Go Phatlalatša Tsebo E Išago Bophelong Bjo Bo Sa Felego
1 Jehofa ke “Yena a rutago batho tsebo.” (Ps. 94:10, PK) O re diriša go phatlalatša tsebo e phološago bophelo mabapi le yena go bao ba sa lemogego kamoo ba ka mo hlankelago ka gona ka mo go amogelegago. Puku ya Tsebo e Išago Bophelong bjo bo sa Felego ke sedirišwa se sebotse sa go ruta seo ka sona batho ba dipelo tše di botegago ba ka hwetšago kwešišo e nepagetšego ya Modimo e tšwago Lentšung la gagwe le le ngwadilwego, Beibele. (1 Tim. 2:3, 4) Tlhaloso e kwalago le e kwešišegago ya puku ya Tsebo ya go hlalosa therešo e tla thuša batho go kwešiša seo Jehofa a nyakago go ba ruta sona. Kgweding ye re nyaka go tsenya batho dipoledišanong tšeo di tlago go dira gore ba nyake go bala puku. Mo go na le ditšhišinyo tše dingwe. Go e na le go leka go di swara ka hlogo, leka go bolela dikgopolo tša motheo ka mantšu a gago le ka mokgwa wa tlhago wa go bolela.
2 Ka ge batho ba bantši ba lahlegetšwe ke motho yo ba mo ratago lehung, o ka logelela kholofelo ya tsogo poledišanong ka go thoma ka go bolela selo se se swanago le se:
◼“Bontši bja rena re lahlegetšwe ke motho yo re mo ratago lehung. Na o ile wa ipotšiša ge e ba o tla bona motho yo bjalo gape? [Dumelela karabo.] Lehu e be e se karolo ya morero wa Modimo wa mathomong ka motho. Jesu o bontšhitše gore baratiwa ba rena ba ka phološwa lehung. [Bala Johane 11:11, 25, 44.] Gaešita le ge se se diragetše makgolong a nywaga a fetilego, se bontšha seo Modimo a holofeditšego go re direla sona. [Phetla puku ya Tsebo go seswantšho se se lego go letlakala 85 gomme o bale taba e hlalosago. Ke moka o bontšhe seswantšho se se lego go letlakala 86 gomme o se hlalose.] Ge e ba o tla rata go bala ka mo go oketšegilego ka kholofelo ye e homotšago ya tsogo, ke tla thabela go go tlogelela puku ye ka moneelo wa R3,50.”
3 Ka morago ga poledišano ya mathomo mabapi le kholofelo ya tsogo, o ka thoma poledišano e latelago le motho yena yoo ka tsela ye:
◼“Mo gongwe o ka ba o gopola seo ke se boletšego gore lehu e be e se karolo ya morero wa Modimo wa mathomo ka motho. Ge e ba seo e le therešo, ke ka baka la’ng re tšofala le go hwa? Dipshinyaleraga tše dingwe di phela nywaga e fetago 100, gomme go na le dihlare tšeo di phetšego nywaga e dikete. Ke ka baka la’ng batho ba phela nywaga e 70 goba e 80 feela? [Dumelela karabo.] Re hwa ka baka la ge batho ba babedi ba pele ba ile ba se kwe Modimo.” Bala Ba-Roma 5:12. Phetla go letlakala 53 pukung ya Tsebo gomme o bale sehlogo sa kgaolo. Ahla-ahla dirapa tše tharo tša mathomo, o bontšhe dikarabo tša dipotšišo tše di gatišitšwego. Dira tumelelano ya go boa gape nakong e tlago bakeng sa go tlo ahla-ahla karolo e šetšego ya kgaolo. Kgothaletša motho gore a e bale ka moka ga yona ge a sa letile.
4 Ge e ba o bolela le motho yo go bonalago a sekametše bodumeding, mohlomongwe o ka re:
◼“Lehono go na le madumedi a makgolo e le ka kgonthe a sa swanego. A ruta mehuta ka moka ya ditumelo tše di lwantšhanago. Batho ba bangwe ba bolela gore madumedi ka moka a lokile gomme ga go dire phapano gore ke eng seo re se dumelago. Kgopolo ya gago ke efe? [Dumelela karabo.] Jesu o rutile ka bodumedi bja therešo gomme a bontšha gore dibopego tše dingwe tša borapedi ga di amogelwe ke Modimo. [Bala Mateo 7:21-23.] Ge e ba re nyaka go kgahliša Modimo, re swanetše go mo rapela ka go dumelelana le thato ya gagwe.” Phetla puku ya Tsebo go kgaolo 5, bala sehlogo gomme o bontšhe tše dingwe tša dihlogwana. Hlalosa gore tsebišo ye e tla thuša motho go ithuta kamoo a ka kgahlišago Modimo ka gona. Sepediša puku ka moneelo wa R3,50.
5 Batho bao ba gakanegilego ka baka la ge go e-na le madumedi a mantši gakaakaa mo gongwe ba ka thabela karabo ya potšišo ye leetong la gago la go boela:
◼“Ka ge go e-na le madumedi a mantši gakaakaa a sa swanego lehono, re ka tseba bjang bjoo e lego bjo bo nepagetšego? Ke’ng seo o bego o tla se lebelela go bjona? [Dumelela karabo.] Jesu o re boditše kamoo re ka hlaolago ka gona balatedi ba gagwe ba therešo.” Bala Johane 13:35. Ahla-ahla dirapa 18 le 19 go kgaolo 5 ya puku ya Tsebo. Bontšha gore ka go diriša tlhahlo ya Mangwalo le mokgwa wa go nyakišiša, motho a ka lemoga bodumedi bja therešo. Laodiša kamoo Dihlatse tša Jehofa di tsebjago ka gona lefaseng ka moka ka baka la lerato la tšona le ditekanyetšo tše di phagamego tša boitshwaro. Hlalosa kamoo thuto ya Beibele yeo go yona go dirišwago puku ya Tsebo e tlago go hlaola ka gona ka mo go kwalago sebopego sa borapedi bjo Modimo a bo amogelago.
6 Ge e ba o kopana le motswadi, mohlomongwe matseno a e ka ba a atlegago:
◼“Letšatši le lengwe le le lengwe re kwa dipego mabapi le boitshwaro bjo bo sa laolegego bja bafsa bao ba bonalago ba se na ditekanyetšo le ge e le dife tša boitshwaro. Batho ba bangwe ba bagolo ba nyaka go sola tshepedišo ya sekolo bakeng sa go se rute bana phapano magareng ga se se lokilego le se se fošagetšego. O nagana gore ke mang yo a swanetšego go nea tlwaetšo ye? [Dumelela karabo.] Theetša seo Beibele e se bolelago mabapi le potšišo ye. [Bala Ba-Efeso 6:4.] Seo se re botša gore go nweletša ditekanyetšo tša boitshwaro baneng ke boikarabelo bja batswadi.” Phetla puku ya Tsebo go letlakala 145, bala serapa 16 gomme o hlalose diswantšho tše di lego go letlakala 147. Hlalosa gore puku e rulaganyeleditšwe lapa ka moka bakeng sa go ithuta. O diriša dirapa 17 le 18 go letlakala 146, ithapele go bontšha kamoo re swarago thuto e bjalo le malapa ka gona.
7 Ge e ba o ile wa thoma thuto le motswadi yo a tshwenyegilego ketelong ya pele, mohlomongwe o ka e tšwetša pele leetong la go boela ka go bolela gore:
◼“Lefase la lehono le bea diteko tše dintši pele ga bafsa ba rena. Se se dira gore go be thata kudu go bona gore e be ba boifago Modimo ge ba dutše ba gola. Mohlomongwe o a gopola gore poledišanong ya rena ya nakong e fetilego re ile ra kgetha melao e mebedi ya motheo. Ka ge re le batswadi ba boifago Modimo, re nyaka go beela bana ba rena mehlala e mebotse gomme re swanetše go nea dipontšho tše sa kgaotšego tša lerato la rena go bona. Go na le selo se sengwe seo Beibele e bolelago gore bana ba se nyaka go batswadi ba bona.” Bala Diema 1:8. Phetla go letlakala 148 pukung ya Tsebo gomme o tšwetše thuto pele ka go akaretša dirapa 19-23. Šišinya gore o tla boa gape bakeng sa go ithuta le lapa ka moka, le thoma ka kgaolo 1.