Kamoo Go Ka Hlagolelwago Kgahlego Ka Gona

1 Go tšwa puku-ntšung e nngwe re ithuta gore “go hlagolela” go bolela go lokišetša goba go thekgetša bakeng sa kgolo. Eupja lentšu le gape le ka bolela go kaonefatša ka go itapiša, go hlokomela goba go ithuta. Go dira barutiwa ke morero o mogolo wa bodiredi bja rena. (Mat. 28:19, 20) Ka gona re swanetše go dira boiteko bja go hlagolela kgahlego yeo re e hwetšago bodireding bja tšhemo.

2 Gantši go nyakega maeto ao a dirwago leboelela bakeng sa go thekgetša kgolo ya moya ya batho ba dipelo tše di botegago. Dipoelo tše di atlegago di swanetše go lebiša thutong ya ka mehla ya Beibele.

3 Na o boela feela go bao ba bontšhago kgahlego e kgolo? Ga se gore o swanetše go sepediša puku e le gore o tle o boele. Mmulamadibogo o mongwe yo a sa sepedišego dipuku gantši diketelong tša mathomo o boela go bohle bao ba nago le bogwera. Poledišano e botse yeo go yona le abelanago kgopolo ya Mangwalo e nea motheo o mobotse bakeng sa go boela.

4 Diriša Dipampišana Bakeng sa go Thoma Dithuto tša Beibele Dipoelong: Dihlogo tše di fapa-fapanego tše di lego dipampišaneng tša rena ke tšeo di swanetšego bakeng sa mehla ya rena. Di gatelela go nyakega ga go ba le tsebo ya Beibele le go e diriša.

O ka re:

◼“Nakong e fetilego re boletše ka mabaka a mangwe a go holofela Beibele. Beibele e bolela ka bokamoso bja mohuta mang?” Thoma go bala go tloga go serapa sa bobedi go letlakala 3 la pampišana ya Bophelo Lefaseng le Lefsa la Khutšo. Bala mangwalo. Botšiša kamoo mong wa ntlo a ikwago ka gona ka seo o se balago. Phetha ka go ahla-ahla taba e lego ka tlase ga sehlogwana se se rego “Kamoo go ka Kgonegago ka Gona go Wena” go letlakala 4.

5 Ka mokgwa o swanago, o ka diriša pampišana ya Kholofelo ke Efe ka Baratiwa Bao ba Hwilego?

Mo gongwe o ka re:

◼“Bjalo ka ge re bone ka boripana pejana, batho ba bantši ga ba holofele Modimo. Ka mohlala, ba botšiša gore, ‘Ge e ba Modimo a e-na le matla gakaalo, ke ka baka la’ng a dumelela batho gore ba hwe?’ Pampišana ye e ka thuša go araba potšišo yeo.” Lebiša tlhokomelo go karolo yeo e thomago ka serapa sa bone go letlakala 2. Botšiša potšišo e lebanego ka morago ga serapa se sengwe le se sengwe gomme o hlahlobe mangwalo ao a bontšhitšwego ao a sa tsopolwago. Moo batho ba šetšego ba e-na le dipuku o ka ba wa neela dimakasine tša morago-rago.

6 Go Tšwetša Thuto Pele: Ka go latela mekgwa ye e šišintšwego mo, o thoma thuto ya Beibele ya legae. Gore o tšwetše poledišano pele ka mehla, botšiša mong wa ntlo mafelelong a ketelo ya gago gore: “Na o lemogile gore re arabile dipotšišo tše bohlokwa ka metsotso e sego kae feela? Bekeng e tlago re tla tšea nako e oketšegilego go se nene re boledišana ka kholofelo ya tsogo goba taba e nngwe yeo o e ratago.” O ka diriša e tee feela ya dipotšišo tše di boletšwego dihlogong tše nakong e nngwe le e nngwe ge o etela. Ka nako e swanetšego, o ka fetela pukwaneng goba wa thoma thuto ka puku ya Phela ka mo go sa Felego.

7 Ke mo go kgotsofatšago gakaakang go swara thuto ya Beibele le motho yo a tsomago therešo e le ka kgonthe! Eka re ka šegofatšwa ka bodiredi bjo bo atlegago ka go diriša ditšhišinyo tšeo di neilwego mabapi le kamoo re ka hlagolelago kgahlego yeo re e hwetšago ka gona.