Go Diriša Puku Ya Motho Yo A Phagamego Kudu Maetong A Go Boela

1 Moapostola Paulo o be a tseba bohlokwa bja go ba le mafolofolo a go hlokomela batho bao ba bontšhitšego go thabela therešo. O ile a ba swantšha le dibjalo tše nyenyane, tšeo nako le nako di nyakago go nošetšwa le go hlagolelwa. (1 Ba-Kor. 3:6-9) Ka mo go swanago, batho ba ba thabelago ba nyaka tlhokomelo e botho yeo re e neago ge re dira maeto a go boela bakeng sa go hlagolela kgolo ya bona ya moya.

2 Ke gabotse go gopola gore batho bao re ba etelago gantši go tla nyakega gore ba gopotšwe dintlha tšeo di boletšwego poledišanong ya rena ya nakong e fetilego. Ka gona, go ka ba kaone gore leetong le lengwe le le lengwe la go boela o boeletše ka boripana seo le boledišanego ka sona leetong la pele, o bolele kudu-kudu ka dintlha tšeo mong wa ntlo a ilego a di thabela. Tsenya mong wa ntlo poledišanong gomme o ele hloko dilo tšeo di mo kgahlago le tšeo a di nyakago.

3 Ge o dira leeto la go boela, go sa šetšwe gore o sepeditše puku ya “Motho yo a Phagamego Kudu” goba ga se wa e sepetša, mo gongwe o ka rata go ba le matseno a a lebanyago bakeng sa go thoma thuto:

◼Mo gongwe o ka botšiša gore: “Ke eng se se ilego sa dira gore Jesu e be motho o mogolo kudu yo a kilego a ba gona lefaseng?” O ka araba seo ka go šupa dikgaolo tše sego kae tša tše 133 tšeo di bolelago ka bophelo bja gagwe, semelo sa gagwe, go ruta ga gagwe le ditiro tša gagwe. Kgaolo 24 e hlalosa morero wa go tla ga gagwe lefaseng. Kgaolo 35 e boeletša Thuto ya gagwe e tumilego ya Thabeng. Kgaolo 133 e re nyetlela ka ditšhegofatšo tšeo batho ba tlago go di hwetša ge a phetha mošomo wa gagwe. Bontšha mong wa ntlo kamoo dipotšišo gotee le mangwalo ao a lego mafelelong a kgaolo e nngwe le e nngwe di re thušago ka gona go kwešiša dintlha tše bohlokwa kudu go tšwa kgaolong e nngwe le e nngwe. Akaretša dintlha tše sego kae feela gomme o dire dithulaganyo tše di tsepamego tša go etela gape.

4 Matseno a mangwe e ka ba a gore:

◼“Ke ipshinne kudu ka poledišano ya rena bekeng e fetilego. Batho ba bantši ba boletše gore ba tshwenyegile ka maemo a lefase ao a senyegelago pele. Ke ile ka bona eka kgaolo 111 ya puku ye ya Motho yo a Phagamego Kudu yo a Kilego a Phela e tla go kgahla. [Lokišetša go hlalosa dikarolo tše itšego go kgaolo 111 bakeng sa go araba potšišo e tee goba tše pedi tša poeletšo mafelelong a kgaolo, tše bjalo ka: “Ke maemo afe a lefase ao a swayago go ba gona ga Kriste?” goba “Jesu o nea seswantšho sefe go thuša barutiwa ba gagwe ba nakong e tlago go lemoga nako yeo ka yona bofelo bo lego kgaufsi?”] Go latela seo re se badilego mo, o nagana gore kholofelo ya rena ka bokamoso bjo bo lego kgaufsi ke efe? [Emela karabo gomme o leboge mong wa ntlo.] Re swanetše go dira’ng ge e ba re nyaka go phologa bofelo bja tshepedišo ye e kgopo?” Bala Johane 17:3 gomme o ithapele go tlo swara thuto ya ka mehla ya legae ya Beibele.

5 Ge o boela ka morago ga ketelo ya pele yeo go yona go ilego gwa sepedišwa puku ya “Motho yo a Phagamego Kudu,” mo gongwe o ka re:

◼“Ge ke be ke tlile mo nakong e fetilego, re boledišane ka maemo a lefase ao go nyakegago gore a fetolwe. Na o kile wa ipotšiša gore maemo lefaseng a tla ba bjang ge bobe bo se sa le gona?” Emela karabo gomme o phetle go kgaolo 133, o botšiše dipotšišo tše pedi tša mathomo mafelelong a kgaolo. Bala dirapa tšeo di arabago dipotšišo tše gomme o di hlalose, o be o bale a mangwe a mangwalo ao a lego mafelelong a kgaolo. Mo gongwe o ka ba wa tlaleletša tabeng ka go bolela ka seswantšho se se lego kgaolong yeo.

6 Moo go Šadišitšwego Pampišana: Ka dinako tše dingwe go šadišwa pampišana ketelong ya mathomo. Ge le dira maeto a go boela, le ka ahla-ahla serapa se setee goba tše pedi pampišaneng gotee le mangwalo ao a ngwadilwego. Ge e ba motho yoo a bontšha kgahlego, mo gongwe le ka rata go neela puku ya Motho yo a Phagamego Kudu gomme la dira dithulaganyo tša go tšwela pele ka poledišano ketelong ya lena e latelago.

7 Ge re dutše re hlokometše go nošetša dibjalo tše nyenyane tša tumelo ya Bokriste tšeo re gafetšwego gore re di hlokomele, Modimo o tla di mediša bakeng sa go mo nea tumišo le letago.—1 Ba-Kor. 3:7.