Thušang ba Bangwe go ‘Lotola tše di Ngwadilwego’

¹Ga se gwa lekana go ‘kwa’ mantšu a diporofeto tšeo di lego ka pukung ya Kutollo. Gore motho a holege ka mo go tletšego, o swanetše go ‘lotola’ tše di ngwadilwego. (Kut. 1:⁠3) Go sepediša dipuku e fo ba mogato wa mathomo wa go dira barutiwa. Ge re hweditše batho ba ba thabelago bao ba ikemišeditšego go theetša, re swanetše go boela kapejana go ba thuša gore ba ithute mo go oketšegilego. Re ka bolela ka eng leetong la rena la go boela?

²Ge e ba ketelong ya pele le boletše ka banamedi ba bane ba dipitsi ba seswantšhetšo, mo gongwe o ka thoma poledišano ya gago ka tsela ye:

◼ “Nakong e fetilego re boletše ka puku ya Kutollo le kamoo diporofeto tša yona di phethagalago ka gona lehono ditiragalong tša lefase. Kutollo kgaolo 6 e boletše e sa le pele ka go kata ga banamedi ba bane ba dipitsi ba seswantšhetšo, moo go bego go tla feleletša ka bošoro bjo bogolo le tlalelo lefaseng. Re bone se se direga ka pele ga mahlo a rena. Ba bantši ba ipotšiša nako yeo ka yona tlalelo ye e tlago go fela, e le gore re thabele bophelo lefaseng la khutšo. Kgopolo ya gago ke efe? [Dumelela karabo.] Barutiwa ba Jesu ba be ba rata go tseba karabo ya potšišo ye.” Bala Mateo 24:​3 moo potšišo e rotošitšwego, ka morago o bale temana 34 moo Jesu a neilego karabo. Ge e ba karabelo e le e botse, hlalosa mo gontši ka mehla ya bofelo.

³Ge e ba ketelong ya pele le boledišane ka Mmušo wa Modimo, mohlomongwe o ka kgetha go tšwela pele ka go botšiša potšišo ye:

◼ “Go ya ka kgopolo ya gago, ke mmušo wa mohuta mang wo o nyakegago bakeng sa go kgotsofatša dinyakwa tša batho ka moka? [Dumelela karabo. Bala Jeremia 10:​23.] Bjalo ka ge o ka bona, Modimo ga se a ka a rera gore motho o swanetše go laola ditaba tša gagwe ka noši. Maiteko a go dira seo ka ntle le thušo ya Modimo ke sebaki sa mathata a rena a mantši. Mmušo wa Modimo ke pušo e nnoši yeo e ka re neago seo re se nyakago.” Phetla go letlakala 328 ka pukung ya Go Boledišana, gomme o bolele ka mangwalo ao a lego ka tlase ga sehlogwana sa boraro. Tšwetša poledišano pele ka go hlalosa lebaka leo ka lona re ka botago Modimo ka mo go feletšego.

⁴Mohlomongwe o ka rata go leka se gore o thome poledišano ya Mangwalo:

◼ Bontšha seswantšho se se lego go letlakala 302 la puku ya Seremo sa Kutollo gomme o hlalose ka gore: “Batho ba tla thabela maemo a ge thato ya Modimo e dirwa lefaseng bjalo ka ge e dirwa legodimong. Lega go le bjalo, ba bangwe ba boifa gore maemo a mabe a tla boa gape. Seo se ka se kgonege ka gobane batho ba babe ka moka ba tla ba ba se gona.” Bala Psalme 37:​10, 11. Laletša mong wa ntlo gore a diriše lenaneo la thuto ya rena ya Beibele ka mo go holago e le gore a ithute mo go oketšegilego.

⁵Ge e ba o tlogetše pampišana ya “Bophelo Lefaseng le Lefsa la Khutšo,” šupa seswantšhong se se lego letlakaleng la mathomo ke moka o bale serapa 1 ka tlase ga sehlogo se se rego, “Bophelo Lefaseng le Lefsa la Modimo.” Ka morago o re:

◼ “Ge e ba re rata go phela lefaseng le le swanago le leo, go na le selo se sengwe sa bohlokwa seo re swanetšego go se dira.” Bala serapa sa mafelelo gomme o sepediše puku ya Seremo sa Kutollo.

⁶Ka ge morero wa rena e le go thoma dithuto tša Beibele, re swanetše go dira maeto a atlegago a go boela. Rulaganya nako bakeng sa ona gomme o lokišetše gabotse. Ka tsela ye re ka thuša e le ka kgonthe batho ba dipelo tše botegago.​—⁠Kut. 22:​6, 7.