Boela Moo o Hweditšego Kgahlego
1 Ge re šoma ka ntlo le ntlo, gantši tekanyo ya nako yeo re e tšeago le motho yo a thabelago ke e nyenyane. Mabakeng a mantši kudu, modiro wa go ruta ka kgonthe o dirwa ge re dira maeto a go boela le go swara dithuto tša Beibele. (Mat. 28:19, 20) Gore re rute ka mo go atlegago maetong a go boela, re swanetše go boeletša seo re boledišanego ka sona ketelong ya pele ke moka re lokišeletše poledišano e tšwelago pele.
2 Ge e ba le boletše ka ga go teka-teka ga thulaganyo ya lapa, mohlomongwe o ka diriša taba e lego go kgaolo 29 ya puku ya “Phela ka mo go sa Felego.” O ka re:
◼ “Nakong e fetilego re boledišane ka bohlale bja go latela keletšo ya Beibele e le gore re be le bophelo bjo bo thabišago bja lapa. O nagana gore senotlelo sa go kopanya malapa ke sefe lehono?” Dumelela karabo. Šupa go serapa 27 se se lego go letlakala 247 gomme o bale Ba-Kolose 3:12-14. Hlalosa ka mo go oketšegilego go bontšha kamoo lerato la kgonthe le ka kopanyago malapa ka gona. Hlalosa kamoo thuto ya ka mehla ya puku ya Phela ka mo go sa Felego e ka thušago ka gona go rarolla mathata.
3 Ge e ba le boletše ka ga go mpefala ga maemo a lefase ketelong ya gago ya pele, mo gongwe o ka boela moo ka go re:
◼ “Ke holofela gore o tla dumela gore go nyakega diphetogo tše dikgolo ge e ba re tla phela ka khutšo. Beibele e bontšha gore Sathane ke mohlodi yo mogolo wa mathata a rena. Ba bantši ba ipotšiša lebaka leo ka lona Modimo a mo dumeletšego gore a phele lebaka le lekaakaa. O nagana’ng?” Dumelela karabo. Phetla go letlakala 20, dirapa 14 le 15 pukung ya Phela ka mo go sa Felego, gomme o hlalose lebaka leo ka lona Sathane a sa hlwago a fedišwa. Ka morago, bala Ba-Roma 16:20 yeo e hlalosago ka seo re ka se letelago nakong e tlago e lego kgaufsi.
4Ge e ba le boletše ka ditšhegofatšo tšeo di tlago go ba gona ka tlase ga pušo ya Mmušo, leetong la gago la go boela o ka re:
◼ “Mmušo wa Modimo o tla tliša ditšhegofatšo tše di kgahlišago lefaseng le bathong. Ditšhegofatšo tše di bontšhitšwe gabotse mo go matlakala 12 le 13. O bona’ng seo se ipiletšago go wena? [Dumelela karabo.] Nagana kamoo go phela lefaseng le le swanago le le go tlago go ba ka gona.” Bala serapa 12. Ge e ba go e-na le kgahlego, botšiša potšišo ya serapa 13 gomme o bolele karabo. Hlalosa gore kgaolo ye e araba dipotšišo tše dintši ka ditšhegofatšo tša Mmušo le gore o tla thabela go di ahla-ahla ketelong ya gago e latelago.
5Mohlomongwe o ka kgona go thoma thuto ka go re:
◼ “Batho ba bantši ba hweditše dikarabo tša dipotšišo tša bona tša Beibele ka go diriša puku ye.” Phetla go lelokelelo la dikagare gomme o botšiše gore: “Ke taba efe mo yeo le e kgahlegelago kudu?” Dumelela karabo ke moka o phetle kgaolong e tantšego kgahlego ya bona gomme o bale serapa sa pele. Hlalosa kamoo dipotšišo tše di lego botlaseng bja letlakala le lengwe le le lengwe di gatelelago ka gona dintlha tše dikgolo tše di lego serapeng se sengwe le se sengwe. Bontšha ka go ahla-ahla serapa se tee goba tše pedi tše di oketšegilego ke moka o dire ditokišetšo tša go boa gape.
6 Go boela mo go bontšhitšwego kgahlego pukung ya Phela ka mo go sa Felego go bontšha go rata ga rena go phetha bodiredi bja rena ka mo go tletšego. (2 Tim. 4:5) Re ka kgona go thuša batheetši ba rena gore ba fihlelele bophelo bjo bo sa felego.—Joh. 17:3.