E-bang Ba Ba Feto-fetogago Bodireding Bja Lena

1 Go thwe pheta e botse ka magabo. Gantši, matseno a fapa-fapanego tabeng a ka e dira gore e be e tsošago kgahlego le go feta. Se ke sa therešo ka mo go swanago ka bodiredi bja rena. Ge e ba re sa hlokomele, dithero tša rena tša ntlo le ntlo di ka ba gabonolo tšeo di sa feto-fetogego. Go boeletša matseno a tee gantši-ntši e ka ba mo go lapišago bobedi go rena le go beng ba dintlo. Ka gona, e-bang ba ba feto-fetogago bodireding bja lena. Eupja se le ka se phetha bjang?

2 Go e na le go bolela selo se se swanago le, ‘Re a lotšha. Re etela baagišani ba rena ka ditaba tše di lokilego tša Mmušo,’ ke ka baka la’ng o sa nagane ka ditsela tša go fetola mantšu a gago a matseno? Puku ya Go Boledišana e na le tsebišo e humilego ka matseno. Go matlakala 9-15 go na le matseno a lego mabapi le dihlogo tše 18 tše di fapa-fapanego. Go na le matseno a mabedi, a mararo goba go feta moo ao a ka dirišwago bakeng sa dihlogo tše dintši.

3 Ge e ba o diriša pukwana ya “Na Modimo Ruri o na le Taba le Rena?,” matseno a a tšwago karolong ya “Bophelo/Lethabo” go letlakala 11 e ka ba a thušago:

◼“Re boledišana le batho bao ba tshwenyegilego e le ka kgonthe ka boemo bjo bobotse bja bophelo lehono. Ba bantši ba ipotšiša gore, Na bophelo bja lethabo la kgonthe bo a kgonega? Pukwana ye e nea pono e kgothatšago le yeo e šišinyago monagano.” Phetla pukwana go letlakala 25 gomme o bale ntlha e tee goba tše pedi tše kgolo go dirapa 15 le 16.

4 Bagoeledi ba bangwe ba Mmušo—ba banyenyane le ba bafsa ka mo go kgethegilego, eupja le ba bagolo—ba hweditše gore matseno a tsošago kgahlego mejakong a ka dirwa ka dipampišana.

Mogoeledi wa mofsa a ka diriša pampišana ya “Na Lefase le le tla Phologa?” gomme a re:

◼“Ke go swaretše molaetša o mokopana mabapi le bokamoso bja lefase le. Ke tla rata go go nea pampišana ye e nago le sehlogo se se rego Na Lefase le le tla Phologa?” Mogoeledi o mogolo yo a šomago gotee le mofsa a ka lebelela ge e ba a ka oketša ditlhaloso tše dingwe goba go neela puku, go ithekgile ka karabelo ya mong wa ntlo.

5 Ge e ba mong wa ntlo a bontšha kgahlego, mo gongwe mogoeledi o mogolo a ka re:

◼“Ela hloko diswantšho tše tše pedi, se sengwe ke sa sefofane se lahla dipomo nakong ya ntwa gomme se sengwe ke sa ngwana yo a swerwego ke tlala o šoro. [Phetla go letlakala 5.] Bona seswantšho se sa tšhišinyego ya lefase le sa monna yo a babjago a le malaong a sepetlela. [Ema go se nene.] Beibele e bontšha gore dilo tše bjalo tše di setlago pelo di tla tloga di fela.” Ka gona bala Kutollo 21:4, 5 le Psalme 46:8, 9.

6 Ge o bolelela puku ya Seremo sa Kutollo, ke ka baka la’ng o sa gatelele pono e thabišago ya bokamoso yeo e hlaloswago go Kutollo 21:3, 4? Ka gona bala serapa 7 go letlakala 303 la puku. Botšiša mong wa ntlo ge e ba e le ga tlhaloganyo go dumela gore Modimo o tla phethagatša dikholofetšo tše. Poledišano e kopana ya diporofeto tša Beibele tšeo di šetšego di phethagetše e swanetše go tiiša kholofelo ya mong wa ntlo matleng a Modimo a go šegofatša moloko wa batho.

7 Bagoeledi ka moka ba Mmušo ba nyaka go tšea karolo go tšwetšeng pele dikgahlego tša pušo ya Modimo, go bjaleng dipeu tša therešo mo go kgonegago le go hlagoleleng kgahlego yeo e bontšhitšwego. Ge re dirile karolo ya rena, gona re ka tlogela ka lethabo go gola lege e le gofe ga nakong e tlago diatleng tša Jehofa. Re na le ditaba tše di botse kudu tšeo re ka di abelanago le baagišani ba rena. Ka go dula re le bao ba itokišeditšego, re ka ba bao ba feto-fetogago go neeleng molaetša wa Mmušo le go beng le temogo ge re neela dipuku tša rena.