Tsebo Ya Go Tseba Modimo Wa Therešo E Iša Bophelong
1 Jesu o boditše Tatagwe thapelong gore: “Gomme bophelo bjo bo sa felego ke ge ba tseba wene Modimo wa go rereša o nnoši.” (Joh. 17:3, PK) Se ke moputso o mogolo gakaakang! Ka go diriša puku ya Tsebo e Išago Bophelong bjo bo sa Felego, re ka thuša ba bangwe go ithuta seo ba swanetšego go se dira gore ba phele ka mo go sa felego. Re ka bolela’ng go tsoša kgahlego ya bona le go ba tutueletša go rata go bala puku ya Tsebo?
2 Mo gongwe o ka diriša thero yeo e bolelelago Beibele e le mothopo o šomago wa tlhahlo, ka go re:
◼“Re boledišana le baagišani ba rena mabapi le moo go ka hwetšwago gona mothopo o šomago wa tlhahlo bakeng sa go lebeletšana le mathata a bophelo. Nakong e fetilego batho ba bantši ba be ba thoma ka go nyakišiša Beibeleng. Eupša gona bjale boemo bja batho bja kgopolo bo fetogile; ba bantši ga ba dumele Beibele, ba e lebelela e fo ba bjalo ka puku e ngwadilwego ke batho. Kgopolo ya gago ke efe? [Dumelela karabo.] Go na le lebaka le lebotse kudu leo ka lona go ka bolelwago gore Beibele ke e šomago bakeng sa mehla ya rena. [Bala 2 Timotheo 3:16, 17.] Mo nakong ye melao ya motheo ya Beibele e šoma go fo swana le ge e be e šoma nakong ya ge Modimo a be a budulela go ngwalwa ga Beibele.” Phetla go letlakala 16 ka pukung ya Tsebo gomme o hlalose ka boripana mabapi le tlhahlo e šomago yeo e hwetšwago Thutong ya Jesu ya Thabeng. Bala tsopolo yeo e hwetšwago go serapa 11 goba yeo e lego go serapa 13. Sepediša puku ka moneelo wa R3,50 gomme o rulaganyetše go boa bakeng sa go araba potšišo e rego, Rena ka noši re ka holwa bjang ke tsebo e lego ka Beibeleng?
3 Ka ge thapelo e le taba e kgahlišago batho ba bantši, mo gongwe o ka rata go e ahla-ahla ka go botšiša gore:
◼“Ka ge go e-na le ditlhohlo tše dintši tšeo re swanetšego go lebana le tšona bophelong bja mehleng yeno, na o nagana gore thapelo e ka ba thušo ya kgonthe go rena? [Letela karabo.] Ba bantši ba nagana gore ba batamela Modimo ka go mo rapela le gore go dira bjalo go ba neile matla a ka gare, e lego sona seo Beibele e se holofetšago. [Bula puku ya Tsebo go letlakala 156 gomme o bale Ba-Filipi 4:6, 7.] Lega go le bjalo, motho a ka nagana gore thapelo ya gagwe ka dinako tše dingwe ga e arabje. Kgaolo ye e ahla-ahla ‘Kamoo o ka Batamelago Modimo ka Gona.’ [Sepediša puku ka moneelo wa R3,50.] Kgaolo ye e hlalosa gape kamoo re ka theetšago Modimo ka gona, ka ge go boledišana le yena go sa lekanyetšwa lehlakoreng le tee. Re ka ahla-ahla seo ge ke boa nakong e tlago.”
4 Na o ka rata go leka matseno a lebanyago bakeng sa go thoma thuto? A mangwe ao mo gongwe a ka go šomelago šea:
◼“Re ithapela go swara thuto e sa lefelelwego ya legae ya Beibele. Na o kile wa ba le thuto ya Beibele pele? [Dumelela karabo.] E re ke go bontšhe thušo ya go ithuta yeo re e dirišago.” Bontšha puku ya Tsebo, phetla go letlakala 3 e le gore mong wa ntlo a ka bona lelokelelo la dikagare gomme o botšiše gore, “Na o kile wa ipotšiša seo Beibele e se bolelago ka ditaba tše?” Phetla kgaolong yeo go bontšhitšwego kgahlego kudu go yona gomme o bale dihlogwana. Hlalosa gore o tla rata go bontšha ka boripana kamoo re akaretšago tsebišo ye ka gona thutong ya rena. Go sa šetšwe gore thuto e thomile goba ga se ya thoma, nea motho puku.
5 Lehono mašaba a batho a arabela tsebong e nepagetšego ya go tseba Modimo wa therešo. (Jes. 2:2-4) Ke tokelo ya rena go thuša ba bantši ka mo go kgonegago go ithuta ka Jehofa gomme ba išwe bophelong.—1 Tim. 2:4.