Amogela Boikarabelo Bja Maeto A Go Boela

1 Go na le mabaka a mantšinyana ao a tutueletšago go ba le karolo ka botlalo ka mo go kgonegago go direng maeto a go boela. Re nyaka go phetha ka botlalo modiro woo re o neilwego bjalo ka Paulo. (Dit. 20:21, 24) Ge e ba re boela go batho ba ba bontšhitšego kgahlego ka tshwanelo, gona re tla dula re e-na le letswalo le lebotse ge re dutše re katanela go phetha bodiredi bja rena ka botlalo.—2 Tim. 4:5.

2 Tsebo e re Rweša Boikarabelo: Therešo ya gore maphelo a kotsing e swanetše go re tutueletša go ba le mafolofolo ge re dira maeto a go boela. (Joh. 17:3) Go tseba ga rena ka kahlolo ya Jehofa le go batamela ga Haramagedone go swanetše go re tutueletša gore re se lemoše ba babe feela eupja re be re thuše bao ba ‘llago ba hlokofetše ka baka la makgapha a dirwago mo lefaseng.’ (Hesek. 9:4) Ba swanetše go dirwa gore ba kopanele le phuthego e bonagalago ya Jehofa.

3 Batho ba nyaka thušo gore ba kwešiše therešo ka mo go nepagetšego. (Dit. 8:30, 31; 18:26) Le ke lebaka le lengwe leo ka lona re amogelago boikarabelo bja rena bja go boela le go “nošetša” dipeu tša therešo tšeo di ilego tša bjalwa. Ke tšwelopele e kaakang ya moya yeo rena ka noši re ka bago re ile ra e dira ge nkabe motho o mongwe a sa ka a boela go rena leboelela bakeng sa go re thuša go hwetša tsebo e nepagetšego ya Jehofa le merero ya Gagwe e makatšago?—Mat. 7:12.

4 Bontšha Lerato le Phišego: Go dira maeto a go boela ke tsela e botse ya go bontšha lerato la rena go batho. Ngwanabo rena wa sefofu yo e lego mmulamadibogo wa ka mehla o itše: “Go tloga ge e sa le ke kolobetšwa, kganyogo ya-ka e bile go botša ba bangwe ka seo ke ithutilego sona ka Beibeleng. Ke ile ka thaba ka gobane bogole bja-ka ga se bja nthibela go dira se. . . . Ke bile ke ithutile go gopola ka hlogo ntlo e nngwe le e nngwe mo setarateng, gomme ka tsela ye, ke ile ka kgona go boela go batho ba thabelago thuto ya Beibele.” Ruri ngwanabo rena yo wa sefofu o kgona go bona ka pelo ya gagwe, gomme ga a tlogele go dira maeto a go boela le go bontšha lerato la gagwe la Bokriste go ba bangwe.

5 Ge re dira maeto a go boela, gantši re ba le sebaka sa go diriša Beibele gabotse le go nea mabaka a tumelo ya rena. (1 Pet. 3:15) Se ga se thuše mong wa ntlo a nnoši eupja se bile se kgohleletša phišego le tebogo ya rena bakeng sa therešo. Go dira maeto a go boela go tliša lethabo leo le ka se hwetšwego ka tsela lege e le efe e nngwe. Boemo bja lethabo leo le ka mohla bo ka se fele. Le ka mpshafatšwa ka mo go tšwelago pele ka go dira ga rena maeto a go boela ka phišego.—Die. 10:22.

6 Re swanetše go tšeela godimo boikarabelo bja rena bja go dira maeto a go boela. Batho ba Jehofa ga ba time ba bangwe se se lokilego, gomme se se ka bonwa modirong wa rena wa lefase ka bophara ngwageng wa tirelo wa 1991. (Die. 3:27) Re dirile maeto a go boela a 344 926 952 gomme ra swara dithuto tša Beibele tša magae tše 3947 261. Go bile le barutiwa ba bafsa ba 300 945 bao ba ilego ba ineela go Jehofa gomme ba kolobetšwa. Koketšego ye e botse e be e ka se be gona ge nkabe e se be ka go rata ga rena go amogela boikarabelo bja go dira maeto a go boela.—1 Ba-Thes. 2:8.