Go Nea Ditaba Tše Di Lokilego Ka Maikwelo A Go Akgofa Ga Boemo
1 Re bontšha tebogo ya rena e tseneletšego ya go leboga dikholofetšo tša Mmušo wa Modimo ka go tšea karolo ka pelo ka moka bodireding bja Bokriste. Re swanetše go tšea karolo modirong wo ka maikwelo a go akgofa ga boemo. Ka baka la’ng? Ka gobane badiri ga ba nene, bofelo bja tshepedišo ye e kgopo ya dilo bo a batamela, le gona maphelo a bao ba lego tšhemong ya rena a kotsing. (Hesek. 3:19; Mat. 9:37, 38) Boikarabelo bjo bjalo bjo boima bo nyaka boiteko bja rena bjo bo feletšego bodireding. Re ka bontšha bjang maikwelo a go akgofa ga boemo mabapi le modiro wa rena wa tirelo ya tšhemo? Ka go lokišeletša dithero tše dibotse e sa le pele, ka go ba mafolofolo tabeng ya go tsoma batho kae le kae moo ba ka hwetšwago gona, ka go boloka pego e nepagetšego ya bohle bao ba bontšhago kgahlego, ka go boela ka bjako bakeng sa go latelela kgahlego yeo le ka go gopola gore ka ge maphelo a akaretšwa, re swanetše go tšeela bodiredi bja rena godimo. Ditšhišinyo tše di latelago e ka ba tše di thušago ge re lokišeletša go nea ditaba tše di lokilego ka maikwelo a go akgofa ga boemo ka February. Mpho e tla ba puku ya Seremo se Segolo sa Kutollo se Batametše!
2 Mo gongwe o ka kgona go thoma poledišano ka go bolela ka bokopana mathata ao go lebeletšanwago le ona setšhabeng, gomme ka morago o ka re: ◼“Batho ba bantši ba a dumela gore go na le Modimo, eupša ba ipotšiša gore: ‘O re nyakela bokamoso bja mohuta ofe?’ O be o tla araba seo bjang? [Dumelela karabo.] Na o be o tseba gore Beibele e hlalosa ka mo go kwagalago thato ya Modimo ka batho le megato yeo a e gatago bakeng sa go e phetha?” Phetla go letlakala 301 ka pukung ya Seremo sa Kutollo. Bala Kutollo 21:1 go serapa 1, ka morago o bale tlhaloso yeo e neilwego bakeng sa go e hlalosa seripeng sa mafelelo sa serapa 2. Phetla go seswantšho seo se lego go letlakala 302 bakeng sa go bontšha seo se se se bolelago ka bokamoso bja rena. Bala Kutollo 21:4 go serapa 6. Sepediša puku ka moneelo wa R12,00. Rulaganyetša nako e swanetšego ya go boela bakeng sa go tšwetša pele poledišano.
3 O ka tšwetša pele poledišano ya nakong e fetilego ya Kutollo 21:1, 4 ka thero ye e kopana: ◼“Ketelong ya-ka ya nakong e fetilego, re ile ra boledišana ka kholofetšo ya Modimo ya go lokišetša lekoko le lefsa la lefaseng bakeng sa batho. [Lebiša tlhokomelo le seswantšhong se se lego go letlakala 302 ka pukung ya Seremo sa Kutollo.] Na o be o tla rata go bona lapa la gago le thabela maemo a bjalo? [Dumelela karabo.] Potšišo ke gore, Dikholofetšo tša Modimo di botega gakaaka’ng? Hle ela hloko seo yena ka boyena a se bolelago.” Bala Kutollo 21:5, 6a go serapa 8 go letlakala 303. Botšiša potšišo e gatišitšwego ya serapa 9 go letlakala 304, gomme o bale karabo go akaretša le lefoko la mafelelo la serapa. Bolela mpho ya thuto e sa lefelelwego ya Beibele. Rulaganyetša go e bontšha ka morago.
4 Ka ge ba bantši ba kgomegile ka mathata a golago ao a lebanego le batho, mo gongwe o ka bolela selo sa go swana le se ketelong ya pele: ◼“Mo e nyakilego go ba motho yo mongwe le yo mongwe yo ke gahlanago le yena o kgomegile ka mathata ao re lebeletšanago le ona setšhabeng sa gabo rena. [Bolela a sego kae.] Bo-radipolitiki ba ile ba holofetša go tliša ditharollo tša sa ruri, gomme ba bantši ba ile ba leka go dira bjalo. O nagana gore ke’ng seo se dirago gore maemo a tšwele pele ka go senyega? [Dumelela karabo.] Beibele e nea tlhaloso yeo batho ba bantši le ka mohla ba sa kago ba e ela hloko. Puku ya Kutollo e hlalosa ntwa yeo e ilego ya direga legodimong. Ela hloko ditla-morago, go etša ge go boletšwe go Kutollo 12:9.” Bala temana, ke moka o phetle go letlakala 182 ka pukung ya Seremo sa Kutollo. Diriša seswantšho go hlalosa go akaretšwa ga Sathane ditabeng tša lefase. Sepediša puku ka moneelo wa R12,00. Dira dithulaganyo tša go boa gomme o ahla-ahle kamoo Modimo a tlago go rarolla mathata a batho ka gona.
5 Ge e ba o holofeditše go boa bakeng sa go hlalosa tharollo ya Modimo ya mathata a lehono, mo gongwe o ka leka matseno a: ◼“Ke dirile boiteko bjo bo kgethegilego gore ke boe e le gore re ka tšwetša pele poledišano ya rena mabapi le tharollo ya kgonthe ya mathata ao a lebanego le batho. Ketelong ya-ka e fetilego, re bone gore Beibele e hlaola Sathane Diabolo e le yena yo a arošago lefase ka moka leo go agilwego go lona. Ka ge e le sebopiwa sa moya se se phagametšego motho, na o nagana gore go na le tsela yeo ka yona tutuetšo ya gagwe e ka tlošwago? [Dumelela karabo.] Hle ela hloko seo Beibele e se bolelago.” Bala gomme o hlalose Kutollo 20:1-3. Ka go diriša seswantšho seo se lego go matlakala 4-5 a puku ya Tsebo, bontšha kamoo maemo a tlago go ba ka gona ge go se na tutuetšo ya Sathane. Ithapele go swara thuto ya Beibele gomme o leke go e thoma di tloga fase.
6 Ka ge go e-na le batho ba bantši gakaakaa bao ba kgahlišwago ke tikologo, o ka bolela selo sa go swana le se bakeng sa go thoma poledišano: ◼“Re hweditše gore mo e nyakilego go ba motho yo mongwe le yo mongwe o kgomegile ka tšhilafalo ya moya wa rena, meetse le dijo. Dinageng tše dingwe maemo a tikologo a šetše a bea bophelo kotsing. Ka ge Modimo e le Mmopi wa lefase, o nagana gore o tla dira’ng ka se? [Dumelela karabo.] Beibele e bolela gore Modimo o tla nyaka pego ya tsela yeo re dirišago polanete ka gona. [Bala Kutollo 11:18b.] Akanya o dula lefaseng leo le se nago tšhilafalo ka moka!” Bolela ka kholofetšo ya Modimo ya paradeise, go etša ge go bontšhitšwe go Kutollo 21:3, 4. Bontšha seswantšho se se lego go letlakala 302 ka pukung ya Seremo sa Kutollo. Sepediša puku ka moneelo wa R12,00 gomme o rulaganyetše go boela.
7 Ge o boela go motho yo a bontšhitšego kgahlego ya go kgahlegela lefase la Paradeise, mo gongwe o ka re: ◼“Ketelong ya-ka ya nakong e fetilego, re dumelelane ka gore, gore go rarollwe bothata bja tšhilafalo ya lefase, Modimo o tla swanelwa ke go tsena ditaba tša motho gare. Eupša potšišo ke e rego, Ke’ng seo re swanetšego go se dira gore re phologele lefaseng le lefsa la go loka leo le dirilwego ke Modimo?” Bala Johane 17:3. Laletša mong wa ntlo gore a ikhole ka lenaneo-thuto le le sa lefelelwego la thuto ya Beibele gore a hwetše tsebo ye e kgethegilego.
8 Ke tokelo gakaakang go dirišwa re le badiri ba mehleng yeno bao e lego babuni le go dira modiro wa boboledi wa go phološa bophelo! Eka ka moka ga rena re ka tšwela pele re swaregile ka go nea ditaba tše di lokilego ka maikwelo a go akgofa ga boemo, ‘re tseba gore go itapiša ga rena ga se ga lefeela.’—1 Ba-Kor. 15:58.