Kgaolo 27

Mmušo wa Modimo o Tswetšwe!

Pono 7—Kutollo 12:1-17

Taba: Mosadi wa legodimong o a belega, Mikaele o lwa le Sathane gomme o mo lahlela lefaseng

Nako ya phethagatšo: Go tloga ge Kriste Jesu a bewa sedulong sa bogoši ka 1914, go fihla masetlapelong a magolo

1. Go kwešiša dipontšho tše di bolelwago go Kutollo dikgaolo 12 go ya go 14 go tla re thuša bjang?

SEPHIRI se sekgethwa sa Modimo se utolotšwe. (Kutollo 10:7) Mmušo wa Jehofa ka Mesia wa gagwe bjale o gona e le ka kgonthe. O a buša! Go ba gona ga wona go bolela phedišo go Sathane le peu ya gagwe, gomme go bolela go fenya mo gogolo ga Peu ya mokgatlo wa Modimo wa legodimong. Lega go le bjalo, morongwa wa bošupa ga se a hlwa a fetša go letša phalafala ya gagwe, ka gobane o na le dilo tše dintši tšeo a tlago go re utollela tšona ka madimabe a boraro. (Kutollo 11:14) Dipontšho tše di hlaloswago go Kutollo dikgaolo 12 go ya go 14 di tla re thuša go godiša kwešišo ya rena ka dilo ka moka tšeo di akaretšwago go madimabe ao le go phethweng ga sephiri se sekgethwa sa Modimo.

2. (a) Johane o bona pontšho efe e kgolo? (b) Tlhaloso ya pontšho e kgolo e ile ya utollwa neng?

² Johane bjale o bona pontšho e kgolo, e lego yeo e kgahlišago kudu go batho ba Modimo. E rola pono e kgahlišago ya boporofeta yeo tlhaloso ya yona e ilego ya gatišwa la mathomo tokollong ya March 1, 1925 ya Morokami (wa Seisemane) sehlogong se se rego “Go Tswalwa ga Setšhaba,” gomme ya gatišwa gape ka 1926 pukung ya Deliverance. Seetša se se se phadimago sa go kwešišwa ga Beibele e ile ya ba leswao historing tabeng ya go tšwetša pele modiro wa Jehofa. Ka gona anke Johane a hlalose pono e latelago ge e thoma go utollwa: “Pontšho e kgolo ya bonwa legodimong, mosadi yo a tšhepilego ka letšatši, kgwedi e le ka tlase ga dinao tša gagwe, hlogong ya gagwe a rwele mphapahlogo wa dinaledi tše lesome-pedi, gomme e le moimana. A goeletša a šokwa e bile a le bohlokong bja go belega.”—Kutollo 12:1, 2.

3. Mosadi yo a bonwago legodimong ke mang?

³ Ke la mathomo Johane a bona mosadi legodimong. Ge e le gabotse, ga se mosadi wa kgonthe. Go e na le moo, ke pontšho goba seka. (Kutollo 1:1) O swantšhetša’ng? Basadi diporofetong tše di buduletšwego, gantši ba emela mekgatlo yeo e “nyetšwego” ke batho ba ba hlomphegago. Mangwalong a Seheberu, Isiraele e be e bolelwa e le mosadi wa Jehofa Modimo. (Jeremia 3:14) Mangwalong a Segerika, phuthego ya Bakriste ba tloditšwego e bolelwa e le monyadiwa wa Kriste. (Kutollo 21:9-14) Mosadi yo Johane a mmonago mo le yena o nyetšwe ke motho yo mongwe, gomme o kgaufsi le go belega. Monna wa gagwe ke mang? Ngwana wa gagwe ka morago o a “tšewa a išwa go Modimo le sedulong sa gagwe sa bogoši.” (Kutollo 12:5) Ka gona, Jehofa o bolela gore ngwana ke wa gagwe. Ka baka leo, mosadi yo Johane a mmonago e swanetše go ba mosadi wa Jehofa wa seswantšhetšo.

4. Barwa ba mosadi wa Modimo wa seswantšhetšo ke bomang, gomme moapostola Paulo o bitša mosadi yo a bonwego ke Johane gore ke’ng?

⁴ Mo e ka bago makgolong a nywaga a seswai pele ga mo, Jehofa o be a ile a botša mosadi yo wa seswantšhetšo gore: “Bana ba gago ka moka ba tlo rutwa ke Jehofa.” (Jesaya 54:5, 13, PK) Jesu o ile a tsopola boporofeta bjo gomme a bontšha gore bana ba e be e le balatedi ba gagwe ba ba botegago, bao ka morago ba ilego ba bopa phuthego ya Bakriste ba tloditšwego. (Johane 6:44, 45) Ka gona, ditho tša phuthego ye tšeo di bolelwago e le barwa ba Modimo, e bile ke bana ba mosadi wa Modimo wa seswantšhetšo. (Baroma 8:14) Moapostola Paulo o oketša karolo ya mafelelo ya taba, ge a re: “Jerusalema ya godimo e lokologile, gomme ke mmago rena.” (Bagalatia 4:26) Ka gona, “mosadi” yo a bonwago ke Johane ke “Jerusalema ya godimo.”

5. Ka ge mosadi wa Jehofa wa seswantšhetšo a rwele mphapahlogo wa dinaledi tše 12, ruri ke’ng seo e lego sa kgonthe ka Jerusalema ya godimo?

⁵ Jerusalema ya godimo ge e le gabotse ke’ng? Ka ge Paulo a bolela ka yona e le ya “godimo” gomme Johane a e bona legodimong, gona ruri ga se motse wa lefaseng; le gona ga se ye e swanago le “Jerusalema o Mofsa,” ka ge mokgatlo woo e le monyadiwa wa Kriste, e sego mosadi wa Jehofa. (Kutollo 21:2) Hlokomela gore o rwele mphapahlogo wa dinaledi tše 12. Palo 12 e tswalanywa le go phethega ga thulaganyo ya mokgatlo.a Ka gona, dinaledi tše tše 12 di bonala di bontšha gore ke thulaganyo ya mokgatlo wa legodimong, go swana le ge Jerusalema ya bogologolo e be e le bjalo lefaseng. Jerusalema ya godimo ke mokgatlo wa legohle wa Jehofa wa dibopiwa tša moya woo o šomago bjalo ka mosadi, bobedi tabeng ya go mo hlankela gotee le go tšweletša bana.

6. (a) Ke’ng seo se bontšhwago ke taba ya gore mosadi yo a bonwago ke Johane o apere letšatši, ka tlase ga dinao tša gagwe go na le kgwedi gomme o na le mphapahlogo wa dinaledi? (b) Ke’ng seo se swantšhetšwago ke mahloko a pelego a mosadi wa moimana?

⁶ Johane o bona mosadi yo a le bjalo ka yo a aperego letšatši gomme kgwedi e le ka tlase ga dinao tša gagwe. Ge re oketša ka mphapahlogo wa gagwe wa dinaledi, gona ruri o dikologilwe ka gohle ke dietša tša legodimong. O bonegelwa ke kgaugelo ya Modimo mosegare le bošego. A seka se se swanetšego gakaakang sa mokgatlo o mogolo wa Jehofa wa legodimong! Le gona ke moimana gomme o kgotlelela mahloko a pelego. Go llela ga gagwe thušo e tšwago go Modimo, go bontšha gore nako ya gagwe ya go belega e fihlile. Mahloko a pelego ka Beibeleng, gantši a swantšhetša modiro o boima o nyakegago e le gore go tšweletšwe mafelelo a bohlokwa. (Bapiša le Psalme 90:2; Diema 25:23; Jesaya 66:7, 8.) Ka ntle le pelaelo, mahloko a pelego a mohuta wo a ile a kwewa ge mokgatlo wa Jehofa wa legodimong o be o rulaganyetša go belega mo mo e lego ga histori.

Drakone e Kgolo ya Mmala wa Mollo

7. Pontšho e nngwe ke efe yeo Johane a e bonago legodimong?

⁷ Johane o tšwela pele go bona’ng? “Pontšho e nngwe ya bonwa legodimong, gomme, bonang! drakone e kgolo ya mmala wa mollo ya dihlogo tše šupago le dinaka tše lesome gomme dihlogong tša yona go e-na le mefapahlogo e šupago; mosela wa yona wa goga karolo ya boraro ya dinaledi tša legodimo wa di lahlela lefaseng. Drakone ya fela e eme pele ga mosadi yo a bego a tla tloga a belega, gore ge a belega, e je ngwana wa gagwe.”—Kutollo 12:3, 4.

8. (a) Drakone e kgolo ya mmala wa mollo ke’ng? (b) Ke’ng seo se bontšhwago ke go ba ga drakone le dihlogo tše šupago, dinaka tše lesome le mphapahlogo hlogong e nngwe le e nngwe?

⁸ Drakone ye ke Sathane, “noga ya kgale.” (Kutollo 12:9; Genesi 3:15) Ke mofediši yo sehlogo, yena drakone ya dihlogo tše šupago goba moji yo a ka meletšago ka mo go feletšego mohlaselwa wa gagwe. O boifiša gakaakang! Dihlogo tšeo tše šupago le dinaka tšeo tše lesome di bontšha gore ke yena mohlami wa sebata sa bopolitiki seo se tla tlogago se hlaloswa go Kutollo kgaolo 13. Sebata se le sona se na le dihlogo tše šupago le dinaka tše lesome. Ka ge Sathane a e-na le mphapahlogo hlogong e nngwe le e nngwe, e lego e šupago ka moka ga yona, gona re ka kgonthišega gore mebušo ya lefase yeo e emelwago ke sebata seo e be e dutše e le tlase ga pušo ya gagwe. (Johane 16:11) Dinaka tše lesome ke seka se se swanetšego sa go phethega ga matla ao a a dirišitšego lefaseng le.

9. Ke’ng seo se bontšhwago ke taba ya gore mosela wa drakone o ‘gogela karolo ya boraro ya dinaledi tša legodimong’ mo lefaseng?

⁹ Le gona drakone e na le matla lefelong la moya. Ka mosela wa yona, e “goga karolo ya boraro ya dinaledi tša legodimo.” Dinaledi di ka emela barongwa. (Jobo 38:7) Go bolelwa ga “karolo ya boraro” go ka gatelela gore palo e kgolo ya barongwa e ile ya arošwa ke Sathane. Ge fela ba ba laolwa ke yena, ruri go be go se na kamoo ba bego ba ka tšwa ka gona. Ba be ba ka se ke ba hlwa ba sa boela phuthegong ya Modimo e kgethwa. Ba ile ba fetoga batemona bao go bego go le bjalo ka ge eka ba gogwa ke Sathane, kgoši ya bona goba mmuši wa bona. (Mateo 12:24) Sathane le gona o ba lahletše lefaseng. Se ka ntle le pelaelo se šupa mehleng ya Noa pele ga Meetse-fula, ge Sathane a ile a tutuetša barwa ba go se kwe ba Modimo gore ba tle lefaseng gomme ba dule le barwedi ba batho. E le kotlo ya bona, ‘barongwa ba bao ba ilego ba dira sebe’ ba lahletšwe ke Modimo boemong bjo bo swanago le kgolego bjo bo bitšwago Tatarase.—Genesi 6:4; 2 Petro 2:4; Juda 6.

10. Ke mekgatlo efe e ganetšanago yeo e tšwelelago phatlalatša, gomme ke ka baka la’ng drakone e rata go ja ngwana ge mosadi a mmelega?

¹⁰ Ka gona, mekgatlo e mebedi yeo e lwantšhanago e tšweletše phatlalatša, e lego mokgatlo wa Jehofa wa legodimong wo o swantšhetšwago ke mosadi, le mokgatlo wa Sathane wa batemona wo o hlohlago bogoši bja Modimo. Kgang e kgolo ya bogoši e swanetše go lokišwa. Eupša bjang? Sathane, a dutše a goga batemona gore ba be gotee le yena, o swana le sebata se se nyakuretšego seo se nyakago yo se ka mo swarago. O letetše mosadi gore a belege. O nyaka go ja lesea le le le letetšwego, ka gobane o tseba gore le dira gore go tšwela pele ga gagwe a le gona le ga lefase leo a le bušago go be kotsing.—Johane 14:30.

Morwa, Ngwana e Motona

11. Johane o hlalosa bjang go belegwa ga ngwana wa mosadi, gomme ke ka baka la’ng ngwana a bitšwa “morwa, e motona”?

¹¹ Nako e beetšwego ditšhaba gore di buše ka ntle le go šitišwa ke Modimo, e ile ya fela ka 1914. (Luka 21:24) Bjale mosadi o belega ngwana wa gagwe ka nako e swanetšego: “A belega morwa, e motona, yo a tlago go diša ditšhaba ka moka ka molamo wa tšhipi. Ngwana wa gagwe a tšewa a išwa go Modimo le sedulong sa gagwe sa bogoši. Mosadi a tšhabela lešokeng moo a bego a e-na le lefelo leo a le lokišeditšwego ke Modimo, gore ba mo fepe moo ka matšatši a sekete makgolo-pedi-masome-tshela.” (Kutollo 12:5, 6) Ngwana yo ke “morwa, e motona.” Ke ka baka la’ng Johane a diriša polelwana ye ya go ipoeletša? O e diriša e le gore a bontšhe go swanelega ga ngwana, e lego go kgona ga gagwe go buša ditšhaba ka matla a feletšego. Le gona e gatelela kamoo go belegwa mo e lego mo gogolo ka gona le kamoo go thabišago ka gona! Go kgatha tema e kgolo tabeng ya go phetha sephiri se sekgethwa sa Modimo. Ee, ngwana yo yo motona o tla ba a “diša ditšhaba ka moka ka molamo wa tšhipi”!

12. (a) Jehofa o ile a holofetša’ng ka mokgwa wa boporofeta mabapi le Jesu go Dipsalme? (b) Ke’ng seo se swantšhetšwago ke go belega ga mosadi morwa “yo a tlago go diša ditšhaba ka moka ka molamo wa tšhipi”?

¹² Na polelwana ye e kwala e le e tlwaetšwego? Ee, Jehofa o ile a holofetša ka mokgwa wa boporofeta mabapi le Jesu gore: “O tlo ba rôba ka molamó wa thsipi; o tlo ba phšatla wa ’pitša tša letsopa.” (Psalme 2:9) Le gona go ile gwa porofetwa mabapi le yena gore: “Morêna ó tlo roma molamo wa matla a xaxo à le Tsione. Buša xare xa manaba ’axo.” (Psalme 110:2) Ka gona, go belegwa mo go bonwego ke Johane go akaretša kudu Jesu Kriste. Aowa, ga se go belegwa ga Jesu ke kgarebe morago kua pele ga lekgolo la pele la nywaga la Mehla ya rena e Tlwaetšwego; goba gore go ka bolela go tsošetšwa ga Jesu gape bophelong bja moya ka 33 C.E. Le gona, ga se go fetišetšwa boemong bjo bongwe bja bophelo. Go e na le moo, ke go belegwa ga Mmušo wa Modimo ka 1914 e le selo sa kgonthe, gomme Jesu yo ga bjale a lego legodimong ka nywaga-kgolo e ka bago 20, e le Kgoši e beilwego sedulong sa bogoši.—Kutollo 12:10.

13. Ke’ng seo se bontšhwago ke ‘go tšewa ga ngwana e motona gomme a išwa go Modimo le sedulong sa gagwe sa bogoši’?

¹³ Jehofa le ka mohla o be a ka se ke a dumelela Sathane gore a metše mosadi wa Gagwe goba morwa wa Gagwe yo a bego a sa tšwa go belegwa! Ngwana e motona ge a belegwe o a “tšewa a išwa go Modimo le sedulong sa gagwe sa bogoši.” Ka gona o šireletšwa e le ka kgonthe ke Jehofa, yo a tlago go hlokomela ka mo go feletšego Mmušo wo wo o sa tšwago go tswalwa, e lego sedirišwa sa Gagwe bakeng sa go kgethagatša leina la Gagwe le lekgethwa. Ka nako e swanago, mosadi o tšhabela lefelong leo Modimo a mo lokišeleditšego lona lešokeng. Ditaba tše dintši ka se di tla bolelwa ka morago! Ge e le ka Sathane, motheo bjale o theilwe bakeng sa tiragalo e kgolo yeo e tlago go dira gore ka mo go feletšego a se ke a hlwa a sa kgona go tšhošetša Mmušo legodimong. Tiragalo yeo ke’ng?

Ntwa Legodimong!

14. (a) Go etša ge Johane a bolela, ke tiragalo efe yeo e dirago gore Sathane a se ke a hlwa a sa kgona go tšhošetša Mmušo? (b) Sathane le batemona ba gagwe ba lahletšwe kae?

¹⁴ Johane o re botša gore: “Ntwa ya tsoga legodimong: Mikaele le barongwa ba gagwe ba lwa le drakone, gomme drakone le barongwa ba yona ba lwa, eupša ya se ke ya fenya, le gona gwa se ke gwa hlwa go hwetšwa madulo a bona legodimong. Ka gona drakone e kgolo ya lahlwa, yona noga ya kgale, ye e bitšwago Diabolo le Sathane, ye e timetšago lefase ka moka le go agilwego go lona; ya lahlelwa lefaseng gomme barongwa ba yona ba lahlwa le yona.” (Kutollo 12:7-9) Ka gona ge tiragalo e kgolo ya go dira gore sephiri se sekgethwa sa Modimo se phethege e direga, Sathane o a rakwa, o ntšhwa legodimong, gomme batemona ba gagwe ba lahlelwa lefaseng le yena. Motho yo a timeditšego lefase ka moka le go agilwego go lona go fihlela moo a fetogilego modimo wa lona, o feleletša ka go tswalelelwa tikologong ya lefase moo borabele bja gagwe bo ilego bja thoma gona.—2 Bakorinthe 4:3, 4.

15, 16. (a) Mikaele ke mang, gomme re tseba bjang? (b) Ke ka baka la’ng go swanetše gore Mikaele ke yena yo a lahlelago Sathane lefaseng a e-tšwa legodimong?

¹⁵ Ke bomang bao ba phethago phenyo ye e kgolo leineng la Jehofa? Beibele e bolela gore ke Mikaele le barongwa ba gagwe. Eupša Mikaele yo ke mang? Leina “Mikaele” le bolela gore “Ke Mang yo a Swanago le Modimo?” Ka gona, Mikaele o swanetše go ba a kgahlišwa ke go lwela bogoši bja Jehofa ka go hlatsela gore ga go na motho yo a ka bapišwago le Yena. O bitšwa “Mikaele morongwa yo mogolo” go Juda temana ya 9. Ka mo go kgahlišago, leina “morongwa yo mogolo” le dirišwa felo go gongwe ka Beibeleng le šupa go motho o tee feela: Jesu Kriste.b Paulo o bolela ka yena gore: “Morena o tla theoga legodimong ka mokgoši wa taelo, ka lentšu la morongwa yo mogolo le ka phalafala ya Modimo.” (1 Bathesalonika 4:16) Leina “morongwa yo mogolo” le bolela “kgoši ya barongwa.” Ka gona, ga go makatše ge Kutollo e bolela ka “Mikaele le barongwa ba gagwe.” Mafelong a mangwe moo Beibele e bolelago ka barongwa ba ikokobeletša mohlanka yo a lokilego wa Modimo, e šupa Jesu. Ka gona, Paulo o bolela ka “[kutollo] ya Morena Jesu go tšwa legodimong a e-na le barongwa ba gagwe ba matla.”—2 Bathesalonika 1:7; bona gape le Mateo 24:30, 31; 25:31.

¹⁶ Mangwalo a le a mangwe a re lebiša phethong yeo e ka se kego ya phengwa ya gore Mikaele ke Morena Jesu Kriste boemong bja gagwe bja legodimo, e sego motho yo mongwe o šele. Ka gona mo letšatšing la Morena ga a sa hlwa a botša Sathane fela gore: “A Jehofa a go kgalemele!” Ka ge ye e le nako ya kahlolo, Jesu ka ge e le Mikaele, o lahlela Sathane yo kgopo le barongwa ba gagwe ba batemona lefaseng ba e-tšwa legodimong. (Juda 9; Kutollo 1:10) Ke mo go swanetšego kudu gore e be Yena yo a dirago se, ka ge e le Yena Kgoši e sa tšwago go bewa sedulong sa bogoši. Jesu le gona ke Peu, e holofeditšwego morago kua Edene, yeo mafelelong e tlago go pšhatla hlogo ya Noga, gomme e be go e fediša gore e se ke ya hlwa e sa ba gona le ka mohla. (Genesi 3:15) Jesu ka go raka Sathane legodimong, o gatile megato e lebišago go pšhatleng moo ga mafelelo.

“Thabang Lena Magodimo”

17, 18. (a) Johane o bega boemo bofe bja legodimong ge e le ka go rakwa ga Sathane legodimong? (b) Ke’ng seo e ka bago e le mothopo o swanago wa lentšu le legolo leo Johane a le kwago?

¹⁷ Johane o bega lethabo leo le bilego gona legodimong ka baka la go lahlwa mo mo gogolo ga Sathane: “Ka kwa lentšu le le hlabošago legodimong le re: ‘Bjale go tlile phološo le matla le mmušo wa Modimo wa rena le matla a Kriste wa gagwe, gobane mmegi wa bana babo rena yo a ba begago pele ga Modimo mosegare le bošego o lahletšwe tlase! Ba mo fentše ka baka la madi a Kwana le ka baka la lentšu la go nea bohlatse ga bona, gomme ga se ba ka ba rata meoya ya bona gaešita le ge ba lebane le lehu. Ka baka le, thabang lena magodimo le bao le dulago go ona!’”—Kutollo 12:10-12a.

¹⁸ Lentšu le legolo leo Johane a le kwago ke la mang? Beibele ga e bolele. Eupša mogoo o swanago o bolelwago go Kutollo 11:17 o be o e-tšwa go bagolo ba 24 ba tsošitšwego bao ba lego maemong a bona a legodimong, moo bjale ba ka emelago bakgethwa ba 144 000. (Kutollo 11:18) Ka ge bahlanka ba Modimo ba tloditšwego ba ba tlaišwago bao ba sa dutšego ba le lefaseng ba bolelwa mo e le “bana babo rena,” gona polelo ye e ka ba e e-tšwa mothopong o swanago. Babotegi ba ka ntle le pelaelo ba ka kopanela ka mantšu a bona, ka ge tsogo ya bona e be e tla latela gatee-tee ka morago ga ge Sathane le madira a gagwe a batemona ba rakilwe legodimong.

19. (a) Go phethwa ga sephiri se sekgethwa sa Modimo go bulela Jesu tsela ya go dira’ng? (b) Ke’ng seo se bontšhwago ke go bitšwa ga Sathane “mmegi wa bana babo rena”?

¹⁹ Gore sephiri se sekgethwa sa Modimo se phethwe, Jesu o swanetše go buša Mmušong wa Jehofa. Ka gona, tsela e butšwe ya gore Modimo a phethe morero wa gagwe o mogolo wa go phološa batho ba botegago. Jesu o tliša phološo e sego feela go barutiwa ba gagwe bao ba boifago Modimo bao mo nakong ye ba lego lefaseng, eupša o e tliša le go dimilione tšeo di se nago palo tša bahu bao ba gopolwago ke Modimo. (Luka 21:27, 28) Go bitšwa ga Sathane “mmegi wa bana babo rena,” go bontšha gore gaešita le ge go bega ga gagwe Jobo go ile gwa ipontšha e le ga maaka, fela o sa dutše a belaela go botega ga bahlanka ba Modimo ba lefaseng. Ge e le gabotse, o boletše ka dinako tše dintši gore motho o tla gafa tšohle tšeo a nago le tšona e le gore a hlekelele bophelo bja gagwe. Sathane o paletšwe ka mo go nyamišago gakaakang!—Jobo 1:9-11; 2:4, 5.

20. Bakriste ba botegago ba fentše Sathane bjang?

²⁰ Bakriste ba tloditšwego bao ba bolelwago ba lokile “ka baka la madi a Kwana,” ba tšwela pele go nea bohlatse ka Modimo le ka Jesu Kriste go sa šetšwe ditlaišo. Sehlopha se sa Johane ka nywaga e fetago 120, se ile sa bolela ka dikgang tše dikgolo tšeo di sepedišanago le go fela ga Mabaka a Bantle ka 1914. (Luka 21:24) Lešaba le legolo mo nakong ye le hlankela ka potego le le ka lehlakoreng la bona. Ga go le o tee wa ba yo a ‘boifago bao ba bolayago mmele eupša ba sa kgone go bolaya moya,’ go etša ge diphihlelo tšeo di diregilego e le ka kgonthe tša Dihlatse tša Jehofa di bontšhitše gantši mehleng ya rena. Ba fentše Sathane ka polelo le ka boitshwaro bjo bo swanetšego bja Bokriste, gomme ba mmontšhitše gantši gore ke moaketši. (Mateo 10:28; Diema 27:11; Kutollo 7:9) Ge Bakriste ba tloditšwego ba tsošetšwa legodimong, ba swanetše go ba ba thaba gakaakang, ka ge Sathane a se sa hlwa a le moo go bega bana babo bona! Ruri, ke nako ya gore madira ka moka a borongwa a arabele ka lethabo mokgošing o rego: “Thabang lena magodimo le bao le dulago go ona!”

Madimabe a Bonaba!

21. Sathane o tlišitše bjang madimabe lefaseng le lewatleng?

²¹ Sathane ka ge a galefišitšwe ke madimabe a boraro, o ikemišeditše go kweša batho bohloko ka madimabe a mohuta wa gagwe. Ona ke a: “Go madimabe lefase le lewatle, gobane Diabolo o theogetše go lena a galefile kudu, ka ge a tseba gore o na le nako e kopana.” (Kutollo 12:12b) Go rakwa ga Sathane legodimong ruri go bolela madimabe lefaseng la kgonthe, leo le sentšwego ke batho ba boithati bao ba laolwago ke yena. (Doiteronomio 32:5) Go feta mo, molao wa Sathane wa gore ‘buša goba o senye,’ o tliša madimabe lefaseng la seswantšhetšo, e lego thulaganyo ya lekoko la batho, gotee le go a tliša go lewatle la seswantšhetšo, e lego batho bao ba ferekanego. Nakong ya dintwa tše pedi tša lefase, bogale bja Sathane bo ile bja bonagala bogaleng bja ditšhaba tšeo di bego di le tlase ga gagwe gomme go phulega mo go swanago ga kgalefo ya botemona go tšwela pele go fihla le lehono le, gaešita le ge bo ka se be gona ka nako e telele! (Mareka 13:7, 8) Eupša go sa šetšwe kamoo maano a Diabolo e ka bago a šiišago ka gona, fela a ka se ke a swana le mafelelo a bohloko ao madimabe a boraro, e lego mogato o tlago go gatwa ke Mmušo wa Modimo, a tlago go a tšweletša mokgatlong o bonagalago wa Sathane!

22, 23. (a) Ke’ng seo Johane a rego se a direga ka morago ga ge drakone e lahletšwe lefaseng? (b) Go kgonega bjang gore drakone e tlaiše “mosadi yo a belegego ngwana e motona”?

²² Ga e sa le go tloga go rakweng o šoro ga Sathane, bana babo Kriste bao ba sa dutšego ba le lefaseng ba kgotleletše sehlogo sa bogale bja gagwe. Johane o a bega: “Bjale ge drakone e bona gore e lahletšwe lefaseng, ya tlaiša mosadi yo a belegego ngwana e motona. Eupša diphego tše pedi tša ntšhu e kgolo tša newa mosadi gore a fofele lefelong la gagwe lešokeng; moo ke mo a fepšago ka nako le dinako le seripa sa nako a le kgole le sefahlego sa noga.”—Kutollo 12:13, 14.

²³ Pono mo e tšweletša kgopolo e boletšwego Kut 12 temaneng ya 6, yeo e re botšago gore mosadi ka morago ga go belegwa ga ngwana wa gagwe, o tšhabela lešokeng gore a be kgole le drakone. Mo gongwe re ka ipotšiša gore drakone e ka tlaiša mosadi bjang, ka ge yena a le legodimong gomme drakone yona e lahletšwe mo lefaseng. Gopola gore mosadi o na le bana mo lefaseng, bao e lego peu ya gagwe. Re botšwa ka morago ponong ye gore, Sathane o galefela mosadi ka go tlaiša peu ya gagwe. (Kutollo 12:17) Seo se diregago go peu ya mosadi mo lefaseng, se ka lebelelwa e le seo se diregago go yena mosadi. (Bapiša le Mateo 25:40.) Palo e oketšegago ya bagwera ba peu mo lefaseng, le yona e welwa ke ditlaišo tše.

Setšhaba se Sefsa

24. Barutwana ba Beibele ba ile ba ba le phihlelo efe yeo e bego e swana le go phološwa ga Baisiraele Egipita?

²⁴ Nakong ya ge ntwa ya pele ya lefase e be e lwewa, bana babo Jesu ba botegago ba ile ba tšwela pele ka go nea bohlatse go ya kamoo ba bego ba kgona ka gona. Se se ile sa dirwa go lebanwe le kganetšo e šoro e tšwago go Sathane le balatedi ba gagwe ba sehlogo. Mafelelong, go nea bohlatse phatlalatša ga Barutwana ba Beibele go ile gwa nyaka go kgaoditšwe ka mo go feletšego. (Kutollo 11:7-10) Seo se bile nakong ya ge ba be ba e-na le phihlelo e bego e swana gabotse le yela ya Baisiraele kua Egipita, bao le bona ba ilego ba kgotlelela go gatelelwa mo gogolo. E bile ka nako yeo mo Jehofa a ilego a ba tliša gatee-tee lefelong leo ba bego ba ka bolokega go lona leganateng la Sinai, go etša ge eka ke ka diphego tša lenong goba ntšhu. (Ekisodo 19:1-4) Ka mokgwa o swanago, Jehofa ka morago ga tlaišo e sehlogo ya 1918-19, o ile a tliša dihlatse tša gagwe tšeo di bego di emela mosadi wa gagwe, boemong bja moya bjo ba bego ba ka bolokega go bjona go etša ge leganata le be le le bjalo go Baisiraele. Se se ile sa tla e le karabo ya dithapelo tša bona.—Bapiša le Psalme 55:6-9.

25. (a) Jehofa o ile a tšweletša’ng ka 1919, go etša ge a ile a dira gore Baisiraele e be setšhaba lešokeng? (b) Ke bomang bao ba bopago setšhaba se, gomme ba tlišitšwe go eng?

²⁵ Jehofa o ile a dira Baisiraele gore e be setšhaba lešokeng, gomme a ba hlokomela moyeng le nameng. Ka mokgwa o swanago, go thoma ka 1919 Jehofa o ile a tšweletša peu ya mosadi e le setšhaba sa moya. Se ga se sa swanela go gakantšhwa le Mmušo wa Mesia wo o bego o dutše o buša legodimong go tloga ka 1914. Go e na le moo, setšhaba se se sefsa se dirilwe ka mašaledi a dihlatse tše di tloditšwego a lego lefaseng, ao a tlišitšwego boemong bja moya bja letago ka 1919. Ba ka go hlokomelwa ka “tekanyo ya dijo tša bona ka nako e swanetšego,” ba ile ba matlafaletšwa modiro wo o bego o le ka pele.—Luka 12:42; Jesaya 66:8.

26. (a) Nako e bolelwago go Kutollo 12:6, 14 ke e kaaka’ng? (b) Morero wa lebaka la dinako tše tharo le seripa e be e le ofe, gomme di ile tša thoma neng gomme tša fela neng?

²⁶ Nako ye ya go khutša bakeng sa peu ya mosadi wa Modimo e bile e kaaka’ng? Kutollo 12:6 e bolela gore ke ka matšatši a 1 260. Kutollo 12:14 e bitša lebaka le gore ke nako, dinako le seripa sa nako; ka mantšu a mangwe, ke gore dinako tše tharo le seripa sa nako. Ge e le gabotse, dipolelwana tšeo ka bobedi di emela nywaga e meraro le seripa yeo Karolong ya Lefase ya ka Leboa e thomago seruthwaneng sa 1919 go ya lehlabuleng la 1922. Ye e be e le nako ya go tielela mo go lapološago le go rulaganywa gape ga sehlopha sa Johane seo se tsošološitšwego.

27. (a) Drakone e ile ya dira’ng ka morago ga 1922, ka go ya ka pego ya Johane? (b) Morero wa Sathane e be e le ofe ka go hlatša lefula la tlaišo malebana le Dihlatse?

²⁷ Drakone e ile ya se hwe matwa! “Noga ya hlatša meetse molomong wa yona a swanago le noka ka morago ga mosadi, go mo dira gore a kgangwe ke noka.” (Kutollo 12:15) Go bolelwa’ng ka ‘meetse a swanago le noka,’ goba “meetse a mantši”? (The New English Bible) Kgoši Dafida wa kgale o ile a bolela ka batho ba babe bao ba bego ba mo tlaiša e le ‘dinoka tša batho bao e sego ba selo’ [“dinoka tše di se nago mohola,” Young]. (Psalme 18:4, 5, 16, 17) Seo Sathane bjale a se tšweletšago ke seo se swanago le tlaišo e dirwago ke ‘batho ba hlokago mohola goba bao e sego ba selo.’ Sathane ka morago ga 1922, o ile a hlatša lefula la tlaišo malebana le Dihlatse. (Mateo 24:9-13) Se se ile sa akaretša go hlokofatšwa mmeleng, ‘go dirwa ga bosenyi molao,’ go golegwa gaešita le go bolawa ka go fegwa, go thunywa le go kgaolwa dihlogo. (Psalme 94:20) Ka ge a ganeditšwe gore a se kgone go tsena ka go lebanya moo mosadi wa Modimo wa legodimo a lego gona, Sathane yo a gobogilego o ile a ikemišetša ka bogale go hlasela peu ya mosadi yeo e sa šaletšego lefaseng, e le gore a ba fediše mo gongwe ka mokgwa o lebanyago goba ka go ba dira gore ba lahlegelwe ke kgaugelo ya Modimo ka gore ba se sa botega. Eupša boikemišetšo bja bona bo ile bja ipontšha bo swana le bjola bja Jobo ge a be a re: “Nka se ke ka tloša potego ya-ka go nna, go fihlela ge ke e-hwa!”—Jobo 27:5, NW.

28. Lefula la tlaišo le ile la fihla bjang seremong nakong ya Ntwa ya II ya Lefase?

²⁸ Lefula le le lešoro la tlaišo le ile la golela godimo nakong ya Ntwa ya II ya Lefase. Dihlatse tše 12 000 kua Yuropa di ile tša golegwa dikampeng tša tshwenyo tša Nazi le dikgolegong, gomme tše ka bago 2 000 di ile tša hwa. Dihlatse tše botegago di ile tša hlokofatšwa ka tshwaro e swanago e sehlogo tlase ga baetapele ba phagamego ba bahlabani bao ba bego ba buša Italy, Japane, Korea le Taiwan. Gaešita le dinageng tšeo di bego di bitšwa tša pušo ka batho, Dihlatse di ile tša hlaselwa ke dihlopha tše di bego di ipopile tša Makatholika, di ile tša tšhelwa ka sekontiri le go hlomelwa mafofa gomme tša rakwa motseng. Dikopano tša Bokriste di ile tša šitišwa ka go phatlalatšwa gomme bana ba Dihlatse ba ile ba rakwa dikolong.

29. (a) Johane o hlalosa bjang kimollo e tšwelelago e e-tšwa mothopong wo o bego o se wa lebelelwa? (b) ‘Lefase le ile la thuša mosadi’ bjang? (c) Drakone e tšwetše pele go dira’ng?

²⁹ Kimollo e ile ya tšwelela e e-tšwa mothopong wo o bego o se wa lebelelwa: “Eupša lefase la thuša mosadi, la ahlamiša molomo wa lona gomme la metša noka yeo drakone e e hlatšitšego molomong wa yona. Drakone ya galefela mosadi gomme ya ya go lwa le ba šetšego ba peu ya mosadi, bao ba bolokago ditaelo tša Modimo gomme ba e-na le modiro wa go nea bohlatse ka Jesu.” (Kutollo 12:16, 17) “Lefase,” e lego dikarolo tšeo di lego tshepedišong ya Sathane ya dilo, le ile la thoma go metša “noka,” goba “lefula.” Dihlatse nywageng ya bo-1940 di ile tša hwetša lelokelelo la dikahlolo tše di kgahlišago Kgorong e Phagamego ya United States le mebušong e lego dinageng tše dingwe, yeo e bego e dumelela tokologo ya borapedi. Mafelelong, ditšhaba tšeo di bego di kopane di ile tša metša tumelo ya Bonazi le Bofasi, e lego seo se ilego sa imolla Dihlatse tšeo di bego di hlokofatšwa mebušong yeo e šoro ya bonkgwete. Ditlaišo di ile tša se ke tša felela ruri, ka gobane bogale bja drakone bo tšwetše pele go fihla le lehono, gomme e tšwela pele go lwa le bao ba “[nago] le modiro wa go nea bohlatse ka Jesu.” Dihlatse tše botegago di sa dutše di le dikgolegong dinageng tše dintši, gomme tše dingwe di sa dutše di e-hwa ka baka la potego ya tšona. Eupša dinageng tše dingwe tša tše, nako le nako babuši ba fokotša kgatelelo ya bona gomme Dihlatse di thabela khunologo e itšego.c Ka gona, ka go phethagatša boporofeta, lefase le tšwela pele go metša noka ya tlaišo.

30. (a) Lefase le neile kimollo e lekanego bakeng sa gore go direge’ng? (b) Potego ya batho ba Modimo e tšweletša’ng?

³⁰ Lefase ka tsela ye le tšweleditše kimollo e lekanego go dumelela gore modiro wa Modimo o phatlalale dinageng tše ka bago 235, gomme o tšweletše baboledi ba botegago ba ditaba tše dibotse ba fetago dimilione tše tshela. Lešaba le legolo la ditšhaba tšohle la badumedi ba bafsa gotee le bao ba sa šaletšego ba peu ya mosadi, le boloka ditaelo tša Modimo tšeo di lego mabapi le go ikarola lefaseng, boitshwaro bjo bo hlwekilego le lerato la go rata bana babo bona, gomme le nea bohlatse ka Mmušo wa Mesia. Potego ya lona e araba lenyatšo le lešoro la Sathane, e le gore go bontšhwe go palelwa ga Sathane le tshepedišo ya gagwe ya dilo.—Diema 27:11.

[Mengwalo ya ka tlase]

[Lepokisi go letlakala 185]

‘Lefase la Ahlamiša Molomo wa Lona’

Lefula le šoro la Sathane la tlaišo le bile gona dinageng tše dintši malebana le Bakriste ba tloditšwego le bagwera ba bona. Lega go le bjalo, ditiragalo tše di diregago tshepedišong ya Sathane ya dilo gantši di feleleditše ka go metša lefula leo.

Lefula la tlhaselo ya dihlopha tša bahlola-mpherefere le go golegwa kua United States, le ile la metšwa ka karolo e kgolo ke dikahlolo tše di kgahlišago tša Kgoro e Phagamego nywageng ya bo-1940.

1945: Tlaišo e šoro dinageng tšeo di bego di bušwa ke Jeremane le Japane e ile ya kgaotšwa ke diphenyo tša Ditšhaba tšeo di bego di kopane Ntweng ya II ya Lefase.

Nakong ya ge go thibelwa Dihlatse tša Jehofa kua Dominican Republic, Dihlatse di ile tša golegwa le go bethwa ka dikutu tša dithunya. Go se kwane mo go bilego gona magareng ga Rafael Trujillo wa nkgwete le Kereke ya Roma Katholika ka 1960, go dirile gore thibelo e tlošwe godimo ga Dihlatse tša Jehofa.

Go thunywa ka dithunya, go tšhungwa, go katwa, go bethwa, go hlokofatšwa le go bolawa ga Dihlatse nakong ya ntwa ya selegae kua Nigeria, go ile gwa kgaotšwa ka 1970 nakong ya ge madira a mmušo a fentše profense yeo e bego e ikarotše, e lego moo dilo tše di bego di direga gona.

Kua Sepania magae a ile a hlaselwa gomme Bakriste ba lefišwa le go golegwa ka baka la “molato” wa go bolela ka Modimo le go swara diboka tša Bokriste. Tlaišo ye e ile ya fela ka 1970 nakong ya ge ka baka la go fetoša ga mmušo melao ya yona malebana le madumedi ao e sego a Katholika, Dihlatse tša Jehofa di ile tša dumelelwa go ngwadišwa ka molao.

Kua Portugal, magae a mantši a ile a phuruphutšwa ka ntle le tumelelo. Dihlatse di ile tša gobatšwa mmeleng le go lahlelwa kgolegong, gomme Dibeibele tša tšona di ile tša tšewa. Botšhošetši bjo bo ile bja ‘metšwa’ nakong ya ge phetogelo ya bahlabani ka 1974 e feleletša ka go bewa ga mmušo o mofsa gomme go ntšhwa molao wa go dumelela tokologo ya go bokana.

Kua Argentina, bana ba Dihlatse tša Jehofa tlase ga mmušo wa bahlabani ba ile ba rakwa dikolong gomme Dihlatse tše di bego di le nageng ka moka di ile tša swarwa ka baka la go bolela ditaba tše dibotse. Tlaišo ye e ile ya feleletša ka go kgaotša ka 1984, nakong ya ge mmušo wo o bego o buša ka nako yeo o be o amogela Lekgotla la Dihlatse tša Jehofa ka molao.

[Seswantšho go letlakala 183]

1914 Go tswalwa ga Mmušo

1919 Go tswalwa ga setšhaba se sefsa

1919—1922 Nako ya go tielela

1922— Lefula la tlaišo

[Diswantšho go letlakala 182]

Go madimabe lefase