Leka go Diriša Tsela e Dumelelanago le Maemo

Leka go Diriša Tsela e Dumelelanago le Maemo

Go kgahlegela batho go tšwa pelong go tla re tutueletša gore re leke go lemoga dinyakwa tša bona gomme re ba bontšhe kamoo Mmušo o tlago go ba rarollela ka botlalo mathata ao ba lebeletšanego le ona. (Ba-Fil. 2:4) Tsela ya go dumelelana le maemo yeo bagoeledi ba bantši ba e hweditšego e atlega ke go kgopela mong wa ntlo gore a hlalose diswantšho tša Paradeise tšeo di lego ka dikgatišong tša rena, tše bjalo ka tšeo di lokeleditšwego karolong e lego ka letsogong le letona la letlakala le. O ka dira se o diriša a mangwe a matseno a latelago:

◼ “Na o nagana gore re tla ka ra bona moloko wa batho o phela ka tlase ga maemo ao a bontšhitšwego mo?”

◼ “Ka moka ga rena re ka rata gore bana ba rena ba phele lefaseng la go swana le le le bontšhitšwego mo. O nagana gore ke’ng seo se nyakegago gore go be ka tsela ye?”

◼ “Wo ke mohlala wa kamoo lefase le tlago go ba ka gona ge thato ya Modimo e tla be e direga mo lefaseng go etša ge e direga kua legodimong. Na go na le se o se lemogago mo seo se fapanego le bophelo bja lehono?”

◼ “Na o ka rata go phela ka tlase ga maemo a bontšhitšwego mo? [Dumelela karabo.] Na o nagana gore se se tla direga mehleng ye ya rena?”

Theeletša karabo ya motho ka kelohloko gomme o leke go bona kamoo a ikwago ka gona ka go mmotšiša potšišo e tee goba tše pedi. Ge e ba ba bangwe ba araba ka gore ba ka se rate go phela ka tlase ga maemo ao a bontšhitšwego seswantšhong goba ba re ga ba dumele gore selo sa mohuta woo se ka direga, se akgofele go phetha ka gore ga ba na kgahlego. Ba botšiše ka bohlale gore ke ka baka la’ng ba ikwa ka tsela yeo ba ikwago ka yona. Ditlhaloso tša bona di ka utolla kamoo ba tshwenyegilego kudu ka gona ka mathata ao batho ba lebeletšanego le ona ao go bonagalago eka ga a na tharollo.—Hesek. 9:4.

Ge o dutše o lemoga seo mong wa ntlo a tshwenyegilego ka sona, dumelelanya thero ya gago le maemo. Gatelela ntlha ya molaetša wa Mmušo yeo e bolelago kudu ka dinyakwa tša gagwe ka go lebanya. Mmontšhe lengwalo le letee goba a mabedi ao a sepedišanago le taba yeo a kgomegilego ka yona. (Bona ditšhišinyo tšeo di lego karolong ya ka letsogong le letona. ) Dira gore a iponele seo Lentšu la Modimo le se bolelago. Ge e ba a bontšha kgahlego, mo sepedišetše kgatišo gomme o rulaganyetše go boa gape. Tšwela pele go agelela go seo le se boletšego poledišanong ya lena ya mathomo.

[Lepokisi go letlakala 6]

Mehlala ya Diswantšho tša Paradeise

Puku ya Morutiši: matlakala 251-4

Puku ya Tsebo: matlakala 4-5, 188-9

Poroutšha ya Seo Modimo a se Nyakago: matlakala 11, 13

Puku ya Khutšo ya Kgonthe: letlakala 98

Puku ya Rapela Modimo: matlakala 92-3

[Lepokisi go letlakala 6]

Dilo Tšeo Batho ba Kgomegilego ka Tšona

Bodiidi, kgatelelo

Psalme 72:12-14;

Mmoledi 8:9