Na o ka Hlankela Tšhemong E Šele?

“KA MEHLA ke be ke dula ke nagana ka go tsenela modiro wa boromiwa. Bjalo ka motho yo a sa nyalago, ke ile ka hlankela kua Texas, U.S.A., moo go bego go nyakega thušo e kgolo ya baboledi. Mosadi wa-ka o ile a ntlatša moo ka morago ga lenyalo la rena. Ge morwedi wa rena a be a belegwa, ke ile ka nagana gore, ‘Seo ke mafelelo a dipakane tša-ka.’ Eupša Jehofa o dira gore ditoro di phethagale kudu-kudu ge e ba di tswalana le thato ya gagwe.”​—Jesse, yoo ga bjale a hlankelago kua Ecuador le mosadi wa gagwe gotee le bana ba bararo.

“Ga se ka ka ka nagana gore ke be nka kgona go dira selo se se swanago le seo ke se ka hwetša tlwaetšo ya sekolong sa boromiwa sa Gilead. Ge ke be ke bona yo mongwe wa barutwana ba-ka ba Beibele a nea polelo goba a bolela, seo se be se nthabiša gomme ke ile ka leboga Jehofa ka ge a mphile sebaka se.”​—Karen, mosadi yo a sa nyalwago yoo e bilego mmulamadibogo ka nywaga e seswai Amerika Borwa.

“Ka morago ga go bolela ka nako e tletšego ka nywaga e 13 kua United States, nna le mosadi wa-ka re ile ra ikwa re nyaka tlhohlo e mpsha. Re thabile kutšwanyana go feta kamoo re bego re le ka gona pele; ruri ke tsela e thabišago ya bophelo.”​—Tom, yo a bulago madibogo le mosadi wa gagwe, Linda kua tikologong ya Amazon.

Dipolelo tše tša tebogo di tšwa bathong bao maemo a bona a bego a sa ba dumelele go ka amogela tlwaetšo ya boromiwa Sekolong sa Beibele sa Watchtower sa Gilead. Lega go le bjalo, ba ile ba latswa lethabo le ditlhohlo tša tirelo ya dinageng dišele. Se se diregile bjang? Na tirelo e bjalo e ka ba ya gago?

Go Nyakega Maikemišetšo a Mabotse

Go nyakega se se fetago go ba le moya wa go lekela hlogong e le gore motho a ka atlega tšhemong e šele. Bao ba ilego ba kgotlelela ba dirile bjalo ka maikemišetšo a mabotse. Bjalo ka moapostola Paulo, ba ikwa ba na le molato, e sego feela go Modimo eupša le go batho. (Ba-Roma 1:​14) Ba ka be ba ile ba phethagatša taelo ya Modimo ya go bolela ka go tšea karolo bodireding tšhemong ya gabo bona. (Mateo 24:​14) Eupša ba ile ba ikwa ba na le molato gomme ba ikwa ba tutueletšega gore ba obelele le go thuša bao ba hwetšago sebaka sa go kwa ditaba tše di lokilego ka sewelo.

Kganyogo ya go šoma tšhemong e enywago kudu gantši ke lebaka le lengwe​—le gona le le swanetšego. Ke mang go rena a ka rego ge a bona morei yo mongwe wa dihlapi a atlega kudu a se ke a batamela kgaufsinyana le lefelo leo la letangwana? Ka mo go swanago, dipego tše di thabišago pelo tša dikoketšego tše di kgethegilego mafaseng a mangwe di tutueleditše ba bantši go ya moo go nago le “bontši byo boxolo bya dihlapi.”​—Luka 5:​4-10.

Bala Ditshenyagalelo

Dinaga tše dintši ga di dumelele baithapi ba bodumedi bao ba tšwago dinageng dišele go šoma mošomo wa boiphedišo. Ka gona, bao ba ratago go šoma nageng e šele ka kakaretšo e swanetše go ba bao ba ikemetšego ka tša ditšhelete. Go ile gwa lebeletšanwa bjang le tlhohlo ye ya tša boiphedišo? Ba mmalwa ba ile ba rekiša goba ba hiriša nywako ya bona e le gore ba hwetše ditšhelete tšeo di nyakegago. Ba bangwe ba ile ba rekiša dikgwebo tša bona. Ba bangwe ba ile ba boloka tšhelete bakeng sa go fihlelela pakane ya bona. Ba bangwe gape ba hlankela nageng e šele lebaka la ngwaga goba e mebedi, ba boele dinageng tša gabo bona go ya go šoma le go kgoboketša ditšhelete tše itšego, ke moka ba boele morago go ya go hlankela gape.

Thušo e kgonthišeditšwego ya go dula dinageng tše di hlabologago ke ya gore maemo a tša boiphedišo ke ao a bitšago tšhelete ya tlase go feta a dinageng tšeo di hlabologilego kudu. Se se ile sa dumelela ba bangwe go phela gabotse ka tšhelete e lekanetšego ya phenšene. Ee, ditshenyagalelo tša motho di tla ithekga kudu ka boemo bja bophelo bjoo motho a bo kgethago. Gaešita le dinageng tšeo di hlabologago, madulo ao a šireletšegilego a ka hwetšwa eupša ka tefelo ya godimo kudu.

Go molaleng gore ditshenyagalelo di swanetše go balwa pele go ka gatwa mogato. Lega go le bjalo, go akaretšwa mo gontši go feta go fo bala ditshenyagalelo tša tša ditšhelete. Mohlomongwe dipolelo tša ba bangwe bao ba kilego ba hlankela Amerika Borwa e ka ba tšeo di sedimošago.

Tlhohlo e Kgolo-kgolo

Markku wa Finland o gopola gore: “Ke be ke tloga ke thatafalelwa ke go ithuta Sepaniši. Ke ile ka ipotša gore bjalo ka ge ke be ke sa tsebe leleme, go tla ntšea nakwana pele nka hlankela bjalo ka mohlanka wa bodiredi. E bile semaka se segolo gakaakang ge ke be ke kgopelwa gore ke sware thuto ya puku ka morago ga dikgwedi tše pedi feela! Go bolela therešo, go bile le dinako tše dintši tšeo di lešago dihlong. Ke be ke na le bothata kudu ka maina. Ka letšatši le lengwe ke ile ka bitša Ngwanešo Sancho ka re ‘Ngwanešo Chancho (kolobe),’ gomme nka se tsoge ke lebetše ge ke ile ka bitša Kgaetšedi Salamea ka re ‘Malasea (yo kgopo).’ Ka mahlatse, banabešo le dikgaetšedi ba be ba sa fele pelo e le ruri.” Markku o ile a feleletša a hlanketše lebaka la nywaga e seswai nageng yeo bjalo ka molebeledi wa tikologo a e-na le mosadi wa gagwe, Celine.

Chris e lego mosadi wa Jesse yo go boletšwego ka yena pejana o anega ka gore: “Ke gopola ketelo ya rena ya pele ya molebeledi wa tikologo ka morago ga ge re be re e-na le dikgwedi tše tharo feela re le mo. Ke be ke kgona go lemoga gore ngwanešo o be a diriša diswantšho gomme a bolela selo seo se kgahlišago e le go leka go kgoma dipelo tša rena, eupša ke be ke sa mo kwešiše. Gona ka moo holong ke ile ka tšholla meokgo. Ye e be e se megokgo feela; ke be ke tsetsela. Ka morago ga diboka, ke ile ka leka go hlalosetša molebeledi wa tikologo ka boitshwaro bja-ka. E be e le yo botho kudu gomme a mpotša seo motho yo mongwe le yo mongwe a bego a mpotša sona, ‘Ten paciencia, hermana’ (‘Se fele pelo kgaetšedi’). Ka morago ga nywaga e mebedi goba e meraro, re ile ra gahlana gape gomme ra boledišana lebaka la metsotso e 45, re thabetše taba ya gore re be re kgona go boledišana.”

Ngwanabo rena yo mongwe o itše: “Thuto e bohlokwa. Ge re dira boiteko bjo bogolo go ithuteng leleme, ke moo re kaonefatšago kudu bokgoni bja rena bja go boledišana le ba bangwe.”

Ka moka re dumela gore maiteko a bjalo a tliša mehola e mentši. Boikokobetšo, go se fele pelo le go phegelela di a hlagolelwa ge motho a katanela go ithuta leleme le lefsa. Go bulegile sebaka se segolo sa go botša ba bangwe ka ditaba tše di lokilego. Ka mohlala, go ithuta Sepaniši go kgontšha motho go boledišana le batho ka leleme leo le bolelwago ke batho ba fetago dimilione tše 400 go dikologa lefase. Ba bantši bao ka morago ba ilego ba swanelwa ke go boela dinageng tša gabo bona ba ile ba kgona go tšwela pele ba šomiša bokgoni bja bona bja polelo bakeng sa go thuša batho bao leleme la gabo bona e lego Sepaniši.

Go Thwe’ng ka go Hlologelwa Gae?

Deborah yoo a hlanketšego le monna wa gagwe Gary tikologong ya Amazon o gopola gore: “Ge re be re e-tla la mathomo mo Ecuador ka 1989, ke be ke hlologelwa gae kudu. Ke ithutile go ithekga kudu ka banabešo le dikgaetšedi ka phuthegong. Ba ile ba swana le lapa lešo.”

Karen yo go boletšwego ka yena matsenong, o re: “Ke be ke lwantšhana le go hlologelwa gae ka go ba bodireding letšatši le lengwe le le lengwe. Ka tsela ye, ke be ke sa dule ke naganne gae. Gape ke ile dula ke gopola gore batswadi ba-ka kua gae ba be ba ikgantšha ka modiro wa-ka tšhemong e šele. Mma ka mehla o be a nkgothatša ka mantšu a rego: ‘Jehofa a ka go hlokomela gakaone go feta kamoo nna nka dirago ka gona.’ ”

Makiko yo a tšwago Japane o oketša ka mo go segišago gore: “Ka morago ga go fetša letšatši ka moka ke le tirelong ya tšhemo, ke ba ke lapile kudu. Ka gona ge ke fihla gae ke thoma go ikwa ke hlologelwa gae, gantši ke a robala. Ka baka leo, maikwelo ao ga a tšee nako e telele kudu.”

Go Thwe’ng ka Bana?

Ge e ba bana ba akaretšwa, go swanetše go naganelwe dinyakwa tša bona tše bjalo ka thuto. Tabeng ye, ba bangwe ba ile ba kgetha go tsenya bana ba bona sekolong ka gae mola ba bangwe ba ile ba tsenya bana ba bona dikolong tša mafelong ao.

Al o ile a hudugela Amerika Borwa le mosadi wa gagwe, bana ba babedi le mmagwe. O bolela gore: “Re hweditše gore go iša bana sekolong go ile gwa ba thuša gore ba ithute leleme kapejana. Lebakeng la dikgwedi tše tharo ba be ba šetše ba bolela ka go thelela kudu.” Ka lehlakoreng le lengwe, bašemane ba babedi bao ba lego nywageng ya bofsa ba Mike le Carrie ba ile ba ithuta ka sekolo sa ngwalelano seo se amogelegago ka molao. Batswadi ba re: “Re ile ra hwetša gore dithuto tše bjalo di ka se ke tša fo tlogelelwa bana ba rena ba nnoši. Re ile ra swanelwa ke go tšea karolo thutong gomme re kgonthišetše gore bašemane ba dula ba le nakong ka lenaneo-thuto leo ba le abetšwego.”

David le Janita, bao ba tšwago Australia ba bolela maikwelo a bona ka bašemane ba bona ba babedi. “Re be re rata gore bašemane ba rena ba iponele ka bobona kamoo ba bangwe ba phelago ka gona. Go bonolo go akanya gore mokgwa wa bophelo woo re godilego ka wona ke setlwaedi, eupša ge e le gabotse ke ba mmalwa kudu bao ba phelago ka wona. Ba ile ba bona le ka mokgwa woo melao ya metheo ya pušo ya Modimo e šomago ka gona lefaseng ka moka, go sa šetšwe gore ke nageng efe goba setšong sefe.”

Ken o gopola gore: “Ke be ke e-na le nywaga e mene feela ge lapa lešo le be le tloga Engelane ka 1969. Gaešita le ge ke be ke nyamišitšwe ke gore ga se ra ka ra dula ka mokutwaneng woo o agilwego ka mmu wo o ruletšwego ka bjang bjalo ka ge ke be ke lebeletše, ke be ke nagana gore ke bile le kgodišo e thabišago kudu yeo mofsa a ka godišwago ka yona. Ka mehla ke be ke kwela bana ba bangwe bao ba sa kago ba hwetša sebaka se se swanago bohloko! Ka baka la go ba le ditlwaelano tše botse le baromiwa le babulamadibogo ba kgethegilego, ke ile ka thoma bobulamadibogo bja go thuša ke na le nywaga e senyane.” Ken ga bjale ke molebeledi wa mosepedi.

Gabriella e lego morwedi wa Jesse, o dumela ka gore: “Ga bjale Ecuador e tloga e le legae la rena. Ke thabile kudu gore batswadi ba-ka ba ile ba dira phetho ya go tla mo.”

Ka lehlakoreng le lengwe, go bile le bana bao ba sa kago ba kgona go itlwaelanya le maemo ka baka la mabaka a fapa-fapanego, gomme malapa a gabo bona a ile a swanelwa ke gore a boele dinageng tša gabo bona. Ke ka baka leo go etela naga e šele pele go hudugelwa go yona e le mo go swanetšego. Ka tsela ye, diphetho di tla dirwa go ithekgilwe ka taba ya go iponela ka mahlo.

Ditšhegofatšo tša go Huduga

Ka kgonthe, go hudugela tšhemong e šele go akaretša ditlhohlo tše dintši le go gafa dilo tše dintši. Na go ile gwa bonagala go na le mohola go bao ba ilego ba huduga? Anke ba re botše.

Jesse: “Ka nywaga e lesome yeo re bilego motseng wa Ambato, re ile ra bona palo ya diphuthego e gola go tloga go 2 go ya go 11. Re bile le tokelo ya go thuša ka go hloma tše hlano tša diphuthego tšeo, gomme re ile ra šoma go agweng ga Diholo tše pedi tša Mmušo. Re bile gape le lethabo la go thuša barutwana ba Beibele ka kakaretšo ya ba babedi ngwageng o mongwe le o mongwe gore ba swanelegele kolobetšo. Ke itsholela selo se tee feela​—go se tle mo nywaga e lesome pejana.”

Linda: “Go thabela ga batho ditaba tše di lokilego gotee le maiteko a rena go re kgothatša kudu. Ka mohlala, toropong e nyenyane ya ka sethokgweng, morutwana wa Beibele yo a bitšwago Alfonso o ile a lemoga gore go be go tla ba bohlokwa kudu gore dipolelo tša phatlalatša di swarelwe tikologong ya gabo. O be a sa tšwa go hudugela ntlong ya gagwe yeo e sa tšwago go agwa ya mapolanka, e nngwe ya tše mmalwa mo motseng. Ge a dira phetho ya gore ntlo ya gagwe e be e le moago o nnoši toropong woo o bego o ka neelwa Jehofa, o ile a boela ka mokutwaneng wa gagwe wa bjang gomme a neela ntlo ya gagwe go banababo rena gore ba e šomiše bjalo ka Holo ya Mmušo.”

Jim: “Ge e le gabotse nako yeo re e fetšago re bolela le batho bodireding e feta ka makga a lesome yeo re bego re e fetša ge re be re le United States. Go oketša moo, bophelo bo sepela ka boiketlo. Ka ntle le pelaelo go na le nako e ntši ya go ithuta le ya tirelo ya tšhemo.”

Sandra: “Go bona kamoo therešo ya Beibele e kgonago go fetoša batho ya ba dira ba kaone go ntlišetša kgotsofalo e kgolo. Nkile ka ithuta Beibele le Amada, mong wa lebenkele le lenyenyane la korosari yo a nago le nywaga e 69. Ka mehla dikarolong tše dingwe le tše dingwe tše lesome tša mafsi, o be a oketša ka dikarolo tše pedi tša meetse. O ile a tšwela pele ka go radia bareki ba gagwe ka go ba rekišetša mafsi a a tswakilwego ka tekanyo e sa tlalago. Eupša ka morago ga gore a ithute taba yeo e lego ka tlase ga sehlogwana se se rego, ‘Potego e Tliša Lethabo’ go kgaolo 13 ya puku ya Tsebo e Išago Bophelong bjo bo sa Felego, Amada o ile a kgaotša mekgwa yeo e fošagetšego. E bile lethabo le legolo gakaakang go mmona a kolobetšwa lebakanyana ka morago ga moo!”

Karen: “Ga se ka ka ka swanelwa ke go ithekga ka Jehofa ka mokgwa wo goba go šomišwa ke yena ka tsela e bjalo kudu go swana le ge ke le mo. Segwera sa-ka le Jehofa se godile kudu e bile se tiile kudu.”

Go Thwe’ng ka Wena?

Go theoša le nywaga Dihlatse tše dikete di ile tša huduga tša yo hlankela kgole. Tše dingwe di dula ngwaga goba e mebedi gomme tše dingwe di dulela sa ruri. Di sepela le phihlelo ya tšona, kgolo ya moya le matlotlo a ditšhelete, pakane ya tšona e le go tšwetša dikgahlego tša Mmušo pele tšhemong e šele. Di kgonne go hlankela mafelong ao go ona bagoeledi ba Mmušo ba lefelong leo ba bego ba sa kgone go hlankela ka baka la go hlokega ga mošomo wa boiphedišo. Tše dintši di ile tša reka dikoloi tša go goga ka maotwana a mane bakeng sa go akaretša tšhemo yeo e sa fihlelelegego ka tsela e nngwe. Tše dingwe tšeo di ratago bophelo bja ditoropong, e bile tutuetšo e matlafatšago diphuthegong tše dikgolo tšeo di nago le bagolo ba sego kae. Lega go le bjalo, go se na yo a sa akaretšwego, ka moka di bolela gore di amogetše mo gontši kudu ditšhegofatšong tša moya go feta tšeo tšona di di neilego.

Na o ka ba le karolo tokelong ya go hlankela tšhemong e šele? Ge e ba maemo a gago a go dumelela, ke ka baka la’ng o sa seka-seke dikgonagalo tša go gata mogato o bjalo? Mogato wa pele le woo o lego bohlokwa e tla ba go ngwalela ofising ya lekala ya Mokgatlo ya nageng yeo o naganago go hlankela go yona. Tsebišo e lebanego yeo o e amogelago e tla go thuša go beakanya dibaka tša gago tša go e dira gore e atlege. Go oketša moo, ditšhišinyo tše dintši tšeo di šomago di ka hwetšwa sehlogong seo se rego “Tloxêla Lefase la Xeno, le Metswalô ya Xaxo,” ka tokollong ya Morokami ya August 15, 1988. Ka go dira dithulaganyo tše di swanetšego le ka tšhegofatšo ya Jehofa, mohlomongwe le wena o ka latswa lethabo la go hlankela tšhemong e šele.

[Seswantšho go letlakala 24]

TOM LE LINDA TSELENG YA KGOLE, BA LEBILE SETŠHABENG SA MA-INDIA SA MA-SHUAR

[Seswantšho go letlakala 25]

BA BANTŠI BA HLANKELA MOTSENG-MOŠATE WA ECUADOR, QUITO

[Seswantšho go letlakala 25]

MAKIKO O BOLELA DITHABENG TŠA ANDES

[Seswantšho go letlakala 26]

LAPA LA GA-HILBIG LE BE LE DUTŠE LE HLANKELA ECUADOR KA NYWAGA E MEHLANO E FETILEGO