Latelela Kgahlego Ka Temogo Matšatšing A Maikhutšo

1 December ke kgwedi yeo ka yona ba bantši bao ba bontšhitšego kgahlego molaetšeng wa rena go bonalago ba tla ba ba swaregile ka mediro ya matšatšing a maikhutšo. Ka gona ge re latelela kgahlego, re tla swanelwa ke go lemoga goba mohlomongwe re lokišeletše go tsena tabeng ka pela, ka ntle le ge mong wa ntlo a bontšha go kganyoga poledišano e telele.

2 Re Nagane e sa le Pele ka Seo re Tlago go se Bolela: Ka mehla re swanetše go gopola gabotse seo re nyakago go se bolela. Se se nyaka gore re hlahlobe dintlha tša rena mabapi le ketelo e fetilego le go ikgopotša lefsa dintlha tšeo di akareditšwego poledišanong gotee le potšišo lege e le efe yeo e sa arabjago yeo e ilego ya tlogelelwa mong wa ntlo.

3 Ge e ba go dirišitšwe tšhišinyo e lego go serapa 3 sa sehlogo se se lego ka mo godimo, ge re boela re ka re:

◼“Nakong ye ya ngwaga, batho ba bantši ba nagana ka matswalo a Kriste. Nakong e fetilego ge re be re bolela, ke ile ka holofetša go abelana le wena taba e kgahlišago mabapi le motse wo Jesu a belegetšwego go wona. Na o be o tseba gore Beibele e boletše nywageng e 700 e sa le pele gore Jesu o be a tla belegelwa Betlehema?” Dumelela karabo. Ka gona ka morago ga go bala Mika 5:2, o ka re: “Bjoo ke boporofeta bjo bo tlabago, na ga go bjalo? Lege ye e le taba e kgahlišago ya Beibele, na o be o tseba gore diporofeto tša Beibele di a phethagala le mehleng ya rena?” Ge e ba motho yoo a e-na le nako, re ka tšwetša poledišano pele goba ge e ba a swaregile mo gongwe re ka ithapela go boa gomme re boledišane le yena ka se ka mo go tšwelago pele.

4 Ge e ba go tlogetšwe pampišana ya “Bophelo Lefaseng le Lefsa la Khutšo,” mo gongwe re ka bolela se se latelago:

◼“Anke o ele hloko se se boletšwego mo go letlakala 3, ka tlase ga sehlogwana se se rego ‘Bophelo Lefaseng le Lefsa la Modimo.’ Se se mabapi le maemo ao a tlago go aparela ka tlase ga Mmušo wa Modimo. [Hlahloba serapa sa pele le sa bobedi, o gatelela mangwalo a mangwe.] Na o be o ka rata go phela bophelo bja mohuta woo?” Šišinya go mong wa ntlo gore o tla rata go boa bekeng e tlago gomme le boledišane ka dikgopolo tše dingwe tše sego kae tšeo di tšwago pampišaneng. Ge e ba mong wa ntlo a se a hlwa a e-ba le puku ya Motho yo a Phagamego, bontšha kamoo kgaolo 111 e hlalosago ditaba ka botlalo ka gona mabapi le pontšho yeo Jesu a e neilego yeo e tlago go swaya bofelo bja tshepedišo ya gona bjale e kgopo ya dilo. Mo neele puku.

5 Go Bolelela Thuto ya Beibele ya Legae: Ge e ba re tlogela puku ya Motho yo a Phagamego go mong wa ntlo goba a šetše a e-na le kopi, e tla ba mo gobotse go bontšha kamoo thuto ya Beibele ya legae e swarwago ka gona ka go diriša kgaolo 111. Re ka diriša mokgwa o swanago le wo o dirišwago Thutong ya Puku ya Phuthego. Ge e ba thuto e tšwela pele, gona re ka fetogela go ithuteng e nngwe ya dipukwana (brochure) goba ra ya ka go lebanya pukung ya Phela ka mo go sa Felego.

6 Anke ka mehla re be bao ba itokišeditšego go latelela kgahlego ka moka. Re swanetše go ba bao ba lemogago gomme ka mehla re leke go bula tsela bakeng sa ketelo e tlago ka go tsoša dipotšišo tše di kgahlišago bofelong bja poledišano e nngwe le e nngwe. Se se tla re thuša go ba bao ba “hlamilwego ka mo go feletšego bakeng sa mediro ka moka e mebotse.”—2 Tim. 3:17, NW.