Letlolo la Dipotšišo
◼ Ke eng seo batswadi ba swanetšego go se phafogela ge bana ba bona ba banyenyane ba e ba le karolo tirelong ya tšhemo?
Batswadi ba Bakriste ka mo go swanetšego ba sepela gotee le bana ba bona bodireding bja tšhemo, ba ba tlwaetša go abelana ditaba tše di lokilego tša Mmušo le ba bangwe. Ka go dira bjalo, go nyakega gore ba bee bana ba bona leihlo ka baka la go kgonagala ga dikotsi tšhemong, gaešita le mafelong a kgaufsi a “šireletšegilego.” Gantši bana ke bahlaselwa ba bošoro le go gobošwa ka baka la go ata ga megabaru le kgobogo ya tša botona le botshadi ‘dinakong tše tše hlobaetšago’ tšeo re phelago go tšona. (2 Tim. 3:1-5, NW) Go nyakega gore batswadi ba tšee ditemošo tše kwalago e sa le pele go šireletša bana ba bona go bao ba ka ba hlaselago. Ke eng seo se ka dirwago?
Beibele ka bohlale e eletša gore re be ba šetšago gomme re lebelele pele bakeng sa go bona dikotsi tše di sa tlago. (Die. 22:3; Mat. 10:16) Maikemišetšo mo ga se go hloma melao, eupša ke gabohlale gore motswadi goba motho yo mongwe yo mogolo a sepele le ngwana ge a e-ya tirelong ya tšhemo. Ge e ba bagoeledi ba babedi ba bafsa bao ba nago le boikarabelo ba šoma gotee, go šišinywa gore motswadi goba motho yo mongwe yo mogolo a ba bee leihlo ka dinako tšohle. Go ba gona, ge ngwana a dutše a gola gomme a ipontšha a e-na le boikarabelo kudu, batswadi ba ka dira phetho ya ge e ba a nyaka tlhokomelo e nyenyane yeo batswadi ba e neago ka go lebanya.—Bona gape le Letlolo la Dipotšišo la Tirelo ya Rena ya Mmušo ya October 1992.
Le gona ke gabohlale go dula o nagana ka polokego ge o sepela ka koloi goba o itshepelela feela. Go tšea megato e sa le pele gantši go šireletša dikotsi le merwalo e sehlogo ya dihlabi tše šoro, ditshenyagalelo tša tša kalafo le kgonagalo ya ditatofatšo tša molao lefaseng le le atilego ka go rata go latofatša kudu leo le re dikologilego.
Ke mo go swanetšego gore bafsa ba “rêtê ’ina la Morêna.” (Ps. 148:12, 13) Mantšu a bona a bose le boitshwaro bjo bobotse ge ba le bodireding bja tšhemo ke tšeo di kgahlišago ba bangwe le go tlišetša Jehofa kgodišo. Batswadi, thušang bana ba lena ka mo le ka kgonago gore ba be le karolo ka mehla go tsebatšeng ditaba tše di lokilego ge le dutše le phafogela go ba šireletša dikotsing le ge e le dife tšeo di lego gona!