Babulamadibogo Ba Thuša Ba Bangwe

¹ Jesu o ile a re: “Punô ké e ntši; ’me badiri xa ba nene. Ké xôna kgopêlang Mong wa punô, a romê badiri punong ya xaxwe.” Ka ge babuni ba lekgolong la pele la nywaga e be e le ba sego nene ka palo gomme ba e-na le tšhemo e kgolo yeo ba bego ba swanetše go e akaretša, Jesu a ka be a ile a ba laela gore ba fihlelele batho ba bantši ka mo go kgonegago ka ditaba tše di lokilego ka go ba roma ka o tee ka o tee. Go e na le moo, o ile a ba roma “ka babedi [ka] babedi.” (Luka 10:1, 2) Ke ka baka la’ng e le ka babedi ka babedi?

² Barutiwa bao e be e le ba bafsa gomme ba se na phihlelo. Ka go šoma gotee ba be ba ka rutana le go kgothatšana. Bjalo ka ge Salomo a bolela, “Bolô ké mola è le ba babedi.” (Mmo. 4:9, 10) Gaešita le ka morago ga ge moya o mokgethwa o tšholotšwe ka Pentekoste ya 33 C.E., Paulo, Baranaba le ba bangwe ba ile ba sepela le badumedi-gotee le bona bodireding. (Dit. 15:35) Yeo e swanetše go ba e bile tokelo e kgolo gakaakang go ba bangwe gore ba tlwaetšwe ka go lebanya ke banna ba bjalo bao ba nago le bokgoni!

³ Lenaneo le Lebotse la Tlwaetšo: Go swana le mogwera wa yona wa lekgolong la pele la nywaga, phuthego ya mehleng yeno ya Bokriste ke mokgatlo wa go dira boboledi. E bile e re nea tlwaetšo. Re le batho ka o tee ka o tee, kganyogo ya rena e tšwago pelong e swanetše go ba go bolela ditaba tše di lokilego ka bokgwari ka mo go ka kgonegago ka gona. E le gore bagoeledi ba bantši ba tle ba kaonefatše bokgoni bja bona, thušo e a hwetšagala.

⁴ Sekolong sa Bodiredi sa Mmušo seo se sa tšwago go swarwa morago bjale, Mokgatlo o ile wa tsebiša lenaneo la gore babulamadibogo ba thuše ba bangwe bodireding bja tšhemo. Na se se a nyakega? Ee, ruri se a nyakega. Bagoeledi ba fetago milione o tee ba ile ba kolobetšwa nywageng e meraro e fetilego, gomme ba bantši ba ba ba nyaka tlwaetšo gore e be ba nago le bokgoni kudu modirong wa boboledi. Ke bomang bao ba ka dirišwago go kgotsofatša senyakwa seo?

⁵ Babulamadibogo ba nako e tletšego ba ka thuša. Mokgatlo wa Jehofa o ba nea keletšo e ntši le tlwaetšo. Babulamadibogo ba hwetša tlhahlo yeo e rulaganyeditšwego dinyakwa tša bona Sekolong sa Tirelo ya Bobulamadibogo sa dibeke tše pedi. Gape ba holwa ke diboka tšeo ba bago le tšona le balebeledi ba tikologo le ba selete, gaešita le go tšwa tlhahlong ya bagolo. Le ge e se babulamadibogo ka moka bao ba nago le phihlelo e swanago le yeo Paulo le Baranaba ba bego ba e-na le yona, fela ba hweditše tlwaetšo e bohlokwa yeo ba thabelago go e abelana le ba bangwe.

⁶ Ke Bomang ba Tlago go Holega? Na go tšea karolo lenaneong le go lekanyeditšwe feela go bagoeledi ba bafsa goba bao ba sa tšwago go kolobetšwa? Le gatee! Go na le bao e lego bafsa le ba bagolo bao ba tsebilego therešo ka nywaga e mentši eupša ba ka thabela go thušwa dibopegong tše itšego tša bodiredi. Ba bangwe ba šoma gabotse kudu go sepedišeng dipuku eupša ba na le bothata bja go dira maeto a go boela goba go thoma dithuto tša Beibele. Ba bangwe ba ka thoma dithuto tša Beibele gabonolo eupša ba hlokomela gore barutwana ba bona ga ba dire tšwelopele. Ke eng seo se ba šitišago? Babulamadibogo bao ba nago le phihlelo ba ka kgopelwa gore ba nee thušo mafelong a. Babulamadibogo ba bangwe ba na le bokgoni tabeng ya go hlagolela kgahlego, go thoma dithuto tša Beibele le go lebiša barutwana ba bafsa mokgatlong. Phihlelo ya bona e tla ba e holago lenaneong le le lefsa.

⁷ Na o hwetša e le gore thulaganyo ya gago ga e go dumelele go thekga diboka tša ka mehla tša phuthego tša tirelo ya tšhemo kudu ka mo o bego o ka rata ka gona? Mmulamadibogo a ka kgona go šoma le wena ka dinako tše dingwe ge bagoeledi ba bangwe ba se gona.

⁸ Go Nyakega Tirišano e Botse: Gabedi ka ngwaga, bagolo ba tla dira dithulaganyo bakeng sa bagoeledi bao ba kganyogago thušo ya motho ka noši gore ba kopanele lenaneong la Babulamadibogo ba Thuša ba Bangwe. Ge e ba o dumela go hwetša thušo e bjalo, kopana le mogoeledi wa mmulamadibogo yo a abetšwego go go thuša, dirang thulaganyo e šomago ya tirelo gomme le e kgomarele. Boloka nako e nngwe le e nngwe yeo le kwanego ka yona. Ge le dutše le šoma gotee, elang hloko ditsela tše di atlegago tša go bolela ditaba tše di lokilego. Hlahloba lebaka leo ka lona matseno a itšego e lego a atlegago. Hlahloba ditšhišinyo tšeo mogoeledi wa mmulamadibogo a ka di neago bakeng sa go kaonefatša thero ya gago. Ge o dutše o diriša dilo tšeo o ithutilego tšona, tšwelopele ya gago bodireding e tla bonala go wena gotee le go ba bangwe. (Bona 1 Timotheo 4:15.) Šomang gotee gantši kamoo go ka kgonegago, le kopanela dibopegong ka moka tša bodiredi, go akaretša go neeng bohlatse bjo bo sa rulaganyetšwago eupša le lebiša tlhokomelo sebopegong se itšego seo o nyakago thušo ya motho ka noši go sona.

⁹ Molebeledi wa tirelo o kgahlegela tšwelopele yeo e tlago go dirwa. Nako le nako o tla hlahloba le moswari wa Thuto ya Puku ya Phuthego go bona kamoo o holegago ka gona lenaneong le. Molebeledi wa tikologo le yena o tla go thuša ge a etela phuthego.

¹⁰ Jehofa o nyaka gore batho ba gagwe e be ba tlwaeditšwego le bao ‘ba hlametšwego modiro o mongwe le o mongwe o mobotse.’ (2 Tim. 3:17, NW) Lebelela thulaganyo ya Babulamadibogo ba Thuša ba Bangwe e le tokišetšo e botse ya go thuša bao ba kganyogago go kaonefatša bokgoni bja bona bja go bolela lentšu. Ge e ba e le tokelo ya gago ya go ba le karolo go yona, dira bjalo ka tebogo, boikokobetšo le lethabo.