelo bja gago ka noši. Mohlomongwe o ka tutueletšega go oketša bodiredi bja gago ka go bula madibogo go etša ge ba dira. (1 Ba-Kor. 11:1) Go tla nyakega eng gore o oketše modiro wa gago go ya go diiri tše 70 ka kgwedi gomme ka go rialo o hlankele o le mmulamadibogo wa ka mehla?

⁶ Gona bjale banababo rena le dikgaetšedi ba fetago 17 000 ba hlankela diofising tša lekala le magaeng a Bethele go dikologa lefase. Tirelo ya Rena ya Mmušo ya March 1995 e ahla-ahla seo se nyakegago gore o dire kgopelo ya tirelo e bjalo. Ke ka baka la’ng o sa bale pampiri yeo ya ka gare gomme o bone ge e ba o le yo mongwe yo a ka swanelegelago tokelo e kgethegilego ya tirelo ya Bethele?

⁷ Hlankela mo go Nyakegago Thušo e Kgolo: Na o dula moo tšhemo ya gona e šongwago leboelela goba moo go nago le banababo rena ba bantši bao ba ka abelanago morwalo? Na o kile wa nagana ka go oketša bodiredi bja gago ka go hudugela moo go nyakegago thušo e kgolo kudu? Mohlomongwe o ka hudugela lefelong la magaeng la kgaufsi moo go nyakegago badiri ba oketšegilego. (Mat. 9:37, 38) Se ga se sa swanela go dirwa ka go akgofa. Se swanelwa ke go naganelwa ka thapelo. (Luka 14:28-30) Ahla-ahla boemo bja gago le bagolo le molebeledi wa tikologo. Ba tla boledišana le wena ge e ba e le gabohlale go huduga gona bjale goba go lokišetša go dira bjalo nakong e tlago. Ge e ba o rata go ngwalela go Mokgatlo bakeng sa tšhišinyo ya moo o ka hudugelago gona, lengwalo la gago le swanetše go sepela le lengwalo le le saennwego ke Komiti ya Tirelo ya Phuthego ya geno.

⁸ Kaonefatša Boemo bja Tirelo ya Gago: Ka moka re ka ba le karolo kudu ka mo go tletšego bodireding ka go kaonefatša boemo bja tirelo ya rena ya tšhemo. Na o akaretšwa dibopegong ka moka tša modiro, go akaretša go nea bohlatse ka ntlo le ntlo le go nea bohlatse bjo bo sa rulaganyetšwago gaešita le maeto a go boela le modiro wa thuto ya Beibele? Ge e ba o swara thuto, na o ka kaonefatša bokgoni bja gago bja go ruta? E tla ba mo gobotse go boeletša ditšhišinyo tšeo di lego ka go pampiri ya ka gare ya Tirelo ya Rena ya Mmušo ya June 1996 go tutuetša barutwana ba gago gore ba ineele le go kolobetšwa.

⁹ Tlhahlobo e oketšegilego ya ditsela tša go oketša le go kaonefatša bodiredi bja rena e hwetšwa go kgaolo 9 ya puku ya Go Rulaganyetšwa go Dira Bodiredi bja Rena. Ruri ka moka ga rena re swanetše go kganyoga go dira sohle seo re ka se kgonago tirelong ya Modimo. Ke ka baka la’ng o sa naganišiše ka dipakane tša gago tša moya? Dira go etša ge 1 Timotheo 4:15 e eletša: “Hlôkômêla tšôna-tšeo, O ineêlê tšôna, xore dilong tšohle xo bônalê xe O tšwêlêla pele.”