Bontšha Kgahlego e Lerato go “Dišuana”
1 Jehofa ke “Yêna tata-xo-dišuana.” (Ps. 68:5) Go tshwenyega ga gagwe ka katlego ya bona go bontšhwa taelong yeo a e neilego setšhaba sa Isiraele ya bogologolo yeo e rego: “O se kê wa hlakiša mohloloxadi le sešuana. Xe O ka bá wa ba hlakiša, ’me ba ntelêla, ke tlo kwa sellô sa bôná.” (Ek. 22:21, 22) Le gona Molao wa Modimo o akaretša tokišetšo ya go thuša batho ba bjalo ka dinyakwa tša bona tša nama. (Doit. 24:19-21) Ka tlase ga thulaganyo ya Bokriste, barapedi ba therešo ba eletšwa “xo hlôla dišuana le bahlôlôxadi mahlokong a bôná, le xo itôta xore lefase le se Xo thšilafatšê.” (Jak. 1:27) Re ka ekiša bjang kgahlego e lerato ya Jehofa go bao ba golelago ka malapeng a motswadi yo a se nago molekane goba ao a aroganego bodumeding?
2 Tlwaetšo ya Moya: Ge e ba o le motswadi yo a se nago molekane goba yoo a nago le molekane yo a sa dumelego, go swara thuto ya legae ya Beibele ka mehla le bana ba gago e ka ba tlhohlo. Eupša thuto ya Beibele ya ka mehla le yeo e holago ke ya bohlokwa ge e ba ba tla gola go ba bao ba leka-lekanego, go ba batho ba bagolo bao ba godilego moyeng. (Die. 22:6) Go swara dipoledišano le bona tša letšatši le letšatši ka ditaba tša moya le gona go bohlokwa. (Doit. 6:6-9) Ka dinako tše dingwe, o ka ikwa o nolegile moko, eupša o se ke wa lapa. Retologela go Jehofa bakeng sa matla le tlhahlo ge o ‘tšwela pele o godiša bana ba gago ka tayo le tlhahlo ya monagano ya Jehofa.’—Ba-Ef. 6:4, bapiša le NW.
3 Ge e ba o nyaka thušo go rwaleng boikarabelo bja gago bja Mangwalo, tsebiša bagolo dinyakwa tša gago. Ba ka kgona go nea ditšhišinyo tše di šomago goba go go thuša go hloma lenaneo le lebotse la moya la lapa la gago.
4 Kamoo ba Bangwe ba ka Thušago ka Gona: Lekgolong la pele la nywaga, Timotheo o ile a ba mohlanka yo mafolofolo wa Jehofa go sa šetšwe go golela lapeng leo le aroganego bodumeding. Maiteko a tseneletšego a mmagwe le makgolo’agwe a go mo ruta mangwalo a makgethwa bofseng bja gagwe ka ntle le pelaelo a kgathile tema ya bohlokwa. (Dit. 16:1, 2; 2 Tim. 1:5; 3:15) Lega go le bjalo, le yena o ile a holega ditswalanong le Bakriste ba bangwe, go akaretša moapostola Paulo, yoo a ilego a bitša Timotheo “ngwana wa-ka moratiwa, mmotexi Moreneng.”—1 Ba-Kor. 4:17.
5 Ka mo go swanago lehono, ke mo go holago gakaakang ge bana babo rena le dikgaetšedi ba ba godilego moyeng ba bontšha tlhokomelo e lerato go dišuana ka phuthegong! Na o tseba yo mongwe le yo mongwe ka leina? Na o boledišana le bona dibokeng tša Bokriste le ditiragalong tše dingwe? Ba laletše go sepela le wena bodireding bja tšhemo. Mohlomongwe ka dinako tše dingwe o ka ba akaretša thutong ya lapa la gago goba ditokišetšong tša boithabišo bjo bo agago, gotee le batswadi ba bona bao ba se nago balekane goba bao ba sa dumelego. Ge bafsa ba ba go tšea bjalo ka mogwera wa bona, go bonolo gore ba ekiše mohlala wa gago le go amogela kgothatšo ya gago.—Ba-Fil. 2:4.
6 Jehofa o na le kgahlego e tseneletšego ka dišuana, gomme o šegofatša maiteko a rena a lerato a go ba thuša go dira gore therešo e be ya bona. Ba bantši bao ba goletšego malapeng a motswadi yo a se nago molekane goba ao a aroganego bodumeding ba ile ba amogela kgothatšo e bjalo gomme ga bjale ba hlankela ka potego e le babulamadibogo, bahlanka ba bodiredi, bagolo, balebeledi ba basepedi, baromiwa goba ditho tša lapa la Bethele. Anke ka moka ga rena re nyake ditsela tša go ‘katološa’ lerato la rena la go rata dišuana, ka go ekiša Tatago rena wa legodimong.—2 Ba-Kor. 6:11-13.