Lenaneo le Lefsa la Kopano ya Tikologo
Tlhaloso e nngwe ya poifo ke “tlhompho e tseneletšego le poifo ya borapedi, kudu-kudu go Modimo.” Se se hlalosa poifo e swanetšego yeo go bolelwago ka yona ka Mangwalong e le “mathômô a bohlale.” (Ps. 111:10) Ka mo go fapanego, mohuta o mongwe wa poifo o buša lefase la Sathane leo le re dikologilego. Re ka phema bjang maikwelo ao a sa swanelago ge re hlagolela go boifa Jehofa ka tlhompho? Lenaneo le lefsa la kopano ya tikologo bakeng sa ngwaga wa tirelo wa 2002 le ahla-ahla potšišo ye. Sehlogo se re “Boifang Modimo Le rêtê Yêna.” (Kut. 14:7) Re tla kwešiša ditsela tše dintši tšeo ka tšona go boifa Jehofa go re holago re le motho ka o tee ka o tee le ge re le mokgatlo.
Gaešita le ge poifo e ka bolela pelaelo goba go lahlegelwa ke sebete le go dika-dika go lebeletšana le maemo a thata, Beibele e re: “Wa lehlôxônôlô ké e a boifaxo Morêna.” (Ps. 128:1) Lenaneo la kopano le tla re bontšha ka moo re ka lebeletšanago ka katlego le ditlhohlo tša borapedi bja therešo. Re tla bona kamoo re ka thušago ba sa tšwago go kopanela go hlagolela poifo e bjalo e nepagetšego ya go boifa Modimo, yeo ge e le gabotse e tlago ba tutuetša go nyaka go mo hlankela ka pelo ka moka, moya, monagano le matla. (Mar. 12:30) Letšatši la mathomo le phetha ka polelo ya molebeledi wa tikologo e rego: “Batamelang Kgaufsi Kudu le Bao le ba Ratago.” O tla hlalosa kamoo re ka dulago re phafogetše maiteko a Diabolo a go re fapoša go Jehofa, lapa la rena le go banababo rena ba Bakriste.
“Boifa Jehofa, e Sego Batho” ke sehlogo sa tšhiedišano ya dikarolo tše nne letšatšing la bobedi. E tla hlalosa lebaka le mokgwa woo re swanetšego go fenya ka gona poifo le ge e le efe yeo e re šitišago go phetha bodiredi bja rena ka mo go tletšego goba go boloka potego ya rena le letswalo le lebotse sekolong le lefelong la mošomo. Polelo ya phatlalatša e rego “Boifa Modimo Gomme o Boloke Ditaelo tša Gagwe” e theilwe tatelanong ya ditiragalo tšeo di hlalositšwego go Kutollo kgaolo 14. Kopano ya tikologo e tla phetha ka tlhahlo yeo e kgothatšago e rego “Tšwelang Pele le Sepela ka go Boifa Jehofa.”
Sekolo sa Bodiredi sa Pušo ya Modimo, Seboka sa Tirelo sa mohlala, polelo ya kolobetšo le kakaretšo ya Thuto ya Morokami ke dintlha tše kgolo tše di oketšegilego tšeo o ka se nyakego go di foša. Kgopela barutwana ba gago ba Beibele go ba gona le wena. Yo mongwe le yo mongwe yo a ratago go kolobetšwa o swanetše go botša molebeledi yo a okamelago kapejana ka mo go ka kgonegago. Ka moka ga rena re tla nyaka go bontšha poifo ya rena e feletšego ya go boifa Jehofa le go mo godiša ka go se foše karolo le ge e le efe ya lenaneo le le lebotse!