Hlagolela Kgahlego Pukung ya Phela ka mo go sa Felego
1 Ge re etela magaeng a bona, gantši re hwetša gore batho ba nweletše ‘dipelaelong tša bophelo bjono.’ (Mar. 4:19) Re lebana le tlhohlo ya go thopa kgahlego ya bona ka thero e šišinyago kgopolo. Mathomong, batho ba bantši ba ka ba le kgahlego e nyenyane go seo re se bolelago. Ge e ba re ka bolela selo se sengwe se se tlago go kgoma maphelo a bona, re ka kgona go fehla kgahlego e itšego molaetšeng wa Mmušo. Senotlelo sa go thoma dipoledišano ke go kgetha dintlha tše di ipiletšago tše di ka bolelelwago tše di tšwago pukung ya Phela ka mo go sa Felego. O ka re’ng?
2 Mo gongwe o ka diriša matseno a:
◼ “Ge nkabe o be o e-na le matla, ke bothata bofe bjo bo tlaišago mehleng ya rena bjo o bego o tla bo lokiša? [Dumelela karabo gomme ge e ba go swanetše, dumela gore batho ba bantši ba ikwa ka tsela e swanago.] Go fihla ga bjale, baetapele ba lefase ba bonala ba atlega ganyenyane go hwetša ditharollo tša mathata a mantši a tlabago a mehleng yeno. Eupja go na le Yo a ka kgonago e bile a tlago go fediša mathata ka moka ao a tlaišago batho. Hle hlokomela se se bolelwago go Psalme 145:16. [Bala lengwalo gomme o šupe diswantšhong tše di lego go matlakala 11-13.] Serapa 14 go letlakala 14 se rotoša potšišo yeo re sa tšwago go e ahla-ahla gomme se tšwela pele go botšiša gore: ‘Eupja se se tla direga neng?’” Hlalosa gore puku e tla araba potšišo yeo gomme o neele puku.
3 Goba o ka bolela selo se se swanago le se:
◼ “Mohlomongwe o tseba maikwelo a go itlhoboga ao a tlišwago ke go hwelwa ke moratiwa. Mohlomongwe a ile a go dira gore o ikwe o nyamile e bile o tloga o sa šireletšega. Mo gongwe o ka ba o ile wa naganišiša ka dipotšišo tše: [Bala dipotšišo go serapa 1 go letlakala 76.] Na e be e ka se be mo go homotšago go hwetša dikarabo tša dipotšišo tše? O ka kgothatšwa ke go tseba gore Beibele e nea kholofelo e kgonthišeditšwego bakeng sa ba ba ba hwilego. [Bala Johane 5:28, 29.] Puku ye e re thuša go kwešiša boemo bja bahu le kholofelo e lego gona ka bokamoso.” Šupa ka boripana go dikgaolo 8 le 20. Nea mong wa ntlo sebaka sa go hlahloba puku.
4 Go na le kgonagalo e kgolo ya gore o tla hwetša dibaka tša go nea bohlatse bjo bo sa rulaganyetšwago. Ge e ba go le bjalo, mo gongwe o ka bolela ka mantšu a gago selo se se swanago le se:
◼ “Lefase le tletše mathata mehleng yeno gomme ga go pelaelo ya gore le wena o na le a gago. Ka manyami, go bonala eka batho ba ba se nago molato ba tlaišega kudu. Na o nagana gore Modimo o tla ka a fediša tlaišego ka moka? [Dumelela karabo.] Anke ke bontšhe seo Modimo a holofetšago go se direla ba ba mo hlankelago. [Bala Psalme 37:40 ke moka o phetle puku ya Phela ka mo go sa Felego go letlakala 99.] Puku ye e hlalosa lebaka leo ka lona Modimo a dumeletšego bokgopo le kamoo a tlago go bo fediša ka gona.”
5 Ge e ba o le mogoeledi wa mofsa, o ka diriša thero e theilwego diswantšhong tše di hwetšwago go matlakala 156-8. Mo gongwe o ka thoma ka go botšiša gore:
◼ “Na o be o ka rata go phela lefaseng le le swanago le le? [Dumelela karabo.] Se sengwe le se sengwe sa diswantšho tše tše botse se theilwe kholofetšong e boletšwego Lentšung la Modimo, Beibele. [Šupa ditšhupetšong tša Mangwalo.] Puku ye e ka go thuša go ithuta mo gontši ka kholofetšo ya Modimo ya go dira lefase ka moka paradeise. E swere tsebišo e phološago bophelo gomme e swanelwa gabotse ke nako e dirišetšwago go e bala.”—Joh. 17:3.
6 Jehofa o tla šegofatša modiro wa rena ge e ba re dira boiteko bjo mafolofolo bja go lebiša batho ba ba swanago le dinku meetseng a therešo. Ka gona a re direng sohle seo re ka se kgonago ka September go hlagolela kgahlego pukung ya Phela ka mo go sa Felego.