Tutuetšang Kgolo ka Maeto a go Boela ao a Nago le Morero
1 Bakeng sa go thuša bao ba bontšhitšego kgahlego, go bohlokwa gore re tšwele pele re ba nea dijo tša moya ka go se kgaotše ka maeto a go boela a ka mehla. Diketelo tša rena di tla thuša ka mo go tšwelago pele go tutuetša kgolo ya bona ya moya. (1 Ba-Kor. 3:6-9) Lega go le bjalo, gore diketelo tša rena e be tšeo di nago le morero, go nyakega gore re lokišetše e sa le pele, re nagana ka motho yoo.
2 Go Boela go Bao re ba Tlogeletšego Pampišana: Mohlomongwe go ile gwa sepedišwa pampišana ya Lefase le Lefsa la Khutšo ketelong ya pele.
Ka morago ga go boeletša ka boripana seo go ilego gwa boledišanwa ka sona, mo gongwe re ka botšiša se sengwe se se swanago le se:
◼ “Ke mmušo ofe wo o ka tlišago diphetogo tše? [Dumelela tlhaloso.] Ga go na pelaelo gore le wena o be o tla thabela go phela maemong a swanago le a. Rena ka noši re ka thabela bjang maemo a bjalo?” Ka morago tlhokomelo e ka lebišwa tabeng yeo e lego ka tlase ga sehlogwana se se rego “Kamoo go ka Kgonegago ka Gona go Wena.” Lebiša tlhokomelo pukung ya Phela ka mo go sa Felego, kgaolo 15 ye e rego, “Go ba Molata wa Mmušo wa Modimo.” Mo gongwe re ka ahla-ahla dirapa tše pedi tša pele ke moka ra botšiša potšišo e rego: “Go ithuta ka Modimo go swanetše go re kgoma bjang?” Go ka dirwa dithulaganyo bakeng sa go araba potšišo le go ahla-ahla kgaolo ye ka mo go oketšegilego ketelong e latelago.
3 Ge re boela go bao re ba tlogeletšego puku ya “O ka Phela ka mo go sa Felego Paradeiseng mo Lefaseng,” re ka re:
◼ “Nakong ye e fetilego ge ke be ke go etetše, re ile ra boledišana ka mathata a mantši ao batho ba lebeletšanego le ona le seo Modimo a holofetšago go se dira ka ona. Lega go le bjalo, ke ka baka la’ng Modimo a dumeletše tlaišego nako e telele gakaakaa? Karabo e kgahlišago e hwetšwa go kgaolo 11 ya puku yeo ke go tlogeletšego yona.” Kgopela mong wa ntlo gore a tle le kopi ya gagwe ge e ba e le kgaufsi. Ka morago ga go hlahloba dirapa tše sego kae, re ka botšiša gore: “Na o nagana gore go tla ka gwa kgonega gore go phelwe lefaseng leo go lona go tla bego go se sa na bokgopo, moo batho ba tlago go kgona go thabela bophelo bjo bo sa felego ka tlase ga mmušo wa go loka?” Botša mong wa ntlo gore o tla thabela go boa bekeng e latelago gomme le ahla-ahle dikarabo tša dipotšišo tše go kgaolo 1 ye e rego, “Go Phela ka mo go sa Felego ga se Toro Feela.”
4 Go Boela go Bao re ba Tlogeletšego Dimakasine: Ge e ba o kgethile sehlogo se itšego seo se kgahlilego mong wa ntlo, godiša dintlha tše di oketšegilego go tšwa sehlogong ge o boela, o theile ditlhaloso tša gago temaneng e tee ya motheo le tabeng yeo e e ahla-ahlago. Ge e ba go e-na le kgahlego yeo e tšwelago pele, go ka ahla-ahlwa mehola ya dimakasine. Gape, tlhokomelo e ka lebišwa tokollong e latelago ya makasine ge e ba e e-na le sehlogo seo se bolelago ka taba e swanago. Go sego bjalo, re ka lebiša tlhokomelo tabeng yeo e lego pukung ya Phela ka mo go sa Felego yeo e bolelago ka taba yeo gomme ra dira dithulaganyo tša go e ahla-ahla ketelong ya rena e latelago.
5 Go bontšha ga rena kgahlego go motho ka go tšwela pele ka maeto a go boela a nago le morero go tla bontšha lerato la rena la go rata batho le Jehofa. (Joh. 13:34, 35) Eka re ka tšwela pele re tutuetša kgolo ya moya ya bao ba lego tšhemong ya rena ka go dira maeto a go boela ao a nago le morero ka mehla.