“Bolela Lentšu la Modimo ka Botlalo”

¹ Ge o bontšha tebogo e le ka kgonthe ka go hwetša selo se itšego se se botse, na ga o e bontšhe ka boemo bja gago bja kgopolo le mediro? Ka kgonthe o dira bjalo! Ela hloko kamoo moapostola Paulo a ilego a arabela ka gona, mabapi le go loka le botho bjo lerato tšeo Jehofa a di fetišetšago go batho. O ile a goeletša a re: “Gomme Modimo a lebogwe ka baka la neo ya gagwe e sa bolelwego”! “Neo” yeo e akaretša’ng? “Kgaugelo e kgolo kudu ya Modimo” yeo re e bontšhitšwego, ponagatšo e kgolo kudu yeo e bego e le mpho ya Morwa wa gagwe ka noši e le topollo ya dibe tša rena.—2 Ba-Kor. 9:14, 15, PK; Joh. 3:16.

² Na polelo ya Paulo ya ditebogo e be e le mantšu feela? Ga go bjalo! O ile a bontšha tebogo ya gagwe e tseneletšego ka ditsela tše dintši. O be a tloga a kgomegile kudu ka boemo bjo bo botse bja moya bja Bakriste-gotee le yena gomme o be a nyaka go dira ka mo a ka kgonago go ba thuša gore ba holege ka mo go tletšego bothong bjo lerato bja Modimo. Mabapi le ba bjalo, Paulo o itše: “Ka thloloxêlô e kaakaa re be re re re Le neê tšohle, e sexo Ebangedi yeo ya Modimo fêla, re bê re re re Le neê le bophelô bya rena; xobane Lè le baratiwa ba rena.” (1 Ba-Thes. 2:8) Godimo ga go thuša bao e bego e šetše e le karolo ya phuthego go šireletša phološo ya bona, Paulo o ile a bolela ditaba tše dibotse a sa lape, a sepela dikhilomithara tše dikete nageng le lewatleng bakeng sa go hwetša bao “ba hlaoletšwexo bophelô byo bo sa felexo.” (Dit. 13:48) Tebogo ya Paulo e tseneletšego bakeng sa tšohle tšeo Jehofa a bego a mo diretše tšona e ile ya mo tutuetša go “bolela lentšu la Modimo ka botlalo.”—Ba-Kol. 1:25, NW.

³ Na tebogo ya rena bakeng sa dilo ka moka tšeo Jehofa a re diretšego tšona ga e re tutuetše go nea thušo ya moya go bao ba nyakago thušo phuthegong ya gabo rena? (Ba-Gal. 6:10) Le gona na ga re tutueletšege go ba le karolo e tletšego ka mo re ka kgonago ka gona go boleleng ditaba tše dibotse tša Mmušo tšhemong ya gabo rena ka moka?—Mat. 24:14.

⁴ Sebaka sa go Bontšha Tebogo: Ngwaga o mongwe le o mongwe Segopotšo sa lehu la Kriste se re nea sebaka se se kgethegilego sa go bontšha tebogo ka seo Jehofa le Jesu ba re diretšego sona. Se ga e fo ba seboka se sengwe goba go fo ba segopotšo sa tiragalo. Jesu o itše: “Dirang byalo xore e bê xo nkxopola.” (Luka 22:19, mongwalo o sekamego ke wa rena.) Segopotšo sa lehu la Kriste ke nako ya go nagana ka mohuta wa motho yoo Jesu e lego yena. Ke nako ya go lemoga gore o a phela le go ba mafolofolo lehono, ka letago le bogoši bjo a ilego a bo newa ka baka la go botega bophelong bja gagwe le ka sehlabelo sa gagwe. Tiragalo ye gape ke nako ya go bontšha go ikokobeletša ga rena bohlogo bja Kriste ge a dutše a hlahla ditaba le mediro ya phuthego ya Bokriste. (Ba-Kol. 1:17-20) Batho ba Modimo ka moka ba swanetše go ba gona ka tlhompho Segopotšong sa lehu la Kriste. Lenyaga se tla swarwa ka morago ga ge letšatši le sobetše ka Labone, March 28, 2002.

⁵ Ka boiteko bja kgonthe bjo bo ilego bja dirwa pele ga go binwa ga Segopotšo ngwagola, re bile le tlhora e fetago tšohle ya bao ba bego ba le gona ba 202 271 dinageng tše di hlankelago ka tlase ga lekala la Afrika Borwa. Ngwageng wo go tla ba le ba bakae? Mo gontši go tla ithekga ka go “šoma ka thata le go katana” ga rena, re thuša ba bantši ka mo go ka kgonegago go ba gona.—1 Tim. 4:10, NW.

⁶ Ka ntle le go ba gona Sejong sa Morena sa Mantšiboa, re ka kgona go oketša modiro wa rena wa tirelo ya tšhemo. Ka ntle le pelaelo, bana babo rena le dikgaetšedi ba dikete ba tla tsenela bobulamadibogo bja go thuša ka kgwedi e tee goba tše pedi. Ngwaga o mongwe le o mongwe go e mehlano e fetilego, re ile ra ba le palo-gare ya babulamadibogo ba go thuša ba 17 788 sehleng sa Segopotšo go tloga ka March go ya go May. Na o ka kgona go lokiša maemo a gago bakeng sa go thabela tokelo ya go tšea bobulamadibogo bja go thuša lenyaga? E tla ba tsela e botse ya go bontšha tebogo ya gago ya kgonthe bakeng sa mpho ya Modimo e lerato ya sehlabelo sa Kriste. O ka kgonthišega ka tšhegofatšo ya Jehofa, go etša ge diphihlelo tše di latelago di bontšha.

⁷ Kgaetšedi yo a nago le mošomo wa boiphedišo wa nako e tletšego o ile a ngwala ka phihlelo ya gagwe ya bobulamadibogo bja go thuša ka March e fetilego: “Tirelo ya Rena ya Mmušo ya February 2001 e ile ya kgothaletša yo mongwe le yo mongwe yoo maemo a gagwe a bego a mo dumelela go tšea bobulamadibogo bja go thuša sehleng sa Segopotšo. Ka ge March e na le Mekibelo e mehlano, se se ile sa sepedišana gabotse le thulaganyo ya-ka. Ka gona ke ile ka phetha ka go tsenya fomo ya-ka.” Ge a thoma kgwedi, o ile a ipeela pakane ya go leka go thoma thuto ya legae ya Beibele. Na o ile a atlega? Ee, iring ya gagwe ya bo-52 ya boboledi kgweding yeo o ile a thoma thuto! Phetho ya gagwe e bile efe? “Go na le ditšhegofatšo tše dibotse ge re dira maiteko a oketšegilego.”

⁸ Mehola ke efe ge lapa le bula madibogo gotee? Lapa la ditho tše nne leo le ilego la dira bjalo ka April e fetilego le ile la hwetša e le kgwedi yeo le tla dulago le e gopola. Mma o itše: “A tebelelo e kgahlišago gakaakang yeo re bego re e-na le yona bakeng sa letšatši le lengwe le le lengwe, ka ge re be re kopantšwe bodireding! Dipoledišano medirong ya rena ya letšatši le letšatši tirelong di ile tša dira gore dinako tša dijo tša mantšiboa e be tše di thabišago kudu.” Morwa o itše: “Ke thabetše go šoma le tate tirelong ya tšhemo gare ga beke, ka ge gantši a le mošomong wa boiphedišo.” Tate o ile a oketša ka gore: “Bjalo ka hlogo ya lapa, ke ile ka ikwa ke kgotsofetše go tseba gore re be re dira gotee modirong wo bohlokwa kudu wa mehla ya rena.” Na lapa la gago le ka bula madibogo gotee? Ke ka baka la’ng le sa be le poledišano ya lapa le bone ge e ba go kgonega bakeng sa ba lapa la gago ka moka go tšea bobulamadibogo bja go thuša sehleng sa Segopotšo?

⁹ Na re ka Dira Gore March e be Kgwedi ya Rena e di Phalago Tšohle? Pejana ka 2000, Tirelo ya Rena ya Mmušo e ile ya rotoša potšišo e rego: “Na re ka Dira Gore April 2000 e be Kgwedi ya Rena e di Phalago Tšohle?” Karabelo e bile efe? Go ile gwa fihlelelwa ditlhora tše mpsha tše mmalwa. Go ile gwa ba le tlhora e phagamego ya kgwedi ya babulamadibogo ba go thuša ba 10 126 bakeng sa Afrika Borwa. Go oketša moo, re ile ra ba le ditlhora tše difsa tša diiri, tša go sepedišwa ga dimakasine, dipukwana/diporoutšha, maeto a go boela le dithuto tša Beibele. Na o sa gopola phišego yeo e ilego ya ba gona ka phuthegong ya geno ka moya o matla wa bodiredi kgweding yeo e kgethegilego? Na re ka dira ka mo go swanago lenyaga goba go ba ka godimo ga tšeo di fihleletšwego? Ka boiteko bjo bo kopanetšwego bja bohle, March 2002 e ka ba “Kgwedi ya Rena e di Phalago Tšohle.” Ke ka baka la’ng e e-ba March?

¹⁰ Go na le mabaka a mabedi ao ka ona March e swanetšego go ba kgwedi e kgethegilego ya modiro. La pele, Segopotšo se tla swarwa go ya mafelelong a March, e lego se se re neago nako e lekanego mathomong a kgwedi gore re kgone go laletša ba bantši kamoo go ka kgonegago gore ba be gona. La bobedi, lenyaga March e na le mafelo-beke a mahlano, e lego se se dirago gore go be bonolo go tšea bobulamadibogo bja go thuša bakeng sa bao ba šomago mošomo wa boiphedišo goba bao ba tsenago sekolo. Ke ka baka la’ng o sa dule fase gona bjale gomme o rulaganye thulaganyo e šomago, o diriša almanaka yeo e neilwego ka pampiring ye ya ka gare? Bobulamadibogo bja go thuša bo ka ba bohwefo go feta kamoo o naganago. Ka mohlala, ka go beela ka thoko diiri tše seswai tša tirelo ya tšhemo mafelo-beke a mangwe le a mangwe, o tla nyaka go oketša ka diiri tše lesome feela kgweding ka moka bakeng sa go fihlelela diiri tše di nyakegago tše 50.

¹¹ Bagolo ba ka dira’ng go thuša bohle ka phuthegong go ‘bolela lentšu la Modimo ka botlalo’? Aga kgahlego ka dikarolo tša seboka le ka dipoledišano tša motho ka noši. Balebeledi ba Thuto ya Puku ya Phuthego le bathuši ba bona ba ka gata mogato wa pele go boleleng le yo mongwe le yo mongwe yo a abetšwego sehlopheng sa bona gomme ba nee thušo ya motho ka noši. Mantšu a sego kae a botho a kgothatšo goba ditšhišinyo tše dingwe tše di šomago e ka ba seo se nyakegago. (Die. 25:11) Ba bantši ba tla bona gore ka diphetogo tše nyenyane dithulaganyong tša bona, ba ka thabela tokelo ya go hlankela e le babulamadibogo ba go thuša. Diphuthegong tše dintši, batho ba bantši ge e ba e se ka moka ga bona, bagolo le bahlanka ba bodiredi gotee le basadi ba bona ba bea mohlala o mobotse ka go tšea bobulamadibogo bja go thuša gotee ka sehla sa Segopotšo. Se se ile sa kgothaletša palo e kgolo ya bagoeledi go ba tlatša. Ka baka la mafokodi a mmele goba maemo a mangwe, bagoeledi ba bangwe ba ka no se kgone go bula madibogo, eupša ba ka kgothatšwa gore ba bontšhe tebogo ya bona ka go dira go gontši kamoo ba ka kgonago ka gona bodireding gotee le phuthego ka moka.

¹² Katlego e ithekgile ka thulaganyo e botse ka lehlakoreng la bagolo. Diboka tša tirelo ya tšhemo di swanetše go rulaganywa go ya ka dinako tše swanetšego bekeng ka moka. Ge e ba go kgonega, molebeledi wa tirelo o tla abela e sa le pele bana babo rena ba swanelegago gore ba sware diboka ka moka tša tirelo. Go lokišetša gabotse go tla nyakega e le gore diboka tše di se ke tša feta metsotso e 10 go ya go e 15, go akaretša le go rulaganya dihlopha, go aba tšhemo le go rapela. (Bona Letlolo la Dipotšišo go Tirelo ya Rena ya Mmušo ya September 2001.) Thulaganyo ya modiro bakeng sa kgwedi e swanetše go hlalosetšwa phuthego ka mo go kwagalago go gomme e kgomaretšwe letlapeng la ditsebišo.

¹³ Go swanetše gore go be le tšhemo e lekanego. Molebeledi wa tirelo o swanetše go kopana le ngwanabo rena yo a laolago mašemo bakeng sa go dira ditokišetšo tša go akaretša mašemo ao a sa šongwego ka mehla. Go swanetšwe gore go gatelelwe taba ya go šoma magaeng ao go sa hwetšwago batho go ona, go nea bohlatse setarateng le dikgwebong, gotee le go dira boboledi bja mantšiboa. Mo go swanelegago, bagoeledi ba bangwe ba ka thušwa go nea bohlatse ka mogala.

¹⁴ Ba Thuše Gore ba Hlankele Gape: Na tšhemong ya phuthego ya geno go na le bao ba se sa hlwago ba le mafolofolo go boleleng ditaba tše dibotse? Ba bjalo e sa dutše e le karolo ya phuthego gomme ba nyaka thušo. (Ps. 119:176) Ka ge bofelo bja lefase le la kgale bo batametše gomme lefase le lefsa le le kgaufsi, re na le lebaka le le kwagalago la go dira maiteko a go thuša bao ba tapilego. (Ba-Roma 13:11, 12) Nywageng e mehlano e fetilego, batho ba fetago 1 400 ngwaga o mongwe le o mongwe ba ile ba arabela thušong gomme ba tsošološitšwe. Re ka dira’ng go thuša ba bantši go tsošološa lerato le kholofelo tšeo ba bego ba e-na le tšona mathomong a bodiredi bja bona?—Ba-Heb. 3:12-14.

¹⁵ Sehlopha sa bagolo se tla nyaka go ahla-ahla tsela yeo se ka thušago bao ba ilego ba tapa nywaga e mmalwa e fetilego. (Mat. 18:12-14) Mongwaledi o swanetše go lekola dikarata tša Pego ya Mogoeledi ya Phuthego gomme a ngwale ka moka bao ba tapilego. Go swanetšwe gore go dirwe maiteko a kgethegilego ka tokišetšo ya leeto la bodiši bakeng sa go nea thušo. Mogolo a ka nyaka go etela mogoeledi yo a itšego ka lebaka la ge a tsebana le go tlwaelana le yena go tloga nakong e fetilego, goba bagoeledi ba bangwe ba ka kgopelwa gore ba thuše. Mohlomongwe ba ithutile le motho yoo ga bjale a tapilego gomme ba tla amogela sebaka seo gore e be sa thušo e kgethegilego mo nakong ye e nyakegago. Go na le kholofelo ya gore ba bantši bao ba tapilego ba tla tutueletšega go thoma go bolela lentšu la Modimo gape. Ge e ba ba swanelega, ga go na nako e kaone go bona ya go thoma go feta sehla sa Segopotšo!—Bona Letlolo la Dipotšišo ka go Tirelo ya Rena ya Mmušo ya November 2000 bakeng sa dintlha tše oketšegilego.

¹⁶ Na ba Bangwe ba a Swanelega Bakeng sa go Bolela? Jehofa o tšwela pele go šegofatša batho ba gagwe ka go tliša “matsaka a dithšaba ka moka.” (Hag. 2:7) Ngwaga o mongwe le o mongwe ba dikete ba swanelega bjalo ka bagoeledi ba sa kolobetšwago. Ke bomang? Bana ba Dihlatse tša Jehofa gotee le barutwana ba Beibele bao ba tšwelago pele. Re tseba bjang ge e ba ba swanelega go ba bagoeledi ba ditaba tše dibotse?

¹⁷ Bana ba Dihlatse tša Jehofa: Bana ba bantši ba ile ba sepela le batswadi ba bona go ya ka ntlo le ntlo ka nywaga e mentši, le ge ba sešo ba hlankela bjalo ka bagoeledi ba sa kolobetšwago. March e ka ba nako e botse ya gore ba thome. O tseba bjang ge e ba ngwana wa gago a swanelega? Puku ya Go Rulaganyetšwa go Dira Bodiredi bja Rena go letlakala 100 e re “ge ngwana a e-na le mohlala o mobotse wa boitshwaro gomme a kgona go bolela tumelo ya gagwe go ba bangwe ka ditaba tše dibotse gomme a šušumetšwa ke pelo go dira bjalo.” Ge e ba o nagana gore ngwana wa gago o a swanelega, bolela le yo mongwe wa bagolo ba Komiti ya Tirelo ya Phuthego.

¹⁸ Barutwana ba Beibele Bao ba Swanelegago: Ka morago ga gore morutwana wa Beibele a be le tsebo le go ba gona dibokeng ka lebakanyana, a ka nyaka go ba mogoeledi wa Mmušo. Ge e ba o swara thuto le morutwana yo bjalo, nagana ka dipotšišo tše: Na o dira tšwelopele, go dumelelana le nywaga ya gagwe le bokgoni bja gagwe? Na o setše a thomile go abelana le ba bangwe tumelo ya gagwe ka mo go sa rulaganyetšwago? Na o apara “motho e mofsa”? (Ba-Kol. 3:10) Na o fihlelela ditshwanelego tša bagoeledi ba sa kolobetšwago go matlakala 97-9 a puku ya Bodiredi bja Rena? Ge e ba go le bjalo, o tla swanela go bonana le Komiti ya Tirelo ya Phuthego bakeng sa gore go dirwe dithulaganyo le bagolo ba babedi bakeng sa go kopana le wena le morutwana. Ge e ba a swanelega, bagolo ba babedi ba tla mo tsebiša gore a ka thoma go tšea karolo tirelong ya phatlalatša.

¹⁹ Go Thwe’ng ka April le May? Tše ka mo go swanago e tla ba dikgwedi tše kgethegilego bakeng sa modiro o oketšegilego bodireding bja tšhemo. Bontši bja bao ba ilego ba tšea bobulamadibogo bja go thuša ka March ba ka dira bjalo gape ka April le/goba ka May. Ka April le ka May, re tla etiša pele go sepediša dimakasine tša Morokami le Phafoga! bodireding. Di bile le mafelelo a holago gakaakang maphelong a bao ba di badilego! Dimakasine tše di kgathile tema e kgolo go fihleleleng kgolo e makatšago yeo e bilego gona lefaseng ka bophara. Maiteko a kgethegilego a tla dirwa ka April le ka May bakeng sa go sepediša dimakasine go batho ba bantši ka mo go ka kgonegago. Rulaganya e sa le gona bjale go ba le karolo e feletšego.

²⁰ Ka thulaganyo ya modiro wa go bolela e okeditšwego, na go nyakega gore o oketše palo ya dimakasine tšeo o di hwetšago ka phuthego? Ngwageng wa tirelo ka moka, re sepediša Morokami le Phafoga! Mokibelo o mongwe le o mongwe, Letšatši la rena le le kgethilwego la Dimakasine. Lega go le bjalo, ka ge ba bantši ba tla be ba tšea karolo tirelong ya bobulamadibogo bjo bo thušago gomme ka moka ga rena re tla be re sepediša dimakasine ka dikgwedi tše pedi tše di tletšego, go ka nyakega gore o oketše otara ya gago ya dimakasine le phuthego. Ge e ba go le bjalo, hle tsebiša moswari wa dimakasine phuthegong ya geno ka bjako. Ka nako e swanago, moswari wa dipuku o swanetše go kgonthišega gore kabo e lekanego ya pampišana e rego Na o ka Rata go Tseba ka mo go Oketšegilego ka Beibele? e gona bakeng sa gore bohle ba e diriše.

²¹ Ba bantši ba bontšhitše tebogo karolong yeo e lego ka go Tirelo ya Rena ya Mmušo yeo e nago le sehlogo se se rego “Seo o ka se Bolelago ka Dimakasine.” Na o dirišitše tokišetšo ye ka go ithuta mohlala wa dithero tša makasine? Ke ka baka la’ng o sa diriše karolo ya thuto ya lapa ya Beibele ya lena beke e nngwe le e nngwe bakeng sa go itlwaetša dithero tše?

²² Diriša Sehla sa Segopotšo ka Botlalo: Go etša moapostola Paulo, a re bontšheng Jehofa kamoo re lebogago “neo ya gagwe e sa bolelwego” ka go tšea ga rena karolo ka botlalo medirong ya moya yeo e rulagantšwego bakeng sa sehla se sa Segopotšo. Mediro ye e akaretša (1) go ba le karolo e feletšego ka Letšatši la rena le le kgethegilego la Dimakasine ka March 2, 2002; (2) go ba gona tiragalong e bohlokwa-hlokwa ya ngwaga, monyanya wa Sejo sa Morena sa Mantšiboa ka Labone, March 28, 2002; (3) go thuša bao ba tapilego go tsošološa “leratô la [bona] la pele” (Kut. 2:4; Ba-Roma 12:11); (4) go thuša bana ba rena le barutwana ba Beibele le ge e le bafe bao ba swanelegago go ba bagoeledi ba sa kolobetšwago; le (5) go tšea karolo modirong wa boebangedi ka botlalo kamoo re ka kgonago, le go tšea bobulamadibogo bjo bo thušago ka March le ka morago ga yona.—2 Tim. 4:5.

²³ Re rapela go tšwa pelong gore ka moka ga rena re be le karolo e feletšego go boleleng ditaba tše dibotse tša Mmušo sehleng se sa Segopotšo, ka gona re bontšha go tsenelela ga tebogo ya rena ka dilo ka moka tšeo Jehofa a re diretšego tšona.

[Lepokisi go letlakala 6]

Thulaganyo ya Motho ka Noši Bakeng sa Tirelo ya Tšhemo ya March 2002

Sontaga Mošupologo Labobedi Laboraro Labone Labohlano Mokibelo

1 2

3 4 5 6 7 8 9

10 11 12 13 14 15 16

17 18 19 20 21 22 23

24 25 26 27 28 29 30

SOBETŠE

31

Na o ka rulaganyetša palo-moka ya diiri tše 50 bakeng sa go bula madibogo ka March?