Letlolo La Dipotšišo
◼ Go hlankela bjalo ka mmulamadibogo wa go thuša go swanetše go lebelelwa bjang?
Bobulamadibogo bja go thuša bo swanetše go lebelelwa e le tokelo le boikarabelo bjo bogolo. Bagoeledi ba dikete tše masome kgwedi le kgwedi ba kgethwa gore ba hlankele bjalo ka babulamadibogo ba go thuša gomme ba bangwe ba tšwela pele ba dira bjalo. Re reta bagoeledi ba mafolofolo bao maemo a bona a ba dumelelago gore ba diriše diiri tše 60 tirelong ya tšhemo kgwedi le kgwedi ge ba šoma e le babulamadibogo ba go thuša. Bagolo le ba bangwe ba swanetše go kgothatša bagoeledi bao ba dirago kgopelo ya bobulamadibogo bja go thuša gore ba lebelele go kgethwa ga bona e le gabohlokwa le go phema tshekamelo lege e le efe ya go ba le moya wa go go tšeela fase.
Go etša babulamadibogo ba ka mehla, bao ba ithapelago go ba babulamadibogo ba go thuša kgwedi e tee goba go feta moo ba swanetše go thoma ka go bala ditshenyagalelo. (Luka 14:28) Se se akaretša go bona e sa le pele ge e ba ba ka letela go diriša ka mo go kwalago tekanyo e nyakegago ya nako bodireding bja tšhemo ka ntle le go hlokomologa boikarabelo bjo bongwe bja Bokriste. Phetho ya motho ya go ingwadišetša go ba mmulamadibogo wa go thuša e swanetše go dirwa ka morago ga go naganišiša ka thapelo ka maemo a motho ka noši. Ga se ya swanela go hlohleletšwa ke maikwelo ao a tsošwago ke ge ba bangwe ba dira kgopelo. E swanetše go ba phetho yeo e nagannwego gabotse, yeo e sepedišanago le lenaneo le le ngwadilwego bakeng sa go phetha tše di nyakegago. Ke gabohlokwa go bala kgopelo ka kelohloko le go dira phetho ka pelong ya motho ka noši gore o dumela ka potego seo se nyakegago.
Ke therešo gore go akaretša boiteko bjo bo oketšegilego. Dikgwedi tše itšego ngwageng di nea sebaka se sebotse sa go ba ba ‘swaregilego kudu’ ka ditaba tše di lokilego. (Dit. 18:5, NW) Tše di akaretša nako ya Segopotšo ya March le April le dikgwedi tšeo ka tšona molebeledi wa tikologo a etelago phuthego. Bagoeledi ba bantši ba itaya ka lethabo gore ba latele lenaneo leo ekego le thatafišitšwe e le gore ba be le karolo e oketšegilego modirong wa boboledi dinakong tše tša modiro o kgethegilego, ba lemoga gore gantši go feleletša ka ditšhegofatšo tše di humilego. (2 Ba-Kor. 9:6) Bagoeledi ba bantši ba dira maiteko a kgethegilego a go bula madibogo dikgweding tša maikhutšo le kgweding lege e le efe ngwageng yeo e ka bago le mafelo-beke a mahlano a tletšego. Eupja ka go ngwadiša, ba lemoga go nyakega ga go kgomarela molaong wa motheo wo o rego “‘Ee’ e bê ‘Ee’” ka go leka ka gohle gore ba bege diiri tše 60 goba go feta moo kgweding e nngwe le e nngwe ye ba šomago ka yona e le babulamadibogo ba go thuša.—Mat. 5:37.
Bagoeledi bao mo gongwe ba ka se kgonego go tsenela bobulamadibogo ba ka thuša ka go ithapela go šoma gotee le babulamadibogo ba go thuša, ba beelane dinako tše di kgonthišeditšwego le bona. Ke mo go holago go šoma nako e telele le babulamadibogo ge e ba go kgonega. Babulamadibogo ba ka leboga kudu-kudu go ka hwetša thekgo ya bagoeledi ba bangwe e sa le ka pela mesong, thapama ge letšatši le e-ya go sobela goba diiring tša mathomo tša mantšiboa. Babulamadibogo ba go thuša ba thabela go kgopelwa gore ba šome le ba bangwe ge go dirwa maeto a go boela le go thoma dithuto tša legae tša Beibele. Bao ba ka thekgago babulamadibogo ba go thuša ba tla buna lethabo le legolwanyane leo le tlišwago ke go nea.—Dit. 20:35.
Mafolofolo a babulamadibogo ba bantši ba go thuša a lebogwa kudu. Bao ba kgonago go ba tlatša ba ka letela ditšhegofatšo tše di humilego. (Die. 10:4) Wena o tla thabela neng modiro o okeditšwego o le mmulamadibogo wa go thuša?