Go Swanelega Le Go Hlamelwa Go Ruta Ba Bangwe
1 Ge Moše a be a kgethwa e le moemedi wa Jehofa, o be a sa ikwe a swanelegela go tsebatša lentšu la Modimo go Farao. (Ek. 4:10; 6:12) Jeremia o ile a utolla go hloka ga gagwe kgodišego tabeng ya go kgona go hlankela e le moporofeta wa Jehofa, a botša Modimo gore o be a sa kgone go bolela. (Jer. 1:6) Go sa šetšwe go hloka ga bona kgodišego mathomong, baporofeta bao ka bobedi ba ile ba ipontšha e le dihlatse tše di se nago poifo tša Jehofa. Ba ile ba dirwa gore ba swanelege ka mo go lekanego ke Modimo.
2 Lehono re na le seo re se nyakago bakeng sa go phetha bodiredi bja rena ka kgodišego ka baka la Jehofa. (2 Ba-Kor. 3:4, 5; 2 Tim. 3:17) Ka go swana le molokiši wa metšhene yo a swanelegago yo a nago le sehlopha se se feletšego sa didirišwa, re hlamilwe ka mo go swanetšego gore re phethe bodiredi bjo re bo abetšwego ka bokgwari. Ka January re sepediša puku ya O ka Hwetša Bjang Khutšo ya Kgonthe le Polokego? Gaešita le ge sedirišwa se sa moya e se se sefsa, fela dihlogo tša sona tša Mangwalo di sa dutše di le nakong gomme se tla thuša batho go ithuta therešo. Dithero tše di latelago tše di šišintšwego mo gongwe di ka fetolwa gore di swanele mathata a fapa-fapanego ao a atilego tšhemong ya gabo rena.
3 Taba ya thuto e ka dirišetšwa go aga kgahlego ya go kgahlegela Lentšu la Modimo. O ka thoma poledišano ka gore: ◼“Lehono go gatelelwa kudu go nyakega ga thuto ya maemo. Go ya ka pono ya gago, ke thuto ya mohuta mang yeo motho a swanetšego go e phegelela bakeng sa go kgonthišetša lethabo le legolo kudu le katlego bophelong? [Dumelela karabo.] Mehola ya ka mo go sa felego e ka hwetšwa ke bao ba monyago tsebo ya Modimo. [Bala Diema 9:10, 11.] Puku ye ya dikgakollo yeo e nago le sehlogo se se rego O ka Hwetša Bjang Khutšo ya Kgonthe le Polokego? e theilwe Beibeleng. E šupa mothopong o nnoši wa tsebo yeo e ka lebišago khutšong ya kgonthe le polokego.” Ke moka šupa go serapa 8 go letlakala 6 bakeng sa go bontšha gore Beibele e nea tsebo yeo re e nyakago. Sepediša puku ka moneelo wa R4,00, gomme o rulaganyetše leeto la go boela.
4 Ge o boela go mong wa ntlo yo o ahla-ahlilego le yena bohlokwa bja thuto ya Beibele, mo gongwe o ka re: ◼“Ketelong ya-ka e fetilego, re ile ra ahla-ahla Beibele e le mothopo wa thuto yeo e ka kgonthišetšago bokamoso bja rena bjo bo sa felego. Go ba gona, go nyakega boiteko gore re ithute seo re swanetšego go se tseba go tšwa Mangwalong. [Bala Diema 2:1-5.] Batho ba bantši ba hwetša go le thata go kwešiša dikarolo tše dingwe tša Beibele. Ke rata go bontšha ka bokopana mokgwa woo re o dirišitšego kudu go thuša batho go ithuta ka mo go oketšegilego ka dithuto tša motheo tša Beibele.” O diriša puku yeo e ilego ya tlogelwa, phetla lefelong le swanetšego gomme o bontšhe thuto ya Beibele ka bokopana. Ge e ba mong wa ntlo a rata go ba le thuto ya ka mehla, hlalosa gore o tla boa le thušo ya rena ya go ithuta ya Tsebo e Išago Bophelong bjo bo sa Felego.
5 Batho ba bantši ba hlobaetšwa ke go tlaišega ga dimilione tša bana ba lefase. Mohlomongwe o ka thuša mong wa ntlo go bona kamoo Modimo a lebelelago boemo bjo bjo thata ka gona, ka go bolela gore: ◼“Ga go na pelaelo gore o bone dipego tša ditaba mabapi le bana bao ba swerwego ke tlala, bao ba babjago le bao ba hlokomologilwego go dikologa lefase. Ke ka baka la’ng mekgatlo yeo e kgomegago e sa kgone go kaonefatša boemo? [Dumelela karabo.] Modimo o nyaka feela se sekaone kudu bakeng sa batho. Ela hloko seo a se holofetšago bakeng sa bana le batho ba bagolo, go etša ge go begilwe ka Beibeleng. [Bala Kutollo 21:4.] Puku ye yeo e nago le sehlogo se se rego O ka Hwetša Bjang Khutšo ya Kgonthe le Polokego? e nea ditaba tše oketšegilego mabapi le lefase leo le dirilwego ke Modimo leo go lona tlaišego e tlago go fela.” Phetla seswantšhong seo se bontšhago Paradeise go letlakala 98, gomme o se ahla-ahle. Sepediša puku ka moneelo wa R4,00, gomme o rulaganyetše ketelo e nngwe.
6 Ge e ba mathomong o boletše ka go tlaišega ga bana, leetong le le latelago o ka tšwetša pele poledišano ka go bolela gore: ◼“Ge ke be ke le mo malobanyana mo, o ile wa bontšha go tshwenyega ka bothata bja bana bao ba tlaišegago ka baka la malapa a phumegilego, tlala, bolwetši le bošoro. Ke mo go homotšago go bala ka Beibeleng mabapi le lefase leo go lona bana gaešita le batho ba bagolo ba ka se tlaišwego ke bolwetši, bohloko goba lehu. Boporofeta bjo bo lego ka pukung ya Jesaya bo hlalosa bophelo bjo bokaone bjo bo tlago go tla lefaseng.” Bala gomme o ahla-ahle Jesaya 65:20-25. Feleletša ka go lebiša thutong ya Beibele ka puku ya Tsebo.
7 Ka ge taba ya tšhireletšego ya motho ka noši e le menaganong ya batho ba bantši ka baka la bosenyi bjo bo atago, o ka thoma poledišano tabeng ye ka go bolela gore: ◼“Re boledišana le baagišani ba rena ka taba ya tšhireletšego ya motho ka noši. Re dikologilwe ke bosenyi bjo bontši, gomme bo kgoma maphelo a rena. Tharollo ke’ng? Na o nagana gore go na le motho yo a ka fedišago mathata lefaseng?” Dumelela karabo. Go ithekgile ka karabelo mo gongwe o ka tšwela pele ka tsela ye: “Go thwe’ng ge e ba mmuši a e-na le ditshwanelego tša go swana le tše tše di boletšwego go Jesaya 9:5, 6? [Bala.] Na ga o nagane gore se se tla lebiša lefaseng le le šireletšegilego?” Gatelela dintlha bakeng sa go bontšha gore lengwalo le le šupa go Jesu Kriste. “Puku ye ye e nago le sehlogo se se rego O ka Hwetša Bjang Khutšo ya Kgonthe le Polokego? e ahla-ahla ka mo go kwagalago kholofelo e nnoši yeo re nago le yona bakeng sa tšhireletšego le polokego le kamoo ‘Kgošana ya Khutšo’ e tlago go tliša khutšo ya lefase ka bophara lefaseng mehleng ya rena. Na o tla rata go ithuta ka mo go oketšegilego ka lefase le lefsa le le holofeditšwego?” Sepediša puku ka moneelo wa R4,00.
8 Ge o tšwetša pele poledišano ya nakong e fetilego ya mabapi le tšhireletšego ya motho ka noši, mo gongwe o ka leka matseno a: ◼“Ke thabetše poledišano ya rena mabapi le taba ya tšhireletšego ya motho ka noši. Bjalo ka ge go ahla-ahlilwe, Jesu ke mmuši a nnoši yo a ka tlišago polokego ya neng le neng lefaseng. O tla thabela go kwa ka dilo tše dingwe tšeo a tlago go di direla batho nakong ya pušo ya gagwe.” Bala gomme o ahla-ahle serapa 20 go letlakala 42 ka pukung ya Tsebo, gomme o botšiše ge e ba o ka bontšha kamoo go ka ithutwago Beibele ka gona ka thušo ya puku ye.
9 Ge go tliwa tabeng ya go abelana le ba bangwe tsebo ya Modimo, mo gongwe re ka botšiša gore, “Ke mang yo a swanelegago ka mo go lekanego bakeng sa dilo tše?” Mangwalo a araba ka gore: “Ke rena.”—2 Ba-Kor. 2:16, 17, NW.