Fetišetša Taletšo Go Yo Mongwe Le Yo Mongwe Yo A Nyorilwego
1 Go Etša Ge Go Boletšwe E Sa Le Pele Ke Moporofeta Amosi, Lapa La Batho Lehono Le Tlaišwa Ke ‘Lenyora, E Sego La Meetse; Eupša La Go Lla Go Kwa Lentšu La Morena.’ (Amosi 8:11) Go Thuša Batho Boemong Bjo, Bjo Bo Omeletšego Moyeng, Re Ba Botša Ka Ditokišetšo Tša Modimo Tša Go Lokolla Batho Bao Ba Kwago Sebeng Le Lehung Tšeo Di Swantšheditšwego Kgaolong Ya Mafelelo Ya Kutollo E Le “Noka Ya Meetse A Bophelô.” Re Na Le Tokelo Ya Go Fetišetša Go Yo Mongwe Le Yo Mongwe Yo A Nyoretšwego Toko Taletšo Ya “[Go] Tšea Meetse A Bophelô [Ao A Fogo] fiwa Fêla.” (Kut. 22:1, 17) Re Ka Dira Se Bjang Ka February? Ka Go Nea Bao Ba Kgahlegelago E Le Ka Kgonthe Puku Ya Seremo Se Segolo Sa Kutollo Se Batametše! Mohlomongwe O Ka Rata Go Leka Dithero Tše:
2 Ka ge batho ba bantši ba tshwenyegile ka ditaba tša tša maphelo, mo gongwe o ka hwetša matseno a e le a atlegago:
◼“Ba bantši ba tshwenyegile ka ditshenyagalelo tše hlatlogago tša tlhokomelo ya maemo a tša maphelo. Mohlomongwe o ile wa nagana ka taba ye. [Dumelela karabo.] Na go na le tharollo ya sa ruri bothateng bjo? [Letela karabo.] Kholofelo e kgahlišago ke ye.” Bala Kutollo 22:1, 2. Ke moka o bule puku ya Seremo sa Kutollo seswantšhong seo se lego go matlakala 308-9, gomme o diriše serapa 22 go letlakala 311 go se hlalosa. Phetha ka gore: “Puku ye e ahla-ahla temana e nngwe le e nngwe ka go Kutollo.” Sepediša puku ka moneelo wa ka mehla. Dira dithulaganyo tša go boela.
3 Ge o dira leeto la go boela, o ka tšwetša pele poledišano ya gago ka gore:
◼“Nakong ya go feta ge ke be ke le mo, re ile ra bolela ka tharollo ya sa ruri mathateng a tša maphelo. Na o nagana gore go tla ke go be le nako yeo ka yona go ka se bego le yo a babjago? [Dumelela karabo.] Ela hloko polelo ye e kgahlišago.” Bala Jesaya 33:24. Ke moka phetla go thuto 5 poroutšheng ya Seo Modimo a se Nyakago, gomme o ahle-ahle dirapa 5-6, o botšiša dipotšišo tšeo di sepedišanago mathomong a thuto le go lebelela mangwalo a sego kae a bontšhitšwego. Bolela gore go tlošwa ga bolwetši le lehu ke karolo ya go phethagatša morero wa Modimo wa mathomong bakeng sa lefase. Rulaganya go boela go yo ahla-ahla dirapa 1-4 le 7 thutong yona yeo.
4 Ge e ba sehlogo sa ditaba sa mo nakong ye seo se lego mabapi le lehu la tšhoganyetšo e le seo batho ba naganago ka sona, o ka leka matseno a:
◼“O ka no ba o kwele ka [bolela sehlogo sa ditaba]. Ge maphelo a kgaotšwa ka pela ka mo go nyamišago, ba bantši ba ipotšiša gore ke khomotšo efe yeo e ka newago malapa a gabo bahlaselwa. O nagana eng?” Dumelela karabo. Ke moka phetla go letlakala 299 pukung ya Seremo sa Kutollo, gomme o bontšhe ka tiragalo ya tsogo yeo e swantšhitšwego. Tšwela pele ka gore: “Ba bantši ba makatšwa ke go kwa gore bobedi batho ba ba lokilego le ba ba sa lokago ba tla bušetšwa bophelong Paradeiseng lefaseng. [Bala Ditiro 24:15 go etša ge e tsopotšwe go serapa 9 go letlakala 297, gomme o nee tlhaloso yeo e hwetšwago go serapa 10.] Puku ye e ahla-ahla ditaba ka botlalo tše dingwe tše dintši tše di kgahlišago mabapi le morero wa Modimo ka bokamoso. Ge e ba o tla rata go ithuta mo go oketšegilego ka wona, o ka hwetša kopi ye ka moneelo wa R12,00.” Dira dithulaganyo tša go boela, o ngwala dikgahlego tše kgethegilego le dilo tšeo di tshwenyago motho yoo.
5 Ge o etela gape, dumelelanya thero ya gago le mong wa ntlo. Mohlomongwe o ka re:
◼“Nakong e fetilego ge re be re bolela, ke ile ka thabela tlhaloso yeo o e boletšego mabapi le morero wa Modimo ka lefase. [Boeletša tlhaloso.] Ke hweditše taba e itšego yeo ke naganago gore o tla e hwetša e le e kgahlišago.” Phetla poroutšha ya Seo Modimo a se Nyakago go thuto 5. Bala gomme o ahle-ahle dirapa tše dintši ka mo go ka kgonegago thutong yeo tšeo di bonalago di gogela mong wa ntlo. Ka morago ga go rulaganya nako ya go boa gore o tšwetše thuto pele, nea mong wa ntlo pampišana ya taletšo yeo e bontšhago dinako tša diboka tša phuthego. Hlalosa ka Seboka sa Phatlalatša, gomme o mo laletše go ba gona.
6 Ge e ba o rata thero e nolofaditšwego yeo e bolelelago pampišana, o ka re:
◼“Ke rata gore o ikhweletše pampišana ye e nago le sehlogo se se rego, Kholofelo ke Efe ka Baratiwa Bao ba Hwilego?” E nee mong wa ntlo, gomme o mo laletše go latela ge o dutše o bala serapa sa pele. Mo dumelele gore a arabele potšišong yeo e rotošitšwego mothalading wa mafelelo. Bala serapa sa bobedi, ke moka o bule seswantšhong seo se lego go letlakala 299 ka pukung ya Seremo sa Kutollo. Tšwela pele ka go bolela gore: “Puku ye e nea ditaba ka botlalo mabapi le tsogo le dikholofetšo ka moka tše di kgahlišago tša Beibele tša nakong e tlago. Ge e ba o tla rata go e bala, o ka hwetša kopi ye ka moneelo wa R12,00.” Dira dithulaganyo tša gore o boele go yo tšwetša pele kgahlego ya motho therešong.
7 Go fetišetša ga rena taletšo e ipiletšago go ba bangwe go ka ba bakela gore ba tle meetseng a bophelo, ao Jehofa a a dirago gore a hwetšagale mo nakong ye. Ka gona, anke re reng go yo mongwe le yo mongwe yo a nyorilwego, “Tlaa!”—Kut. 22:17.