Ba Thušeng Gore Ba Kwešiše
1 Moapostola Petro o ile a lemoga gore dilo tše dingwe tše di boletšwego ka Beibeleng di “thata xo kwêxa.” (2 Pet. 3:16) Ba bantši ba ile ba ikwa ka tsela yeo ka puku ya Kutollo. Lega go le bjalo, seo e se bolelago se hlalositšwe ka mo go kwalago ka pukung ya Seremo se Segolo sa Kutollo se Batametše! Re ka thuša bjang ba ba kgahlegago gore ba e diriše gakaone kudu?
2 Ge e ba o ahla-ahlile Kutollo 1:3 ketelong ya gago ya mathomo, kgopolo ye mo gongwe e ka tsoša kgahlego e mpshafaditšwego:
◼“Nakong e fetilego re ahla-ahlile kamoo go kwešiša puku ya Kutollo go ka tlišago lethabo ka gona. Lega go le bjalo, lethabo le le bjalo ga le itlele feela. Bonyenyane go nyakega dilo tše pedi go rena: Re swanetše go ithuta Beibele e bile re swanetše go diriša seo re ithutago sona.” Bala gomme o hlalose Jakobo 1:25. Phetla serapa 9 go letlakala 8 gomme o bontšhe kamoo go kwešiša puku ya Kutollo go ka re thušago ka gona go ithuta kamoo re ka hwetšago lethabo ka gona lefaseng le lefsa la paradeise.
3 Ge e ba o ahla-ahlile Johane 17:3 ketelong ya gago ya mathomo, o ka gatelela go nyakega ga go hwetša tsebo e oketšegilego ya Beibele ka go re:
◼“Nakong e fetilego ge ke be ke le mo, re badile go Johane 17:3 gore go hwetša tsebo ka Modimo go ka lebiša bophelong bjo bo sa felego. Eupša na o be o ka nyaka go phela ka mo go sa felego mohuteng wa lefase leo re phelago go lona lehono? [Dumelela karabo.] Ba bantši ba be ba ka se rate. Ka baka leo, re ka thaba ge re e-kwa seo Modimo a se holofeditšego.” Phetla serapa 6 go letlakala 303, bala Kutollo 21:4 ke moka o hlalose seo lefase le tlago go ba sona nakong ya ge “tša pele di fetile.” Ithapele go boa gape bakeng sa poledišano e tšwelago pele.
4 Ge e ba o ile wa diriša seswantšho se se lego go letlakala 302 go bontšha gore Mmušo wa Modimo o tla fediša tlaišego, o ka phetla puku go letlakala lona leo gape gomme o re:
◼“Re ahla-ahlile ditšhegofatšo tše di swantšhitšwego mo tšeo batho ba tlago go di thabela ka tlase ga pušo ya Mmušo wa Modimo. O nagana gore re swanetše go dira’ng ge e ba re nyaka go phela tlase ga Mmušo woo? [Dumelela karabo.] Batho ba bangwe mehleng ya Beibele ba ile ba bea mohlala o mobotse kudu wo re tlago go dira gabotse ge re o ekiša.” Bala Ditiro 17:11, o gatelele go nyakega ga go ‘hlahloba Mangwalo ka mehla.’ Hlalosa gore Dihlatse tša Jehofa di thuša batho ba botegago setšhabeng gore ba ithute Lentšu la Modimo le go le kwešiša gakaone.
5 Ge e ba o tlogeletše mong wa ntlo yo a bego a swaregile kudu go ka boledišana le yena pampišana ya “Na Lefase le le tla Phologa?” o ka diriša matseno a:
◼“Ge ke be ke etetše morago bjale, o be o swaregile kudu. Ke go tlogeletše pampišana yeo e rotošitšego potšišo mabapi le go phologa ga lefase mehleng ye ya khuduego. Re bala Kutollo 21:4 yeo e tsopotšwego ka pukung ye ya Seremo se Segolo sa Kutollo se Batametše! [E bale go serapa 6 go letlakala 303.] Seswantšho se [go letlakala 302] se go nea kgopolo ya kamoo go tlago go ba ka gona ge ‘Modimo a phumola megokgo ka moka mahlong a rena.’ Puku ye e nea bohlatse bjo bo kgodišago bja gore kholofetšo ye e tla phethagatšwa nakong e tlago e lego kgaufsi kudu. Ge e ba o tla rata go e bala, kopi ye ke ya gago ka moneelo wa R10,50.”
6 Ge e ba o hwetša kgahlego, mafelelong o tla rata go lebiša tlhokomelo pukung ya Tsebo e Išago Bophelong bjo bo sa Felego gomme wa e diriša go thoma thuto. Ruri o tla hwetša lethabo le legolo ka go thuša “ba se nago tsebo gore ba kwešiše.”—Ps. 119:130, NW.