Tumišang Leitšibolo la Jehofa!
1 Ka Sontaga, Nisani 9, 33 C.E., lešaba le legolo leo le swerego mahlare a mepalema le ile la tumiša Morwa wa Jehofa wa leitšibolo, Morena Jesu Kriste, e le “e [a] tlaxo ka Leina la Morêna.” (Luka 19:38; Ba-Heb. 1:6) Ka Mošupologo le Labobedi, Nisani 10 le 11, Jesu o be a swaregile ka kudu ka bodiredi bja gagwe bja phatlalatša, a diriša matšatši ao a mafelelo e le a mangwe a ao ka ona a ilego a swarega kudu bophelong bja gagwe bja lefaseng.
2 Lehono, lešaba leo e lego le legolo ka kudu leo le swerego mahlare a mepalema a seswantšhetšo le goeletša ka lentšu le le phagamego le re: “Xo phološa ké xa Modimo wa rena e a dutšexo sedulong sa boxoši, ké xa Kwana.” (Kut. 7:9, 10) Ka March 26, re tla kopana bakeng sa go bina Segopotšo sa lehu la Kriste. Ge letšatši leo le dutše le batamela, na re ka oketša maiteko a rena bodireding gomme ka go rialo ra okeletša mokgošing wo wa lefase ka moka wa tumišo?
3 Oketšang Modiro wa Tšhemo: Bagoeledi ba bantši ba šetše ba ngwadišitše bjalo ka babulamadibogo ba go thuša ka March. Na o tla rata go ba tlatša? Ge e ba go le bjalo, tsenya kgopelo ya gago ka ntle le go diega. Yo mongwe wa bagolo o tla thabela go araba dipotšišo lege e le dife tšeo o ka bago o e-na le tšona mabapi le modiro wo.
4 Go sa šetšwe gore o ka kgona go hlankela o le mmulamadibogo wa go thuša goba o ka se kgone, fela o tla rata go ba le karolo e tletšego bodireding ka March. Mo gongwe phuthego e ka kgona go rulaganyetša go nea bohlatse ka dihlopha letšatši le lengwe le le lengwe kgweding yeo. Go swanetše go beelwa tšhemo e lekanego ka thoko bakeng sa morero woo.
5 Diphuthego ka moka di swanetše go rulaganyetša seboka se se kgethegilego bakeng sa tirelo ya tšhemo ka Mokibelo, March 26. Gaešita lege go e-na le mo gontši mo go swanetšego go dirwa bakeng sa go lokišetša Segopotšo, go kgothaletšwa gore yo mongwe le yo mongwe yo a kgonago go dira bjalo a be le karolo bodireding bja tšhemo ka Mokibelo mesong. Go oketša go šomeng ka ntlo le ntlo, kgonthišetša gore bao o ba laleditšego go ba gona Segopotšong ba na le senamelwa le gore ba gopola gabotse nako le lefelo leo seboka se tlago go swarelwa go lona.
6 Laletšang ba Bangwe le go ba Kgothatša: Jesu o laetše balatedi ba gagwe ka gore: “Dirang bjalo e bê xo nkxopola.” (1 Ba-Kor. 11:24) Bjalo ka ge balatedi ba Jesu bao ba tloditšwego bao ba latelago mehlaleng ya gagwe ba e-kwa taelo yeo, mohlanka yo mongwe le yo mongwe wa Jehofa o laletšwa gore a be gona le go bina monyanya wa Segopotšo. Gare ga ba bangwe, o swanetše go laletša barutwana ba Beibele, metswalo, bao o kilego wa swara dipoledišano tša Beibele le bona, balekane bao ba sa dumelego le batho bao o tlwaelanego le bona mošomong. Dira lelokelelo gore go se be le yo a hlokomologwago.
7 Go tla ba le dibaka tše di oketšegilego bakeng sa go kgothatša batho bao ba thabelago Segopotšong ka bosona. Kgonthišetša gore o fihle e sa le ka pela e le gore o kgone go dumediša batho ba bafsa bao e lego lekga la pele ba e-ba gona. Ge e ba barutwana ba mmalwa ba gago ba Beibele ba e-tla, e tla ba mo go holago gore mogoeledi yo mongwe a dule le ba bangwe ba bona nakong ya seboka. Laletša ba bafsa gore ba be gona Sebokeng sa Phatlalatša sa ka mehla sa phuthego. Mogolo yo a kgethilwego go neela polelo ya phatlalatša o swanetše go itokišetša gabotse bakeng sa go nea polelo yeo e tutuetšago.
8 Mafelelong a monyanya wa Segopotšo, ge re kopanya mantšu a rena go opela kopelo 105 yeo e rego, “Tumišang Leitšibolo la Jehofa!,” eka re ka kgona go lebelela morago ka kgotsofalo kgweding ya go fišegela modiro wa pušo ya Modimo bakeng sa go iša tumišo go Jehofa!