Go Rata Modimo go Bolela’ng?

MO E ka bago nywaga e dikete tše tshelelago e fetilego, lesea la mathomo la motho le ile la belegwa. Ka morago ga go belegwa ga lona, mmago lona e lego Efa o ile a re: “Ke belege monna ka thušo ya Jehofa.” (Genesi 4:1, NW) Polelo ya gagwe e utolla gore gaešita le ge ba be ba šetše ba ahloletšwe lehu ka baka la borabele bja bona, Efa le monna wa gagwe Adama ba be ba sa dutše ba lemoga Bomodimo bja Jehofa. Ka morago ba ile ba belega morwa wa bobedi. Bašemane ba ile ba rewa Kaine le Abele.

Ge barwa ba be ba dutše ba gola, ga go pelaelo gore ba ile ba ithuta mo gontši ka lerato la Jehofa ka go fo hlahloba tlholo ya gagwe. Ba ile ba thabela mebala e mebotse ya tlhago le diphoofolo gotee le dimela tša mehuta-huta. Ga se feela gore Modimo o ile a ba nea bophelo, eupša gape o ile a ba nea bokgoni bja go hwetša lethabo bophelong.

Ba ile ba lemoga gore batswadi ba bona ba be ba bopilwe ba phethagetše le gore morero wa Jehofa wa mathomong e be e le gore batho ba phele ka mo go sa felego. Mohlomongwe Adama le Efa ba ba hlaloseditše ka tšhemo e botse ya Edene gomme ba swanelwa ka tsela e itšego ke go hlalosa lebaka leo ka lona ba bego ba lelekilwe legaeng le bjalo la paradeise. Kaine le Abele ba ka ba ba bile ba be ba lemoga boporofeta bja Modimo bjo bo begilwego go Genesi 3:15. Jehofa o hlalositše ka boporofeta bjoo morero wa gagwe wa go lokiša ditaba ka nako e swanetšego bakeng sa go hola bao ba mo ratago le go ipontšha e le ba mmotegelago ka go se kwanantšhe.

Go ithuta ka Jehofa le dika tša gagwe go swanetše go ba go ile gwa tutuetša kganyogo ya go amogelwa ke Modimo go Kaine le Abele. Ka gona ba ile ba batamela Jehofa ka go mo nea dibego. Pego ya Beibele e re: “Ya re xe xo fetile matšatši, Kaine a išetša Morêna sebexô sa dienywa tša thšemo. Abele yêna a iša sa maitšibulô a dihuswane tša xaxwe, le tše di mahura tša tšôna.”—Genesi 4:3, 4.

Go kganyoga ga bona go amogelwa ke Modimo go ile gwa thea motheo wa tswalano le yena. Kaine o ile a feleletša ka go rabela go Modimo mola Abele a ile a tšwela pele a tutuetšwa ke lerato la kgonthe la go rata Modimo. Abele o be a ka se ke a hlagolela tswalano e bjalo le Modimo le gatee ka ntle le ge a be a thomile ka go hwetša tsebo mabapi le semelo sa Jehofa le merero ya gagwe.

Le wena o ka tseba Jehofa. Ka mohlala, o ka ithuta ka Beibeleng gore Modimo ke motho wa kgonthe e sego matla feela a se nago bophelo a tšamago a bopa dilo ka kotsi feela. (Bapiša le Johane 7:28; Ba-Hebere 9:24; Kutollo 4:11.) Beibele e bile e ruta gore Jehofa ke “Modimo yo mabobo le kxauxêlô, wa xo se fêlê pelo, wa botho byo boxolo le therešô.”—Ekisodo 34:6.

‘Go kwa go Phala Sehlabelo’

Go etša ge go bontšhitšwe ke pego ya Kaine le Abele, go ba le tsebo ya go tseba Modimo gotee le kganyogo ya go ba le tswalano ya kgaufsi le yena ga se gwa lekana. Ke therešo gore barwarre ba ba babedi ba ile ba batamela Modimo ka dibego. Lega go le bjalo, “Modimo Yêna a thabêla Abele le sebexô sa xaxwe; fêla, xa a ka a thabêla Kaine le sebexô sa xaxwe. Ké mo Kaine a befetšwexo xa-xolo, a inamiša sefahloxô.”—Genesi 4:3-5.

Ke ka baka la’ng Jehofa a ile a gana sehlabelo sa Kaine? Na go be go e-na le selo se se fošagetšego ka bohlokwa bja sebego sa gagwe? Na Jehofa o be a kgopišegile ka baka la gore Kaine a neetše sehlabelo sa “dienywa tša thšemo” go e na le sa phoofolo? Go ka ba go se bjalo. Ka morago Modimo o ile a amogela dibego tša mabele le dienywa tše dingwe tša tšhemo tše di tšwago go ba bantši ba barapedi ba gagwe. (Lefitiko 2:1-16) Ka gona, go molaleng gore go be go e-na le selo se se fošagetšego ka pelo ya Kaine. Jehofa o ile a kgona go bala pelo ya Kaine gomme a mo lemoša gore: “O befeletšwe’ng? O re’ng Ò inamiša sefahloxô? Xe O ka dira xa-botse, a xa se mó Ò tl’o xo inamoloxa! Fêla, xe O sa dire xa-botse, xôna sebe se laletše mojakô; se a Xo kxanyoxa.”—Genesi 4:6, 7.

Lerato la kgonthe la go rata Modimo le bolela mo gontši go feta go fo dira dihlabelo. Ke ka lebaka leo Jehofa a ilego a kgothaletša Kaine gore a “dire xa-botse.” Modimo o be a nyaka go kwewa. Go kwa Modimo mo go bjalo go ka be go ile gwa thuša Kaine go thea motheo o mobotse wa tswalano e lerato le Mmopi. Beibele e gatelela bohlokwa bja go kwa ka mantšu a: “A O re Morêna ó thabêla [dihlabelo tša phišo le tša go hlabja] xo fetiša mola motho xe a e-kwa se Morêna a se boletšexo? O tsebê xore xo kwa xo phala [sehlabelo], xo thaetša xo phadiša mahura a dikxapa.”—1 Samuele 15:22, bapiša le PK.

Kgopolo ye e ile ya hlaloswa gabotse kudu ka morago ka mantšu a 1 Johane 5:3 a rego: “Xobane leratô la xo rata Modimo ké xe re e-ya ka melaô ya xaxwe; xomme melaô ya xaxwe xa se e thata.” Ga go na tsela e kaone ya go bontšha lerato la rena la go rata Jehofa go phala go ikokobeletša ga rena taolo ya gagwe. Se se bolela go kwa molao wa Beibele wa boitshwaro. (1 Ba-Korinthe 6:9, 10) Se bolela go rata se se lokilego le go hloya se sebe.—Psalme 97:10; 101:3; Diema 8:13.

Pontšho e nngwe e bohlokwa ya lerato la rena la go rata Modimo ke go rata ga rena moagišani. Beibele e re botša gore: “Xe motho a ka re: Ke rata Modimo,—’me a hloile ngwan’abô, ké wa maaká; xobane e a sa ratexo ngwan’abô yo a mmônaxo, a a ka kxôna xo rata Modimo yo a sa mmonexo?”—1 Johane 4:20.

Tswalano ya Kgaufsi le Modimo e a Kgonega

Ba bangwe ba ka re, ‘Ke rapela Jehofa. Ke kwa melao ya gagwe. Ke swara magagešo ka toka. Ke dira tšeo ka moka. Lega go le bjalo, ruri ga ke ikwe ke le kgaufsi le Modimo. Ga ke ikwe ke mo rata ka mo go tiilego gomme seo se ntira gore ke ikwe ke na le molato.’ Ba bangwe ba ka nagana gore ga ba swanelegele go hwetša tswalano e bjalo ya kgaufsi le Jehofa.

Ka morago ga nywaga e nyakilego go ba e 37 a hlankela Jehofa ka boineelo, Mokriste yo mongwe o ngwadile gore: “Ke ile ka ikwa gantši bophelong bja-ka gore ke be ke se ka moya ka moka tirelong ya-ka go Jehofa, gore mohlomongwe pelo ya-ka e be e bile e se go yona. Eupša ke be ke tseba gore go hlankela Jehofa e be e le selo se se nepagetšego seo ke swanetšego go se dira gomme ke be nka se ke ka itumelela go kgaotša. Lega go le bjalo, nako le nako ge ke be ke bala ka motho yo mongwe a bolela gore ‘pelo [ya gagwe] e be e tletše lerato la go rata Jehofa,’ ke be ke tla ipotšiša gore, ‘Molato ke eng ka nna ka gore le ka mohla ga se ka ka ka ikwa ka tsela yeo?’” Re ka ba bjang le tswalano ya kgaufsi le Modimo?

Ge o tloga o rata motho, o nagana gantši ka motho yoo. O ba le kganyogo e matla ya go ba kgaufsi le yena ka gobane o tshwenyega ka yena. Ge o mmona gantši, o bolela le yena e bile o nagana ka yena, lerato la gago la go mo rata le gola kudu. Molao wo wa motheo o šoma le go hlagoleleng ga gago lerato la go rata Modimo.

Go Psalme 77:12 mongwadi yo a buduletšwego o re: “Ke êlêlwa ditirô tša xaxo ka moka; ke akanya tše Wêna O di dirilexo.” Go naganišiša ke gabohlokwa go hlagoleleng lerato la go rata Modimo. Se ke sa therešo kudu ge re lebelela therešo ya gore ga a bonagale. Eupša ge o nagana ka yena kudu, ke gona mo e tlago go ba wa kgonthe go wena. Ke feela ge o dira bjalo moo o ka bago le tswalano e tšwago pelong le e lerato le yena—ka gobane ke wa kgonthe go wena.

Tshekamelo ya gago ya go naganišiša leboelela ka ditsela tša Jehofa le ditirišano tša gagwe e tla ithekga ka makga ao o mo kwago ka ona. O kwa ka go bala gotee le go ithuta Lentšu la gagwe Beibele ka mehla. Mopsalme o bolela ka motho yo a thabilego e le wa “xo thabêla molaô wa Morêna, molaô woo a o akanya mosexare le bošexo.”—Psalme 1:1, 2.

Karolo e nngwe e bohlokwa ke thapelo. Ke ka baka leo Beibele e re kgothaletšago leboelela gore re rapele—“ka mabaka ohle,” ‘re bone sebaka sa go rapela,’ ‘re tiiše thapelo,’ gomme re “se kxaotše xo rapêla.” (Ba-Efeso 6:18; 1 Ba-Korinthe 7:5; Ba-Roma 12:12; 1 Ba-Thesalonika 5:17) Dithapelo tša rena tše sa kgaotšego go Jehofa di tla dira gore a re rate gomme kgodišego ya gore o a theetša e tla re batametša go yena. Se se kgonthišeditšwe ke mopsalme ge a be a bolela gore: “Morêna ke mo rata ka xobane ó kwele lentšu la-ka xe ke mo llêla. Xe ke sa fêla kè phela, ke tlo mmitša ka mehla, ka xobane ó nthsêkêxêla tsêbê.”—Psalme 116:1, 2.

Go Ekiša Modimo yo Lerato

Jehofa ke yo botho go rena. Ka ge e le Mmopi wa legohle, ka kgonthe o na le dilo tše dintši tšeo a swanetšego go di ela hloko le go di hlokomela. Lega go le bjalo, Beibele e re botša gore le ge e le yo mogolo gakaakaa, o sa dutše a hlokomela tlholo ya gagwe yeo e lego motho. O a re rata. (1 Petro 5:6, 7) Mopsalme o kgonthišetša se ka mantšu a gagwe a rego: “Morêna Mong’a rena! ’Ina l’axo le taxile xa-kaka’ng lefaseng ka moka, Wêna O ipeetšexo borêna kwa maxodimong! Xe ke bôna lexodimo lé la xaxo, medirô ya menô ya xaxo, kxwedi le ’naledi tšé, O di beilexo, ke re motho ké eng, xe O bile O sa mo lebale? Ngwana wa motho ké eng, xe O bile O mo êla hlôkô?”—Psalme 8:1, 3, 4.

Jehofa o ile a dula a gopola motho yo a hwago bjang? Beibele e araba ka gore: “Leratô la Modimo le a re ratilexo ka lôna, le bônaxetše ka xe a roma Morwa wa xaxwe Mo-tswalwa-esi, a tla lefaseng xore re phelê ka yêna. Leratô xe le le xôna, xa se ka xore ké rena re ratilexo Modimo; ké ka xe Yêna a re ratile a roma Morwa wa xaxwe, a ba seloba sa dibe tša rena.”—1 Johane 4:9, 10.

Ke bjang sehlabelo se sa poelanyo e lego bohlatse bjo bogolo kudu bja lerato la Modimo? Anke re hlahlobeng se se diregilego tšhemong ya Edene. Adama le Efa ba be ba lebeletšane le phetho ya ge e ba ba tla ikokobeletša molao wa Jehofa o nago le tebelelo ya bophelo bjo bo phethagetšego bjo bo sa felego goba ba tla rabela go Jehofa, ka go rialo ba hwe. Ba ile ba kgetha go rabela. (Genesi 3:1-6) Ka go dira bjalo ba bile ba lahlela batho ka moka lehung. (Ba-Roma 5:12) Ba re amogile ka boikgogomošo sebaka sa go itirela phetho. Ga go le o tee wa rena yo a bego a e-na le seo a ka se bolelago tabeng ye.

Lega go le bjalo, Jehofa o ile a dula a nagana ka lerato ka motho yo a hwago a ela boemo bja gagwe hloko. Ka lehu la Morwa wa Gagwe Jesu Kriste la sehlabelo, Jehofa o lokišeditše yo mongwe le yo mongwe wa rena motheo wa molao wa go ikgethela bophelo goba lehu, go kwa goba go rabela. (Johane 3:16) Go bjalo ka ge eka Jehofa o re neile sebaka sa rena kgorong ya tsheko—e lego sebaka seo go ka thwego ke sa go boela Edene gomme re itirele phetho. Ye ke pontšho e kgolo kudu ya lerato yeo e kilego ya dirwa.

Akanya ka bohloko bjo Jehofa a ilego a bo kgotlelela ge a be a bona leitšibolo la gagwe le rogakwa, le tlaišwa le go kokotelwa bo-ka sesenyi. Modimo o kgotleletše seo bakeng sa rena. Go lemoga ga rena go gata ga Jehofa mogato pele wa go re rata go swanetše go re tutueletša go mo rata ka mo go swanago gomme go re kgothaletše go mo tsoma. (Jakobo 1:17; 1 Johane 4:19) Beibele e re laleletša go ‘nyaka Jehofa le matla a gagwe, re fele re nyaka sefahlego sa gagwe. Re se lebale mehlolo yeo a e dirilego, matete a gagwe, le dikahlolo tša molomo wa gagwe.’—Psalme 105:4, 5.

Go ba le kgokagano ya motho ka noši le Modimo gotee le tswalano e lerato, go ba mogwera wa gagwe ga se mo go sa kgonegego. Ke mo go ka fihlelelwago. Ke therešo gore re ka se ke ra lekanya ka go tia lerato la rena la go rata Modimo le ditswalano tša batho. Lerato leo re nago le lona bakeng sa molekane wa rena, batswadi, banababo rena, bana ba rena goba bagwera le fapane le lerato leo re ratago Modimo ka lona. (Mateo 10:37; 19:29) Go rata Jehofa go akaretša boikgafo bja rena, borapedi bja rena le boineelo bja rena bjo bo sa ithekgago ka maemo go yena. (Doiteronomio 4:24) Ga go na tswalano e nngwe e nago le tlhaloso e bjalo. Lega go le bjalo, re ka hlagolela maikwelo a tiilego le a tseneletšego bakeng sa Modimo ka tsela ya tlhompho ka poifo.—Psalme 89:7.

Gaešita le ge o sa phethagala, o ka kgona go rata Mmopi wa gago bjalo ka Kaine le Abele. Kaine o ikgethetše a tlatša Sathane gomme a ba mmolai wa mathomo wa motho. (1 Johane 3:12) Ka mo go fapanego, Abele o tla gopolwa ke Jehofa e le monna wa tumelo le go loka gomme o tla putswa ka bophelo Paradeiseng e tlago.—Ba-Hebere 11:4.

Le wena o ka ikgethela. Ka thušo ya moya wa Modimo le Lentšu la gagwe, ruri o ka rata Modimo “ka pelo ya xaxo ka moka, le ka môya wa xaxo ka moka, le ka matla a xaxo ka moka.” (Doiteronomio 6:5) Jehofa le yena o tla tšwela pele a go rata ka gobane “ba ba Mo nyakaxo ó a ba putsa.”—Ba-Hebere 11:6.

[Seswantšho go letlakala 7]

Sehlabelo sa Abele se be se amogelega go Modimo