Ke’ng Seo O Tlago Go Se Bolela Ge O Boela?
1 Gore re tle re atlege bodireding bja rena go nyakega gore re lokišetše e le gore ge re boela go bao ba bontšhitšego kgahlego pele, re tle re kgone go tsošološa kgahlego ya bona le go tšwetša pele poledišano ya rena. Re ka dira se bjang?
2 Ka ge Bakriste ba kgonthe ba tloga ba kgahlišwa ke batho ba bangwe, mo gongwe o ka thoma ka go bolela ka se sengwe seo o se lemogilego ka mong wa ntlo ketelong e fetilego.
Go motho yo a bontšhitšego go tshwenyega ga gagwe ka bokebekwa, o ka re:
◼“Nakong e fetilego ge re be bolela o ile wa bolela gore o hlobaetšwa ke koketšego e kgolo ya go hloka molao. Na o nagana gore go thwala maphodisa a oketšegilego go ka rarolla bothata?”
Ge e ba motho a bontšhitše go belaela ka ditiragalo tša morago bjale boemong bja lefase, o ka re:
◼“Nakong e fetilego ge re be re boledišana o ile wa bolela ka ntlha e bohlokwa mabapi le go hlokega ga khutšo lefaseng. Na o nagana gore baetapele ba lefase ba tla tliša thulaganyo ya lefase le lefsa?”
Go motho yo a tshwentšwego ke boithati bja ba bangwe, o ka re:
◼“Nakong e fetilego ge re be re boledišana o ile wa bolela taba e botse kudu mabapi le megabaru yeo re e bonago go batho ka kakaretšo. O nagana gore Modimo o re’ng ka batho ba megabaru? [Emela karabo.] Beibele go Ba-Efeso 5:5 e bolela se se latelago.”
3 Dipolelo tše dingwe tšeo di ilego tša atlega ge di dirišwa ke tše:
◼“Ke thabetše kudu poledišano ya rena ya nakong e fetilego, ka gona ke dirile nyakišišo ka ntlha ye e kopana bakeng sa go go bontšha kamoo Jehofa a lemogago bothata bja go hloka magae. Hlokomela Jesaya 65:21-23.”
◼“Ke kgahlilwe ke ge o be o bolela gore batho ba nyaka mmušo o mokaone.”
◼“O botšišitše potšišo e kgahlišago mabapi lege e ba bodumedi ka moka bo fihlelela dilo tšeo Modimo a di amogelago.”
◼“O ntirile gore ke nagane kudu ka seo o se boletšego mabapi le go laolelwa bokamoso.”
◼“Ke be ke dutše ke nagana ka poledišano ya rena, gomme go na le ntlha ka pukung ya O ka Hwetša Bjang Khutšo ya Kgonthe le Polokego? yeo ke naganago gore o tla e thabela. [O ka bontšha mong wa ntlo dintlha tše kgethilwego ka pukung.] ”
Matseno a go swana le a a bontšha gore re ile ra thabela dipoledišano tša rena tša nakong e fetilego le gore re rata go boledišna le mong wa ntlo gape.
4 Pele o dira leeto la go boela, naganišiša ka seo o tlago go se bolela. Rulaganya matseno a gago gore a swanele motho o mongwe le o mongwe.
5 Ge e ba motho yo re mo etetšego a swaregile, re sa dutše re ka atlega ka gore:
◼“Ke a tseba gore o na le metsotswana e sego kae, taba še ye o ka šalago o nagana ka yona ge o dutše o phetha modiro wa gago. [Bala Mateo 5:3.]”
Goba o ka re:
◼“Ke go ngwaletše mangwalo a a mararo. Ka ge e se nako e botse bakeng sa go boledišana, e re ke go tlogelele ona, gomme ge ke boa, ke tla rata go tšea metsotso e mehlano ke boledišana le wena ka ona.”
6 Mekgwa e Mebe Yeo e ka Phengwago: Dipotšišo tšeo di ka tšweletšago karabelo e sa agego tšeo di ka tlalago mong wa ntlo dimpa gantši ga di tšweletše mafelelo a mabotse. Tše dingwe tša tšona ke tše di latelago: “Na o badile taba yeo ke go tlogeletšego yona?” “Na o na le dipotšišo le ge e dife?” “Na o sa nkgopola?” “Ke etetše gore ke tle ke botšiše ge e ba o sa dutše o thabela go bolela ka merero ya Modimo bakeng sa lefase le.”
7 Re tla kgona go etela batho bao ba ilego ba bontšha kgahlego nakong e fetilego ge e ba re lokišetša e sa le pele gore re ba nee thušo yeo e tlogago e e-na le morero.