Kutollo—Senotlelo Se Se Išago Lethabong La Kgonthe
1 Mantšu a moapostola Johane go Kutollo 1:3 ke ditaba tše dibotse go rena ka gobane o re botša kamoo re ka hwetšago lethabo ka gona. O ngwadile gore: “Wa lehlôxônôlô ké e a balaxo le ba ba kwaxo mantšu á a porofetô le ba ba lôtôlaxo tše di ngwadilwexo mo xo yôna; xobane lebaka le kxaufsi.” Puku ya Seremo se Segolo sa Kutollo se Batametše! e thušitše ba bantši go hwetša lethabo le legolo. Re na le lebaka le lebotse la go e sepedišetša ba bangwe.
2 Mo gongwe o ka kgona go thoma poledišano ka potšišo ye:
◼“Na o nagana gore puku ya Beibele ya Kutollo e be e reretšwe go kwešišwa, goba na e be e tla dula e le sephiri ka mehla? [Dumelela karabo.] Ba bantši ba na le pono e swanago le ya gago. Ela hloko seo Beibele e se bolelago go Kutollo 1:3. [Bala.] Ka gona Kutollo e ka kwešišwa gomme tsebo yeo e e swerego e ka re tlišetša lethabo. Se se kgonega bjang?” Hlahloba dikgopolo tše di lego go serapa 2 go letlakala 6, ke moka o re: “Puku ye e nea tsheka-tsheko ya temana ka temana ya puku ya Kutollo. E tla nyaka nako ya gago e ntši ge o e bala. Ke tla thabela go go tlogelela kopi ye ka moneelo wa R10,50.”
3 Ka ge ba bantši ba kgomega ka go nea dinyakwa tša bona tša dilo tše di bonagalago, se mohlomongwe se ka fehla kgahlego e itšego:
◼“O nagana gore senyakwa sa rena se segolo kudu ke eng? [Dumelela karabo.] Go na le ba bantši bao ba kgodišegilego gore re nyaka dilo tše dintši tše di bonagalago.” Phetla go letlakala 73 gomme o ahla-ahle dintlha tše dikgolo lepokising le le nago le sehlogo se se rego, “Mahumo a Lwantšhana le Bohlale.” Tšwela pele ka gore: “Se se bontšha gore tlhokomelo e kgolo e lebišwa dilong tše di bonagalago; re swanetše go kgomega kudu ka dinyakwa tša rena tša moya. Tsebo ya kgonthe ke seo ruri re se nyakago. Eupša ke tsebo ya go tseba eng?” Bala Johane 17:3 gomme o hlalose kamoo tsebo ya go tseba Modimo e ka lebišago ka gona bophelong bjo bo sa felego. Ithapele go tlogela puku le gore o boe gape go tla go bontšha kamoo e utollago ka gona tsebišo e kgahlišago ka morero wa Modimo wa go kgotsofatša dinyakwa ka moka tša batho.
4 Ka ge ba bantši ba tshwenyegile ka tlaišego lefaseng, mo gongwe o ka leka se:
◼“Motho yo mongwe le yo mongwe yo ke boledišanago le yena o tshwenyegile ka bokamoso. Baetapele ba bangwe ba lefase ba nagana gore re mollwaneng wa mehla e mefsa ya khutšo. O ikwa bjang ka seo? [Dumelela karabo.] Go sa šetšwe maiteko ka moka a motho, bošoro le tlaišego di tšwela pele go oketšega lefaseng ka bophara. Beibele e utolla tharollo e nnoši ya ka mo go sa felego mathateng a. [Bala 2 Petro 3:13. Phetla seswantšho go letlakala 302 gomme o hlalose kamoo Mmušo wa Modimo wa legodimong o tlago go tliša ka gona khutšo le polokego tša ka mo go sa felego lefaseng le.] Puku ye e tla go thuša gore o bone kamoo o ka bago ka gona karolo ya lekoko le le lefsa la batho bao ba tlago go thabela bophelo bjo bo sa felego tlase ga pušo ya Mmušo wa Modimo.”
5 Ge e ba o gahlana le motho yo a swaregilego gomme o swanelwa ke go bolela ka boripana, mo gongwe o ka bolela se:
◼“Ka ge o e-na le metsotso e sego kae, ke tla rata go tlogela pampišana ye [goba sehlogo sa makasine] e nago le sehlogo se rego [kgetha pampišana e swanetšego goba sehlogo]. Ke go kgothaletša gore o e bale. Nakong e tlago ge ke etela, ke tla rata go tseba seo o se naganago ka yona.”
6 Ge o sepediša dipuku, o se ke wa dika-dika go bolela moneelo o šišintšwego. Dipuku tša rena ga di bitše tšhelete e ntši ge di bapetšwa le seo se hwetšagalago go tša kgwebo. Ge batho ba neela bakeng sa dipuku tša rena, go tlaleletša lethabong leo ba tlago go ba le lona ka go lemoga se se bolelwago ke diporofeto tše di kgahlišago tša Kutollo.—Die. 3:13.