Thuša Batho Bao Ba Swanago Le Dinku Go Aga Motheong O Tiilego

1 Go aga ntlo go nyaka go rulaganya ka kelohloko le boiteko bjo bogolo. Ka morago ga ge polane ya ntlo e thadilwe, lefelo la moago le swanetše go lokišwa gomme go thewe motheo o tiilego. Moago o gola ka mo go tšwelago pele go fihlela ge o phethilwe. Ka mo go swanago, re swanetše go thuša batho bao ba swanago le dinku go ithuta therešo ka mo go tšwelago pele. Re katanela go tutuetša kgahlego ketelong ya mathomo. Ka morago ga moo, re dira maeto a go boela, re thea motheo ka go ruta ditherešo tša motheo mabapi le Modimo le morero wa gagwe ka batho.—Luka 6:48.

2 Lega go le bjalo, pele motheo o ka thewa, re ka re re swanetše go lokiša lefelo la moago re naganela maemo a mong wa ntlo. Ke taba efe yeo e ahla-ahlilwego nakong e fetilego? Ke mangwalo afe ao a dirišitšwego? Karabelo e bile efe? Go tlogetšwe puku efe? Ge o boela, e ba le dintlha tše di swanetšego ka monaganong gomme o thee motheo ka mo go tšwelago pele. Ketelong e nngwe le e nngwe tsebo ya mong wa ntlo e a gola gomme tumelo ya gagwe go Modimo e a oketšega.

3 Ge e ba go sepedišitšwe puku ya “Phela ka mo go sa Felego,” mo gongwe o ka re:

◼“Ke thabile kudu ge ke go hweditše ka gae. Mo gongwe o ka ba o gopola gore ge re be re swere poledišano ya rena ya mafelelo, re ile ra ahla-ahla go fokotšega ga kgahlego go Modimo lefelong la rena. Beibele e bontšha gabotse gore Modimo o kgahlišwa ke batho le gore ba ba lokilego ba tla šegofatšwa ka Mmušo wa gagwe. [Bala Mateo 6:9, 10.] Ka Mmušo wo, go loka le toka di tla ata.” Bala Jesaya 11:3-5 gomme o lebiše tlhokomelo ya mong wa ntlo go dirapa tše pedi tša pele tša kgaolo 1 ya puku ya Phela ka mo go sa Felego. Bontšha kamoo puku e ka ithutwago ka gona.

4 Ge e ba go sepedišitšwe pampišana ya Bophelo Lefaseng le Lefsa la Khutšo ketelong ya mathomo, dintlha tše dikgolo tšeo di ahla-ahlilwego nakong e fetilego mabapi le go nyakega ga maemo a kaone le dikholofetšo tša Beibele di ka boeletšwa. Gatelela gore, gore re phele lefaseng le lefsa, re swanetše go hwetša tsebo e nepagetšego. Bala Johane 17:3. Hlalosa gore ka morago ga go hwetša tsebo ye, re swanetše go dira thato ya Modimo. Bala 1 Johane 2:17. Lebiša tlhokomelo ya mong wa ntlo dintlheng tše itšego tše di tšwago go letlakala 5 la pampišana.

5 Ge e ba o ile wa gatelela taba ya bophelo bja lapa ge o sepediša puku ya “Phela ka mo go sa Felego” ketelong ya mathomo, mo gongwe o ka re:

◼“Nakong e fetilego ge ke be ke etetše, re ile ra ahla-ahla taba ya bophelo bja lapa. Re ile ra dumelelana gore, gore go be le bophelo bjo bo thabilego bja lapa, ditekanyetšo tša tlhahlo tšeo di hwetšwago ka Beibeleng di swanetše go latelwa. O nagana gore go nyakega’ng gore o be le lenyalo le atlegago?” Dumelela karabo. Gatelela dintlha tše kgethegilego tše di tšwago tsebišong yeo e ngwadilwego go matlakala 243-6 ka pukung ya Phela ka mo go sa Felego. Kgopela mong wa ntlo gore a hlalose diswantšho gomme o ahla-ahle dintlha tšeo o di kgethilego e le tše di swanetšego. Gatelela bohlokwa bja melao ya motheo ya Beibele.

6 Ge e ba go tlogetšwe pampišana ya Thabela Bophelo bja Lapa, boeletša melao ya motheo e megolo ya Beibele yeo e ngwadilwego go matlakala 4 le 5. Ka gona sepediša puku ya Phela ka mo go sa Felego. Šupa go kgaolo 29 e rego “Go Dira Bophelo bja Lapa Gore bo Atlege” gomme o bontšhe kamoo e ka ahla-ahlwago ka gona le mong wa ntlo le lapa la gagwe.

7 Ka moka ga rena re swanetše go ba le karolo ka mehla go direng maeto a go boela. Latelela kgahlego ka moka yeo e bontšhitšwego ka go dira maeto ao a atlegago a go boela ka September.