Jehofa O Phethagatša Dikholofetšo Tša Gagwe Bakeng Sa Babotegi
“E a re holofedišitšexo ó a bôtêxa.”—BA-HEBERE 10:23.
1, 2. Ke ka baka la’ng re ka ba le kgodišego e feletšego dikholofetšong tša Jehofa?
JEHOFA o nyaka gore bahlanka ba gagwe ba hlagolele le go kgomarela tumelo e tiilego go yena le dikholofetšong tša gagwe. Ka tumelo e bjalo motho a ka bota Jehofa ka mo go feletšego gore a ka dira seo a holofeditšego go se dira. Lentšu la gagwe le le buduletšwego le re: “Morêna wa mašaba ó enne a re: Xe xo sa direxe tše ke di xopotšexo, xe xo sa tšwêlêle tše ke di rerilexo, e tlo ba è se Nna!”—Jesaya 14:24.
2 Polelo “Morêna wa mašaba ó enne,” e bontšha gore o nea keno ya gagwe ya kgonthe bakeng sa go phethagatša dikholofetšo tša gagwe. Ke ka baka leo Lentšu la gagwe le ka bolelago gore: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” (Diema 3:5, 6) Ge re bota Jehofa gomme re dumelela go hlahlwa ke bohlale bja gagwe, ditsela tša rena di tla leba bophelong bjo bo sa felego ka ntle le go palelwa, ka gobane bohlale bja Modimo ke “sehlare sa bophêlô sa ba bo swerexo.”—Diema 3:18; Johane 17:3.
Tumelo ya Kgonthe Mehleng ya Bogologolo
3. Noage o ile a bontšha bjang tumelo go Jehofa?
3 Pego ya ditiro tša Jehofa go bao ba nago le tumelo ya kgonthe e hlatsela gore ke yo a ka botwago. Ka mohlala, nywageng e fetago 4400 e fetilego, Modimo o ile a botša Noage gore lefase la mehleng ya gagwe le be le tla fedišwa ka Meetse-fula a lefase ka moka. O ile a laela Noage gore a age areka e kgolo kudu bakeng sa go phološa bophelo bja batho le bja diphoofolo. Noage o ile a dira’ng? Ba-Hebere 11:7 e re botša gore: “Ké ka tumêlô xe Noa a dirile polokêlô à laetšwe ke Modimo, a botšwa tše di bexo di sešo tša bônwa, a phološa ba lapá la xaxwe.” Ke ka baka la’ng Noage a ile a ba le tumelo selong seo le ka mohla se bego se sa ka sa direga pele, selo seo ‘se bego se sešo sa bonwa’? Ke ka gobane a be a tseba ka ditirišano tša Modimo tša nakong e fetilego le lapa la batho ka mo go lekanego go ka lemoga gore selo le ge e le sefe seo Modimo a se bolelago e ba sa therešo. Ka gona Noage o be a kgodišegile gore Meetse-fula le wona a be a tla ba gona.—Genesi 6:9-22.
4, 5. Ke ka baka la’ng Aborahama a ile a bota Jehofa ka mo go tletšego?
4 Mohlala o mongwe wa tumelo ya kgonthe ke Aborahama. Mo e nyakilego go ba nywaga e 3900 e fetilego, Modimo o ile a mmotša gore a dire Isaka sehlabelo, e lego morwa a nnoši wa gagwe ka mosadi wa gagwe Sara. (Genesi 22:1-10) Aborahama o ile a arabela bjang? Ba-Hebere 11:17 e re: “Ké ka tumêlô xe Aborahama mola à lekwa, à tliša Isaka xore e bê sedimo [“sehlabelo,” NW].” Lega go le bjalo, motsotsong wa mafelelo, morongwa wa Jehofa o ile a thibela Aborahama. (Genesi 22:11, 12) Lega go le bjalo, ke ka baka la’ng Aborahama a ile a ba a nagana ka go dira selo se se bjalo? Ka gobane go etša ge Ba-Hebere 11:19 e bolela, “mo pelong ya xaxwe a re: Modimo le xo tsoša mohu [Isaka] ó a kxôna.” Eupša Aborahama o be a ka ba le tumelo tsogong bjang mola a se a ka a e bona gomme go se na pego ya yona ya nakong e fetilego?
5 Gopola, Sara o be a e-na le nywaga e 89 ge Modimo a be a ba holofetša morwa. Popelo ya Sara e be e se sa kgona go ima—e be e hwile ge go bolelwa ka go swantšhetša. (Genesi 18:9-14) Modimo o ile a tsoša popelo ya Sara gomme a belega Isaka. (Genesi 21:1-3) Aborahama o be a tseba gore ka ge Modimo a be a bušeditše popelo e hwilego ya Sara bophelong, gona o be a ka bušetša Isaka bophelong ge go be go nyakega. Ba-Roma 4:20, 21 e re ka Aborahama: “Kholofedišô ya Modimo xa a ka a e belaêla ka xo se dumêle; sa xaxwe ya ba xo tiêla tumêlô le xo xodiša Modimo, à kxodilwe ruri xore Modimo ó na le matla a xo dira se a mo holofedišitšexo sôna.”
6. Jošua o ile a bontšha bjang kgodišego go Jehofa?
6 Nywageng e fetago 3400 e fetilego ge Jošua a be a e-na le nywaga ya ka godimo ga e lekgolo le ka morago ga go bona phihlelong ya bophelo ka moka kamoo Modimo a botegago ka gona, o ile a nea lebaka le bakeng sa kgodišego ya gagwe: “Lena a nkê Le lemoxeng ka pelo ka moka le ka môya ka moka, xe xo sa ka xwa hlaêla le setee sa tše botse tše Morêna Modimo wa lena a Le boletšexo ka tšôna; ka moka di tšweletše; xa xo na le setee se se hlokexilexo.”—Jošua 23:14.
7, 8. Ke tsela efe e phološago yeo Bakriste ba botegago ba ilego ba e tšea lekgolong la pele la nywaga, gomme ka baka la’ng?
7 Nywageng e ka bago 1900 e fetilego, batho ba bantši ba ikokobeditšego ba ile ba bontšha tumelo ya kgonthe. Ba ile ba lemoga go tšwa phethagatšong ya boporofeta bja Beibele gore Jesu e be e le Mesia gomme ba amogela dithuto tša gagwe. Ka go ba le motheo o tiilego ditherešong le Mangwalong a Sehebere, ba ile ba dumela seo Jesu a bego a se ruta. Ka go rialo, ge Jesu a be a bolela gore kahlolo ya Modimo e be e tlo wela Juda le Jerusalema ka baka la go se botege, ba ile ba mo dumela. Le gona, ge a be a ba botša ka seo ba bego ba swanetše go se dira gore ba phološe maphelo a bona, ba ile ba se dira.
8 Jesu o ile a botša badumedi gore ge Jerusalema e be e dikanetšwa ke madira, ba swanetše go tšhaba. Madira a Roma a ile a hlasela Jerusalema ka ngwaga wa 66 C.E. Eupša ka morago ba-Roma ba ile ba tloga ka lebaka leo le sa hlalosegego. Leo e be e le leswao go Bakriste gore ba tloge motseng, ka gobane Jesu o be a itše: “E re xe Le bôna motse wa Jerusalêma ò dikilwe ke makôkô a madirá, xôna Le tsebê xore xo batametše xo phušolwa xa wôna. Mehleng yeo ba ba lexo naxeng ya Juda ba thšabêlê dithabeng; ba ba lexo mo motseng ba ngwêxê; ba dinakaneng ba se kê ba ya motseng.” (Luka 21:20, 21) Bao ba nago le tumelo ya kgonthe ba ile ba tloga Jerusalema le mafelong ao a e dikologilego gomme ba tšhabela mo go šireletšegilego.
Ditla-morago tša go Hloka Tumelo
9, 10. (a) Baetapele ba bodumedi ba ile ba bontšha bjang go hloka ga bona tumelo go Jesu? (b) Ditla-morago tša go hloka tumelo moo e bile dife?
9 Ke eng seo bao ba se nago tumelo ya kgonthe ba ilego ba se dira? Ga se ba ka ba tšhaba ge ba be ba e-na le sebaka. Ba ile ba nagana gore baetapele ba bona ba be ba ka ba phološa. Lega go le bjalo, baetapele bao le balatedi ba bona ba be ba e-na le bohlatse bja go ba ga Jesu Mesia. Ka gona ke ka baka la’ng ba se ba ka ba amogela seo a se boletšego? Ka baka la boemo bja bona bjo kgopo bja pelo. Se se ile sa utollwa pejana ge ba be ba bona bontši bja batho feela bo kgeregela go Jesu ka morago ga ge a tsošitše Latsaro. Johane 11:47, 48 e laodiša ka gore: “Baperisita ba baxolo le bafarisei ba napa ba kxobêla pitšô [lekgotla le le phagamego la ba-Juda], ba re: Re tlo re’ng? Motho é [Jesu] ó dira mehlôlô e mentši. Xe re ka fêla rè mo lesa, bohle ba tlo mo dumêla, ’me Ba-Rôma ba tlo tla ba re amoxa naxa le batho.” Temana 53 e re: “Ké lôna ’tšatši le ba tloxilexo bà tlemile la xo re ba tlo mmolaya.”
10 A mohlolo o makatšago gakaakang wo Jesu a bego a o dirile—go tsoša Latsaro bahung! Eupša baetapele ba bodumedi ba be ba nyaka gore Jesu a bolawe bakeng sa go dira seo. Bokgopo bja bona bjo bogolo bo ile bja pepentšhwa ka mo go oketšegilego ge “baperisita ba baxolo ba [lakane] xore le yêna Latsaro ba mmolayê; ka xobane e be e le ka ’baka la xaxwe xe Ba-Juda bà e-ya ’me ba dumêla Jesu.” (Johane 12:10, 11) Latsaro o be a sa tšwa go tsošwa bahung gomme baperisita bao ba be ba nyaka go mmona a hwile gape! Ba be ba sa tshwenyege ka thato ya Modimo goba ka katlego ya batho. E be e le baithati, ba tshwenyegile ka maemo a bona le mehola yeo ba e hwetšago. “Ba be ba kxanyoxa xo rêtwa ke batho, ba nyatša xo rêtwa ke Modimo.” (Johane 12:43) Eupša ba ile ba lefa bakeng sa go hloka ga bona tumelo. Ka ngwaga wa 70 C.E., madira a Roma a ile a boa gomme a senya lefelo la bona le setšhaba sa bona gotee le bontši bja bona.
Tumelo e a Bontšhwa Mehleng ya Rena
11. Mathomong a lekgolo le la nywaga, tumelo ya kgonthe e ile ya bontšhwa bjang?
11 Lekgolong le la nywaga, le gona go bile le banna le basadi ba bantši ba tumelo ya kgonthe. Ka mohlala, morago kua mathomong a nywaga ya bo-1900, batho ka kakaretšo ba be ba letetše bokamoso bja khutšo le bjo bo atlegilego. Ka nako yona yeo, bao ba bego ba dumela go Jehofa ba be ba tsebiša gore batho ba be ba le kgaufsi le go tsena mehleng yeo e bego e tla ba le mathata ka go fetišiša. Seo ke se se bego se boletšwe e sa le pele Lentšung la Modimo go Mateo kgaolo 24, 2 Timotheo kgaolo 3 le mafelong a mangwe. Seo batho bao ba tumelo ba se boletšego se ile sa direga e le ka kgonthe go thoma ka 1914 ka Ntwa ya I ya Lefase. Lefase ka kgonthe le ile la tsena “mehleng ya bofelo” e boletšwego e sa le pele ka “dinako tše di hlobaetšago tšeo go lego thata go lebeletšana le tšona.” (2 Timotheo 3:1, NW) Ke ka baka la’ng bahlanka ba Jehofa ba ile ba tseba ka maemo a lefase morago nakong yeo mola ba bangwe ba be ba sa tsebe? Ka gobane ka go swana le Jošua, ba be ba e-na le tumelo ya gore ga go le letee la mantšu a Jehofa leo le bego le tla palelwa.
12. Lehono, ke kholofetšo efe ya Jehofa yeo bahlanka ba gagwe ba e holofelago ka mo go feletšego?
12 Lehono, bahlanka ba Jehofa bao ba mmotago ke bao ba nyakilego go ba dimilione tše tshelelago lefaseng ka moka. Ba tseba go tšwa bohlatseng bja go phethagala ga lentšu la Modimo la boporofeta gore kgaufsinyane o tla fediša tshepedišo ye e šoro le e gobogilego ya dilo. Ka gona ba kgodišegile gore nako e batametše yeo ka yona ba tlago go bona go phethagala ga 1 Johane 2:17, yeo e rego: “Lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” Bahlanka ba gagwe ba holofela ka mo go feletšego gore Jehofa o tla phethagatša kholofetšo ye.
13. O ka bota Jehofa go fihla bokgoleng bofe?
13 O ka bota Jehofa go fihla bokgoleng bofe? O ka bea bophelo bja gago kotsing ka baka la gagwe! Gaešita le ge o ka lahlegelwa ke bophelo bja gago mo nakong ye ka baka la go mo hlankela, o tla go putsa ka bophelo bjo bokaone kudu tsogong. Jesu o re kgonthišetša ka gore: “Xo tla lebaka leo bohle ba lexo mabitleng [ke gore, bao ba lego kgopolong ya Modimo] ba tl’o xo kwa Lentšu la Morwa-Modimo ka lôna. Xomme ba tlo tšwa.” (Johane 5:28, 29) Na o tseba ngaka le ge e le efe, moetapele wa tša dipolitiki, rathutamahlale, rakgwebo goba motho le ge e le ofe yo mongwe yo a ka kgonago go dira seo? Pego ya bona ya nakong e fetilego e bontšha gore ba ka se kgone. Jehofa a ka kgona e bile o tla kgona!
Bokamoso bjo bo Kgahlišago Bakeng sa Babotegi
14. Ke bokamoso bofe bjo bo kgahlišago bjo Lentšu la Modimo le bo holofetšago babotegi?
14 Jesu o bontšhitše kgonthišetšo ya lefase le lefsa ka tlase ga Mmušo wa Modimo wa legodimong ka go bolela gore: “Ba lehlôxônôlô ké ba bolêta, xobane bôná-bao ba tlo tšea lefase ya ba kabêlô ya bôná.” (Mateo 5:5) Seo se tiišeditše kholofetšo ya Modimo yeo e hwetšwago go Psalme 37:29 e rego: “Baloki e ba beng ba naxa, ba dula mo xo yôna ka mehla le ka mehla.” Pejana ga lehu la Jesu ge modira-dibe a be a bontšha tumelo go yena, Jesu o boletše le monna yoo gore: “O tlo ba le Nna Paradiseng.” (Luka 23:43) Ee, bjalo ka Kgoši ya Mmušo wa Modimo, Jesu o tla kgonthišetša gore monna yo o tsošetšwa bophelong lefaseng ka tebelelo ya go phela Paradeiseng yeo. Lehono, bao ba dumelago go Mmušo wa Jehofa le bona ba ka lebelela pele go tlo phela Paradeiseng ge “Yêna Modimo [a] tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna.”—Kutollo 21:4.
15, 16. Ke ka baka la’ng bophelo e tla ba bja khutšo gakaakaa lefaseng le lefsa?
15 Anke re lahlele menagano ya rena pele lefaseng leo le lefsa. Akanya eka re šetše re phela go lona. Gatee-tee, re bona ka gohle batho bao ba thabilego bao ba dulago gotee ka khutšo e feletšego. Ba thabela maemo a swanago le ao a hlaloswago go Jesaya 14:7 gore: “Byale le letše lè iketlile lefase ka moka; mekxolokwane e a hlaxa.” Ke ka baka la’ng ba le ka tsela yeo? Gare ga dilo tše dingwe, hlokomela gore mabati a nywako ga a na dikgonyu. Ga di nyakege ka ge go se na bosenyi goba bošoro. Go fo ba bjalo ka ge Lentšu la Modimo le boletše gore go tla ba bjalo: “Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo.”—Mika 4:4.
16 Le gona ntwa ga e sa le gona, ka gobane lefaseng le le lefsa ntwa e a iletšwa. Dibetša ka moka di fetotšwe didirišwa tša khutšo. Jesaya 2:4 e phethagaditšwe ka mo go feletšego gore: “Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.” Eupša seo ke se re bego re se letetše! Ka baka la’ng? Ka gobane badudi ba lefaseng le lefsa ba ithutile go dira seo ge ba dutše ba hlankela Modimo lefaseng la kgale.
17. Ke maemo afe a bophelo ao a tlago go aparela ka tlase ga Mmušo wa Modimo?
17 Selo se sengwe gape seo o se lemogago ke gore ga go na bodiidi. Ga go na yo a dulago mokutwaneng wa ditšhila goba yo a aperego maratha goba yo a se nago legae. Yo mongwe le yo mongwe o na le legae la manobonobo le lefelo leo le hlokometšwego gabotse leo le nago le dihlare tše dibotse le matšoba. (Jesaya 35:1, 2; 65:21, 22; Hesekiele 34:27) Le gona ga go na tlala ka gobane Modimo o phethagaditše kholofetšo ya gagwe ya gore go tla ba le motlalo wa dijo bakeng sa bohle ka gore: “Xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.” (Psalme 72:16) Ka kgonthe, ka tlase ga tlhahlo ya Mmušo wa Modimo, paradeise ya letago e katologela lefaseng ka bophara bjalo ka ge Modimo a be a rerile morago kua Edene.—Genesi 2:8.
18. Lefaseng le lefsa, ke dilo dife tšeo di ka se sa hlwago di bea batho kotsing?
18 Gape o makatšwa ke mahlahla a magolo ao yo mongwe le yo mongwe a nago le ona. Se ke ka gobane bjale ba na le mebele e phethagetšego le menagano. Ga go sa na bolwetši, bohloko goba lehu. Ga go na yo a lego setulong sa digole goba yo a lego malaong a sepetlele. Tšeo ka moka di fetetše ruri. (Jesaya 33:24; 35:5, 6) Ee, gape ga go na le ge e le dife tša diphoofolo tšeo di lego kotsi, ka gobane di dirilwe ke matla a Modimo gore di be le khutšo!—Jesaya 11:6-8; 65:25; Hesekiele 34:25.
19. Ke ka baka la’ng letšatši le lengwe le le lengwe lefaseng e tla ba la ‘lethabo’?
19 A tlhabologo e kgahlišago gakaakang yeo e dirwago ke badudi ba botegago ba lefase le le lefsa! Matla a bona le bokgoni le lehumo le le tšwago lefaseng di dirišetšwa mediro e mebotse, e sego e gobatšago; bakeng sa go dirišana le ba bangwe e sego go phadišana le bona. Le gona, motho yo mongwe le yo mongwe yo o gahlanago le yena ke yo o ka mmotago ka gobane go etša ge Modimo a holofeditše, bohle ba “tlo rutwa ke Morêna.” (Jesaya 54:13) Ka ge yo mongwe le yo mongwe a bušwa ke melao ya Modimo, lefase le “tlo tlala tsebo ya Jehofa, bjalo ka meetse ge a khurumeditše lewatle.” (Jesaya 11:9, PK) Ka kgonthe, letšatši le lengwe le le lengwe lefaseng le le lefsa le ba seo Psalme 37:11 e boletšego gore le tla ba sona, e ba la ‘lethabo.’
Bokamoso bja Lethabo bo Kgonthišeditšwe
20. Ke eng seo re swanetšego go se dira gore re thabele bokamoso bja khutšo?
20 Ke eng seo re swanetšego go se dira gore re be karolo ya bokamoso bjoo bja lethabo? Jesaya 55:6 e re botša gore: “Nyakang Morêna è sa le lebaka la xo ka mmôna, Le mmitšeng à sa le kxaufsi.” Ge re dutše re tsoma, boemo bja rena bja kgopolo e swanetše go ba bjo bo swanago le bjo bo hlaloswago go Psalme 143:10 e rego: “Nthutê xo dira se se Xo kxahlaxo, xobane O Modimo wa-ka.” Bao ba dirago se ba ka sepela pele ga Jehofa ba se na bosodi mehleng ye ya bofelo gomme ba ka lebelela pele bokamosong bjo bobotse. “Šetša moloki O bônê yo boló; monna wa moláô ó tlo bôna ditloxolo. Bakxeloxi ba timetšwa bohle; ditloxolo tša bakxôpô di tlo fetšwa.”—Psalme 37:37, 38.
21, 22. Ke eng seo Modimo a se dirago lehono, gomme tlwaetšo e phethwa bjang?
21 Mo nakong ye, Jehofa o bitša bao ba nyakago go dira thato ya gagwe go tšwa setšhabeng se sengwe le se sengwe. O ba dira motheo wa lekoko la gagwe le lefsa la lefaseng, bjalo ka ge boporofeta bja Beibele bo boletše e sa le pele gore: “Bofelong bja mabaka [nako yeo re phelago go yona gona bjale] . . . merafo-rafo ya batho e tlo ya e re: A re yeng re rotogeleng thabeng ya Jehofa [borapedi bja gagwe bjo bo phagamego bja therešo] . . . gore a re rute ditsela tša gagwe, re sepele mebileng ya gagwe.”—Jesaya 2:2, 3, PK.
22 Kutollo 7:9 e hlalosa ba e le “lešaba le lexolo la batho . . . ba dithšaba ka moka, le meloko ka moka, le merafô ka moka, le maleme ka moka.” Temana 14 e re: “Ké bôná ba ba tšwaxo tlaišexong e kxolo,” bao ba phologago bofelo bja tshepedišo ya gona bjale. Motheo wo wa lefase le lefsa mo nakong ye ke wa bogolo bjo bo nyakilego go ba dimilione tše tshelelago, wo o nago le ba bafsa ba bantši bao ba fetogago karolo ya wona ngwaga o mongwe le o mongwe. Bahlanka ba ba botegago ka moka ba Jehofa ba tlwaeletšwa bophelo lefaseng la gagwe le lefsa. Ba ithuta bokgoni bja moya le bjo bongwe bjo bo nyakegago bakeng sa go fetola lefase le go ba paradeise. Le gona ba holofela ka mo go tletšego gore Paradeise e tla ba selo sa kgonthe ka gobane “e a re holofedišitšexo ó a bôtêxa.”—Ba-Hebere 10:23.
Dintlha tša Tlhahlobo
◻ Go hloka tumelo lekgolong la pele la nywaga go ile gwa tliša ditla-morago dife?
◻ Bahlanka ba Modimo ba ka mmota go fihla bokgoleng bofe?
◻ Ke bokamoso bofe bjo bo boloketšwego babotegi?
◻ Ke eng seo re swanetšego go se dira go kgonthišetša bokamoso bja lethabo bakeng sa rena lefaseng le lefsa la Modimo?
[Seswantšho go letlakala 18]
Mo nakong ye Jehofa o dira motheo wa lekoko le lefsa la lefaseng